གཟའ་ཉི་མའི་ཉིན་གྱི་ཧྥ་རན་སིའི་སྲིད་འཛིན་འོས་འདེམས་ཁྲོད། ཧྥ་རན་སིའི་སྤྱི་ཚོགས་རིང་ལུགས་ཆབ་སྲིད་ཚོགས་པའི་སྲིད་འཛིན་འོས་མི་ཧོ་ལན་ཌེ་ལ་རྒྱལ་ཁ་ཐོབ་པར། ཨ་རི་དང་དབྱིན་ཇི་སོགས་ཀྱིས་འཚམས་འདྲི་ཞུས་ཡོད་འདུག
ཁ་སང་ཕྱི་ཚེས་ ༦ ཉིན་ཧྥ་རན་སིའི་ནང་རྒྱལ་ཡོངས་སྲིད་འཛིན་འོས་བསྡུ་བྱས་ཡོད་པ་དང་། འོས་བསྡུ་ཡོངས་སུ་གྲུབ་རྗེས་ཀྱི་གྲུབ་འབྲས་ཕྱིར་བསྒྲགས་བྱས་པ་ལྟར་ན། འོས་ཤོག་མཐོ་ཤོས་ཧྥ་རན་སིའི་སྤྱི་ཚོགས་རིང་ལུགས་ཆབ་སྲིད་ཚོགས་པའི་(Soialist Party )འོས་མི་ཧོ་ལན་ཌེ་(Francois Hollande) ལ་འོས་གྲངས་བརྒྱ་ཆ་ ༥༡།༩ དང་། ད་སྔའི་སྲིད་འཛིན་སར་ཁཱོ་ཛེ་ (Nicolas Sarkozy) ལ་འོས་གྲངས་བརྒྱ་ཆ་ ༤༨།༡ བཅས་ཐོབ་སྟེ། ཧོ་ལན་ཌེར་ཧྥ་རན་སིའི་སྲིད་འཛིན་འོས་འདེམས་ཀྱི་རྒྱལ་ཁབ་ཐོབ་ཡོད་འདུག སར་ཁཱོ་ཛེ་ཡིས་ཧོ་ལན་ཌེ་ལ་རྒྱལ་ཁ་ཐོབ་པར་བཀྲི་ཤིས་བདེ་ལེགས་ཞུས་ཡོད་པ་མ་ཟད། ད་ནས་ཧོ་ལན་ཌེ་ཧྥ་རན་སིའི་སྲིད་འཛིན་ཡིན་པ་དང་ཁོང་ལ་ངེས་པར་དུ་བརྩི་བཀུར་བྱ་དགོས་སྐོར་བརྗོད་འདུག
ཧོ་ལན་ཌེར་སྲིད་འཛིན་འོས་བསྡུའི་རྒྱལ་ཁ་ཐོབ་པ་ཕྱིར་བསྒྲགས་བྱས་རྗེས། ཨ་རིའི་སྲིད་འཛིན་ཨོ་བྷ་མས་ཁ་པར་བརྒྱུད་ཧོ་ལན་ཌེ་ལ་རྟེན་འབྲེལ་གྱི་འཚམས་འདྲི་ཞུས་ཡོད་པ་མ་ཟད། ལས་དོན་འདྲ་མིན་ཐོག་ཁོང་དང་ལྷན་དུ་མཉམ་ལས་བྱ་རྒྱུར་རེ་ལྟོས་བྱ་བཞིན་ཡོད་ཚུལ་བརྗོད་ཡོད་འདུག དེ་བཞིན་དབྱིན་ཇིའི་སྲིད་བློན་དང་འཇར་མན་སྲིད་བློན་སོགས་ཀྱིས་ཀྱང་ཁོང་ཧྥ་རན་སིའི་སྲིད་འཛིན་དུ་འདེམས་ཐོན་བྱུང་པར་འཚམས་འདྲི་ཞུས་འདུག
ཧོ་ལན་ཌེ་ནི་ཉེ་ཆར་ཧྥ་རན་སིའི་སྲིད་འཛིན་འོས་བསྡུའི་འགྲན་རྩོད་ཁྲོད་ཞུགས་མཁན་འོས་མི་ ༡༠ ལས་འོས་མི་ ༩ ཡིས་བོད་དོན་ལ་རྒྱབ་སྐྱོར་དང་། ༸གོང་ས་མཆོག་དང་མཇལ་འཕྲད་ཞུ་འདུན་གྱི་རྣམ་འགྱུར་བསྟན་ཡོད་པའི་གྲས་ཀྱི་གཅིག་ཡིན་ལ། ཁོང་གིས་ “ཏཱ་ལའི་བླ་མ་ནི་ནོ་བྷེལ་ཞི་བདེ་གཟེངས་རྟགས་བཞེས་མཁན་གྱི་འཛམ་གླིང་མི་མང་གིས་གུས་བརྩི་ཡོད་པའི་དབུ་ཁྲིད་ཅིག་རེད། ཉེ་སྔོན་ཁོང་གིས་ཆབ་སྲིད་ཀྱི་འགན་དབང་ཡོངས་རྫོགས་རྩིས་སྤྲོད་བྱས་ཟིན་པར་བརྟེན། ང་རང་གི་ངོས་ནས་ཏཱ་ལའི་བླ་མ་དང་མཇལ་འཕྲད་ཞུ་རྒྱུར་འགོག་རྐྱེན་གང་ཡང་མཐོང་གི་མེད།” ཅེས་བརྗོད་ཡོད་པ་རེད།
༡༩༨༡ ལོར་ཧྥ་རན་སིའི་སྤྱི་ཚོགས་རིང་ལུགས་ཆབ་སྲིད་ཚོགས་པའི་འོས་མི་མཱེ་ཊར་རན་ཌི་(Francois Mitterrand) སྲིད་འཛིན་དུ་འོས་འདེམས་བྱུང་པ་ནས་ད་ལྟའི་བར། ཧོ་ལན་ཌེ་ནི་ཚོགས་པ་དེར་ཧྥ་རན་སིའི་སྲིད་འཛིན་འོས་བསྡུའི་རྒྱལ་ཁ་ཐོབ་མཁན་ཨང་གཉིས་པ་དེ་ཆགས་ཡོད།
གསར་འགོད་པ། བནྡེ་སྐྱབས།
