སྐུ་ཕྱཱར་ཐུགས་འཚབ་གནང་དགོས་མ་མཆིས་ཀྱང་དུས་རྒྱུན་དོ་སྣང་གནང་གལ་ཆེ།

དེ་རིང་གཟའ་ཉི་མའི་ཉིན་ཕྱི་དྲིལ་ལྷག་པ་ཚེ་རིང་ཚོགས་ཁང་ནང་། ༸གོང་ས་མཆོག་གི་སྐུ་ཕྱཱའི་ཐད་ལ་བོད་མིའི་སྒྲིག་འཛུགས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། རྒྱ་ཆེའི་མང་ཚོགས་ཀྱིས་སྐུ་ཕྱཱར་ཐུགས་འཚབ་གནང་དགོས་མ་མཆིས་ཀྱང་། དུས་རྒྱུན་དོ་སྣང་མཉམ་རུབ་གནང་གལ་ཆེ་བ་བསྒྲགས་སོང་།

དེ་རིང་ཕྱི་ཚེས་ ༢༠ ཉིན་གྱི་སྔ་དྲོ་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། ༸གོང་ས་མཆོག་གི་སྐུ་ཕྱཱའི་སྐོར་ལ་དཔལ་ལྡན་བཀའ་བློན་ཁྲི་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་དང་། བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་གཉིས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། ཆོས་རིག་བཀའ་བློན་མཆོག་ནས་༸གོང་ས་མཆོག་གི་སྐུ་ཕྱཱའི་ཐད་ཀྱི་བཀའ་ཤག་གི་གསལ་བསྒྲགས་སྒྲོག་སྦྱངས་དང་། བདེ་སྲུང་བཀའ་བློན་མཆོག་གིས་སྐུ་ཕྱཱའི་ཐད་སྒྲིག་འཛུགས་ཀྱི་ངོས་ནས་ནམ་ཞག་རྒྱུན་དུ་དོ་གལ་གཙིགས་འཛིན་གནང་གི་ཡོད་པས། བོད་ཕྱི་ནང་གི་རྒྱ་ཆེའི་མང་ཚོགས་ཀྱིས་ཐུགས་འཚབ་དངངས་སྐྲག་གནང་དགོས་མ་མཆིས་ཀྱང་། བོད་མི་ཡོངས་ཀྱིས་དུས་རྒྱུན་དོ་སྣང་དང་མཉམ་རུབ་གནང་གལ་ཆེ་བ་བསྒྲགས་སོང་།  གསར་འགོད་གསལ་བསྒྲགས་དེར་རྒྱ་གར་དང་བོད་པའི་གསར་འགོད་པ་ ༢༥ ཙམ་མཉམ་ཞུགས་བྱས་འདུག་ལ། ༸གོང་ས་མཆོག་གི་སྐུ་ཕྱཱའི་བདེ་འཇགས་དང་འབྲེལ་བའི་དོགས་གཞི་ཁག་གི་ཐད་དྲི་བ་དྲིས་ལན་ཀྱང་གནང་ཡོད་པ་རེད།  

ཆོས་རིག་བཀའ་བློན་པདྨ་ཆོས་འབྱོར་མཆོག་གིས་བཀའ་ཤག་གི་གསལ་བསྒྲགས་སྒྲོག་སྦྱངས་གནང་བའི་ནང་། “༸གོང་ས་མཆོག་གི་སྐུ་ཕྱཱའི་སྲུང་སྐྱོབ་ཀྱི་གནད་དོན་དེ་ནི་ཧ་ཅང་སེམས་ཚབ་ཆེན་པོ་བྱེད་དགོས་པའི་གནད་དོན་ཞིག་ཡིན། སྤྱིར་༸གོང་ས་མཆོག་གིས་སྐུ་ཕྱཱར་ཉེན་ཁ་ཡོད་པའི་གནས་ཚུལ་དེ་ཙམ་གྱི་ཚབས་ཆེན་པོ་ཞིག་ལ་དགོངས་བཞེས་མ་མཛད་ཀྱང། ༸གོང་ས་མཆོག་གི་སྐུ་ཕྱཱར་ཉེན་ཁ་འདྲ་མིན་ཡོད་པ་དེ་དག་སྡེ་སྲུང་ལས་ཁུངས་ཀྱིས་ཧ་ཅང་འགན་ལྕི་བོར་རྩིས་བཞིན་ཡོད། ཕྱི་ལོ་ ༢༠༡༠ ཕྱི་ཟླ་ ༦ ནང་བོད་ནས་གནས་ཚུལ་འབྱོར་གསལ་ལྟར་ན། རྒྱ་མིའི་གསང་བའི་ལས་ཁུངས་ཀྱིས་བུད་མེད་ཁག་ཅིག་ལ་དམིགས་བསལ་སྦྱོང་བརྡར་སྤྲད་དེ་༸གོང་ས་མཆོག་གི་སྐུ་ཕྱཱར་གནོད་འཚེ་བྱ་རྒྱུ་མ་ཟད། སྐུ་སྲུང་བའི་ཕྲུལ་ཆས་ཀྱིས་ཞིབ་གཤེར་བྱེད་སྐབས་ཤེས་ཚོར་དཀའ་བའི་རྫས་དུག་རིགས་ཀྱི་རྫས་སྦྱོར་ཧ་ཅང་ཡར་ཐོན་ཅན་དེ་འདྲ་བརྒྱུད། ༸གོང་ས་མཆོག་གི་སྐུ་ཕྱཱར་གནོད་འཚེ་བྱ་རྒྱུའི་ཐབས་ལམ་འཚོལ་ཞིབ་བྱེད་བཞིན་ཡོད་པའི་གནས་ཚུལ་འབྱོར་ཡོད། ཕྱོགས་མཚུངས་ཕྱི་ལོ་ ༢༠༡༡ ཟླ་ ༡༠ ནང་གནས་ཚུལ་འབྱོར་གསལ་ལྟར་ན། རྒྱ་ནག་གསང་བའི་ལས་ཁུངས་ནས་གཡོ་ཐབས་ཀྱིས་༸གོང་ས་མཆོག་གི་སྐུའི་འཕྲོད་བཞེས་ཀྱི་གནས་སྟངས་རྒྱུས་ལོན་བྱེད་ཐབས་བྱས་པ་ཙམ་མ་ཟད། མགོན་པོ་གང་ཉིད་མཆོག་གི་སྐུའི་གཟུང་ཁྲག་དང་ཆབ་གཅིན། དེ་བཞིན་དབུ་སྐྲ་སོགས་རག་ཐབས་ཆེད་རྒྱ་ནག་གཞུང་གིས་བོད་ནང་གི་བོད་མི་ཁག་ཅིག་ལ་ཆེད་མངགས་བརྒྱུད་སྐུལ་བྱས་ཏེ། རྒྱ་གར་དུ་༸གོང་ས་མཆོག་མཇལ་བཅར་ཡིན་ཁུལ་གྱིས་གཏོང་ཐབས་བྱེད་བཞིན་ཡོད་པའི་གནས་ཚུལ་འབྱོར་ཡོད།” ཅེས་འཁོད་འདུག

ཡང་གསལ་བསྒྲགས་དེའི་ནང་དོལ་རྒྱལ་ཚོགས་པས་རྒྱ་གཞུང་དང་ངན་འབྲེལ་བྱ་བཞིན་པའི་སྐོར་ལ། “༸གོང་ས་མཆོག་གིས་བོད་མིའི་སྤྱི་ཚོགས་དེ་བཞིན་མང་གཙོའི་ལམ་བཟང་ཐོག་བཅོས་བསྒྱུར་མཛད་ཐབས་དེར་གོ་སྐབས་བཟུང་སྟེ། བོད་མིའི་སྤྱི་ཚོགས་ཁྲོད་མཁྲེགས་བཟུང་ཅན་རེ་ཟུང་ལ་གདེང་སྤོབས་གསར་པ་བསླེབས་ཏེ་ལངས་ཕྱོགས་མི་མཐུན་པ་བཟུང་ཡོད་པ་ནི་དོལ་རྒྱལ་ཚོགས་པ་ཆགས་ཡོད། གནས་ཚུལ་དེ་ནི་༸གོང་ས་མཆོག་གིས་བོད་མི་ཚོར་རྡོ་རྗེ་ཤུགས་ལྡན་བསྟེན་གསོལ་མི་རུང་བའི་ལམ་སྟོན་མཛད་པ་ནས་བཟུང་བྱུང་བ་ཞིག་ཡིན། མཁྲེགས་བཟུང་ཅན་དེ་དག་ཁྲོད་ལྷ་མི་སྲུང་སྐྱོབ་ཚོགས་པ་ (Dorje Shugden Devotees Charitable and Religious Society) ཟེར་བ་དེ་གཙོ་བོ་ཆགས་ཡོད། ཚོགས་པ་དེའི་ལས་ཁུངས་ཨ་མ་དེ་ཕྱི་ལོ་ ༡༩༩༦ ཕྱི་ཟླ་ ༥ ནང་རྒྱ་གར་གྱི་རྒྱལ་ས་ལྡི་ལིར་བཙུགས་ཡོད། ཚོགས་པ་དེའི་རྗེས་འབྲང་པ་ཚོ་ཕལ་ཆེར་གདུག་རྩུབ་ཆེ་ཤོས་ཆགས་ཡོད། རྒྱ་གར་ཉེན་རྟོག་པས་ཚོགས་པ་དེའི་མི་སྣས་ཕྱི་ལོ་ ༡༩༩༧ ཕྱི་ཟླ་ ༢ ནང་༸གོང་ས་མཆོག་གི་བཞུགས་སྒར་ཕོ་བྲང་དང་ཧ་ཅང་ཉེ་བའི་སར་དགེ་འདུན་པ་གསུམ་དམར་གསོད་བཏང་ཡོད་པ་ངོས་འཛིན་ཐུབ་སྟེ་ནག་ཉེས་བཙུགས་ཡོད། དགེ་འདུན་པ་གསུམ་གྱི་ཁོངས་ནས་གཅིག་སྐུའི་གསུང་བསྒྱུར་ཡིན། དེར་བརྟེན་ཕྱི་ལོ་ ༢༠༠༧ ཕྱི་ཟླ་ ༦ ནང་རྒྱལ་སྤྱིའི་སྐོར་སྲུང་ལྷན་ཚོགས་ (Interpol) ཀྱིས་ལག་དམར་བ་གསུམ་འཛིན་བཟུང་ཆེད་བརྡ་ཁྱབ་བཏང་ཡོད། རྒྱ་ནག་གཞུང་ནས་ཀྱང་གསང་བའི་ཐོག་ནས་དོལ་རྒྱལ་རྗེས་འབྲང་པ་ཚོར་རྒྱབ་སྐྱོར་བྱེད་བཞིན་ཡོད་པའི་གནས་ཚུལ་རིམ་པར་ཐོན་ཡོད། དེ་བཞིན་ཕྱི་ལོ་ ༢༠༡༡ ཕྱི་ཟླ་ ༣ ནང་བཙུགས་པའི་བྱང་ཨ་རིའི་དགེ་ལུགས་མཐུན་ཚོགས་ཟེར་བའི་དོལ་རྒྱལ་ཚོགས་པའི་མགོ་གཙོ་ཁག་ཅིག་གིས་ཨ་རིའི་གྲོང་ཁྱེར་ནེའུ་ཡོག་ཏུ། རྒྱ་ནག་སྐམ་སའི་དཔོན་རིགས་ཁག་ཅིག་དང་ཐེངས་འགའ་ཐུག་འཕྲད་བྱས་ཡོད་པ་མ་ཟད། རྒྱ་ནག་ཏུའང་ཡང་དང་བསྐྱར་དུ་བསྐྱོད་བཞིན་ཡོད།” ཅེས་བཀོད་འདུག

གསར་འགོད་གསལ་བསྒྲགས་ཐོག་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་གིས། “ད་རེབ་གནས་ཚུལ་དེར་ཉེ་ཆར་བརྒྱུད་ལམ་མང་པོས་དོ་སྣང་ཞེ་དྲགས་བྱས་པར་བརྟེན་ནས། བོད་ཕྱི་ནང་གཉིས་སུ་༸གོང་ས་མཆོག་ལ་དད་གུས་དང་དགའ་ཞེན་ཡོད་མཁན་མང་པོ་ཞིག་གིས་བློ་འཚབ་དང་སྦྲགས། བོད་མིའི་སྒྲིག་འཛུགས་ལ་སྐུ་ཕྱཱའི་བདེ་འཇགས་ཐད་སྐད་ཆ་འདྲི་མཁན་མང་པོ་སླེབས་ཡོང་གི་འདུག རྣམ་པ་ཚང་མས་མཁྱེན་གསལ་ལྟར་རེད།  ཉེན་སྲུང་རིག་པའི་འགྲོ་ལུགས་དང་། ཉེན་སྲུང་གི་རིགས་མང་པོ་ཞིག་ནམ་རྒྱུན་བརྒྱུད་ལམ་ཁག་ལ་འགྲོ་བའི་གོམས་གཤིས་ཡོད་པ་མ་རེད་ལ། ཕྱིན་ནའང་དགོས་པ་མེད་པ་ཞིག་ཡིན་དུས། གནས་ཚུལ་རིགས་གཅིག་དུས་ཚོད་གང་ལ་གང་འཚམ་ཕྱིན་པ་རེད་དེ། རྣམ་པ་ཚོར་མཚོན་ན་གསར་བ་ཆགས་ཡོད་པ་རེད། ང་ཚོ་སྲུང་སྐྱོབ་ཀྱི་ལས་ཀ་བྱེད་མཁན་ཞིག་གི་ངོས་ནས་བཤད་ན། གནས་ཚུལ་དེ་འབྱོར་མ་ཐག་ནས་༸གོང་ས་མཆོག་གི་སྐུ་ཕྱཱའི་ཐད་ལ་འབྲེལ་བ་ཡོད་པ་མཁྱེན་དགོས་མཁན་ཚང་མས་མཁྱེན་བསྡད་ཡོད་པ་དང་དོགས་ཟོན་གནང་གི་ཡོད་པ་མ་ཟད། དེའི་ཐད་སྔོན་འགོག་གནང་ཐབས་གོ་སྡུར་གནང་སྟེ་དང་ལག་བསྟར་བྱེད་བཞིན་པ་རེད། དེར་བརྟེན། དེ་འདྲའི་ཐད་ནས་རྒྱ་ཆེའི་མང་ཚོགས་ཀྱིས་དོགས་འདྲོག་དང་ཐུགས་འཚབ་གནང་དགོས་པའི་གནས་སྟངས་གང་ཡང་ཡོད་པ་མ་རེད།” ཅེས་བརྗོད་སོང་།

མཇུག་མཐར།  བདེ་སྲུང་བཀའ་བློན་མཆོག་གིས་  “དགྲ་ཕྱོགས་ནས་ཉེན་ཁ་ཡོད་པ་དེ་ཡོངས་གྲགས་ཀྱི་གནས་ཚུལ་ཞིག་རེད་དེ། གནས་ཚུལ་ཇི་མ་ཇི་བཞིན་ཕྱི་ལོགས་ལ་གསལ་འདོན་གནང་སྟེ།  རྒྱ་ནག་གི་གསང་བའི་ལས་ཁུངས་ཀྱིས་བོད་རིགས་ལ་སྦྱོང་བརྡར་སྤྲད་ཀྱི་ཡོད་པ་དང་། དེའི་ནང་ནས་ཀྱང་དམིགས་བསལ་བུད་མེད་བེད་སྤྱོད་བྱེད་བཞིན་པ་རྩལ་དུ་བཏོན་དེ་ལབ་དགོས་དོན་ནི། རྒྱ་ཆེའི་མང་ཚོགས་ཀྱི་ངོས་ནས་དོ་སྣང་ཡོང་ཆེད་རེད།” ཅེས་བརྗོད་དེ།  ད་ལྟའི་སྤྱི་ཚོགས་ཀྱི་གནས་བབ་ཐད་ནས་དོལ་རྒྱལ་ཚོགས་པ་དེ་སྐུ་ཕྱཱའི་ཐོག་ཉེན་ཁ་ཆེན་པོ་ཡོད་པ་ནི། རྒྱ་གར་གཞུང་གིས་ཉེན་སྲུང་གཏན་འབེབས་ཀྱི་ཡིག་ཆའི་ནང་བཀོད་ཡོད་པ་ལྟར། དོལ་རྒྱལ་ཚོགས་པའི་མི་བོད་ཕྱི་ནང་གཉིས་སུ་ཡོད་སྟབས། མི་སུ་འདྲ་ཞིག་གིས་གྱོན་གོས་ག་འདྲ་ཞིག་གྱོན་ཏེ་རྣམ་པ་ཇི་འདྲ་ཞིག་གི་སྒོ་ནས་ཡོང་མིན་བཤད་ཁག་པོ་ཆགས་ཡོད་པས། རྒྱ་ཆེའི་མང་ཚོགས་ཀྱི་ངོས་ནས་གནས་ཚུལ་རིགས་དོགས་གཞི་བྱུང་བ་དང་མཁྱེན་པ་ཡིན་ན། ལས་ཀ་བྱེད་མཁན་ལ་ཚུར་བཀའ་གནང་དགོས་པ་དེ་ཞེ་དྲག་གལ་ཆེན་པོ་ཡིན་པ་ནན་བརྗོད་གནང་སོང་།

གཞན་ཡང་གསལ་བསྒྲགས་དེའི་ནང་། ཕྱི་ལོ་ ༢༠༠༨ ཟླ་ ༤ ཟླ་མགོར་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཀྲང་ཅིན་ལི་ཡིས་ (Zhang Qingli) གཞུང་གི་ལས་སྣེ་མཐོ་གྲས་ཀྱི་ཚོགས་འདུ་ཞིག་བསྐངས་ཏེ་གསོད་དགོས་པ་རྣམས་གསོད་དགོས་ངེས་དང། བཙོན་འཇུག་བྱེད་དགོས་པ་རྣམས་བཙོན་འཇུག་བྱེད་དགོས་ངེས་ཡིན། ཞེས་བསྒྲགས་ཡོད་པ་མ་ཟད། ཕྱི་ལོ་ ༢༠༡༢ ཟླ་ ༡ ནང་ད་ལྟའི་བོད་རང་སྐྱོང་ལྗོང་གི་དམར་ཤོག་དྲུང་ཆེ་ཁྲིན་ཆོན་ཀོ་ (Chen Quanguo) གྱིས་ཁ་བྲལ་བ་ཚོར་དམག་རྒོལ་བྱེད་དགོས་ཞེས་བསྒྲགས་ཡོད་ལ། ཉེ་བའི་ལོ་འདིར་རྒྱ་ནག་གཞུང་གིས་བོད་ནང་དུ་༸གོང་ས་མཆོག་ལ་ངོ་རྒོལ་གྱི་ལས་འགུལ་སྔར་བས་ཤུགས་ཆེ་རུ་བཏང་ཡོད་པ་མ་ཟད། ༸གོང་ས་མཆོག་ཕྱི་རྒྱལ་དུ་ཆིབས་སྒྱུར་བསྐྱངས་སྐབས་ངོ་རྒོལ་གྱི་ལས་འགུལ་སྤེལ་དགོས་པ་དེ། འབྲེལ་ཡོད་རྒྱ་རིགས་ལས་བྱེད་པ་ཚོར་བཀོད་མངགས་བྱས་ཡོད་པའི་སྐོར་ཐེར་འདོན་དང་སྦྲགས། ད་ལྟའི་བར་རྒྱ་གར་གཞུང་གིས་སྐུ་ཕྱཱའི་སྲུང་སྐྱོབ་ཐོག་ཐུགས་འཁུར་ཆེན་པོས་ལས་གཞི་དང་མཐུན་འགྱུར་ཚགས་ཚུད་ཞུ་དང་ཞུས་མུས་ཡིན་པར་བཀའ་དྲིན་རྗེས་དྲན་དང། སྐུ་ཕྱའི་གནད་དོན་ཐོག་འབྲེལ་ཡོད་བོད་མི་ཚང་མས་ཡིད་གཟབ་དགོས་པ་བརྗོད་འདུག  

ཕྱི་ལོ་ ༢༠༡༢ ཟླ་ ༥ ཚེས་ ༨ ཉིན་བཞུགས་སྒར་རྡ་རམ་ས་ལར་དབྱིན་ཇིའི་གསར་ཤོག་སན་ཌེ་ཊེ་ལི་གྷ་རཕ་ (Sunday Telegraph) ཞེས་པའི་གསར་འགོད་པས། ༸གོང་ས་མཆོག་ལ་སྐུ་ཕྱཱའི་སྲུང་སྐྱོབ་དང་འབྲེལ་བའི་གནད་དོན་སྐོར་བཀའ་འདྲི་ཞུས་པར། ༸གོང་ས་མཆོག་གིས་རྒྱ་གར་དུ་བཙན་བྱོལ་ལ་འབྱོར་མ་ཐག་འབྲེལ་ཡོད་སྡེ་སྲུང་ལས་ཁུངས་ནས་སྐུའི་ཕྱཱའི་སྲུང་སྐྱོབ་ཐོག་ཧ་ཅང་གལ་ཆེན་པོར་བརྩིས་ཏེ་འགན་ཁུར་འཁྱེར་ཡོད་སྐོར་བཀའ་ལན་སྩལ་བ་མ་ཟད། ཉེ་ལམ་བོད་ནང་བདེ་འཇགས་སྲུང་སྐྱོབ་བྱེད་མཁན་བོད་མི་ལས་བྱེད་ཅིག་གིས་རྒྱ་གཞུང་གིས་བོད་རིགས་བུད་མེད་ཁག་ཅིག་ལ་ཆེད་མངགས་དམིགས་བསལ་གྱི་སྦྱོང་བརྡར་འོག  སྐྲ་དང་མཇལ་དར་ལ་དུག་རྫས་བསྲེས་ཏེ་གསར་མཇལ་ཡིན་ཁུལ་གྱིས་ཕྱག་དབང་ཐོབ་ཐབས་བྱས་ཏེ། ༸གོང་ས་མཆོག་གི་སྐུ་ལ་ཟློ་བའི་ངན་བྱུས་ཤོམ་བཞིན་ཡོད་པའི་གནས་ཚུལ་བོད་ནས་བཏང་འབྱོར་བྱུང་ཡོད་ཀྱང་། སྐུ་ཕྱཱར་ངན་བྱུས་ཤོམ་བཞིན་པའི་གནས་ཚུལ་དེར་དཔྱད་ཞིབ་བྱ་ཐབས་མེད་སྐོར་གསར་འགོད་པ་དེར་བཀའ་ལན་སྩལ་ཡོད་པ་རེད།