བསམ་གཞིག་བརྒྱ་ཕྲག་གིས་མས་སྣེ་ནས།

ནང་དོན་གནད་བསྡུས།    ནང་པའི་གཞི་ལམ་འབྲས་གསུམ་གྱི་རྣམ་གཞག་རོབ་བཤད་དང་། དེ་དག་ལས་འཕྲོས་ཏེ་དེང་གི་དགོན་སྡེ་དག་གི་ཡོན་ཐལ་ཅན་གྱི་འཚོ་བ་སྒྲུབ་སྟངས། བསམ་བློ་མ་སྨིན་པའི་ལས་སྣེ་དག་གིས་མཛུབ་མོ་གར་བསྟན་ཤར་གྱི་དཔེ་ལུགས་སློབ་གསོ་ལ་སུན་འབྱིན་དང་། དོན་དངོས་ཀྱི་སློབ་གསོ་ནི་གང་འདྲ་ཞིག་ཡིན་མིན་སོགས་ཀྱི་སྐོར་ནས་བྲིས་ཏེ་མཇུག་གྲུབ་པར་བྱས་ཡོད།

བསམ་གཞིག་བརྒྱ་ཕྲག་གི་མས་སྣེ་ནས་ངས་རང་ཉིད་ཀྱི་དྲུང་དུ་སྐད་ཆ་འདི་འདྲ་ཞིག་བཤད་རྒྱུར་སེམས་ཐག་བཅད་པ་ཡིན། སྐད་ཆ་འདི་མཁས་མང་བྱེ་བར་བགྲོ་ནས་རྙེད་པ་ཞིག་མིན་ལ། གཞུང་ལུགས་མང་པོར་ཁྲུན་ཐག་ཆོད་པས་བཤད་པ་དེ་བས་ག་ལ་ཡིན། དེའི་ཕྱིར་ན། སྐད་ཆ་འདི་ལ་གཞུང་ལུགས་བརྒྱ་ཕྲག་གིས་རྒྱབ་དཔུང་ཡོད་མེད་དང་། རིགས་པ་སྟོང་ཕྲག་གིས་ཕུ་འདེད་བྱེད་ས་ཡོད་མེད་ཀྱི་ཁ་ཚོད་གང་ཡང་བདག་གིས་མི་ཆོད། འོན་ཀྱང་། གཞུང་ལུགས་ཆེན་པོ་དེ་དག་གི་དཀའ་གནད་ཀྱི་མདུད་རྒྱ་མ་ཁྲོལ་ཀྱང་མི་ལོ་བཅུ་ཕྲག་ཟིན་མིན་ཙམ་ལ་དེ་དག་གི་ཁྲོད་ནས་ལྷག་སོང་མཁན་ཞིག་ཡིན་པས། འཚོ་བའི་མྱོང་རྟོགས་ཀྱི་ངོས་ན་གཞུང་ལུགས་དེ་དག་གིས་བཞག་པའི་སློབ་གསོ་ཞིག་ བདག་ལ་མེད་མི་སྲིད་པར་འདོད། བདག་གིས་ཕྱོགས་རེ་བ་ཞིག་མྱོང་ཡོད་པའི་སློབ་གསོ་དེ་ནི་མི་ལོ་སྟོང་ཕྲག་གཉིས་ དང་ལྔ་བརྒྱའི་ཡར་སྔོན་ཞིག་ལ་རྒྱ་གར་ཤྭཀྱའི་རིགས་སུ་འཁྲུངས་བའི་དགེ་སྦྱོང་ཞིག་གིས་བཞག་པའི་སློབ་གསོའི་རིག་གནས་ཤིག་ཡིན་ལ། རིག་གནས་འདི་ནི་དགེ་སྦྱོང་ཁོང་གིས་མྱོང་རྟོགས་དམར་ཁྲིད་ཅིག་ཡིན་པ་ལས། རིག་སྐམ་གནམ་ལ་འཕྱར་ནས་བསྒྲིགས་པ་ཞིག་མིན་པས། ང་ནི་ཁ་ཞེ་གཉིས་མེད་ཀྱིས་དགེ་སྦྱོང་ཁོང་ལ་དད་པ་ཡོད་མཁན་ཞིག་ཡིན། ཁོང་གི་སློབ་གསོའི་བརྒྱུད་རིམ་ཁྲོད་དུ་གཞི་བདེན་པ་གཉིས། ལམ་ཐབས་ཤེས་གཉིས། འབྲས་བུ་སྐུ་གཉིས་སོགས་སུ་དབྱེ་བ་གནང་ཡོད་ལ། གཞི་བདེན་པ་གཉིས་ཞེས་པ་ནི་ཀུན་རྫོབ་བདེན་པ་དང་། དོན་དམ་བདེན་པ་འདི་གཉིས་ཡིན་ལ། འདི་ལ་གཞི་བདེན་པ་གཉིས་ཞེས་པའི་དོན་ནི་གཞི་ཤེས་པར་བྱ་བའི་གནས་ལ་དབྱེ་ན་འདི་གཉིས་སུ་གྲངས་ངེས་སོ་ཞེས་པའི་དོན་ཡིན་ཏེ། ལང་ཀར་གཤེགས་པའི་མདོ་ལས། ཀུན་རྫོབ་དང་ནི་དོན་དམ་སྟེ།། རྒྱུ་ལས་སྐྱེ་བ་གསུམ་པ་མེད།། ཅེས་དང་། ཡབ་སྲས་མཇལ་བའི་མདོ་ལས། དེ་བཞིན་གཤེགས་པས་ཀུན་རྫོབ་དང་དོན་དན་པའི་བདེན་པ་གཉིས་ཐུགས་སུ་ཆུད་དེ་ཤེས་པར་བྱ་བ་ཡང་ཀུན་རྫོབ་དང་དོན་དམ་པ་གཉིས་སུ་ཟད་དོ། ཞེས་གསུངས་ཡོད། ཡབ་སྲས་མཇལ་བའི་མདོ་ཞེས་པ་དེ་ནི་དགེ་སྦྱོང་ཁོང་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ལོ་མང་ཕྱིན་པའི་རྗེས་ཤིག་ལ་རང་གི་ཕ་དང་མཇལ་སྐབས་བཀའ་མོལ་གནང་བའི་སྐོར་ཞིག་ཡིན་ལ། གོང་གི་མདོ་ཚིག་དེ་ནི་ཕ་ཡིས་དྲི་བ་བྱས་པའི་ལན་དུ་གནང་བ་ཞིག་ཡིན། བདེན་པ་ཞེས་པའི་དོན་ནི། དེ་ཡང་ཇི་སྐད་དུ། འཕགས་པ་ཐོག་མེད་ཞབས་ཀྱིས། སྨྲས་པ་བསྟན་པ་དང་མི་མཐུན་པ་མེད་པའི་མཚན་ཉིད་ཀྱི་དོན་དང་། དེ་མཐོང་ན་རྣམ་པར་དག་པའི་རྒྱུར་འགྱུར་བའི་དོན་ནི་བདེན་པའི་དོན་ནོ། ཞེས་གང་སྨྲས་པ་ལུང་དང་རྟོགས་པའི་བདག་ཉིད་ཅན་གྱི་བསྟན་པ་རིན་པོ་ཆེའི་དགོངས་དོན་དང་མི་མཐུན་པ་མེད་པ། དེ་མཐོང་ན་རྣམ་པར་དག་པའི་ལམ་གྱི་རྒྱུར་འགྱུར་བས་ན་བདེན་པའི་དོན་དུ་གསུངས་ཡོད་ལ། སློབ་དཔོན་ལེགས་ལྡན་འབྱེད་ཀྱིས། ཡང་དག་ཀུན་རྫོབ་རྣམས་ཀྱི་སྐས།། མེད་པར་ཡང་དག་ཁང་པ་ཡི།། སྟེང་དུ་འཛེག་པར་བྱ་བ་ནི།། མཁས་ལ་རུང་བ་མ་ཡིན་ནོ།། ཞེས་ཆོས་རྣམས་ཀྱི་ཡང་དག་པའི་གནས་ལུགས་ལ་མཁས་པར་བྱེད་པ་ལ། ཐོག་མར་ཆོས་མངོན་པའི་སྡེ་སྣོད་དག་དུ་གསུངས་པ་བཞིན་ཀུན་རྫོབ་པའི་ཆོས་རྣམས་ཀྱི་རྣམ་གཞག་ལ་མཁས་པར་བྱེད་དགོས་པའི་དོན་དུ། དགག་ཕྱོགས་དང་སྒྲུབ་ཕྱོགས་གཉིས་ཆ་ནས་བདེན་གཉིས་ཀྱི་རྣམ་གཞག་གཏན་ལ་ཕབས་ཡོད་ལ། དེ་འདྲ་བའི་བདེན་པ་གཉིས་ལ་མི་རྨོངས་བར་མ་བྱས་ན་ཆོས་རྣམས་ཀྱི་གནས་ལུགས་རྟོགས་ཚུལ་མེད་པའི་དོན་དུ་རྒྱལ་བ་རང་ཉིད་ཀྱིས་ཀྱང་། ཀཱཏྱ་ཡ་ནར་གདམས་པའི་མདོ་ལས། འཇིག་རྟེན་འདི་ཕལ་ཆེར་ཡོད་པ་ཉིད་དང་མེད་པ་ཉིད་ལ་མངོན་པར་ཞེན་ཏེ། ཞེས་དེའི་དབང་གིས་མི་འདོད་བཞིན་དུ་སྡུག་བསྔལ་མང་པོ་མྱོང་བར་གསུངས་ཡོད། དེས་ན་རྒྱལ་བ་རང་ཉིད་ཀྱི་བསྒྲུབ་བྱ་ནི་རྗེས་འཇུག་གདུལ་བྱ་རྣམས་ཀྱི་ངོར་བདེན་གཉིས་ཀྱི་རྣམ་གཞག་གཏན་ལ་ཕབ་རྒྱུ་དེ་ཡིན་པར་གྲུབ།  

དེ་ལྟར་གཞི་བདེན་གཉིས་ཀྱི་རྣམ་གཞག་ལེགས་པར་ངེས་པ་ལ། དེ་རྟོགས་པའི་ལམ་ཐབས་ཤེས་གཉིས་ཀྱི་ཉམས་ལེན་བསླབ་པ་གསུམ་ལ་བློ་སྦྱོང་དགོས་པ་དང་། དེ་འདྲ་བའི་ལམ་བསླབ་པ་གསུམ་ལ་བརྟེན་ནས་རྗེས་འཇུག་གདུལ་བྱ་རྣམས་རིགས་དང་དབང་པོའི་ཁྱད་པར་གྱིས་འགའ་ཞིག་ནི་ཐེག་པ་ཆེན་པོའི་ལམ་དུ་བགྲོད་པ་དང་། འགའ་ཞིག་ནི་ཐེག་པ་ཆུང་ངུའི་ལམ་དུ་བགྲོད་པ་ཡིན། དེ་འདྲ་བའི་ལམ་གྱི་བགྲོད་པའི་གནས་སྐབས་ན། སྤང་བླང་གི་རྣམ་གཞག་ངེས་དགོས་པ་ནི་རྩ་བའི་གནད་དུ་གོ་དགོས་པས། རྒྱལ་བ་རང་ཉིད་ཀྱིས། སྤང་བྱ་ཉོན་མོངས་བརྒྱད་ཁྲི་བཞི་སྟོང་གི་གཉེན་པོར་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པར་རྒྱ་བོད་ཀྱི་པཎ་གྲུབ་དག་གིས་བཞེད་པ་ཡིན་ལ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་དེ་ཡང་ཚུར་བསྡུས་ན་གསུང་རབ་ཡན་ལག་བཅུ་གཉིས་སུ་འདུ་ཞིང་། དེའང་བསྡུས་ན་སྡེ་སྣོད་གསུམ་དུ་འདུ་བ་ཡིན་ལ། སྡེ་སྣོད་རིན་པོ་ཆེ་གསུམ་གྱི་བརྗོད་བྱ་དག་ཀྱང་ཚུར་བསྡུས་ན་བསླབ་པ་གསུམ་དུ་འདུ་བ་ཡིན། དང་པོ། ལྷག་པ་ཚུལ་ཁྲིམས་ཀྱི་བསླབ་པ་ནི། དེ་ཡང་ཇི་སྐད་དུ། མདོ་ལས། ལུས་ལ་ཡོངས་སུ་གདུང་མེད་པ།། ཚུལ་ཁྲིམས་ཡང་དག་བླང་བ་བདེ།། གཉིད་ལོག་པས་ན་བདེ་བ་སྟེ།། སད་པ་ན་ཡང་བདེ་བར་འགྱུར།། ཞེས་དང་། ཀླུ་སྒྲུབ་ཞབས་ཀྱིས། བཤེས་པའི་སྤྲིངས་ཡིག་ཏུ། ཁྱོད་ཀྱིས་ཚུལ་ཁྲིམས་མ་ཉམས་དམོད་མི་དམའ།། མ་འདྲེས་མ་སྦགས་པ་དག་བསྟེན་པར་མཛོད།། ཁྲིམས་ནི་རྒྱུ་དང་མི་རྒྱུའི་ས་བཞིན་དུ།། ཡོན་ཏན་ཀུན་གྱི་གཞི་རྟེན་ལེགས་པར་གསུངས།། ཞེས་གཞི་ཚུལ་ཁྲིམས་ལ་བརྟེན་ནས་ཏིང་ངེ་འཛིན་སྐྱེས་པ་དང་། ཏིང་ངེ་འཛིན་ལ་བརྟེན་ནས་ཤེས་རབ་སྐྱེས་པ་ཡིན་པས་ན་ཚུལ་ཁྲིམས་ནི་ཡོན་ཏན་ཀུན་གྱི་གཞི་རྟེན་དུ་ལེགས་པར་གསུངས་པ་ཡིན་ནོ།། དེ་ལ་དབྱེ་ན། སོ་ཐར་གྱི་ཚུལ་ཁྲིམས་དང་། བྱང་སེམས་ཀྱི་ཚུལ་ཁྲིམས། གསང་བ་སྔགས་ཀྱི་ཚུལ་ཁྲིམས་སོགས་ཡོད་ལ། དེ་དག་ལའང་ངོ་བོའི་སྒོ་ནས་དང་། རྟེན་གྱི་སྒོ་ནས་སོགས་དབྱེ་བ་གྲངས་ལས་འདས་པ་ཞིག་ཡོད་མོད། བདག་གིས་འདིར་དེ་དག་གི་དབྱེ་བ་དང་འགྲེལ་བཤད་སོགས་གཙོར་འདོན་བྱ་རྒྱུ་མིན་པར། རྣམ་གཞག་དེ་དག་གིས་དོན་དངོས་གང་ཞིག་བརྗོད་གཞིར་བླངས་ཡོད་པ་དང་། དོན་གྱི་འབབ་ས་དངོས་དེ་གང་ཞིག་ཡིན་དགོས་པ་སོགས་ཀྱི་སྤྱི་ཁོག་རོབ་བཤད་དང་། དེ་དག་གི་ལམ་ནས་རང་རེའི་སེར་མོ་བའི་ཚོགས་སྡེ་སྤྱིའི་འགྲོ་སྟངས་ལ་ཅུང་ཙམ་བལྟ་འདོད་པ་དེ་ཡིན།

སྤྱིར་འབྲས་བུ་ལ་སྐུ་བཞི་དང་། སྐུ་གསུམ། སྐུ་གཉིས་སོགས་སུ་དབྱེ་བ་ཡོད་ལ། སྐུ་བཞི་ནི་མངོན་རྟོགས་རྒྱན་ལས། ངོ་བོ་ཉིད་ལོངས་རྫོགས་བཅས་དང་།། དེ་བཞིན་གཞན་པ་སྤྲུལ་བ་ནི།། ཆོས་སྐུ་མཛད་པ་དང་བཅས་པ།། རྣམ་པ་བཞིར་ནི་ཡང་དག་བརྗོད།། ཅེས་ངོ་བོ་ཉིད་སྐུ་དང་། ཡེ་ཤེས་ཆོས་སྐུ། ལོངས་སྤྱོད་རྫོགས་སྐུ། སྤྲུལ་སྐུ་དང་བཞིར་གསུངས་ལ། དེ་བཞི་ལས་ངོ་བོ་ཉིད་སྐུ་དང་ཡེ་ཤེས་ཆོས་སྐུ་གཉིས་གཅིག་ཏུ་བསྡུས་ནས་ཆོས་སྐུ་ལོངས་སྐུ་སྤྲུལ་སྐུ་སྟེ། སྐུ་གསུམ་དུ་བྱེད་པའང་ཡོད་ལ། ཡང་ཀླུ་སྒྲུབ་ཞབས་ཀྱིས། དབུ་མ་རིན་ཆེན་ཕྲེང་བར། སངས་རྒྱས་རྣམས་ཀྱི་གཟུགས་སྐུ་འདི།། བསོད་ནམས་ཚོགས་ལས་བྱུང་བ་སྟེ།། ཆོས་ཀྱི་སྐུ་ནི་མདོར་བསྡུས་ན།། རྒྱལ་བོ་ཡེ་ཤེས་ཚོགས་ལས་འཁྲུངས།། ཞེས་རང་དོན་ཆོས་སྐུ་དང་། གཞན་དོན་གཟུགས་སྐུ་སྟེ། སྐུ་གཉིས་སུ་གསུངས། དེ་ཡང་ངོ་བོ་ཉིད་སྐུ་ནི་གང་འདྲ་ཞིག་ཏུ་འཇོག་ཅེ་ན། དག་པ་གཉིས་ལྡན་གྱི་དབྱངས་མཐར་ཐུག་ཅིག་ཏུ་འཇོག་ལ། དག་པ་གཉིས་ལྡན་ཅེས་པ་ནི་གློ་བུར་རྣམ་པར་དག་པའི་དབྱངས་མཐར་ཐུག་དང་། རང་བཞིན་རྣམ་པར་དག་པའི་དབྱངས་མཐར་ཐུག་སྟེ་འདི་གཉིས་སུ་གསུངས་ལ། དེ་ཡང་དང་པོ་གློ་བུར་རྣམ་དག་གི་ཆར་གྱུར་བའི་དབྱངས་མངོན་དུ་བྱེད་སྟངས་ནི། བྱང་སེམས་ས་བཅུ་བ་པའི་རྒྱུན་མཐའི་སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན་གྱིས་ཤེས་སྒྲིབ་ཟད་པར་སྤོང་ཞིང་། དེ་འདྲ་བའི་སྤངས་ཆ་སྟེ་བར་ཆད་མེད་ལམ་དེས་དྲངས་པའི་རྣམ་གྲོལ་ལམ་ཐོབ་པ་ན། སྒྲིབ་གཉིས་གློ་བུར་བའི་དྲི་མ་མཐའ་དག་སྤངས་པའི་སྤངས་པ་ཐོབ་པ་ནི་གློ་བུར་རྣམ་དག་གི་ཆར་གྱུར་པའི་དབྱངས་མཐར་ཐུག་དང་། སྔོན་ཐ་མལ་བའི་གནས་སྐབས་ཀྱི་སེམས་ཀྱི་སྟེང་གི་ཆོས་ཉིད་ནི་རང་བཞིན་གནས་རིགས་སུ་འཇོག་ལ། དེ་འདྲ་བའི་ཆོས་ཉིད་དེ་ཉིད་ཀྱི་ངོས་སྐལ་གྱི་སྒྲིབ་པ་སོགས་ལས་རིམ་བཞིན་གྲོལ་དེ་གནས་འགྱུར་མཐར་ཕྱིན་པ་ན། དེ་ནི་སངས་རྒྱས་ཀྱི་ཐུགས་རྣམ་མཁྱེན་གྱི་སྟེང་གི་ཆོས་ཉིད་ཀྱི་ངོ་བོར་སོང་བས་རང་བཞིན་རྣམ་དག་གི་ཆར་གྱུར་པའི་དབྱངས་མཐར་ཐུག་ཏུ་གསུངས། ད་ནི་འདི་དག་རེ་རེ་བཞིན་དུ་བཤད་རྒྱུ་ནི་བདག་ལྟ་བུའི་གཞུང་ལུགས་ཆེན་མོ་དག་གི་སྐོར་ལ་བློ་རྒྱ་ཁབ་མིག་ལས་དོག་པ་ཞིག་གིས་ཅི་ཡང་རྔོ་མི་ཐོགས་པས། སྤྱི་ཁོག་རོབ་བཤད་ཀྱི་ངལ་བ་འདི་ནས་མཚམས་འཇོག་གི་ཡིན།

ད་ནི་ད་ལྟའི་དགོན་སྡེ་དག་གི་འཚོ་བ་སྒྲུབ་སྟངས་དང་སློབ་གཉེར་གྱི་ཁ་ཕྱོགས། བསམ་བློའི་རྨང་འཛུགས་སྟངས་སོགས་ཀྱི་ཐད་ནས་འཛམ་གླིང་རང་བཞིན་གྱི་འཚོ་བ་སྒྲུབ་སྟངས་དང་སློབ་གཉེར་བྱེད་སྟངས། བསམ་བློའི་རྨང་འཛུགས་སྟངས་སོགས་ལ་བསྒྱུར་དགོས་པའི་དོན་དངོས་དག་རང་ནུས་ཡོད་ཚད་ཀྱིས་གསེད་འདོན་བྱ་རྒྱུ་ཡིན། མི་རིགས་ཤིག་ལ་མཚོན་ན། ཁྱོད་ནམ་ཡང་གཞན་བརྟེན་ཁོ་ནས་འཚོ་མི་ཐུབ་པ་ནི་ཤིན་ཏུ་གསལ་ལ། ལྷག་དོན་དུ་དེང་གི་ཚན་རིག་པ་དག་གིས་དངོས་དོན་གྱི་བདེན་པ་མང་པོ་ཞིག་ར་སྤྲོད་བྱས་འོང་དུས། ང་ཚོས་འཚོ་བ་རོལ་སྟངས་ནི་ཆེས་ཤིན་ཏུ་བསམ་བློ་གུ་དོག་པོའི་འཚོ་ཐབས་ཤིག་ཡིན་པས། གོ་ལ་གཅིག་གྱུར་གྱི་དེང་གི་སྐབས་སུ་འཚོ་ཐབས་དེའི་རིགས་ཀྱིས་ནི་ཁུངས་ཅི་ཡང་མི་ཕེར་བ་ཡིན། སྤྱིར་ང་ཚོས་ནང་ཆོས་ནི་འཚོ་བ་སྒྲུབ་བྱེད་ཙམ་དུ་བཀོལ་ན་ནི་གཏན་དུ་ནོར་ཚར་བ་རེད། ང་ཚོ་ཆོས་ཉམས་ལེན་མཁན་ཡིན་ཞེས་མིང་སྙན་པོ་ཞིག་ཁ་ལ་འཁྱེར་ནས་ཤར་ནུབ་གང་སར་སྒོར་མོ་སློང་དུ་འགྲོ་བ་ནི་ཧ་ཅང་མི་འོས་པ་ཞིག་རེད་ལ། དམ་པའི་ཆོས་འདུལ་བ་དང་ཡང་གཏན་མི་མཐུན་པ་ཞིག་རེད། སྤྱིར་བསྟན་པའི་བདག་པོ་སྟོན་པ་བཅོམ་ལྡན་འདས་ཀྱིས་བསྟན་པ་འཛིན་སྐྱོང་སྤེལ་གསུམ་བྱེད་པ་ལ་བསྟན་པའི་སྦྱིན་བདག་གཙོ་ཆེ་བར་གསུངས་མོད། དེ་ནི་དེང་གི་འུ་ཅག་གི་དགོན་སྡེ་ཁག་གི་ཕྱག་ལེན་དུ་ཡོད་པའི་སྦྱིན་བདག་འཚོལ་སྟངས་དེ་འདྲ་ཞིག་རྩ་བ་ནས་ཡིན་མི་སྲིད་ལ། ཞིབ་ཏུ་བསམ་ན་ཡུལ་གྱི་ཁྲིམས་ཚུན་ཆད་དུ་ཡང་འགལ་བ་ལྟག་སྤྲོད་དུ་སོང་ཡོད་པ་ཞིག་བཅོམ་ལྡན་འདས་ཀྱིས་གསུངས་མི་སྲིད་པས། བཅོམ་ལྡན་འདས་ཀྱི་རྗེས་འཇུག་རྣམས་ལ་ཡང་གནད་དོན་འདི་འདྲ་ནི་གཏན་ནས་ཡོང་མི་ཆོག་པ་དང་མི་འོས་པ་ཞིག་ཡིན་ནོ། དེང་སང་དགོན་སྡེ་ཆེ་གྲས་དག་གིས་ཀྱང་དགེ་བཤེས་ཡིན་མིན་ཅི་རིགས་དང་། ལག་རྟགས་བདེན་རྫུན་ཅི་རིགས་ཤིག་ཐབས་སྣ་ཚོགས་ཀྱིས་བཟོས་ནས་ཕྱི་རྒྱལ་ཡུལ་གྲུ་ཁག་ཏུ་ང་དགོན་པ་ཅིག་འདྲ་ཞིག་གི་ཆེད་དུ་ཡོང་བ་ཡིན་ཉུག་འདྲ་ཞིག་གི་ཆེ་དུ་ཡོང་བ་ཡིན་སོགས་བཤད་ནས་སྒོར་མོ་འཚོལ་ཐབས་བྱེད་ཀྱིན་ཡོད་ལ། ལྷག་དོན་དུ་མི་ཅུང་འབྱོར་བ་ཅན་ཞིག་ལ་ཐུག་ན་སྒོར་མོའི་ཆེད་དུ་ལས་ཀྱི་རྣམ་འགྱུར་སོགས་ཀྱང་གཞན་ཞིག་ཏུ་བསྒྱུར་ནས་ཁ་ཡག་ངོ་དགའ་བྱེད་ཀྱིན་ཡོད་པ་དང་། དེའི་སྟེང་དུ་རྫུན་སྣ་ཚོགས་བཤད་པ། སྒོར་མོ་ཞིག་རེགས་སོང་ན་ཆོལ་ཁ་དང་ཆོས་ལུགས་སོགས་གང་ལ་ཡང་མི་བསམ་པར་དེ་ཡིས་ཆོག་པར་འདོད་མཁན་ཤིན་ཏུ་མང་བ་ནི་མངོན་གསལ་ཡིན་ལ། ད་དུང་འབྱོར་ལྡན་ཕྱུགས་པོ་ཞིག་སླེབས་སོང་ན། དེ་དག་གི་མདུན་དུ་ཧ་ཅང་གི་ཚད་མཐོ་བའི་འཁྲབ་སྟོན་གང་འདྲ་ཞིག་བྱེད་ཀི་ཡོད། རྗེའི་བྱང་ཆུབ་ལམ་རིམ་ཆེན་མོ་ལས་སྔོན་དགེ་བཤེས་པོ་ཏོ་བས་རང་གི་མཆོད་བཤམས་ཀྱི་ནང་དུ་ཐལ་བ་བཏབ་ནས་བཞུགས་པར་རྒྱ་གར་ནས་ཇོ་བོ་རྗེའི་མངོན་ཤེས་ཀྱིས་གཟིགས་ཏེ་དེ་རིང་ཁ་བའི་ལྗོངས་ཀྱི་ཚོགས་བསག་པ་ཀུན་གྱི་མཆོག་ནི་དགེ་བཤེས་པོ་ཏོ་བས་རང་གི་མཆོད་བཤམས་ཏུ་ཐལ་བ་བཏབ་པ་དེ་རེད་ཅེས་གསུངས་པའི་སྐོར་མ་མཐོང་ཁུལ་བྱེད་རྒྱུ་ག་ལ་ཡོད། གཟིགས་པ་རྒྱང་རིང་མངའ་གང་གིས་ཀྱང་། ཁྱེད་ཚོ་སྒྱུ་ཞིག་རིག་ན་ཤ་རིལ་བ་ལ་འབུ་འཁོར་བ་བཞིན་བྱས་ན་ཡག་པོ་ཁྱོན་ནས་ཡོད་པ་མ་རེད་ཅེས་ནན་ཏན་དུ་གསུངས་དགོས་བྱུང་ཡོད་པ་ཡང་གནད་དོན་རྩ་བ་དེ་འདྲ་ཞིག་ལ་ཐུག་ཡོད་པ་རེད། ཡང་རེ་ཟུང་གིས་གྲྭ་ཆས་མང་པོ་མཐོང་མྱོང་མེད་པའི་ཡུལ་གྲུ་ཁག་གི་ནང་དུ་གྲྭ་ཆས་ཀྱིས་འཆམ་ལྭ་བྱས་ཏེ་སྒོར་མོ་འཚོལ་ཀྱིན་ཡོད་པ་རེད། དངོས་གནས་བསམ་བློ་ཞིབ་མོ་ཞིག་ཐོངས་དང་། སྔོན་གངས་ཅན་བླ་མ་ཟེར་བའི་དོལ་རྒྱལ་བསྟེན་མཁན་དེས་གྲྭ་ཆས་གྱོན་ནས་གར་སྟེགས་ཏུ་བྲོ་འཁྲབ་པ་རེད་ཟེར་ནས་རང་རེའི་སྤྱི་ཚོགས་ཀྱི་མཐོ་དམན་ཀུན་ཏུ་འུར་གང་འདྲ་ཞིག་བསླངས་སོང་། གངས་ཅན་བླ་མས་ཇི་ཞིག་བྱས་ཀྱང་མི་སྒེར་ཞིག་ཡང་ན་ཚོགས་སྡེ་ཆུང་ཆུང་ཞིག་སྟེ་དོལ་རྒྱལ་ཚོགས་པ་ལྟ་བུ་ཞིག་གི་ནོར་འཁྲུལ་དུ་བརྩི་གི་རེད། དགོན་པ་གཞུང་གི་ངོས་ནས་དེ་ལྟར་བྱས་ན་ད་ང་ཚོས་སུ་ཞིག་ལ་ལེ་བརྡ་བྱེད་དགོས་པ་རེད། ང་ཚོར་དཔལ་འབྱོར་གྱི་ཐོན་ཁུངས་དེ་འདྲའི་ཨུ་ཐུག་ཐབས་ཟད་ཅིག་ལས་མེད་སོང་བ་རེད་དམ། གཏན་ནས་མ་རེད། ཡིན་ལུགས་ཚུལ་མཐུན་གྱིས་ཚོང་ལས་ཀྱི་བྱ་བར་ཞུགས་ན་ཅིའི་ཕྱིར་ན་མ་ཆོག་པ་རེད། བཅོན་ལྡན་འདས་ཀྱིས་གནང་བ་མེད་པ་རེད་དམ་ཟེར་ན་མ་རེད། གནང་བ་ཡོད་པ་རེད། ཡིན་རྒྱུ་ནི་དཀའ་ལས་རྒྱག་མ་ཐུབ་པའམ་ཡང་ན་བསམ་བློའི་ནང་དེ་འདྲའི་ཐབས་ལམ་ཞིག་མ་འཁོར་བ་ཙམ་ལས་གཞན་རྒྱུ་མཚན་ཞིག་བཙལ་རྒྱུ་མི་འདུག དོན་ངོ་མ་ནི་ང་ཚོ་ཆོས་བཙོང་ནས་རིན་ཟ་མཁན་ཞིག་ལས་ཆོས་འཛིན་སྐྱོང་སྤེལ་གསུམ་གྱི་འགན་ཕྲག་ཏུ་ལེན་མཁན་ཞིག་མ་རེད། སྔོན་ནཱ་ལེནྡྲས་མགོན་པོ་ཀླུ་སྒྲུབ་ཀྱིས་དགེ་འདུན་པར་ལོག་འཚོ་དྲངས་བར་བཤད་ནས་གནས་ནས་དབྱུངས་རབས་ཀྱི་ལོ་རྒྱུས་ཡོད་པ་རེད། དེ་ནི་དངོས་གནས་ལོག་འཚོ་ཡིན་མིན་མི་ཤེས་ཏེ། དེང་གི་འུ་ཅག་གི་འཚོ་བ་འདི་ལྟ་བུ་ནི་དངོས་གནས་ལོག་འཚོ་ཟེར་བའི་ཉེས་པ་ཅན་ཞིག་ཡོད་ན་དེ་ཡིན་པ་ལས་འོས་མེད་པ་ལྟ་བུ་ཞིག་རེད། ཡང་དེང་གི་དགོན་སྡེ་ཁག་གི་བསམ་བློའི་ཁ་ཕྱོགས་ལ་བལྟས་ན། དགེ་བསྐོས་ཀྱིས་མཛུབ་མོ་གར་བསྟན་ཤར་ཟེར་བའི་དཔེ་ལུགས་རྙིང་པ་དེ་ད་དུང་འདོར་ཐུབ་ཡོད་པ་མ་རེད། ལས་སྣེ་ལ་གནས་ལུགས་བཤད་མི་ཆོག་པའི་ཚད་ན་ད་དུང་ལྷག་བསྡད་ཡོད་པ་རེད། ཚོགས་ཀྱི་སྒྲིག་ལམ་ཚུན་ཆད་ནས་དབང་འཛིན་པ་རེ་ཟུང་གིས་བསྒྱུར་ཆོག་ཆོག་དང་། འཕྲི་སྣོན་སོགས་བྱེད་ཆོག་ཆོག་ཏུ་བསམ་བསྡད་ཡོད་པ་རེད། དོན་དངོས་འདི་ལ་བསམ་ཞིབ་ཅིག་བྱས་ན། ཕྱོགས་གཅིག་ནས་གྲྭ་མང་གི་བསམ་བློ་སྨིན་མ་ཐུབ་པའི་རྟགས་ཤིག་རེད་ལ། ཕྱོགས་གཅིག་ནས་ལས་སྣེ་མང་དག་ཅིག་གིས་སྤྱིའི་འཛམ་གླིང་གི་འཕེལ་རྒྱས་དང་བསམ་བློའི་ཁ་ཕྱོགས་ལ་ལྟ་མ་ཤེས་པར་བླུན་པོ་གཡག་སྣ་ཁུ་ཚུར་གྱི་དཔེ་ལུགས་སྐྱོང་རྒྱུ་མང་དྲག་པས་རེད། མང་པོ་ཞིག་གིས་དགོན་སྡེ་ལ་དགོན་སྡེའི་ལམ་ལུགས་ལས་དེང་གི་འཛམ་གླིང་རང་བཞིན་ཀྱི་འཕེལ་རྒྱས་ཀྱི་བསམ་བློ་ལ་ཡིད་སྨོན་བྱ་རྒྱུ་མེད་པར་སྨྲ་བ་ནི་ཅི་ཡང་མ་ཤེས་པའི་བླུན་རྟགས་ཁོ་ནར་ཟད་ལ། ཁོང་ཅག་གིས་དགོན་སྡེ་ལ་དགོན་སྡེའི་ལམ་ལུགས་ཟེར་བའི་སྐོར་ནི་ལམ་བསླབ་པ་གསུམ་གྱི་ཉམས་ལེན་དང་། ལུང་སྡེ་སྣོད་གསུམ་གྱི་འཆད་ཉན་སོགས་ལ་གོ་རྒྱུ་མིན་པར་གཙོ་བོ་མཚན་སྙན་གྲགས། ད་དུང་དགོན་སྡེ་དང་དགོན་སྡེའི་བར་གྱི་ལ་རྒྱ། གྲུབ་མཐའ་དང་གྲུབ་མཐའི་བར་གྱི་ལངས་ཕྱོགས། དེ་དག་གི་ཆེད་དུ་གཏོ་འདོན་ལུགས་ཀྱི་ཆོ་ག་སྣ་ཚོགས་པ། འདི་དག་ནི་དངོས་གནས་རྒྱལ་བའི་བསྟན་པ་རྒྱས་བྱེད་ཅིག་རེད་དམ། ཉམས་བྱེད་ཅིག་རེད། རྒྱལ་བ་རྫོགས་པའི་སངས་རྒྱས་བཅོམ་ལྡན་འདས་ཀྱིས་ཀྱང་སྤྱི་ཚོགས་ཀྱི་འཕོ་འགྱུར་སོགས་དོན་དངོས་མང་པོ་ཞིག་ལ་ཐུགས་གཞིག་ལེགས་པར་མཛད་མཐར། ཞལ་ཆེམས་ཀྱི་ཚུལ་དུ་ཁོང་གི་རྗེས་འཇུག་སློབ་མ་རྣམས་ལ་དམ་པའི་ཆོས་འདུལ་བ་རང་མཐུན་ཞེས་པ་དེ་གསུངས་པ་མ་ཡིན་ནམ། ངོ་མ་བསམ་བློ་ཞིབ་མོ་ཞིག་བཏང་ན། གནའ་བོའི་སྐུ་དྲག་གི་ལམ་ལུགས་རྙིང་པ་དེ་དག་གཞུང་གི་ངོས་ནས་རྒྱང་ཕུད་བཏང་ཚར་ན་ཡང་། དེང་གི་དགོན་སྡེ་མང་པོ་ཞིག་གིས་རིན་པོ་ཆེ་ཞིག་རྙེད་སོང་བ་ལྟ་བུ་ཞིག་བྱས་ནས། གཏན་ནས་འདོར་ཐུབ་ཀྱི་ཡོད་པ་མ་རེད། དེང་གི་འཛམ་གླིང་ན་མིའི་རིགས་ཀྱི་སློབ་གསོ་ཟེར་ནས་གོ་ལ་གཅིག་གྱུར་གྱི་ཁ་གཡང་སྒྲོག་གིན་གང་འཚམས་ཤིག་ལག་ལེན་དུ་ཡང་གཞོལ་ཐུབ་ཀྱི་ཡོད་པ་རེད། ང་ཚོས་ད་དུང་རྟ་ལ་ལྕག་གིས་བཏུལ་ནས་ཐུལ་སོང་ན། རྟ་ལ་སློབ་གསོ་ཐེབ་མི་ཟེར་བ་དང་། མི་ལ་ལྕག་གིས་བྲབས་ནས་ནུས་མེད་དུ་བཟོས་པ་མི་ལ་སློབ་གསོ་ཐེབ་སོང་བ་མིན་པའི་གནས་ལུགས་ཙམ་ཡང་ཤེས་ཀྱི་ཡོད་པ་མ་རེད། ཅི་ཞིག་ལ་སློབ་གསོ་ཟེར་བ་རེད། སློབ་གསོའི་གོ་དོན་ཤེས་མཁན་ག་ཚོད་ཡོད། ལས་སྣེ་ང་ཡིན་ཟེར་མཁན་དག་གིས་ཁ་ནང་དུ་ཕྱོགས་ནས་འདིའི་སྐོར་ལ་བསམ་བློ་ཞིག་བཏང་མྱོང་ཨེ་ཡོད། ངའི་གྲོགས་པོ་ཞིག་གིས་འུ་ཚོར་སློབ་མཁན་མང་པ་ལས་གསོ་མཁན་ཉུང་བ་རེད་ཟེར་ནས་བཤད་མྱོང་ཡོད། དེ་ནི་ངོ་མ་ལེགས་བཤད་རྨ་མེད་པ་ཞིག་རེད། གསོ་མཁན་ཉུང་ན་སློབ་མཁན་རྐྱང་གིས་ཅི་ཞིག་འོང་གི་རེད། འདི་ནི་ཆོས་འཇིག་རྟེ་གང་ནས་བལྟས་ཀྱང་ནོར་འཁྲུལ་ཁོ་ན་ལས་རྒྱལ་ཁ་ཞིག་གཏན་ནས་མ་རེད། ཡང་དག་པར་རྫོགས་པའི་སངས་རྒྱས་ཀྱིས་གཞན་དབང་ཡོངས་གྲུབ་བདེན་གྲུབ་དང་། ཀུན་བཏགས་ཆོས་རྣམས་བདེན་མེད་དུ་གསུངས་དགོས་པའི་རྒྱུ་མཚན་གང་ལ་ཐུག་པ་རེད། གདུལ་བྱ་བྲི་བའི་རིགས་ལམ་འདི་སློབ་གསོ་ཡང་དག་པ་ཞིག་ཨེ་རེད། རེད། ཡང་དག་པ་ཞིག་རེད། སློབ་གསོ་ཟེར་བ་དེ་ནི་ནང་སེམས་ལ་དཔུང་འཇུག་བྱས་ནས་བྱ་བ་ནོར་འཁྲུལ་ཅན་གང་ཞིག་བྱུང་ཡང་ནང་སེམས་ཀྱི་གཡོ་ཕྱོགས་ཤིག་ལས་བྱུང་བར་ངོས་ཟིན་དུ་འཇུག་རྒྱུ་དང་། དེ་གང་ལས་བྱུང་བའི་སེམས་ལ་བཟོ་བཅོས་གཏོང་བྱེད་ཅིག་ལ་སློབ་གསོ་ཟེར་བ་རེད། འདི་འདྲའི་སློབ་གསོ་ནི་དུས་ཡུན་ག་ཚོད་ཅིག་ཕྱིན་ཀྱང་གཏན་དུ་ཞིག་པ་མེད་པས། འདི་ལ་དུས་ནམ་ཡང་དུས་ཀྱིས་བསྐལ་བའི་སློབ་གསོ་ཞིག་ཏུ་གཞལ་ཡང་མི་སྲིད་པ་རེད། སློབ་གསོ་ཡིས་མི་ལ་ཁུངས་ཁྲོ་སློང་གི་ཨེ་རེད། ང་རྒྱལ་དང་ཕྲག་དོག་སོགས་རང་གཞན་སུ་ལ་ཡང་ཕན་ལས་གནོད་ཆེ་བའི་དོན་རྩ་དག་སློང་གི་ཨེ་རེད། གཏན་ནས་སློང་གི་མ་རེད། དེ་དག་གི་ལྡོག་ཕྱོགས་ཁོ་ནར་ཡོད་པ་རེད། དེ་དག་སློང་བྱེད་ཅིག་ལ་སློབ་གསོ་ཟེར་བ་ཨེ་རེད། གཏན་ནས་ཟེར་བ་མ་རེད།

བསྟན་པ་ལ་སྙིང་ནས་ཤ་ཚ་མཁན་ཞིག་ཡིན་ན། དོན་དུ་ནི་སེམས་ཅན་ལ་ཤ་སྙིང་ནས་ཤ་ཚ་བ་ཡིན་པས། ང་ཚོ་སུ་ལ་ཡང་བསམ་ཚུལ་དང་སྤྱོད་ཚུལ་སོགས་ཀྱི་ཐད་ནས་མི་མཐུན་པ་མང་ན་ཡང་ཕན་ཚུན་ལ་གནག་སེམས་མེད་པར་དོན་དངོས་གང་ཞིག་ཡིན་ཀྱང་བགྲོ་གླེང་གི་སྟེང་ནས་གོམ་པ་སྤོ་རྒྱུ་ནི་གནད་དོན་ངོ་མ་ཞིག་རེད། མཁས་དབང་དགེ་ཆོས་མཆོག་གིས། དེས་ན་རིགས་མཐུན་སྐྱེ་བོས་མགྲིན་གཅིག་ཏུ།། བསྒྲགས་པའི་ངར་སྐད་ཁོ་ན་མི་ཉན་པར།། སྐབས་སུ་བདེན་པའི་རྒྱུ་མཚན་དཔང་བཅོལ་ནས།། གཟུ་བོའི་དྲང་ལམ་ཙམ་ཡང་སྨྲ་བར་མཛོད།། ཅེས་རེ་སྐུལ་དང་བཅས་རེ་ཞིག་མཇུག་གྲུབ་པར་བྱས་སོ།།                      

༢༠༡༢ ལོའི་ཟླ་བ་ ༤ ཚེས་ ༣༠ ཉིན་རྫོགས་པར་བྲིས།