གཟའ་ཉི་མའི་ཉིན་གཞོན་ལྷན་གྱིས་དཔའ་པོ་ཐུབ་བསྟན་དངོས་གྲུབ་མཆོག་ལ་མྱ་ངན་རྗེས་དྲན་མཚོན་ཆེད། ཞོགས་པར་ལྷ་རྒྱལ་རིར་བསང་གསོལ་སྨོན་ལམ་དང་། དགོང་མོར་ངྷ་ས་མེག་གྷན་དུ་མར་མེ་ཁྲོམ་སྐོར་གནང་འདུག
ཁ་སང་ཕྱི་ཚེས་ ༢༩ ཉིན་དབུས་བོད་ཀྱི་གཞོན་ནུ་ལྷན་ཚོགས་ཀྱིས་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་ལགས་སྐུ་གཤེགས་ཏེ། ལོ་ངོ་ ༡༤ འཁོར་བའི་དུས་དྲན་སྲུང་གཙི་བྱས་ཡོད་པ་ལྟར། ཞོགས་པའི་ཆུ་ཚོད་༧ པའི་སྟེང་ངྷ་སའི་ལྷ་རྒྱལ་རིའི་མཆོད་རྟེན་མདུན་ཐང་དུ། བཀའ་ཟུར་བསོད་ནམས་སྟོབས་རྒྱལ་མཆོག་གིས་གཙོས་གཞོན་ནུའི་དབུས་རྒྱུན་ཟུར་པ་དང་། ཚོགས་པ་ཁག་གི་སྐུ་ཚབ། སེར་སྐྱ་མང་ཚོགས་བཅས་འདུ་འཛོམས་ཐོག་བསང་གསོལ་སྨོན་ལམ་གསུངས་ཡོད་པ་དང་། དགོང་མོའི་ཆུ་ཚོད་ ༦།༣༠ སྟེང་ངྷ་ས་མེག་གྷན་ཁྲོམ་གཞུང་དུ་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་ཀྱིས་སྣེ་ཁྲིད་འོག ངྷ་སའི་སེར་སྐྱ་མི་མང་དང་ཕྱི་རྒྱལ་བ་བཅས་ཁྱོན་མི་ ༣༠༠ ཙམ་གྱིས་མར་མེ་ཁྲོམ་སྐོར་ཞིག་གནང་སོང་ལ། མཇུག་སྡོམ་མཛད་སྒོའི་སྟེང་གཞོན་ནུའི་ཚོགས་གཙོ་ལགས་ཀྱིས་དུས་དྲན་དང་འབྲེལ་བའི་གཏམ་བཤད་སྤེལ་ཡོད།
མཇུག་སྡོམ་མཛད་སྒོའི་ཐོག་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་ཀྱིས། རྒྱལ་གཅེས་དཔའ་བོའི་ཉིན་མོ་འདི་ནི། ༡༩༩༨ ལོར་གཞོན་ལྷན་གྱི་གོ་སྒྲིག་ལྟར་རྒྱལ་ས་ལྡི་ལིར་མ་ཤི་བར་གྱི་ཟས་བཅད་ངོ་རྒོལ་གནང་སྐབས། དཔའ་བོ་ཐུབ་བསྟན་དངོས་གྲུབ་ལགས་ཀྱིས་ལོ་དེའི་ཕྱི་ཟླ་ ༤ ཚེས་ ༢༣ ཉིན་བོད་བསྟན་སྲིད་མི་རིགས་ཆེད་རང་ལུས་མེར་བསྲེགས་བཏང་སྟེ། ཕྱི་ཚེས་ ༢༩ ཉིན་འདས་གྲོངས་སུ་ཕྱིན་རྗེས་གཞོན་ལྷན་གྱིས་ཉིན་མོ་དེ་བོད་ཀྱི་དཔའ་བོའི་ཉིན་མོར་གཏན་ཁེལ་བྱུང་ཡོད་པ་ངོ་སྤྲོད་དང་། དེ་བཞིན། ༢༠༠༩ ལོ་ནས་བཟུང་སྟེ་ད་ལྟའི་བར་བོད་རྔ་པ་དང་རྟའུ། དཀར་མཛེས། ཆབ་མདོ། ཁྲི་འདུ། ཐེམ་ཆེན། དར་ལག རྨ་ཆུ། རེབ་གོང་། མགོ་ལོག་བཅས་སུ་རྒྱལ་གཅེས་དཔའ་བོ་ ༣༥ ཙམ་གྱིས་རང་ལུས་མེར་བསྲེགས་བཏང་ཡོད་པའི་ཁྲོད། མི་ ༢༦ འདས་གྲོངས་དང་གཞན་མི་ ༩ གར་སོང་ཆ་མེད་དུ་གྱུར་ཡོད་སྟབས། གཞོན་ལྷན་གྱིས་རྒྱལ་གཅེས་དཔའ་བོ་དེ་དག་ལ་གུས་འདུད་ཞུ་རྒྱུ་དང་། ད་ལོའི་རྒྱ་ནག་ལོ་གསར་དུས་ཆེན་སྐབས། རྒྱ་ནག་དྲག་ཆས་ཉེན་རྟོག་པས་བོད་མི་ཞི་རྒོལ་བའི་ཁྲོད་གང་བྱུང་མེ་མདའ་བརྒྱབ་སྟེ། བྲག་མགོ་རྫོང་དུ་མི་ ༤ དང་གསེར་རྟ་རྫོང་དུ་མི་ ༢། ཛམ་ཐང་རྫོང་དུ་མི་ ༡། མགོ་ལོག་པདྨ་རྫོང་དུ་མི་ ༡ བཅས་དམར་གསོད་བཏང་བར་རྗེས་དྲན་དང་། རྒྱ་གཞུང་གི་བྱ་སྤྱོད་དེའི་རིགས་ལ་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་ཚུལ་བརྗོད་འདུག
བོད་ཀྱི་དཔའ་བོའི་ཉིན་མོར་གཞོན་ལྷན་གྱིས་གསལ་བསྒྲགས་ཤིག་སྤེལ་ཏེ། ཟླ་སྔོན་མའི་ནང་མདོ་སྨད་རྨ་ལྷོ་དང་མཚོ་ལྷོ་ཁུལ་དུ་བོད་རིཊ་སློབ་ཕྲུག་ཚོས། བོད་མི་རིགས་ལ་སྐད་ཡིག་རང་དབང་དགོས་ཞེས་རྒྱ་གཞུང་ལ་ངོ་རྒོལ་བྱས་སྐབས། རྒྱ་ནག་དམག་མིས་གང་བྱུང་འཛིན་བཟུང་དང་། སློབ་གྲྭ་སྒོ་བརྒྱབ་སྟེ་གནས་སྟངས་ཧ་ཅང་ཛ་དྲག་ཆགས་ཡོད་སྟབས། གཞོན་ལྷན་གྱིས་བོད་ཀྱི་སོན་རྩ་རྣམས་ལ་ཡི་རངས་བསྔགས་བརྗོད་དང་། བཙན་བྱོལ་བོད་རིགས་གཞོན་སྐྱེས་ཚོས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་དགོས་པར་ནན་སྐུལ། དེ་བཞིན། གཞོན་ལྷན་གྱིས་མང་ཚོགས་ལ་ད་ལོའི་ལོ་གསར་མི་གཏོང་རྒྱུར་ཡོངས་ཁྱབ་འབོད་སྐུལ་ཞུས་པ་ལྟར། བོད་རིགས་མང་ཚོགས་ཀྱིས་ལོ་གསར་གྱི་དགའ་སྟོན་ལ་མ་རོལ་པ་དང་། བོད་རྒྱལ་ཁབ་འཛུགས་བསྐྲུན་གྱི་མ་དངུལ་བསྡུ་རུབ་ནང་མཉམ་ཞུགས་གནང་བའི་ཐད་ཐུགས་རྗེ་ཆེ་ཞུས་འདུག
གསལ་བསྒྲགས་དེའི་ནང་། “ ད་ལོའི་ལོ་གསར་ཚེས་ ༡ ཉིན་གཞོན་ལྷན་གྱི་སྣེ་ཁྲིད་འོག ཨ་རིའི་ནེའུ་ཡོག་གྲོང་ཁྱེར་གྱི་མཉམ་འབྲེལ་རྒྱལ་ཚོགས་ལས་ཁུངས་མདུན་དུ། ཤིང་བཟའ་རིན་པོ་ཆེ་དང་རྡོ་རྗེ་རྒྱལ་པོ། ཡེ་ཤེས་བསྟན་འཛིན་གསུམ་གྱིས་དུས་ཡུན་ངེས་མེད་ཀྱི་ཟས་བཅད་ངོ་རྒོལ་གནང་སྐབས། རྒྱལ་ཚོགས་སྐུ་ཚབ་ཐེངས་གཉིས་ཆེད་ཕེབས་ཀྱིས་དགོས་འདུན་ཁག་ལ་ཁས་ལེན་གནང་ཡོད་སྟབས། ལས་འགུལ་ནང་ཞུགས་གནང་མཁན་རྣམས་ལ་ཐུགས་རྗེ་ཆེ་ཞུ་རྒྱུ་ཡིན། རྒྱལ་ཚོགས་སྤྱི་ཁྱབ་དྲུང་ཆེ་གཙོས་རྒྱལ་ཚོགས་ཀྱི་འབྲེལ་ཡོད་ལས་བྱེད་དང་། དྲང་བདེན་དང་རང་དབང་གཙིགས་ཆེར་འཛིན་པའི་རྒྱལ་སྤྱིའི་དབུ་ཁྲིད་ཚོས། བོད་མིའི་དྲང་བདེན་གྱི་འཐབ་རྩོད་ལ་གདུང་སེམས་མཉམ་སྐྱེད་དང་། ཁ་ཡོད་ལག་ཡོད་ཐོག་རྒྱབ་སྐྱོར་གནང་རྒྱུའི་འབོད་སྐུལ་ནན་མོ་ཞུ་རྒྱུ་ཡིན ” ཞེས་འཁོད་འདུག
གསར་འགོད་པས་ཚོགས་གཙོ་ལགས་སུ་གཞོན་ལྷན་གྱིས་དཔའ་བོ་ཐུབ་བསྟན་དངོས་གྲུབ་མཆོག་ལ་དྲན་རྟེན་རྡོ་རིང་བཞེངས་ཡོད་པ་ལྟར། མ་འོངས་པར་བོད་ནང་མེར་བསྲེགས་གཏོང་མཁན་ཚོར་དྲན་རྟེན་རྡོ་རིང་བཞེང་འཆར་ཡོད་མེད་དྲིས་པར། “བོད་ནང་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་མང་དག་ཅིག་བྱུང་ཡོད་ལ། མ་འོངས་པའི་གནས་སྟངས་གང་འདྲ་ཆགས་མིན་ཞུ་ཁག་པོ་རེད། གཞོན་ནུ་ལྷན་ཚོགས་ཀྱིས་དཔའ་བོ་དཔའ་མོ་དེ་ཚོའི་ཆེད་དྲན་རྟེན་རྡོ་རིང་བཞེང་དགོས་ན་འདྲ། དེ་མ་ཡིན་པའི་ཕྱག་ལས་གང་འདྲ་ཞིག་གནང་དགོས་རུང་། རིམ་པས་གྲོས་བསྡུར་བྱས་ཏེ་ཐག་གཅོད་བྱ་རྒྱུ་ཡིན་ ” ཞེས་བརྗོད་སོང་།
གཞོན་ནུ་ལྷན་ཚོགས་ཀྱིས་རྒྱ་ནག་རྒྱལ་དར་མེར་བསྲེགས་གཏོང་གི་ཡོད་པའི་ཆ་ནས། ད་ཆར་ཚེ་བརྟན་རྡོ་རྗེ་ནང་མི་གསུམ་གྱིས་རྒྱ་ནག་རྒྱལ་དར་འཁྱེར་ཏེ་བོད་སྐྱོད་གོམ་བགྲོད་གནང་བཞིན་པ་དེར་ལྟ་ཚུལ་ཅི་ཡོད་དྲིས་སྐབས། “ གནས་སྟངས་དེའི་ཐད་ད་ལྟའི་ཆར་གཞོན་ནུ་ལྷན་ཚོགས་ཀྱི་སྒྲིག་འཛུགས་ངོས་ནས་ཐག་གཅོད་གང་ཡང་བྱུང་མེད། རྒྱ་མིའི་རྒྱལ་དར་འཁྱེར་བཞིན་པའི་གནས་ཚུལ་དེ་ལོ་རྒྱུས་ཐོག་ཐེངས་དང་པོ་ཆགས་འགྲོ་ཡི་ཡོད་པ་རེད། གཞོན་ལྷན་སྒྲིག་འཛུགས་ཀྱིས་གནས་སྟངས་དེའི་ཐོག་གྲོས་སྡུར་ཐག་གཅོད་བྱས་རྗེས་མང་ཚོགས་ལ་ལངས་ཕྱོགས་གསལ་པོ་ཞིག་སྟོན་རྒྱུ་ཡིན ” ཞེས་བརྗོད་བྱུང་།
དཔའ་པོ་ཐུབ་བསྟན་དངོས་གྲུབ་ལགས་ནི་རྒྱ་གཞུང་ལ་ངོ་རྒོལ་མཚོན་ཆེད་རང་ལུས་མེར་བསྲེགས་གཏོང་མཁན་བོད་མི་དང་པོ་དེ་ཡིན་ལ། ད་བར་བོད་ཕྱི་ནང་གཉིས་སུ་བོད་མི་ ༤༠ ལྷག་གིས་རང་ལུས་མེར་བསྲེགས་བཏང་ཡོད།
གསར་འགོད་པ། དཔལ་ལྡན།
༄༅། །གལ་ཏེ་བོདད་ཀྱི་དཔའ་བོ་དཔའ་མོ་རྣམ་པའི་དྲན་བརྟན་གྱི་རྡོ་རིང་ཞིག་བོད་ཀྱི་གཞོན་ནུ་ལྷན་ཚོགས་ཀྱིས་གསར་བཞེངས་གནང་བརྟེན་འཁེལ་བ་བྱུང་ན་གུས་པ་ངག་དབང་ནོར་བུ་ནང་མི་བཟུང་ནས་ཞེལ་འདེབས་ཨ་སྒོར་ ༥༠༠ ལྔ་བརྒྱ་ཐམས་པ་འབུལ་རྒྱུ་ཡིན།
༥༩ལོ་ནས་ད་བར་བོད་ཁྱོན་ཡོངས་ཀྱི་དཔའ་བོ་དང་དཔའ་མོར་ཆེད་རྡོ་རིང་ཞིག་བཙུག་ན་ལེགས།
དཔའ་བོའི་ཞལ་ཆེམས་གསལ་བཤད་གནང་བ་ཐུགས་རྗེ་ཆེ། ད་བར་གྱི་དཔའ་བོ་དང་ དཔའ་མོ་ཡོངས་ལ་རང་ནུས་གང་ཐུབ་ཀྱིས་བདེན་དོན་གསལ་བཤད་འཛམ་གླིང་གི་མི་གང་ལའང་ཞུ་དང་ ཞུ་བཞིན་ཡོད། ཁོང་རྣམས་ལ་སྙིང་དབུས་ནས་རྗེས་སུ་ཡིད་རང་ཞུ།། བོད་མི། མི་རེ་ངོ་རེ་རྒྱལ་གཅེས་པ་ཡོངས་ཀྱིས་སྙིང་སྟོབས་དེ་འཛམ་གླིང་ལ་གསལ་བཤད་གནང་རོགས་ཞེས་འབོད་སྒྲ་ཡང་ཞུ་རྒྱུ་ཡིན།།
རྡོ་རིང་བཞེངས་ཞེས་གནས་སྐབས་ཀྱི་ཚོར་བ་ཙམ་གྱི་དབང་དུ་བཞག་ན་མཐའ་འཁྱོལ་ཁག་པོ་མེད་འགྲོ་་་་་་བོད་དོན་ཆེད་རང་སྲོག་བཏང་ཚད་ལ་རྡོ་རིང་རེ་བཞེངས་དགོས་ན་ང་ཚོ་རང་ས་ཤོར་བའི་སྐྱབས་བཅོལ་བ་ཞིག་ཡིན་པས་མུ་མཐུད་འདི་ལྟར་བྱས་ན་དཀའ་ངལ་རེ་འཕྲད་མི་ཡོང་ངམ་བསམ་གྱི་འདུག་་་་་རྒྱལ་ཁབ་ཅིག་ཡོད་ན་ཡིན་དང་ཡིན་་་་་མེ་སྲེག་བྱེད་མཁན་ད་དུང་འབྱུང་ངེས་ཡིན་པས་རེ་རེ་བཞིན་འདི་ལྟར་རྡོ་རིང་རེ་བཞེངས་སའི་ས་ཆ་ཞིག་ཁག་པོ་མིན་འགྲོ་་་་བསམ་ཚུལ་ཙམ་ཡིན་
དཔའ་བོའི་དྲན་རྟེན་བཞེངས་ཐུབ་ན་དེ་ནི་དགའ་འོས་པའི་གནད་དོན་ཞིག་རེད། ཡག་པོ་འདུག
ཡིན་ན་ཡང་དཔའ་པོའི་རྡོ་རིང་ལ་ཁ་གཡར་ནས་དོན་གཞན་ཞིག་མི་སྒྲུབ་པའི་སྐྱབས་འཇུག་ཞུ།
བོད་རྔ་པ་དང་རྟའུ། དཀར་མཛེས། ཆབ་མདོ། ཁྲི་འདུ། ཐེམ་ཆེན། དར་ལག རྨ་ཆུ། རེབ་གོང་། མགོ་ལོག་མདོར་ན་བོད་མདོ་དབུས་ཁམས་གསུམ་དུ་རྒྱལ་གཅེས་དཔའ་བོ་དཔའ་མོ ༣༥ ཙམ་གྱིས་རང་ལུས་མེར་བསྲེགས་བཏང་ཚར་པ་རེད།བོད་གཞོན་ནུ་ལྷན་ཚོགས་ཀྱིས་ཕྱི་དྲིལ་ལས་ཁུངས་ལས་ཁྱབ་བསྒྲགས་ཤུགས་ཆེན་པོ་བྱས་དང་བྱེད་མུས་རེད།ཁ་ཡོད་ལག་ཡོད་ཀྱི་ལས་འགུལ་སྤེལ་བཞིན་པ་དེ་ལ་སྙིང་ནས་རྗེས་སུ་ཡིད་རང་དང་རྒྱབ་སྐྱོར་ཡོད་།
ཁོང་གི་གཤམ་འཁོད་ཞལ་ཆེམས་འདི་དཔའ་བོ་ཁོང་གིས་མི་ཡུལ་ལ་བཞག་པའི་རྡོ་རིང་རེད། རྡོ་རིང་འདི་བོད་མི་ཚོའི་སེམས་ན་སེམས་དང་ལྡན་པའི་ནུབ་མེད་ཀྱི་རྡོ་རིང་ཡིན། རྡོ་རིང་འདི་ལ་ད་དུང་སེམས་ཀྱི་འདྲ་གཟུགས་ཤིག་བཞེངས་དགོས་ན། དེ་གཞོན་ལྷན་ལ་འོས་བབ་ཅིག་གང་ན་ཡོད་དམ། དེ་བོད་གཞུང་མང་གིས་བཞེངས་ན་ཞལ་ཆེམས་དང་མིང་དོན་མཚུངས་བ་ཞིག་ཡོང་གི་རེད།
གཅིག འཛམ་གླིང་ཞིེ་བདེ་བདེ་དཔོན་༧སྤྱི་ནོར་༧གོང་ས་སྐྱབས་མགོན་ཆེན་པོ་སྐུ་ཚེ་ཁྲི་ཕྲག་ནས་ཁྲི་ཕྲག་བརྟན་པར་ཤོག བོད་ལ་གདན་འདྲེན་ཞུ་དགོས། ཤ་རུས་གདོང་རྒྱུད་གཅིག་པའི་སྤུན་ཟླ་ཚོ་མཉམ་འཛོམས་བྱས་ནས། བོད་རྒྱལ་ཁབ་ཆེན་པོའི་རྒྱལ་གླུ་ཕོ་བྲང་པོ་ཏཱ་ལའི་མདུན་དུ་འབྲུག་སྒྲ་གྲགས་པ་ནང་བཞིན་ཡོང་བའི་སྨོན་ལམ་དང་ཡིད་ཆེས་བརྟན་པོ་ཡོད།
གཉིས། སྤུན་ཟླ་ཚོ། མ་འོངས་བདེ་བ་དང་མདུན་ལམ་བསམས་ན་ལ་རྒྱ་དགོས། ལ་རྒྱ་ནི་མི་རིགས་ཤིག་གི་བློ་སྲོག་ཡིན། ད་དུང་དྲང་བདེན་འཚོལ་བའི་སྤོབས་པ་ཡིན། མ་འོངས་བདེ་བའི་སྣ་འདྲེན་ཡང་ཡིན། སྤུན་ཟླ་ཚོ། འཛམ་གླིང་མི་མང་འདྲ་མཉམ་འཚོལ་བའི་བདེ་སྐྱིད་བསམ་ན། ལ་རྒྱ་ཟེར་བའི་ཚིག་འདི་སེམས་ལ་བཅངས་དགོས། བྱ་བ་ཆེ་ཆུང་སོགས་ལ་འབད་བརྩོན་གནང་དགོས། སྤྱིར་ལ་རྒྱ་ནི་བདེན་རྫུན་འབྱེད་པའི་ཤེས་རབ་ཡིན།
གསུམ། རང་དབང་ནི་སྲོག་ལྡན་ཡོངས་ཀྱི་བདེ་སྐྱིད་གཞི་མ་ཡིན། རང་དབང་མེད་ན་རླུང་ནང་མར་མེ་འབར་བ་ནང་བཞིན་ཡིན། བོད་མི་ས་ཡ་དྲུག་གི་ཁ་ཕྱོགས་འདྲ་བོ། ཆོལ་ཁ་གསུམ་གྱི་སྤུན་ཟླ་ཚོས་ནུས་ཤུགས་གཅིག་ཏུ་སྒྲིལ་ན་འབྲས་བུ་ཐོབ་པ་ང་ཚོས་ཤེས་གསལ་རེད། སེམས་ཤུགས་མ་ཆགས་རོགས།
བཞི། གུས་པས་བརྗོད་པ་ནི་བོད་མི་ས་ཡ་དྲུག་གི་གནད་དོན་ཞིག་ཡིན། མི་རིགས་ཀྱི་འཐབ་རྩོད་སྐབས་དགོས་པ་ནི། དཔལ་འབྱོར་ཡོད་ན་བེད་སྤྱོད་གཏང་བའི་དུས་ཚོད་རེད། ཡོན་ཏན་ཡོད་ན་ནུས་པ་སྒྲིལ་དགོས་པའི་ཛ་དྲག་གི་དུས་ཚོད་ལ་སླེབས་པ། སྲོག་ཡོད་ན་རང་སྲོག་བློས་གཏོང་བའི་ཉིན་མོ་རེད་དྲན་གྱི་ཡོད། དུས་རབས་ཉི་ཤུ་རྩ་གཅིག་ནང་ལ་མི་ལུས་རིན་ཆེན་མེ་ལ་ཕུལ་བ་ནི། འཛམ་གླིང་མི་མང་ལ་བོད་མི་ས་ཡ་དྲུག་གི་སྡུག་བསྔལ་དེ་འགྲོ་བ་མིའི་ཐོབ་ཐང་འདྲ་མཉམ་མེད་པའི་རྟགས་མཚན་ཡིན། ཤ་ཚ་སྙིང་རྗེ་ཡོད་ན་ཉམས་ཆུང་བོད་མི་ལ་གཟིགས་རོགས་གནང་།
ལྔ། ང་རང་ཚོའི་ཕ་མའི་ཆོས། རིགས་པའི་གཞུང་ལུགས་དང་སྐད་ཡིག་སོགས་ལ་རང་དབང་དགོས། འཛམ་གླིང་མི་མང་ཐོབ་ཐང་འདྲ་མཉམ་དགོས། འཛམ་གླིང་མི་མང་ང་ཚོའི་རྒྱབ་ཏུ་ལངས་ཤོག བོད་ཀྱི་བདག་པོ་བོད་མི་ཡིན། བོད་རྒྱལ་ལོ།
རྟའུ་འཇམ་དཔལ་ཡེ་ཤེས་ནས་ཕུལ། ༢༠༡༢། ༣། ༡༦། ཉིན།
སྤྱི་ལོ་ ༡༩༨༧ ལོར་ཕ་རུས་དཀར་པོ་སྙིང་ལ་བཅངས་ཏེ་རིགས་ཞེན་ལང་ཚོ་རྒྱས་པའི་བོད་ཀྱི་རྒྱལ་ས་ལྷ་སའི་གངས་ཕྲུག་ཚོས་དབུ་ཁྲིད་པའི་བོད་འབངས་ཡོངས་ཀྱིས་ བཙན་རྒོལ་རྒྱལ་སྐྱོབ་ཞི་བའི་སྐད་འབོད་ཀྱི་ལས་འགུལ་འབྱུང་རྐྱེན་དང་བྱུང་རིམ།༼སྐབས་དེ་དུས་གྲྭ་བཙུན་གཙོ་བོར་འགྱུར་བའི་རང་རིགས་སྤུན་ཟླ་མང་པོར་གསད་རྨས་ཚབ་ཆེན་བྱུང་ཡོད།༽སྤྱི་ལོ་ ༡༩༩༣ ལོར་བཙུན་མ་བཅུ་བཞིས་གདུགས་རྩུབ་ཀྱི་ཁྲག་དྲི་བྲོ་ཞིང་ཐ་ན་དྲང་གཏམ་ཚིགས་གཅིག་ཀྱང་ཤོས་ས་མེད་པའི་ཆེས་བཙན་གནོན་གྱི་བཙོན་ཁང་ར་བའི་ ནང་ནས་བོད་ལ་རང་དབང་དགོས། ༸གོང་ས་མཆོག་སྐུ་ཚེ་བརྟན་པར་ཤོག རྒྱ་དམར་ཀླ་ཀློའི་གདུག་རྩུབ་ཇི་ལྟར་ཆེ་ན་ཡང་བོད་མིའི་རང་བཙན་སེམས་ཤུགས་ནམ་ཡང་ འགྱུར་བ་མེད་ཅེས་སྐྱོ་གདུང་གི་སྨྲེ་ངག་ཞི་བའི་དབྱངས་སུ་བཀུག་སྟེ་སྒྲ་འཇུག་བྱས་ནས་ཕྱིར་བཀྲམས་པ། ༼དེ་ཁོངས་བཙུན་མར་རྡུང་རྡེག་ཚ་སྣན་བཏང་སྟེ་ལོ་ངོ་གསུམ་ནས་དགུ་བར ་ལོ་ཚད་སྤར་ཡོད། ཕུན་ཚོགས་ཉི་སྒྲོན་ལགས་དང་ངག་དབང་གསང་སྒྲོན་གཉིས་ལ་ལོ་ཚད་མཐོ་ཤོས་སྤར་ཡོད།༽ སྤྱི་ལོ་ ༡༩༩༨ ལོའི་ནང་ལ་སྡུག་རྩུབ་དང་། གཉའ་གནོན་གྱི་མེ་ལྕེ་འབར་ བཞིན་པའི་སྐྱི་གཡའ་བ་ཡི་གྲྭ་བཞི་བཙོན་ཁང་ནང་དུ་རྒྱ་གཅེས་དཔའ་བོ་དང་དཔའ་མོས་རྒྱ་དར་མཁའ་ལ་འཕྱར་བའི་སྐབས་འ་ཆད་འུ་ཐུག་གིས་སླར་ཡང་རྒྱ་དམར་གྱི་དྲང་ བདེན་པའི་ཁྲིམས་འཁྱོགས་དང་། ཡ་ང་བྲལ་བའི་གདུག་རྩུབ་ལ་ཞི་བའི་ངོ་རྒོལ་གནང་བ། ༼སྐབས་དེ་དུས་ཤ་ཁྲག་རུས་གསུམ་ལ་རྔམ་པའི་གུང་ཁྲན་ཏང་གིས་ཤན་པ་ལག་དམར་བས།ལག་ཏུ་ མཚོན་ཆ་ཁབ་ཙམ་ཡང་ཐོགས་མེད་པའི་ཞི་བའི་ངོ་རྒོལ་བའི་སྟེང་བྱ་རྒོད་ཤ་ལ་ཆགས་པ་ཇི་བཞིན་མཆོངས་ཏེ་དེང་དུས་མཚོན་ཆས་བེད་དཔྱོད་པ། སྐམ་རྡུང་གཏོང་བ།བཙོན་པ་ཡོངས་རྗོགས་ལ་རྡུང་རྡེག་དྲག་པོ་ བཏང་། ཕལ་མོ་ཆེ་ནད་རོ་གཅོང་ཅན་བཟོས་པ་མ་ཟད་གྲྭ་བཙུན་བཅུ་ལྷག་དམར་གསོར་བཏང་ཡོད།༽ སྟོང་ལོ་གསར་པ་སྤྱི་ལོ་ ༢༠༠༨ ལོར་བོད་ཀྱི་རྒྱལ་ས་ལྷ་ས་ནས་རྒྱ་དམར་གྱི་དྲང་བདེན་ མིན་པའི་སྲིད་ཇུས་ལ་ཞི་བའི་ངོ་རྒོལ་མགོ་བཙུགས་ཏེ་བོད་ཆོལ་གསུལ་ཁྱོན་ལ་དབྱར་གྱི་ཆུ་ཆེན་བརྡོལ་བ་ལྟར་གང་སར་ཁྱབ། ༼དྲག་སྤྱོད་དང་བཙན་གནོན་ལ་གོམས་པའི་རྒྱ་དམག་ གིས།ཞི་བའི་མི་སེར་རྣམས་ལ་མུ་མཐུད་དེ་དེང་དུས་ཀྱི་མེ་མདའ་དང་འབར་རྫས་བེད་སྤྱོད་གཏོང་བ། དུག་རླངས་གཏོར་བ། ལྐོག་གསོད་གཏོང་བ། གསོན་པོར་མེར་སྲེག་པ། རྐང་ལག་གཅོག་པ།ཐེམ་རེ་མི་རེའི་ མདུན་ལ་དམག་དཔུང་གིས་བཙན་ཤེད་ཆེན་པོས་བཀག་སྟེ་ནང་དུ་ལྟོགས་ཤི་སོགས་བཏང་ཡོད།༽ སྤྱི་ལོ་ ༢༠༡༡ ལོར་ཡང་བོད་ཤར་ཕྱོགས་ཀྱི་རྒྱལ་གཅེས་དཔའ་བོ་དང་དཔའ་མོ་དག་གིས་ཆེས་རྙེད་པར་དཀའ་བའི་དལ་བརྒྱད་འབྱོར་བཅུ་ཚང་བའི་རྟེན་བཟང་འདི་ཉིད་བར་མདོའི་འཕྲང་དུ་ལུས་པའི་མི་རིགས་འདིའི་རྣམ་ཤེས་ཀྱི་རྒྱུན་སྐྱོབ་རྒྱུའི་ཆེད་མཆོད་མེར་བསྒྲོན་ཡོད།༼རྒྱལ་གཅེས་དཔའ་བོ་ ༣༥ ཙམ་གྱིས་རང་ལུས་མེར་བསྲེགས་བཏང་ཡོད་པའི་ཁྲོད། མི་ ༢༦ འདས་གྲོངས་དང་གཞན་མི་ ༩ གར་སོང་ཆ་མེད་དུ་གྱུར་ཡོད།༽ང་ཚོས་རྒྱལ་གཅེས་དཔའ་བོ་དང་དཔའ་མོ་དེ་དག་གི་ལྷག་བསམ་དང། སྙིང་སྟོབས། ལ་རྒྱ། རང་ཉིད་ཀྱི་ཡོད་ཚད་ བློས་གཏོང་ཕོད་པའི་རྒྱལ་གཅེས་ཀྱི་བྱ་བ་བསྔགས་བརྗོད་དང་། རྗེས་སུ་ཡིད་རངས་དང་རབ་བྱུང་ན་ཁོང་ཚོའི་མཛད་རྗེས་འཁོད་པའི་རྡོ་རིང་ཞིག་བཞེངས་ཐུབ་ན་དགེ་མཚན་ཆེ།།