ཁྲིན་ཀུང་ཁྲིན་ཨ་རིའི་གཞུང་ཚབ་ཁང་དུ་ཡིབ་ཡོད་པའི་ཚོད་དཔག་བྱེད་བཞིན་འདུག

ཉེ་ཆར་ཁྲིམས་རྩོད་པ་ཁྲིན་ཀུང་ཁྲིན་རྒྱ་གཞུང་གི་བཀག་སྡོམ་འོག་བྲོས་ཐར་བྱུང་རྗེས། པེ་ཅིན་གྱི་ཨ་རིའི་གཞུང་ཚབ་ཁང་དུ་ཡིབ་སྡོད་བྱས་ཡོད་པའི་ཚོད་དཔག་དང་། ཨ་རྒྱ་གཉིས་བར་འགྲོ་བ་མིའི་ཐོབ་ཐང་གནད་དོན་ཐད་རྣོ་ངར་ལྡན་པའི་འཐབ་རྩོད་ཅིག་སླེབས་སྲིད་པའི་གླེང་སློང་ཤུགས་ཆེན་བྱུང་ཡོད།

ཟླ་འདིའི་ཕྱི་ཚེས་ ༢༢ ཉིན་ཁྲིམས་རྩོད་པ་ཁྲིན་ཀུང་ཁྲིན་རྒྱ་གཞུང་གི་བཀག་སྡོམ་འོག་བྲོས་ཐར་གྱིས་བདེ་འཇགས་ཀྱི་ས་གནས་ཤིག་ཏུ་ཡིབ་སྡོད་བྱས་ཡོད་འདུག འདས་པའི་ཟླ་ ༡༩ ལྷག་རིང་རྒྱ་གཞུང་གི་བཀག་སྡོམ་མནར་གཅོད་འོག་ཚུད་ཅིང་མིག་ལོང་པ་ཡིན་པའི་ཁྲིམས་རྩོད་པ་ཁྲིན་ཀུང་ཁྲིན་བྲོས་བྱོལ་དུ་ཕྱིན་པའི་གནས་ཚུལ་དེར། རྒྱལ་སྤྱིའི་སྤྱི་ཚོགས་དང་འགྲོ་བ་མིའི་ཐོབ་ཐང་ཚོགས་སྡེ་ཁག་གིས་དོ་སྣང་ཤུགས་ཆེན་པོ་བྱེད་བཞིན་ཡོད་ཀྱང་། ད་ལྟའི་ཆར་ཁོང་གང་དུ་ཡོད་མེད་ཀྱི་གནས་སྟངས་ཐད་ཁུངས་འཕེར་ཁ་གསལ་གྱི་གནས་ཚུལ་གང་ཡང་རག་མེད་པ་རེད། ཁྲིན་ཀུང་ཁྲིན་བྲོས་བྱོལ་ཕྱིན་ཤུལ་དུ་རྒྱ་གཞུང་གིས་ཁོང་གི་ནང་མི་ཉེ་འབྲེལ་དག་དང་། ཁོའི་བྲོས་བྱོལ་ཐད་རོགས་རམ་བྱེད་མཁན་ཧི་ཕའེ་རོང་དང་ཀྲུའུ་ཀྲུན། ཁྲིན་ཡུས། ཧུའུ་ཀཱ་སོགས་འབྲེལ་ཡོད་མི་སྣ་མང་པོར་བཀག་ཉར་འདྲི་གཅོད་བྱེད་མགོ་བརྩམས་ཡོད་པ་དང་། ‘ཁྲིན་ཀུང་ཁྲིན’ དང་ ‘ལོང་བ’ སོགས་ཀྱི་ཐ་སྙད་དག་དྲ་ལམ་ནས་འཚོལ་བཤེར་མི་ཐུབ་པ་བཟོས་ཏེ། རྒྱ་ནང་གི་གནས་འཕྲིན་དྲ་རྒྱ་ཁག་ལའང་བཀག་སྡོམ་ནན་མོ་བྱས་ཡོད་པ་རེད།

ཁྲིན་ཀུང་ཁྲིན་ད་ལྟའི་ཆར་གང་དུ་ཡུབ་སྡོད་བྱས་ཡོད་མེད་ཐད། བརྒྱུད་ལམ་ཁག་ཏུ་ཁོང་ཨ་རིའི་ UA898 རྟགས་ཅན་གྱི་གནམ་གྲུར་བསྡད་དེ་ཝ་ཤིན་ཊོན་དུ་སླེབས་ཡོད་ཚུལ་དང་། པེ་ཅིན་གྱི་ཨ་རིའི་གཞུང་ཚབ་ཁང་དང་ཡེ་ཤུས་ཆོས་ཁང་གང་རུང་ཞིག་ཏུ་ཡོད་སྐོར་སོགས་གླེང་སློང་འདྲ་མིན་བྱུང་ཡོད་པ་རེད། དབྱིན་ཇིའི་དུས་བབ་གསར་ཤོག་(UK’s The Times newspaper )གིས་གནས་ཚུལ་སྤེལ་དོན་ལྟར་ན། ཟླ་འདིའི་ཕྱི་ཚེས་ ༢༢ ཉིན་ཁྲིན་ཀུང་ཁྲིན་གསང་སྟབས་ཀྱིས་སོ་སོའི་ཁྱིམ་གྱི་སྒོ་རའི་རྩིག་གྱང་ལས་ཕར་ལྡིང་སྟེ།  ལམ་བར་དུ་ས་ལ་འགྱེལ་ཞོར་རང་ཉིད་གཅིག་པུ་ཆུ་ཚོད་གཅིག་ལྷག་རིང་བསྐྱོད་མཐར།  ཁོའི་གྲོགས་མོ་ཧི་ཕའེ་རཱོང་དང་ཀྲིན་ཀྲུའུ་གཉིས་ལ་འབྲེལ་བ་གནང་ཐུབ་པ་བྱུང་ཞིང་།   ཧི་ཕའེ་རོང་གིས་གྲོགས་པོ་གཞན་དག་གི་རམ་འདེགས་འོག་ཁྲིན་ཀུང་ཁྲིན་རླངས་འཁོར་ནང་བཞག་སྟེ་བདེ་འཇགས་ཀྱི་ས་ཆ་ཞིག་ལ་བསྐྱལ་ཡོད་འདུག 

ཁྲིན་ཀུང་ཁྲིན་རྒྱ་གཞུང་གི་བཀག་སྡོམ་འོག་བྲོས་ཐར་བྱུང་བའི་རྗེས། དྲ་ལམ་ཁག་ཏུ་དུས་ཡུན་སྐར་མ་ ༡༥ ཅན་གྱི་བརྙན་ཐུང་ཞིག་སྤེལ་ཡོད་པའི་ནང་། ཁོང་གིས་ ༼དེ་སྔོན་དྲ་ལམ་ཁག་ཏུ་རྒྱ་གཞུང་གིས་ང་ལ་དྲག་སྤྱོད་དམ་དྲག་བྱས་པའི་གནས་ཚུལ་སྤེལ་བ་མཐའ་དག་དངོས་བདེན་ཡིན་ལ། ང་རང་དངོས་ཡོད་གནས་ཚུལ་དེའི་དཔང་མི་ཡིན་པའི་ཆ་ནས་དེ་རིང་ཚང་མར་བདེན་དཔང་བྱས་པ་ཡིན། གཅར་རྡུང་མནར་གཅོད་བཏང་བའི་དངོས་ཡོད་གནས་སྟངས་རྣམས་ནི་དྲ་ལམ་ཁག་ཏུ་ཐོན་པའི་གནས་ཚུལ་ལས་ཀྱང་ཧ་ཅང་བློ་ཡིད་ལས་འདས་པ་ཞིག་ཡིན། ༽ ཞེས་བརྗོད་དེ། རྒྱ་གཞུང་འབྲེལ་ཡོད་སྡེ་ཁག་གིས་ཁོང་དང་ཁོང་གི་ནང་མིར་ཁྲིམས་མེད་ལུགས་མེད་ཐོག་གཅར་རྡུང་མནར་གཅོད་བཏང་བའི་ཞིབ་ཕྲའི་གནས་ཚུལ་རྣམས་ཐེར་འདོན་བྱས་ཡོད་པ་མ་ཟད། ཁོང་གིས་བརྙན་ཐུང་དེ་བརྒྱུད་ནས་རྒྱ་ནག་སྲིད་བློན་ཝུན་ཇ་པའོ་ལ་ “ཁྲིམས་ལྟར་ཉེས་ཅན་ལ་ཁྲིམས་གཅོད་ནན་པོ་བྱེད་དགོས་པ། ཁྲིམས་ལྟར་ནང་མིའི་བདེ་འཇགས་སྲུང་སྐྱོབ་བྱ་དགོས་པ།  ཁྲིམས་ལྟར་རུལ་སུངས་བྱ་སྤྱོད་ལ་ཉེས་ཆད་གཅོད་དགོས་པ། ” བཅས་དགོས་འདུན་དོན་ཚན་གསུམ་བཏོན་འདུག 

ཐེངས་འདིའི་བྲོས་བྱོལ་ཆེད་མིག་ལོང་པ་ཁྲིན་ཀུང་ཁྲིན་གྱིས་ཟླ་གཉིས་ལྷག་རིང་གྲ་སྒྲིག་བྱས་ཡོད་པ་དང་།  ལྟ་སྲུང་བའི་དོ་སྣང་ཆེན་པོ་མི་ཡོང་ཆེད་དུས་རྒྱུན་རང་ཁྱིམ་དང་ཁ་མ་བྲལ་པར་ཉལ་ཁྲི་སྟེང་རྒྱུན་རིང་ཉལ་བསྡད་སྟབས། སྒོ་འགྲམ་གྱི་ལྟ་སྲུང་བའི་སེམས་ལ་བདུན་ཕྲག་གཅིག་རིང་ཁོ་རང་མཐོང་མ་ཐུབ་ཀྱང་དེ་ནི་ཧ་ཅང་རྒྱུན་ལྡན་གྱི་རྣམ་པ་ཞིག་ཆགས་སུ་བཅུག་ཡོད་པ་དང་། དེ་བཞིན། ཁོས་མཚན་མོ་རེ་རེ་བཞིན་སྒོ་འགྲམ་གྱི་ལྟ་སྲུང་བའི་འགྲུལ་བཞུད་ཀྱི་ལྷམ་སྒྲར་ཉན་ཏེ། ལྟ་སྲུང་བ་ཆུ་ལེན་དུ་འགྲོ་བར་ཕར་ལ་སྐར་ཆ་ ༥ དང་ཚུར་ལ་སྐར་ཆ་ ༥ ཡི་དུས་ཡུན་དགོས་ཀྱི་ཡོད་པ་རྟོག་ཞིབ་བྱས་མཐར།  དུས་ཡུན་སྐར་ཆ་ ༡༠ ཡི་གོ་སྐབས་དེ་དམ་འཛིན་གྱིས་རང་ཉིད་སྡོད་སའི་ཁང་མིག་ནས་ཁང་མིག་གཞན་ཞིག་གི་ནང་འཛུལ་ཐབས་བྱས་ཤིང་། མཚན་གུང་སོ་སོའི་ཁྱིམ་གྱི་སྒོ་རའི་རྩིག་གྱང་ལས་ཕར་ལྡིང་སྟེ་བྲོས་ཡོད་འདུག  དེའི་ཐད་ཧི་ཕའེ་རོང་གིས། “ དགོང་མོ་དེར་ཁྲིན་ཀུང་ཁྲིན་ཐེངས་མང་པོར་ས་ལ་འགྱེལ་ཡོད་པ་དང་། གྲོང་སྡེ་དེའི་སྲང་བར་དག་ལ་ཆ་རྒྱུས་ཆེན་པོ་མེད་སྟབས་གྱང་ཐུང་མང་པོ་བརྒལ་དགོས་བྱུང་ཡོད་པ་མ་ཟད། གྲོང་འདབས་ཀྱི་ཆུ་ཕྲན་ཞིག་ཀྱང་བརྒལ་འདུག་ལ། གྲོགས་པོ་ཚོས་ཁོ་རང་རྙེད་སོན་བྱུང་སྐབས་ལུས་ཀྱི་ལྭ་བ་ཡོངས་རྫོགས་བརླན་ཡོད་པ་དང་། རྐང་པར་ཡང་རྨས་སྐྱོན་བཟོས་འདུག” ཅེས་བརྗོད་ཡོད།  

ད་ལྟའི་ཆར་གནས་ཚུལ་དབྱེ་ཞིབ་པ་དག་གིས་ཁྲིན་ཀུང་ཁྲིན་ཡིབ་སྡོད་བྱ་སའི་བདེ་འཇགས་ཀྱི་ས་གནས་དེ་ནི་པེ་ཅིན་གྱི་ཨ་རིའི་གཞུང་ཚབ་ཁང་ཡིན་པའི་ཚོད་དཔག་བྱེད་ཀྱིན་ཡོད་ལ། ཁྲིན་ཀུང་ཁྲིན་གྱི་གནས་ཚུལ་དེས་རྒྱ་གཞུང་དཔོན་རིགས་ནང་ཁུལ་གྱི་དབང་ཤུགས་འཐབ་རྩོད་ཁྲོད་ཀྲུག་ཡུང་ཁཱང་གཙོས་ཅཱང་ཤོག་ཁག་སྔར་ལས་ལྷག་པར་ཉེན་ཁར་དེད་ཡོད་འདུག  ཁ་སང་ཕྱི་ཚེས་ ༣༠ ཉིན་ཨ་རི་དང་ཉི་ཧོང་སྲིད་འཛིན་གཉིས་ཀྱི་མཉམ་འབྲེལ་གསར་འགོད་གསལ་བསྒྲགས་སྐབས། གསར་འགོད་པས་ཨོ་བྷ་མར་ཁྲིན་ཀུང་ཁྲིན་པེ་ཅིན་དུ་ཨ་རིའི་སྲུང་སྐྱོབ་འོག་ཡོད་མེད་དང་། ཁོང་ལ་ཨ་རིའི་གཞུང་གིས་ཆབ་སྲིད་སྐྱབས་བཅོལ་སྤྲོད་འཆར་ཡོད་མེད་ཀྱི་དྲི་བ་བཏོན་པར། ཨོ་བྷ་མས་ “ གསར་ལམ་ཁག་གིས་སྤེལ་བའི་རྒྱ་ནག་གི་དཀའ་རྙོག་དེའི་སྐོར་གྱི་གནས་ཚུལ་ངས་ཤེས་རྟོག་བྱུང་ཡོད། ཡིན་ནའང་། ངས་གནས་ཚུལ་དེའི་ཐད་གསལ་བཤད་གནང་རྒྱུའི་གྲ་སྒྲིག་བྱེད་ཀྱིན་མེད། ངས་འདིར་གསལ་བཤད་བྱེད་འདོད་པ་ཞིག་ནི་ང་ཚོའི་ངོས་ནས་རྒྱ་ནག་གཞུང་དང་འབྲེལ་མོལ་བྱེད་ཐེངས་རེར་འགྲོ་བ་མིའི་ཐོབ་ཐང་གནད་དོན་གླེང་སློང་བྱེད་བཞིན་ཡོད། དེ་ནི་སྒྲུབ་སྟངས་ཡང་དག་པ་ཞིག་ལ་ངོས་འཛིན་བྱེད་ཀྱི་ཡོད། རྒྱུ་མཚན་ནི་ང་ཚོའི་གཞི་རྩའི་ལངས་ཕྱོགས་དང་། རང་དབང་དང་འགྲོ་བ་མིའི་ཐོབ་ཐང་ཐད་ཀྱི་ང་ཚོའི་དམ་ཚིག་དང་མཐུན་གྱི་ཡོད་པ་མ་ཟད། ང་ཚོའི་ངོས་ནས་རྒྱ་ནག་གི་སྲིད་ཇུས་གུ་ཡངས་དང་རང་དབང་ཅན་དུ་གྱུར་ཚེ་རྒྱ་ནག་སྔར་ལས་སྟོབས་ལྡན་ཆགས་ཐུབ་རྒྱུར་ཡིད་ཆེས་ཡོད། ” ཅེས་བརྗོད་དེ། གལ་སྲིད་འགྲོ་བ་མིའི་ཐོབ་ཐང་གནད་དོན་ཐད་རྒྱ་གཞུང་གིས་ལེགས་བཅོས་བྱས་པ་ཡིན་ན། ཨ་རྒྱ་གཉིས་ཀྱི་འབྲེལ་བ་སྔར་ལས་ཇེ་ཟབ་དང་། རྒྱ་ནག་སྔར་ལྷག་སྟོབས་ཆེན་དང་མཚན་མཐོང་ལྡན་པ་ཞིག་ཏུ་འགྱུར་རྒྱུ་ཡིན་སྐོར་བསྒྲགས་འདུག

གཟའ་ཟླ་བའི་ཉིན་ལྷོ་ཀོ་རི་ཡའི་བརྒྱུད་ལམ་གཙོ་གྲས་༼ཤར་ཨེ་ཤ་ཡའི་ཉིན་རེའི་གསར་ཤོག༽སྟེང་། ཨ་རྒྱ་གཉིས་སོ་སོའི་སྲིད་འཛིན་འོས་འདེམས་དང་སྲིད་དབང་རྩིས་སྤྲོད་ཀྱི་འགག་རྩའི་དུས་སྐབས་སུ་འགྲོ་བ་མིའི་ཐོབ་ཐང་གི་ས་འོག་འབར་མདེལ་འགས་གཏོར་བྱུང་བཞིན་ཡོད་པའི་དཔྱད་བརྗོད་སྤེལ་ཡོད་པ་མ་ཟད། རྒྱལ་སྤྱིའི་གསར་ལམ་ཁག་གིས་ཨོ་བྷ་མ་གཞུང་གིས་བྲེལ་འཚུབ་དང་མངོན་གསལ་མིན་པའི་ཐོག་ནས་རྒྱ་ནག་གཞུང་དང་འབྲེལ་བ་བྱས་ཏེ། ཟླ་འདིའི་ཕྱི་ཚེས་ ༣ ནས་ ༤ བར་པེ་ཅིན་དུ་འཚོགས་གཏན་ཁེལ་ཡོད་པའི་ཨ་རྒྱ་གཉིས་ཀྱི་ཚོང་ལས་མཉམ་འབྲེལ་ཚོགས་འདུའི་སྔོན་ལ།  ཁྲིན་ཀུང་ཁྲིན་གྱི་གནད་དོན་ཐག་གཅོད་ཡོང་ཐབས་འབད་བརྩོན་བྱེད་བཞིན་པའི་ངོས་འཛིན་བྱས་ཡོད་ལ། དེ་བཞིན། གཟའ་ཉི་མའི་ཉིན་ཨ་རིའི་ཤར་ཨེ་ཤ་ཡའི་ལས་དོན་ཐད་ཀྱི་ཕྱི་འབྲེལ་དྲུང་ཆེ་ཁཱམ་བྷེལ་(Campbell)ལགས་པེ་ཅིན་དུ་བསྐྱོད་ཡོད་པ་དང་། གཟའ་ཟླ་བའི་ཉིན་ཨ་རིའི་ཕྱི་སྲིད་བློན་ཆེན་ཧེ་ལའེ་རའེ་ཡིས་ཀྱང་པེ་ཅིན་དུ་འཚོགས་འཆར་གྱི་ཨ་རྒྱ་གཉིས་ཀྱི་ཚོང་དོན་མཉམ་འབྲེལ་ཚོགས་འདུའི་ཐོག་འགྲོ་བ་མིའི་ཐོབ་ཐང་གླེང་སློང་བྱ་རྒྱུ་ཡིན་སྐོར་བསྒྲགས་ཡོད་པ་མ་ཟད། ཐེངས་འདིའི་ཨ་རིའི་སྲིད་འཛིན་འོས་བསྡུའི་ཁྲོད་ཨོ་བྷ་མའི་ཁ་གཏད་དུ་ལངས་བཞིན་པའི་སྤྱི་མཐུན་ཚོགས་པའི་སྲིད་འཛིན་འོས་མི་མའེ་ཋི་རོམ་ནའེ་(Mitt Romney )ལགས་ཀྱིས་ཀྱང་གཟའ་ཉི་མའི་ཉིན་གསལ་བསྒྲགས་སྤེལ་ཏེ། ཁོ་རང་ཉིད་ཀྱི་ངོས་ནས་ཁྲིན་ཀུང་ཁྲིན་དང་ཁོའི་ནང་མིའི་བདེ་འཇགས་ཐད་ཧ་ཅང་བློ་འཚབ་བྱེད་བཞིན་ཡོད་ལ། རྒྱ་གཞུང་གིས་ཆབ་སྲིད་རང་དབང་ལ་བཀག་སྡོམ་དང་། སྒེར་གཅོད་སྲིད་ཇུས་རྒྱུན་འཛིན། འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་སྟབས། ཨ་རིའི་གཞུང་གིས་ངེས་པར་དུ་གནོན་ཤུགས་ལྡན་པའི་བྱེད་ཐབས་སྤྱད་དེ། རྒྱ་གཞུང་གི་ལམ་ལུགས་བཅོས་སྒྱུར་ལག་བསྟར་ཡོང་བར་སྐུལ་འདེད་གཏོང་དགོས་པར་མ་ཟད། རང་དབང་དང་འགྲོ་བ་མིའི་ཐོབ་ཐང་རྩོད་ལེན་གནང་མཁན་དག་ལ་རྒྱབ་སྐྱོར་བྱེད་དགོས་ཚུལ་བརྗོད་དེ་ཨ་བྷ་མའི་གཞུང་ལ་གནོན་ཤུགས་སྤྲད་ཡོད་འདུག 

དབྱིན་ཇིའི་(The Guardian) གསར་ཤོག་གི་པེ་ཅིན་གསར་འགོད་པས་གནས་ཚུལ་སྤེལ་བའི་ནང་། དུས་ཡུན་རིང་པོར་རྒྱ་ནག་གི་ཆབ་སྲིད་གནད་དོན་ཐད་རྟོག་ཞིབ་གནང་མཁན་སྲིད་དོན་དབྱེ་ཞིབ་པ་དག་གིས། ཉེ་ཆར་འགྲོ་བ་མིའི་ཐོབ་ཐང་རྩོད་ལེན་གནང་མཁན་གྱི་ཁྲིམས་རྩོད་པ་ཁྲིན་ཀུང་ཁྲིན་དང་། རྒྱ་ནག་ནང་ལྐོག་གསོད་བྱས་པའི་དབྱིན་ཇིའི་ཚོང་བ་ཧེ་ཝུ་ཏིག  དེ་བཞིན། རུལ་སུངས་པ་ཝང་ལིས་ཅོན་དང་པའོ་ཞིས་ལའེ་སོགས་ཟློ་གར་རང་བཞིན་ཅན་གྱི་གནས་ཚུལ་དེ་དག་གིས། ད་ལྟའི་རྒྱ་ནག་དམར་པོའི་གཞུང་དེ་ཆབ་སྲིད་བཅོས་སྒྱུར་དང་། མུ་མཐུད་དྲག་གནོན་གཉིས་ཀྱི་འགག་རྩའི་ཐག་གཅོད་ལ་ཐུག་ཡོད་སྟབས། ཝུན་ཇ་པའོ་གཙོས་པའི་དེང་རབས་ཅན་གྱི་འཛམ་གླིང་ལ་ཁ་ཕྱོགས་མཁན་རྒྱ་གཞུང་དཔོན་རིགས་དག་ལ་མཚོན་ན།  ད་ལྟའི་དུས་སྐབས་འདི་ནི་ཕྱི་ལོ་ ༡༩༨༩ ཚུན་གྱི་གོ་སྐབས་ཆེས་ལེགས་ཤོས་དེ་ཆགས་ཡོད་པས། སྔར་ལས་ལྷག་པར་སྤྱི་ཚོགས་ཕྱི་གསལ་ནང་གསལ་དང་འགན་ལེན་ལྡན་པ། ཁྲིམས་ཀྱིས་སྐྱོང་དགོས་པའི་དགོས་འདུན་བཏོན་ཏེ། ངེས་པར་དུ་སྒེར་གཅོད་མཁྲེམས་འཛིན་པ་དག་ལ་གདོང་ལེན་བྱེད་དགོས་པའི་དུས་ལ་སླེབས་ཡོད་པ་བརྗོད་འདུག 

མིག་ལོང་ཡིན་པའི་ཁྲིམས་རྩོད་པ་ཁྲུན་ཀུང་ཁྲིན་ལགས་གྱིས། ཧྲན་ཏུང་ཞིང་ཆེན་ལན་ཀྲུག་ས་གནས་སྲིད་གཞུང་གིས་བཙན་ཤེལ་གྱི་སྒོ་ནས་འཆར་ལྡན་བུ་སྐྱེས་སྲིད་ཇུས་སྤེལ་ཏེ། སྦྲུམ་མའི་ཕྲུ་གུ་མངལ་ལས་འདོན་པའི་ཉེས་སྤྱོད་ཐེར་འདོན་གྱིས་མང་ཚོགས་ལ་རྒྱབ་སྐྱོར་ཁྲིམས་རྩོད་བྱས་པར་བརྟེན་ནས་རྒྱ་གཞུང་གི་གཅར་རྡུང་བཀག་ཉར་འོག་ཚུད་ཡོད་པ་རེད།