ཟླ་འདིའི་ཕྱི་ཚེས་ ༡༥ ཉིན་དཔལ་ལྡན་འབྲས་སྤུངས་སྒོ་མང་གྲྭ་ཚང་དུ། བོད་ཀྱི་རིག་གཞུང་ཟུར་སྦྱོང་འཛིན་གྲྭ་ཐེངས་༡༧ པ་དེ་མགོ་འཛུགས་འདུག
དཔལ་ལྡན་འབྲས་སྤུངས་བཀྲ་ཤིས་སྒོ་མང་ནང་པའི་རིག་གཞུང་ཚོགས་པ་དང་སློབ་གྲྭ་ཐུན་མོང་གིས་གོ་སྒྲིག་འོག ལོ་ལྟར་ས་གནས་གཞིས་ཆགས་ཁག་གི་སློབ་ཕྲུག་ཚོར་དབྱར་ཁའི་གུང་གསེང་དུས་ཡུན་ཟླ་གཅིག་རིང་བོད་ཡིག་ཟུར་སྦྱོང་འཛིན་གྲྭ་ཚོགས་ཀྱི་ཡོད་པ་ལྟར། ཟླ་འདིའི་ཕྱི་ཚེས་ ༡༥ ཉིན་འབྲས་སྤུངས་སྒོ་མང་གྲྭ་ཚང་གི་སློབ་གྲྭའི་ནང་བོད་ཀྱི་རིག་གཞུང་ཟུར་སྦྱོང་འཛིན་གྲྭ་ཐེངས་ ༡༧ དེ་མགོ་འཛུགས་ཡོད་འདུག ཐེངས་འདིའི་ཟུར་སྦྱོང་འཛིན་གྲྭར་ས་གནས་གཞིས་གྲོང་ཁག་དགུའི་འཛིན་རིམ་དང་པོ་ནས་བཅུ་གཅིག་བར་གྱི་སློབ་ཕྲུག་གྲངས་ ༢༢༠ མཉམ་ཞུགས་ཡོད་པ་དང་། གྲྭ་སའི་དང་བླངས་དགེ་རྒན་ ༡༢ གྱིས་སློབ་ཕྲུག་ཚོར་སུམ་རྟགས་དང་། དག་ཡིག ཡིག་གཟུགས། བོད་སྐད་ཐ་སྙད་གསར་བ། ཆོས་འབྱུང་། རིགས་ལམ། ནང་ཆོས་ངོ་སྤྲོད། མཛད་རྣམ་སོགས་སློབ་ཁྲིད་བྱ་རྒྱུ་ཡིན་འདུག
ཟུར་སྦྱོང་འཛིན་གྲྭ་དེའི་དམིགས་ཡུལ་ནི། ས་གནས་གཞིས་ཆགས་ཁག་གི་སློབ་ཕྲུག་ཚོས་བོད་རང་གི་རིག་གནས་ལ་དོ་སྣང་ཡོང་རྒྱུར་སྐུལ་སློང་བྱས་ཏེ། སློབ་མིའི་བོད་ཡིག་གི་ཤེས་ཚད་ཡར་རྒྱས་དང་། བོད་སྐད་གཙང་མ་བཤད་ཐུབ་རྒྱུར་དམིགས་པ་ཞིག་ཡིན་ལ། ༡༩༩༥ ལོར་བོད་ཀྱི་རིག་གཞུང་ཟུར་སྦྱོང་འཛིན་གྲྭ་གསར་དུ་མགོ་བཙུགས་པ་ནས་བཟུང་ད་ལྟའི་བར་སྔ་ཕྱིར་ཐེངས་ ༡༧ ལ་ཚོགས་ཡོད་པ་རེད།
གསར་འགོད་པ། ཚེ་རིང་རྒྱལ།
སྦྲ་དཔལ་ལྡན་གྱིས་རྒྱབ་སྐྱོར་གནང་བ་ཐུགས་རྗེ་ཆེ།
བོད་སྐད་གཙང་མ་ཞིག་དང་བོད་ཡིག་དག་མ་ཞིག་ཤེས་མཁན་ཨ་མདོ་བ་རྣམས་མ་གཏོགས་མེད་པས་གྲོགས་པོ་རྒྱ་རྙི་ཁྱོད་མ་དགའ་དབུས་ལ་སོང་རུང་མ་མཇལ་ཕྱིར་ཡོང་རུང་སྡུག་ཅོང་རེད།
རྒྱ་རྙི་ལགས་རང་ཚོད་ཀྱི་མ་བསྡད་ནས་རོ་མདོང་གི་མ་རྒྱབས་ན་ཡག། ཁྱེད་ཀྱི་ལས་འགན་གཙོ་བོ་དཀྲུག་ཤིང་རྒྱགས་རྒྱུ་དང་ཕྲག་དོག་ལངས་རྒྱུ་དེ་ཡིན་ཚོད་རེད་
འདི་ལ་ལོ་མང་པོ་ཞིག་གི་སྲོལ་རྒྱུན་གྱི་འདུ་ཤེས་ཙམ་རེད། ཕན་ཐོགས་གང་ཡང་མེད་པ་རེད། མི་མང་སྔོན་ནས་མིང་བརྫིག་བྱེད་ཐབས་ཙམ་ལས་དོན་དངོས་ཀྱིས་སྦྱོང་བརྡར་ཞིག་ཆགས་ཀྱིན་མེད།
དགེ་ཕྲུག་གསར་པ་ཚོ་ལ་དགེ་རྒན་གསར་པ་ཚོས་ཟླ་གཅིག་རིང་གུང་སེང་ཕུད་བའི་ཉིན་༢༠་རིང་ཚོད་ལྟའི་སྦྱོང་བརྡར་ཙམ་སྤྲོད་ཀྱིན་ཡོད་པ་རེད།
དགེ་རྒན་མང་ཤོས་ཨམ་མདོ་བ་རྐྱང་རེད། སློབ་ཕྲུག་ཚོས་སྐད་མ་གོ་ནས་ཉིན་༡༥་འགོར་གྱིན་རེད། སྐད་གོ་ནས་ཉིན་ལྔའི་རྗེས་ནས་སྲོལ་རྒྱུན་གྱི་ཡིག་རྩལ་ཞིག་གིས་སློབ་ཡུན་རྫོགས་འགྲོ་བ་རེད། རླབས་ཆེན་གང་ཡང་མ་རེད། ཡིན་ནའང་། མེད་པ་ལས་ཡོད་པ་ཙམ་ལའང་ངོ་སོ་དགོས་པ་ཞིག་རེད།
ངོ་མ་དངོས་གནས་ཡག་པོ་འདུག་རིག་གཞུང་ལ་ཞེན་པ་དང་། གཞོན་སྐྱེས་ལ་གོ་སྐབས་མང་ཙམ་གནང་སྟེ་དོ་སྣང་ཆེ་བ་བྱུང་ན་དེ་ལས་ལྷགས་པའི་མི་རིགས་ཀྱིས་ཐབ་རྩོད་དང་། གསོན་གནས་ཐུབ་རྒྱུར་བྱ་བ་བྱེད་རྒྱུ་མེད་པས་ཐུགས་རྗེ་ཆེ་བ་མ་ཟད་དགོན་པ་དང་། བཤད་སྒྲ་ཁག གང་ན་ཡོད་པ་ཚང་མས་དེ་ཁུལ་གྱི་བོད་མའི་གཞོན་སྐྱེས་ཚོར་བོད་ཡིག་གཙོ་བྱས་ཀྱིས་ལམ་སྟོན་གནང་སྐྱོང་ཡོང་རྒྱུའི་རེ་བསྐུལ་ཞུ་རྒྱུ་ཡིན། དབུ་མ་དང་། རང་བཙན་ཁ་རྩོད་རྒྱབ་ནས་ཉིན་བསྐྱལ་བ་ལས། དེས་ཁ་ཡོད་ལག་ཡོད་ཀྱིས་མི་རིགས་དང་། གཞོན་སྐྱེས་ལ་ཕན་ཐོག་ཆེ་བ་མཐོང།།
ངས་བལྟས་ན་ཟུར་སྦྱོང་དགེ་རྒན་ལ་ཡིག་ནོར་རྐྱང་རྐྱང་གི་ཟིན་བྲིས་གཉེར་མཁན་ཚ་སྒང་ཕོ་ཉ་ལྟ་བུ་མགྲོན་འབོད་བྱེད་ཐུབ་ན་བཟང་གི ཁོས་བཤད་སྟངས་ལ་བལྟས་ན་ཁོ་འོས་འཚམ་རེད་འདོད་འདུག མི་རིགས་འདིའི་ལས་དབང་ངོ་མ་རྩོག་གི མི་དམངས་ལ་ཕན་པའི་ལས་ཙུང་ཙམ་སྒྲུབ་ན་ཡང་དེ་ལ་མར་འཐེན་རྐྱང་རྐྱང་བྱེད་ཀི།
ཐོག་མར་འབྲས་སྒོ་མང་གི་མཁན་ལས་འདུས་མང་ལ་ཐུག་རྗེ་ཆེ་ཞེས་སྙིང་ནས་ཞུ། བོད་མི་རིགས་འདི་ཉིད་དེང་སྐབས་འཆི་གསོན་གྱི་མཚམས་སུ་སླབ་པ་དང་དེའི་ཚེའི་སྲོགས་ལྟ་བུ་བོད་ཀྱི་སྐད་ཡིག་འདི་ཡང་རླུང་ནང་གི་མར་མེ་དང་གཅིག་མཚུངས་སུ་གྱུར་བཞིན་པའི་དུས་འདིར་སློབ་ཕྲུག་གུང་སེང་གི་དུས་ཚོད་བེད་སྤྱད་དེ་བོད་ཀྱི་མ་འོངས་སོན་རྩ་དག་ལ་བོད་མིའི་སྐད་ཡིག་སློབ་ཁྲིད་ཀྱི་འཛིན་གྲྭ་ཞིག་གོ་སྒྲིགས་གནང་བར་དངོས་གནས་སྔགས་བརྗོད་ཀྱི་ཡུལ་ལས་མ་འདས། ཡིན་ན་ཡང་སློབ་ཁྲིད་གཅིག་གཅིག་མིག་མིག་བྱེད་ཀྱི་ཡོད་ཟེར་བའི་གསར་སྒྲགས་ལ་མི་གཙོ་བར་དེའི་སྐབས་དགེ་རྒན་ཚད་ལྡན་གོ་སྒྲིགས་བྱེད་དགོས་པ་དེ་ཁ་ཚ་དགོས་ཐུག་ཞིག་རེད། གཞན་སློབ་ཕྲུག་འདི་དག་བེད་སྤྱེད་དེ་བོད་ཡིག་ཐ་ཐོར་ཤེས་མཁན་གྱི་དགེ་རྒན་རྫུན་མ་དག་སྦྱོང་རྡ་བྱེད་ས་ལྟ་བུ་ཞིག་དུ་གྱུན་ན་རྗེས་ཕྱོགས་ལས་དོན་གང་ཞིག་སྒྲུབ་ན་ཡང་དཀའ་ངལ་དུ་ལྷུང་སྲིད་ལ། སློབ་ཕྲུག་དེ་དག་གི་དུས་ཚོད་ཀྱང་ཆོས་ཟོས་ལས་མ་འདས། ངས་དེ་འདྲ་གཅིག་མིན་པར་ངོས་འཛིན་བྱེད་བཞིན་ཡོད་ཀྱང་དྲན་གསོ་བྱེད་ཆེད་དུ་ཕུལ་བ་ཙམ་ཡིན་ལགས།
འབྲས་སྒོ་མང་གྲྭ་ཚང་གི་ཟུར་སྦྱོང་སློབ་གྲྭ་ནས་མ་བསྐུལ་དང་བླང་གིས་འབྲེལ་ཡོད་ཁག་ལ་བོད་ཀྱི་རིག་གཞུང་ངོ་སྤྲོད་སོགས་གནང་བ་བཀའ་དྲིན་ཆེན་པོ་རེད།
དཔལ་ལྡན་འབྲས་སྒོ་མང་སློབ་གྲྭའི་སྤྱི་ཁྱབ་དབུ་འཛིན་དང་ལས་མི་རྣམས་ལ་རྗེས་སུ་ཡི་རངས་བྱེད་ཀྱི་ཡོད། བོད་ཡིག་ནི་མི་རིགས་དེའི་ཡོད་ཙད་ཡིན་དུས་མ་འོངས་སོན་རྩ་རྣམས་ལ་རྨང་གཞི་ངེས་ཅན་ཞིག་འཇོག་རྒྱུ་ཧ་ཅང་གནད་དོན་ཞིག་ཏུ་སེམས