ཧཱེ་ལ་རེ་ཁུ་ལེན་ཊོན་རྒྱ་གར་དུ་སླེབས་འདུག

ཨ་རིའི་རྒྱལ་དོན་དྲུང་ཆེ་ཧཱེ་ལི་རེ་ཁུ་ལེན་ཊོན་རྒྱ་གར་ནང་རྒྱལ་དོན་གཟིགས་སྐོར་དུ་ཡོང་སྟེ། རྒྱ་གར་གཞུང་གིས་ཨེ་རན་ནང་གི་རྡོ་སྣུམ་ནང་འདྲེན་བྱ་རྒྱུ་མཚམས་འཇོག་དགོས་པའི་ནན་སྐུལ་བྱས་ཡོད་འདུག

ཁ་སང་ཕྱི་ཚེས་ ༦ ཉིན་ཨ་རིའི་རྒྱལ་དོན་དྲུང་ཆེ་ཧཱེ་ལི་རེ་ཁུ་ལེན་ཊོན་རྒྱ་ནག་དང་བྷང་ལཱ་ཌེ་ཤི་བཅས་སུ་རྒྱལ་དོན་གཟིགས་སྐོར་གྲུབ་སྟེ་རྒྱ་གར་གྱི་གྲོང་ཁྱེར་ཀོལ་ཀཱ་ཊ་(Kolkata) ནང་འབྱོར་ཡོད་པ་དང་། དེ་རིང་རྒྱ་གར་གྱི་དཔོན་རིགས་དག་དང་ཐུག་འཕྲད་ཐོག ཨེ་རན་གྱིས་རྒྱལ་སྤྱིའི་རྡུལ་མཚོན་བཟོ་སྐྲུན་བཀག་འགོག་གི་ཁྲིམས་ལུགས་རྩིས་མེད་བཏང་སྟེ་རྡུལ་མཚོན་བཟོ་སྐྲུན་བྱེད་བཞིན་པ་དེས། གཅིག་ནས་རྒྱལ་སྤྱིའི་ཁྲིམས་ལུགས་ལ་གཏོར་བརླག་བཟོས་པ་དང་། གཉིས་ནས་ཨེ་ཛི་རལ་ལ་འཇིགས་རྒོལ་བྱེད་བཞིན་པའི་བྱ་སྤྱོད་བཅས་ལ་ངོ་རྒོལ་དང་གནོན་ཤུགས་སྤྲོད་ཆེད། རྒྱ་གར་གཞུང་གིས་ཨེ་རན་གྱི་རྡོ་སྣུམ་ནང་འདྲེན་བྱེད་མཚམས་བཞག་སྟེ། སའོ་ངྷི་ཨ་རབ་སོགས་རྒྱལ་ཁབ་གཞན་དག་ནས་རྡོ་སྣུམ་ནང་འདྲེན་བྱེད་ཆོག་པའི་ནན་སྐུལ་བྱས་ཡོད་འདུག

ཉེ་སྔོན་ཨ་རིའི་གཞུང་གིས་ཨེ་རན་གྱི་རྡུལ་མཚོན་བཀག་སྡོམ་ཐད་གནོན་ཤུགས་སྤྲོད་ཆེད། འཛམ་གླིང་རྒྱལ་ཁབ་ཁག་གིས་ཨེ་རན་ནང་རྡོ་སྣུམ་ཉོ་ཚོང་མཚམས་འཇོག་དགོས་པའི་དཔལ་འབྱོར་གྱི་འགོག་རྐྱེན་སྲིད་ཇུས་བཟུང་པར། ཡུ་རོབ་རྒྱལ་ཁབ་ཁག་དང་ཉི་ཧོང་སོགས་ཀྱིས་ཨེ་རན་རྡོ་སྣུམ་ནང་འདྲེན་བྱེད་མཚམས་བཞག་ཡོད་ཀྱང་། རྒྱ་ནག་དང་རྒྱ་གར། ཊུར་ཀེ ལྷོ་ཨ་ཧྥི་རི་ཀ་སོགས་ཀྱིས་མུ་མཐུན་ཨེ་རན་ནང་རྡོ་སྣུམ་ཉོ་བཞིན་ཡོད་པ་རེད།

དེ་རིང་གཟའ་ཟླ་བའི་ཉིན་ཧཱེ་ལི་རེ་ཁུ་ལེན་ཊོན་དང་ནུབ་བྷན་གྷལ་(West Bangel) གྱི་སྤྱི་ཁྱབ་བློན་ཆེན་བྷ་ནར་ཇེ་(Mamata Banerjee) གཉིས་ཐུག་འཕྲད་བྱས་རྗེས། སྤྱི་ཁྱབ་བློན་ཆེན་གྱིས་ཐེངས་འདིའི་ཐུག་འཕྲད་སྐབས། ཧཱེ་ལི་རེ་ཡིས་ནུབ་བྷན་གྷལ་མངའ་སྡེ་ནང་ཨ་རིས་མ་དངུལ་གྱིས་རོགས་འདེགས་བྱ་རྒྱུའི་ཁས་ལེན་བྱས་ཡོད་པར་བརྗོད་འདུག

གསར་འགོད་པ། བནྡེ་སྐྱབས།