གཟའ་ཟླ་བའི་ཉིན་ཊོ་ཁའེ་ཡའོ་རུ་འཛམ་གླིང་ཡུ་གུར་འཐུས་ཚབ་ཚོགས་པའི་ཚོགས་ཆེན་ཐེངས་ ༤ ཚོགས་ཡོད་ལ། རྒྱལ་ཁབ་ཁག་ ༢༠ ནས་ཚོགས་ཞུགས་པ་མི་ ༡༢༠ ལྷག་སླེབས་ཡོད་འདུག
ཟླ་འདིའི་ཕྱི་ཚེས་ ༡༤ ནས་ཉིན་བཞིའི་རིང་འཛམ་གླིང་ཡུ་གུར་འཐུས་ཚབ་ཚོགས་པའི་ཚོགས་ཆེན་ཐེངས་ ༤ པ་དེ་ཉི་ཧོང་རྒྱལ་ས་ཊོ་ཁའེ་ཡའོ (Tokyo) རུ་འཚོགས་བཞིན་པ་ལྟར། ཚོགས་འདུའི་ཐོག་འཛམ་གླིང་ཡུལ་གྲུ་ཁག་ནང་ཡོད་པའི་ཡུ་གུར་འཐུས་ཚབ་མི་སྣ་དང་ཡུ་གུར་མི་རིགས་ཀྱི་འཐབ་རྩོད་ལ་རྒྱབ་སྐྱོར་གནང་མཁན་ཉི་ཧོང་གྲོས་ཚོགས་འཐུས་མི་གཙོས། ཨ་རི་དང་། ཨེ་ཊ་ལི། ཌོར་ཁའེ་སོགས་རྒྱལ་ཁབ་ཁག་ ༢༠ ལྷག་གི་ཡུ་གུར་རྒྱབ་སྐྱོར་གྲོས་ཚོགས་འཐུས་མི་དང་
འབྲེལ་ཡོད་ཚོགས་སྡེ་ཁག་གི་འཐུས་མི་བཅས་མི་གྲངས་ ༡༢༠ མཉམ་ཞུགས་གནང་ཡོད་པ་དང་། ཚོགས་འདུའི་མཛད་སྒོའི་ཐོག་ལྕམ་རེ་བྷེ་ཡ་ལགས་ཀྱིས་རྒྱ་གཞུང་གིས་ཡུ་གུར་བ་དམར་གསོད་གཏོང་བཞིན་པ་མཚམས་འཇོག་དགོས་པ་ནན་བརྗོད་དང་། དེ་བཞིན་རྒྱལ་ཁབ་ཁག་གི་གྲོས་ཚོགས་འཐུས་མི་རྣམས་ཀྱིས་ཀྱང་། རྒྱལ་སྤྱིའི་སྤྱི་ཚོགས་ཀྱིས་རྒྱ་གཞུང་གི་དྲག་གནོན་འོག་ཡོད་པའི་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་གནས་སྟངས་ལ་གཟིགས་རྟོག་རྒྱབ་སྐྱོར་གནང་དགོས་པའི་འབོད་སྐུལ་གནང་ཡོད་འདུག
ཚོགས་འདུའི་མཛད་སྒོ་གྲོལ་རྗེས་ཀྱི་གསར་འགོད་ལྷན་ཚོགས་ཐོག འཛམ་གླིང་ཡུ་གུར་འཐུས་ཚབ་ཚོགས་པའི་ཚོགས་གཙོ་ལྕམ་རེ་བྷེ་ཡ་ལགས་ཀྱིས། རྒྱ་གཞུང་གིས་ཕྱི་རྣམ་པའི་ཐོག་ནས་ཡུ་གུར་ལ་རང་སྐྱོང་སྤྲད་ཡོད་ཀྱང་། དོན་གྱིས་དེ་ལས་ལྡོག་སྟེ་ཡུ་གུར་མི་རིགས་ཤུལ་མེད་རྩ་རྫོགས་སུ་གཏོང་བཞིན་པའི་གནས་སྟངས་འོག་ལྷུང་ཡོད་སྐོར་གསལ་བཤད་དང་། ཁོ་མོའི་ངོས་ནས་མི་རིགས་རང་ཐག་རང་གཅོད་ཀྱི་གནས་བབས་ཐད་རྒྱ་གཞུང་དང་གྲོས་མོལ་བྱ་འདུན་ཡོད་པ་བརྗོད་འདུག
གསར་འགོད་པས་འཛམ་གླིང་ཡུ་གུར་འཐུས་ཚབ་ཚོགས་པའི་མཐར་ཐུག་དམིགས་ཡུལ་ནི་རང་བཙན་ཟིན་གྱི་ཡོད་མེད་སྐོར་དྲིས་པར། ཁོ་མོས་༼ མི་རིགས་གང་དང་གང་ཡིན་ཡང་ཚང་མར་རང་ཉིད་ཀྱི་ལས་དབང་ཐག་གཅོད་ཀྱི་བདག་དབང་ངེས་པར་དུ་ཡོད་དགོས་པ་རེད། ཤར་ཏུར་ཀི་སི་ཐན་ནི་ཡུ་གུར་བ་རྣམས་ཀྱི་མེས་རྒྱལ་རེད།༽ ཅེས་ལན་འདེབས་བྱས་ཡོད་པ་རེད།
རྒྱ་གཞུང་གིས་ཉི་ཧོང་གཞུང་ལ་ཡི་གེ་བཏང་སྟེ་འཛམ་གླིང་ཡུ་གུར་འཐུས་ཚབ་ཚོགས་པ་ནི་རྒྱ་ནག་གི་བདག་དབང་དང་རྒྱལ་ཁོངས་གཅིག་གྱུར་ལ་གཏོར་བཤིག་གཏོང་མཁན་དང་། ལྕམ་རེ་བྷེ་ཡ་ནི་དྲག་སྤྱོད་པར་འབྲེལ་བ་ཡོད་སྐོར་བརྗོད་དེ། ཉི་ཧོང་གཞུང་གིས་ཡུ་གུར་གནད་དོན་ཐད་ཀྱི་ཚོགས་འདུར་འགོག་རྐྱེན་དང་། ལྕམ་རེ་བྷེ་ཡར་ཐོངས་མཆན་ཡིག་ཆ་མི་སྤྲོད་པའི་རེ་སྐུལ་ཞུས་ཡོད་འདུག
ཕྱི་ཚེས་ ༡༡ ཉིན་རྒྱ་གཞུང་ཕྱི་འབྲེལ་མགྲིན་ཚབ་པ་ཧུང་ཧྲི་ཡིས་ ༼ཉི་ཧོང་གཞུང་གིས་རེ་བྷེ་ཡར་ཐོངས་མཆད་སྤྲོད་རྒྱུའི་ཐག་གཅོད་དེར་རྒྱ་གཞུང་གིས་ངོ་རྒོལ་ཡོད༽ཅེས་བརྗོད་ཡོད། ཡིན་ནའང་། ཉི་ཧོང་ཕྱི་འབྲེལ་སྡེ་ཁག་གིས་ “རྒྱལ་སྤྱིའི་ཉེས་དོན་ཉེན་རྟོག་རྩ་འཛུགས་(ICPO)ཀྱིས་ལྕམ་རེ་བྷེ་ཡར་འཇུ་བཟུང་བཀའ་རྒྱ་མ་བཏང་པའི་བར་དུ། ཉི་ཧོང་གཞུང་ངོས་ནས་ཁོ་མོའི་ཐོངས་མཆན་ཐད་བཀག་འགོག་བྱ་ཐུབ་ཀྱི་མ་རེད།” ཅེས་ལན་འདེབས་བྱས་འདུག
ཕྱི་ཚེས་ ༡༣ ཉིན་པེ་ཅིན་དུ་རྒྱ་ནག་སྲིད་བློན་ཝུན་ཇ་པའོ་དང་ཉི་ཧོང་སྲིད་འཛིན་ནའོ་ཊ་ (Noda ) གཉིས་ཐུག་འཕྲད་སྐབས་སུའང་
ཝུན་གྱིས་ཡུ་གུར་དང་སིན་ཁཱ་ཁའོ་གླིང་ཕྲན་(Senkaku Islands) བདག་དབང་གནད་དོན་ནི་རྒྱ་ནག་གི་གཞི་རྩའི་ཁེ་དབང་གནད་དོན་ལ་ཐུག་ཡོད་སྐོར་ནན་བརྗོད་བྱས་ཡོད་ཀྱང་། ཉི་ཧོང་སྲིད་འཛིན་ནའོ་ཊ་ལགས་ཀྱིས་སིན་ཁཱ་ཁའོ་གླིང་ཕྲན་ནི་ཉི་ཧོང་གི་མངའ་ཁོངས་ཡིན་ལ། རྒྱ་ནག་གི་འགྲོ་བ་མིའི་ཐོབ་ཐང་ལས་འགུལ་པ་ཁྲིན་ཀུང་ཁྲིན་གྱི་གནད་དོན་ཐད་ཁོང་གིས་དོ་སྣང་གནང་གི་ཚུལ་བརྗོད་དེ། ཉི་ཧོང་དང་རྒྱ་ནག་བར་འགྲོ་བ་མིའི་ཐོབ་ཐང་གནད་དོན་སྐོར་ནས་གྲོས་མོལ་གནང་དགོས་པའི་བསམ་ཚུལ་བཏོན་ཡོད་པ་རེད།
འཛམ་གླིང་ཡུ་གུར་འཐུས་ཚབ་ཚོགས་པའི་མགྲིན་ཚབ་པ་ཏིས་ལིས་ཞཱ་ཏིས་ལགས་ཀྱིས། ཤིན་ཅང་ས་ཁུལ་གྱི་གནས་སྟངས་སྔར་བཞིན་ཧ་ཅང་ཛ་དྲག་གནས་བབ་འོག་ཡོད་པ་དང་། རྒྱ་གཞུང་གིས་དྲག་གནོན་སྲིད་ཇུས་དེར་མུ་མཐུད་འགྱུར་བ་མ་བཏང་བ་ཡིན་ན། ཤིན་ཅང་ནང་བསྐྱར་དུ་ངོ་རྒོལ་ཟིང་འཁྲུག་འབྱུང་སྲིད་པའི་ཉེན་བརྡ་བཏང་ཡོད་པ་རེད།
གསར་འགོད་པ། ཚེ་རིང་རྒྱལ།
ལངས་ཕྱོགས་ཀྱིས་གཞུང་གི་སྐུ་ཚབ་ཞིག་འགྲོ་མ་ཐུབ་ཀྱང་འདིར་བོད་ཀྱི་ཕྱོགས་ནས་ཚོགས་སྡེ་གང་རུང་གི་སྐུ་ཚབ་ཅིག་མེད་པ་གང་ཡིན་ནམ། གཞོན་ནུའི་སྐུ་ཚབ་ལྟ་བུ་འདིར་མི་འགྲོ་བ་བློ་ཕམ་སྐྱེ་གཞི་ཞིག་རེད། ཕལ་ཆེར་མགྲོན་ཤོག་འདྲ་མ་རག་པ་ཡིན་ནམ།
ཤར་ཏུར་ཀི་སི་ཐན་ནི་ཡུ་གུར་བ་རྣམས་ཀྱི་མེས་རྒྱལ་རེད་ཅེས་པ་ལྟར། བོད་ཀྱང་བོད་མི་རྣམས་ཀྱི་མེས་རྒྱལ་རེད། བོད་དང་ཡུ་གུར་མཉམ་འབྲེལ་གྱི་ཚོགས་པ་ཞིག་དགོས་ཚོད་རེད། ཡུ་གུར་བ་རྣམས་ཀྱིས་རང་ཐག་རང་གཅོད་ཀྱི་དགོད་འདུན་འདོན་གྱིན་འདུག་མོད། བོད་ཀྱིས་རྒྱ་ནག་འོག་གི་མི་རིགས་ས་གནས་རང་སྐྱོང་རྩོད་ཀྱིན་ཡོད།
ཡུ་གུར་ཚོས་རང་བཙན་ལོངས་ཤོག དམར་ཤོགས་མགོ་རྟིང་སློགས་ཤོག། ག་ས་ག་ནས་ཡིན་ད། ཡུ་གུར་རྒྱལ་ལོ།