ཁྲིམས་ཞིབ་ཁང་གི་གོམ་སྟབས་གསར་པ།

ཆེས་མཐོའི་ཁྲིམས་ཞིབ་ཁང་གིས་གསལ་བསྒྲགས་སྤེལ་ཏེ། ས་གནས་ཁྲིམས་ཞིབ་ཁང་གཉིས་སུ་ཁྲིམས་ཞིབ་པ་གཉིས་དང་ཁྲིམས་དྲུང་གཉིས་ཐད་བསྐོ་བྱ་རྒྱུ་ཡིན་ཟེར།

ཟླ་སྔོན་མའི་ཕྱི་ཚེས་ ༣༠ ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གིས་གསལ་བསྒྲགས་ཤིག་སྤེལ་བའི་ནང་། ས་གནས་ཁྲིམས་ཞིབ་ཁང་གཉིས་སུ་ཁྲིམས་ཞིབ་པ་གཉིས་དང་ཁྲིམས་དྲུང་གཉིས་ཐད་བསྐོ་བྱ་འཆར་ཡོད་ཚུལ་བཀོད་འདུག ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་ལྟར་ན། ས་གནས་ཁྲིམས་ཞིབ་པའི་ས་མིག་དྲུང་འཕར་དང་། ཁྲིམས་དྲུང་གི་ས་མིག་དྲུང་གཞོན་ཡིན་ཡང་། ཐེངས་འདིར་གནས་རིམ་རེ་མར་ཕབ་འདུག་པ་དང་། ཟུང་དྲུང་དང་དྲུང་ལས་གནས་རིམ་ཐོག་འདེམས་རྒྱུགས་བླངས་ཏེ། དེ་དག་གི་ཐོབ་ཐང་ས་མིག་གཞིར་བཟུང་གནས་རིམ་གོང་མའི་ཐོབ་ཐང་སྤྲོད་རྒྱུ་ཡིན་འདུག འདི་ནི་བཙན་བྱོལ་བོད་མིའི་སྤྱི་ཚོགས་ནང་གི་ཁྲིམས་ལུགས་དབང་འཛིན་གྱི་གོམ་སྟབས་གསར་པ་ཞིག་ཡིན་པ་མ་ཟད། མ་འོངས་པར་ཆེས་མཐོའི་ཁྲིམས་ཞིབ་ཁང་ལ་ཁྲིམས་ཞིབ་པ་མ་རག་པའི་དཀའ་ངལ་སེལ་བའི་ཐབས་ལམ་ཉག་གཅིག་ཀྱང་ཆགས་ཡོད་རབས་བཤད།

རྩད་ཞིབ་བྱས་པ་ལྟར་ན། ཆེས་མཐོའི་ཁྲིམས་ཞིབ་ཁང་བཙུགས་ནས་ད་བར་མི་ལོ་ ༢༠ ལྷག་ཕྱིན་པའི་རིང་། ཆེས་མཐོའི་ཁྲིམས་ཞིབ་ཁང་དུ་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་བཅས་སྔ་རྗེས་རིམ་པའི་ཁྲོད་བཅའ་ཁྲིམས་ནང་གསལ་གྱི་འོས་ཆོས་ཚང་མཁན་དང་། ཁྲིམས་ལུགས་རིག་པར་སྦྱངས་པ་ཐོན་མཁན་གཅིག་ཀྱང་བྱུང་མི་འདུག

བཙན་བྱོལ་བོད་མིའི་བཅའ་ཁྲིམས་ནང་ཁྲིམས་ཞིབ་པ་རྣམ་པའི་འོས་ཆོས་སྐོར་ལ། “ཁྲིམས་ཁང་ཞིག་ནང་ལོ་ ༥ རིང་མུ་མཐུད་ཁྲིམས་དཔོན་གྱི་ལས་ཁུར་བྱས་མྱོང་བའམ།  ཡང་ན་ཉུང་མཐར་ལོ་༡༠ རིང་ཁྲིམས་རྩོད་མཁས་པའི་གྲས་སུ་ཚུད་པ་བཅས་ལ་མ་གཏོགས་འོས་བབ་ཡོད་པ་མ་ཡིན” ཞེས་བཀོད་ཡོད་ཀྱང་། བཙན་བྱོལ་སྤྱི་ཚོགས་ཀྱི་དངོས་ཡོད་གནས་སྟངས་ལ་གཞིགས་ཏེ། བཅའ་ཁྲིམས་ནང་ཆ་རྐྱེན་དེ་ལོ་ ༡༠ རིང་ཕྱི་སྣུར་བྱས་ཡོད་ནའང་མུ་མཐུད་ཁྲིམས་ཞིབ་པ་རག་མིན་གྱི་དཀའ་ངལ་འོག སྤྱི་འཐུས་གྲོས་ཚོགས་ནང་བཅའ་ཁྲིམས་བསྐྱར་བཅོས་ཡང་ཡང་གནང་མཐར་ལོ་ ༣༠ བར་འཕར་འགྱངས་བྱ་དགོས་བྱུང་ཡོད།

ཕྱི་ལོ་ ༢༠༠༡ ལོར་ཌེ་ར་ཌུན་དང་། ༢༠༠༢ ལོར་སྦེལ་ཀོབ་ས་གནས་ཁྲིམས་ཞིབ་ཁང་གཉིས་གསར་འཛུགས་གནང་ཡོད་ཀྱང་། ད་བར་དེ་དག་གི་ས་གནས་ཁྲིམས་ཞིབ་པ་གཞུང་ཞབས་གནས་སྤོས་བྱས་པ་གཅིག་མ་གཏོག གཞན་ཚང་མ་ཆོད་གན་ཐོག་ནས་བསྐོ་གཞག་བྱས་ཡོད་ལ། ཆོད་གན་ཞེས་པ་ནི་ས་མིག་ཡོད་པ་ཞིག་ལ་ལས་བྱེད་བསྐོ་མ་ཐུབ་པར་འཕྲལ་སེལ་གྱི་བྱེད་ཐབས་བཙལ་བ་ཞིག་ཡིན་ཞིང་། ཆོད་གན་ཐོག་མང་མཐའ་ལོ་ ༤ ལས་ལྷག་བསྐོ་གཞག་བྱེད་ཆོག་གི་མེད་པ་ལས་བྱེད་འདེམས་ལྷན་གྱི་སྒྲིག་གཞིའི་ནང་གསལ་ཡོད་སྟབས། གོང་གསལ་ཆོད་གན་ལས་བྱེད་དེ་དག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པར་ཡོང་བའི་འོས་ཆོས་ཚང་མེད།

དེ་སྔ་གཞིས་ཆགས་ཁག་ཏུ་གཅིག་ལྕོགས་ས་གནས་ཁྲིམས་ཞིབ་ཁང་ཞེས་ས་གནས་མགོ་འཛིན་ཚོར་ཁྲིམས་ལུགས་དབང་འཛིན་གྱི་འགན་དབང་གཅིག་ལྕོགས་སུ་བསྐུར་ཡོད་པ་དང་། འཛིན་སྐྱོང་དང་ཁྲིམས་འཛིན་གྱི་འགན་དབང་མི་གཅིག་ལ་བསྐུར་བའི་བྱེད་ཐབས་འདི་རིགས་ལྟ་གྲུབ་དང་ལག་ལེན་གང་ལའང་མཐུན་གྱི་མེད་པ་མ་ཟད། ༧གོང་ས་མཆོག་གིས་ཀྱང་དེའི་སྐོར་ལ་འགྱུར་བ་གཏོང་དགོས་པའི་བཀའ་སློབ་ཡོངས་གྲགས་སུ་བསྩལ་ཡོད།

གསར་འགོད་པས་རྒྱུས་ལོན་བྱས་པ་ལྟར་ན། ཉེ་ཆར་གྲོས་ཚོགས་ཚོགས་དུས་ ༣ པའི་སྟེང་ལ་དྭགས་དང་ར་སྦང་ལ་གཉིས་སུ་ས་གནས་ཁྲིམས་ཞིབ་ཁང་གཉིས་གསར་འཛུགས་ཀྱི་སྔོན་རྩིས་ལ་ཆོག་མཆན་སྤྲད་ཡོད་པ་དང་། ས་གནས་ཁྲིམས་ཞིབ་ཁང་གཉིས་དབུ་འཛུགས་བྱུང་ཚེ། བལ་ཡུལ་ཕུད། རྒྱ་གར་ནང་གཅིག་ལྕོགས་ས་གནས་ཁྲིམས་ཞིབ་ཁང་ཡོངས་རྫོགས་ཕྱིར་བསྡུ་བྱས་ཏེ།  ད་ཡོད་ས་གནས་ཁྲིམས་ཞིབ་ཁང་བཞིས་རྒྱ་གར་ནང་གི་བོད་མི་འདུས་སྡོད་ཁུལ་ཡོངས་སུ་ཁྱབ་ཐུབ་པ་བྱ་འཆར་ཡོད་འདུག

འདེམས་རྒྱུགས་ཀྱི་ཆ་རྐྱེན་ནང་བཀོད་པ་ལྟར་ན། ཁྲིམས་ལུགས་རིག་པའི་སློབ་ཐོན་ལག་ཁྱེར་ LLB ཡོད་མཁན་ལ་ཨང་ཀི་ ༥ རེ་དང་། ཁྲིམས་ཞིབ་ཁང་གང་རུང་དུ་ལས་ཀའི་ཉམས་མྱོང་ལོ་ ༢ ཡན་ཡོད་མཁན་ནམ། ཁྲིམས་རྩོད་པའི་སྦྱོང་བརྡར་དང་ཉམས་མྱོང་ཡོད་རིགས་ལ་དམིགས་བསལ་ཨང་ཀི་ ༥ རེ་འཕར་མ་སྤྲོད་རྒྱུ་དང་། བོད་མིའི་སྒྲིག་འཛུགས་ཀྱི་སྲི་ཞུ་བའི་རིགས་རྒྱུགས་འཕྲོད་བྱུང་ན་དེ་སྔའི་ཞབས་ལོ་རྩིས་འགྲོ་གཏོང་རྒྱུའི་གཏན་འབེབས་གནང་འདུག་པ་དང་། འཚང་རྒྱུགས་སྙན་ཞུ་འབུལ་རྒྱུའི་དུས་བཀག་ཕྱི་ལོ་ ༢༠༡༢ ཟླ་ ༥ ཚེས་ ༣༠ ཉིན་བར་བཅད་འདུག།

 གསར་འགོད་པ། དོན་གྲུབ་བཀྲ་ཤིས།