བརྒྱད་གཉིས་བཅུ་དྲུག་གི་གྲོས་ཆོད།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༥༤ སྟེང་གི་རྩོམ་སྒྲིག་པའི་གཏམ།

ལྔ་བཅུ་ང་གྲངས་དང་དྲུག་ཅུ་རེ་གྲངས་ནང་མཉམ་འབྲེལ་རྒྱལ་ཚོགས་ཀྱིས་བོད་དོན་སྐོར་ལ་གྲོས་ཆོད་སྔ་ཕྱིར་བཞག་པའི་ནང་“བོད་མི་མང་གི་རང་ཐག་རང་གཅོད་ཀྱི་ཐོབ་ཐང་གིས་མཚོན་ཁོང་ཚོའི་གཞི་རྩའི་འགྲོ་བ་མིའི་ཐོབ་ཐང་དང་། རང་དབང་བཙན་འཕྲོག་གི་བྱ་སྤྱོད་མཐའ་དག་མཚམས་འཇོག་དགོས”ཞེས་འཁོད་པ་དེ་དག་ང་ཚོས་ཡང་དང་བསྐྱར་དུ་གླེང་གི་ཡོད་ལ། ནང་དོན་ལག་བསྟར་གནང་རྒྱུར་ཡང་གསོལ་བ་ཕུར་ཚུགས་སུ་བཏབ་དང་འདེབས་བཞིན་ཡོད། ད་དུང་བཀའ་སྤྱི་གཉིས་ཀྱིས་བརྒྱུད་ལམ་འདྲ་མིན་ནས་རྒྱལ་ཁབ་གཞན་དག་གི་གྲོས་ཚོགས་གོང་འོག་ནང་བོད་དོན་ཐོག་གྲོས་ཆོད་སྣོལ་འཇོག་ཡོང་བའི་འབོད་སྐུལ་དང་། སྔར་བཞག་ཟིན་པའི་འབྲུ་དོན་ཁག་ལག་བསྟར་མ་ཐུབ་པར་ཟུར་ཟ་དང་འཁང་ར་བྱེད་ཀྱིན་ཡོད། 

    བོད་པའི་ཁ་རྒྱུན་ལ་གཞན་ལ་ལྟ་བའི་མིག་ཡོད་ན། རང་ལ་ལྟ་བར་མེ་ལོང་དགོས་ཞེས་པ་ལྟར་བོད་མི་མང་སྤྱི་འཐུས་ལྷན་ཚོགས་ནང་བོད་པའི་རྩ་དོན་འཐབ་རྩོད་ཐོག་གྲོས་ཆོད་སྔ་ཕྱི་མང་དག་ཅིག་བཞག་ཡོད་ལ། ཉིས་སྟོང་བརྒྱད་ཚུན་ལའང་གཅིག་ལས་གཅིག་ལྷག་གི་གྲོས་ཆོད་རིམ་པ་བརྩེགས་ཡོད། ཁ་ནས་གཞན་ལ་འཆད་པའི་གདོང་ལྤགས་མཐུག་ཀྱང་མཛུབ་མོ་རང་ལ་ཀེར་བའི་གོམས་སྲོལ་མེད་སྟབས། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཆོད་དང་ལག་ལེན་བར་ན་ལོ་ཟླ་སྤུངས་ཡོད་ལ། གྲོས་ཆོད་ཕྱི་མ་ཕྱི་མ་འཇོག་སྐབས་སྔ་མ་སྔ་མའི་འབྲུ་དོན་རྩ་བརྗེད་དུ་སོང་ནས་སྔ་འགལ་ཕྱི་འཛོལ་ཤོར་བ་དང་། ནང་དོན་གཅིག་ཐོག་གྲོས་ཆོད་དགུ་བརྩེགས་བཞག་པ་ཡང་ཉུང་ཉུང་མིན་པ་ཀུན་གྱི་དགོངས་པར་མངའ་གསལ་ཡིན།

    གྲོས་ཆོད་ཟེར་བ་ལག་ལེན་དུ་བསྟར་རྒྱུ་ཞིག་ཡིན་པ་ཤེས་ཀྱི་ཡོད་ན། ཐོག་མར་གངས་ཅན་དཀྱིལ་གཤོངས་ཀྱི་གྲོས་ཆོད་ཁག་ལག་ལེན་བསྟར་རྗེས་ད་གཟོད་གཞན་ལ་ཚ་འདེད་གཏོང་རྒྱུའི་འོས་བབ་ཡོད་ལ། མི་ཆོས་ཀུན་སྤྱོད་ཐད་ནས་ཀྱང་དྲང་བདེན་ཡིན། ད་ལོའི་སྐབས་བཅོ་ལྔ་པའི་གྲོས་ཚོགས་ཚོགས་དུས་གསུམ་པའི་ཉིན་ཐོག་མ་དང་མཐའ་མ་གཉིས་ནང་། སྤྱི་འཐུས་མང་དག་ཅིག་གིས་བོད་ནང་གི་གནས་སྟངས་ཛ་དྲག་ཆེ་ལུགས་ཆེ་ཚུལ་དང་། ཕྱི་ལོགས་ནས་ལས་འགུལ་སྤེལ་དགོས་ལུགས་དགོས་ཚུལ་བཤད་བཤད་པའི་མཐའ་མར། ཡང་བསྐྱར་བོད་དོན་སྐོར་ལ་དོན་ཚན་བརྒྱད་གཉིས་བཅུ་དྲུག་གི་གྲོས་ཆོད་སྔ་ཕྱི་གཉིས་སྣོལ་འཇོག་བྱས་སོང་། གྲོས་ཆོད་ཀྱི་ནང་དོན་ཁག་ལའང་མགྲིན་གཅིག་དབྱངས་གཅིག་གིས་སྤྱི་མོས་རྒྱབ་སྐྱོར་གནང་སོང་།

            བོད་ནང་གཅེས་སྲོག་མཆོད་འབུལ་གནང་མཁན་དག་གི་འབོད་སྒྲ་༧གོང་ས་མཆོག་བོད་དུ་ཕེབས་དགོས་པ་དེ་ཡིན་ལ། བཀའ་ཤག་སྐབས་བཅུ་བཞི་བའི་ཁས་ལེན་དམ་བཅའ་ཡང་༧གོང་ས་མཆོག་བོད་དུ་གདན་འདྲེན་ཞུ་རྒྱུ་དེ་ཡིན། ཡ་མཚན་པ་ཞིག་ལ་སྤྱི་འཐུས་ལྷན་ཚོགས་ཀྱི་བརྒྱད་གཉིས་བཅུ་དྲུག་གི་གྲོས་ཆོད་ནང་བོད་ནང་གི་ཛ་དྲག་གནས་སྟངས་ཐོག་རྒྱལ་སྤྱིའི་ཚོགས་སྡེ་ཁག་གིས་འདི་དང་དེ་གནང་རོགས་ཟེར་ནས་སླར་ཡང་ཞུ་འབོད་དང་། རྒྱ་གཞུང་གིས་འདི་དང་གན་བསྒྲུབ་དགོས་ཟེར་ནས་རེ་སྨོན་དང་སྐྱབས་འཇུག་ཙམ་ལས། བཀའ་སྤྱི་གཉིས་ངོས་ནས་འདི་དང་དེ་བསྒྲུབ་རྒྱུ་ཡིན་ཟེར་བའི་ཁས་ལན་སྣེ་གཅིག་ཀྱང་མི་འདུག་ལ། མང་ཚོགས་དཀྱུས་མའི་ལས་འགུལ་སྤེལ་ཕྱོགས་དང་བླང་དོར་སྲུང་ཕྱོགས་འདི་དང་དེ་ཡིན་གྱི་བཀོད་ཁྱབ་སྣ་གཅིག་ཀྱང་མ་མཐོང་། དོན་ཚན་ཁག་གི་མཐའ་མར་རང་དབང་ལུང་པའི་བོད་མི་ཚོས་བོད་ནང་གི་སློབ་མ་ཚོ་མིག་དཔེར་བཟུང་སྟེ། སོ་སོའི་སྐད་ཡིག་རིག་གཞུང་ལ་དོ་སྣང་དགོས་རབས་ཤིག་འཁོད་ཡོད་པ་དེ་ཡང་ཐུགས་སྣང་གཞེན་སྐུལ་ཙམ་རེད།