ཚད་མཐོའི་ཞི་རྒོལ་གྱི་མེ་ལྕེ་ཞལ་ཆེམས།

ས་འོད།

དང་པོ། མེ་ལྕེ་ཞལ་ཆེམས་ཀྱི་འབྱུང་རྐྱེན་དང་དགོས་དོན།

༢༠༠༨ ལོའི་ས་བྱི་ཞི་རྒོལ་ཆེིན་མོའི་སྔ་རྗེས་སུ་བོད་མིའི་ཞི་རྒོལ་གྱི་རྣམ་པ་གསར་བ་ཞིག་གི་མགོ་བརྩམས་པ་སྟེ། རང་ལུས་མེ་རུ་བསྒྲོན་ཏེ་བསྟན་སྲིད་ཉམས་ཆག་གི་གནས་ལས་སྲུང་ཐབས་མཛད་ཅིང་། བདག་པོས་གཞན་གཅེས་ཀྱི་ཚད་མཐོའི་ཞི་རྒོལ་གྱི་མེ་ལྕེ་དྲག་ཏུ་འབར་ཞིང་རྒྱུན་འབར་གྱི་ཕྱོགས་སུ་བསྐྱོད་དགོས་བྱུང་། དེ་ཡང་མི་ལོ་དྲུག་ཅུའི་རིང་རྒྱ་ནག་དམར་གཞུང་གིས་ཐལ་སྤྱོད་ཅན་གྱི་སྲིད་ཇུས་འོག་ལུས་ལ་མནར་སྤྱོད་ཙམ་དུ་མ་ཟད། སེམས་སུ་ལྷན་སྐྱེས་སུ་མཆིས་པའི་བོད་ཀྱི་སྲོལ་རྒྱུན་བསམ་བློ་དང་ནང་ཆོས་ཀྱི་བླ་སློབ་འབྲེལ་བ། སྐད་ཡིག་རིག་གཞུང་གི་ངོ་བོ་དང་། ཁོར་ཡུག བེད་སྤྱོད་བྱས་ཏེ། གཅིག་སྡུད་རིང་ལུགས་པའམ་དྲག་སྤྱོད་རིང་ལུགས་དང་མི་མཐུན་པས་ན། དེ་རྒྱུ་མཚན་དུ་བཟུང་སྟེ་མཐའ་གཅིག་ཏུ་ཁ་བྲལ་རིང་ལུགས་པ་དང་གསར་བརྗེ་ངོ་ལོག་པའི་ཉེས་མིང་འོག་ཚད་ལས་འདས་པའི་མནར་གཅོད་རྒྱུད་མར་བཏང་དང་གཏོང་བཞིན་ཡོད་པ་རེད། དེར་བརྟེན། བོད་མི་རྣམས་ཀྱིས་མི་ལོ་ཉིས་སྟོང་ལྷག་གི་ལོ་རྒྱུས་ལྡན་པའི་བོད་རྒྱལ་ཁབ་དང་མི་རིགས་རིག་གཞུང་བཅས་ཀྱི་ཆེད་དུ་རང་སྲོག་གི་འགྲོ་གྲོན་ནི་ཕོ་ཟད་མོ་ཐུག་དང་། མོ་ཟད་མདང་སྐྱེས་བྱིས་པར་ཐུག་པའི་བར་བློས་གཏོང་མི་བྱེད་ཐབས་མེད་བྱུང་ཞིང་། དེ་ལྟར་བཏང་དང་གཏོང་བར་ནམ་ཡང་ཞུམ་པ་སྐྱེས་མྱོང་མེད། དཔའ་ངར་ཞུམ་མེད་ཀྱི་རྒྱལ་གཅེས་པ་ཚོས་“རྔ་ཇི་ལྟར་རྡུང་ན་འཆམ་དེ་ལྟར་འཁྲབས་”ཏེ་དྲག་སྤྱོད་ཚད་ལས་འདས་པའི་ཁ་གཏད་དུ་རང་ལུས་མེ་ལ་བསྲེགས་ཏེ་ཚད་མཐོའི་ཞི་རྒོལ་གནང་དགོས་བྱུང་བ་ཡིན།

ང་ཚོས་སངས་རྒྱས་ཀྱི་མདོ་རུ་གསལ་བའི་དེད་དཔོན་སྙིང་རྗེ་ཆེན་པོའི་མཛད་པ་དང་དཔེ་སྦྱོར་བྱས་ཏེ། བོད་མིའི་རང་ལུས་མཆོད་མེར་ཕུལ་བའི་རྒྱུ་རྐྱེན་སོགས་ལ་བལྟས་པ་ཡིན་ན། མཆོད་མེའི་ངོ་བོ་ནི་ནང་བསྟན་ཆོས་ལུགས་དང་ཡོངས་སུ་མཐུན་པར་མ་ཟད། དགོས་དོན་ཡང་ནང་བསྟན་གྱི་སྙིང་བོ་ཞི་བདེ་དང་གཞན་ཕན་ལ་ཐུག་པར་ངོ་འཕྲོད་པ་ཡིན། དེ་ཡང་དེད་དཔོན་སྙིང་རྗེ་ཅན་ཀྱིས་ཚོང་མི་ལྔ་བརྒྱའི་མགོ་དཔོན་གནང་སྟེ་ཚོང་ལ་ཕྱིན། ཚོང་རྫས་གྱ་ནོམ་པ་བྱུང་ནས་ཕྱིར་འཁོར་མཚམས་ཚོང་མིའི་གྲས་པ་ཞིག་གི་རྫས་རྣམས་བདག་འདོད་ཀྱིས་གཞན་གསོད་པར་བརྩམ་པ་ན། དེད་དཔོན་དེས་མི་ལྔ་བརྒྱ་འཆི་བ་ལས་ཐར་ཕྱིར་སྒེར་སེམས་ཅན་གྱི་མི་ངན་དེ་བསད་ཅིང་། ཁོང་གིས་དེ་ལྟར་བསད་པས་འཇིག་རྟེན་སྤྱིའི་ལུགས་དང་མི་འགལ་བར་མ་ཟད། ནང་བསྟན་ཆོས་ལུགས་ལྟར་ནའང་གཞན་གྱི་ཕན་བསམ་བློ་མངོན་འགྱུར་བྱུང་བ་ཞིག་ཡིན། རྒྱུ་མཚན་ནི་ཁོང་གི་མཛད་བབ་དང་གཞན་ཕན་གྱི་བསམ་བློ་བཅས་ནི་ནང་བསྟན་ཆོས་ལུགས་ཀྱི་བསྟན་བཅོས་རྣམས་སུ་བྱང་ཆུབ་སེམས་དཔའི་བློ་སྟོབས་ལ་ངོས་འཛིན་བྱས་ཡོད། དེ་མཚུངས་སུ་རྒྱ་བོད་དུང་ཕྱུར་མང་བོའི་རང་དབང་གི་ཕྱིར་དུ་རང་ལུས་མེ་རུ་བསྲེགས་པའི་བོད་ཀྱི་དཔའ་རྒོད་ཕོ་མོ་རྣམས་ཀྱིས་དེད་དཔོན་སྙིང་རྗེ་ཆེན་པོའི་མཛད་པ་དང་མཐུན་པར་མཛད་པ་ལ། འཚེ་བའི་ལས་དང་ནང་བསྟན་ཆོས་ལུགས་དང་མི་མཐུན་ཚུལ་བསྒྲགས་པ་ནི་རྒྱུས་མེད་ཀྱི་རྒྱུས་གཏམ་ལས་མ་འདས་སོ།། ནོར་རྫས་བདག་འདོད་ཀྱི་མི་དེ་ནི་དམར་གཞུང་གི་མགོ་གཙོ་རྣམས་དང་མཚུངས་ཤིང་། མི་ལྔ་བརྒྱ་ཡང་རྒྱ་བོད་མི་མང་དང་དཔེ་དོན་འགྲིགས། ཡུལ་གྱི་ཆ་ནས་ཚོང་མི་ལྔ་བརྒྱ་རྒྱ་མཚོའི་དཀྱིལ་དུ་མཆིས་པའི་སྐབས་ཡིན་ལ། རྒྱ་བོད་མི་མང་ཡང་འཇིགས་སུ་རུང་བའི་དམར་དམག་གི་མེ་མདའི་སོ་ཁས་ཕྱི་ནང་བར་གསུམ་བསྐོར་བའི་དཀྱིལ་དུ་གནས་པས་གཡོ་འགུལ་མི་ནུས་པ་དང་ཀུན་ནས་མཚུངས།

དུས་ཀྱི་ཆ་ནས་དུས་རབས་ཉེར་གཅིག་ནང་འཛམ་གླིང་མི་མང་མང་གཙོའི་ལམ་ལུགས་སྟེང་རང་དབང་ཡོངས་སུ་རྫོགས་པའི་དེང་རབས་ཀྱི་དུས་སྐབས་མངོན་གྱུར་བྱུང་ཡོད་ཀྱང་རྒྱ་བོད་མི་མང་དྲག་སྤྱོད་སྲིད་གཞུང་གི་མེ་འདའི་འོག་མཆིས་པས་དེད་དཔོན་ལྟ་བུའི་བོད་མི་སྙིང་སྟོབས་ཅན་རྣམས་ཀྱིས་རང་སྲོག་བློས་གཏོང་གི་ལས་འགུལ་འདི་དག་མཚམས་མ་ཆད་པར་བརྩམས་དགོས་བྱུང་བ་ཞིག་ཡིན་འདུག ཚད་མཐོའི་ཞི་རྒོལ་གྱི་མེ་ལྕེ་མཆེད་ཟིན་པ་ནས་ད་ལྟ་ཡང་ད་དུང་དྲག་སྤྱོད་སྲིད་གཞུང་གིས་བཙན་གནོན་སྒོས་གཏུམ་དྲག་གི་སྤྱོད་པ་མཚམས་འཇོག་མ་བྱས་པ་ཡིན་ན། བཙན་པོའི་བུ་རྒྱུད་རྣམས་ཀྱིས་དཔའ་ངར་ཞུམ་མེད་ཀྱི་མེ་ལྕེའི་ཞི་རྒོལ་མུ་མཐུད་དུ་གནང་ངེས་པ་ཡིན་ཏེ། རྒྱུ་མཚན་ནི། ཇི་སྲིད་བོད་ཀྱི་རང་དབང་དང་ཆོས་རིག་སྐད་ཡིག་བཅས་རང་སོར་མ་ཆུད་པ་དེ་སྲིད་དུ་“ཆོས་ཀྱི་དོན་དུ་སྲོག་གཏོང་བ”ལ་སོམ་ཉི་དང་འཇིགས་སྣང་མེད་པ་ཡིན་འདུག ད་དུང་ནང་བསྟན་ཆོས་ལུགས་སུ་རང་བདེ་གཞན་ལ་གཏོང་བ་དང་གཞན་གྱི་སྡུག་བསྔལ་སེལ་བའི་ཆེད་དུ“མེ་ནང་བསྐལ་བ་རྒྱ་མཚོར་གནས་དགོས་ཀྱང་། སྙིང་རྗེས་མི་སྐྱེ་”བར་སློབ་སྟོན་གནང་ཡོད་པས་ན། ནང་བསྟན་ཉམས་སུ་ལེན་པའི་བོད་མི་ཚོར་མཚོན་ན། རྒྱ་ནག་དུང་ཕྱུར་བཅུ་གསུམ་དང་བོད་མི་ས་ཡ་དྲུག་གི་གཞི་རྩའི་རང་དབང་ཕྱིར་དུས་ནམ་ཡང་ཞུམ་པ་མེད་ཅིང་། གཞན་ཕན་ལྷག་བསམ་གྱིས་ལྷོད་པ་མེད་པའི་སྒོ་ནས་རང་ལུས་ཚ་ཞིང་བསྲེགས་པའི་དབྱིངས་སུ་བསྟིམས་ཟིན་པ་དེ་ལྟར། མ་འོངས་པར་ཡང་བསྟིམ་ངེས་པར་ཐེ་ཚོམ་མེད་པ་ཞིག་ཡིན། དཔེར་ན། ཉེ་བའི་ཉིན་ཤས་སྔོན་འཛམ་ཐང་བཙན་པོའི་དཔའ་སྲས་ཆོས་འཕགས་དང་བསོད་ནམས་གཉིས་ཀྱིས་“སྤྱིར་སངས་རྒྱས་ཀྱི་བསྟན་པ་དང་འགྲོ་བའི་བདེ་སྐྱིད། ལྷག་པར་དུ་བོད་ཀྱི་རང་དབང་ཆེད་དུ་རང་སྲོག་མེ་རུ་སྒྲོན་པ་”ཡིན་པའི་ཞལ་ཆེམས་བསྩལ་བས་ཤེས་པ་བཞིན་ནོ།།

དེ་ལྟ་མོད་དེ། འགྲོ་མི་ཐམས་ཅད་ཚོར་བཅས་ཡིན་པ་དང་། ཚོར་འདུའི་མྱོང་ཚུལ་མཚུངས་པའི་ཆ་ནས་དམར་གཞུང་གི་མིག་སྔ་ན་དམར་ལྷོག་ལྷོག་ཏུ་འབར་བ་ནི་ཤ་ཁྲག་གི་ལུས་ཕུང་ཞིག་ལས། རྩ་ཕུང་མེ་རུ་བསྒྱུར་བའི་ཁ་དོག་ཙམ་ག་ལ་ཡིན། ཡིན་ཡང་དྲག་སྤྱོད་སྲིད་གཞུང་གིས་རྩ་སྐྱ་མེ་ལ་ཤོར་བའི་གནས་བབ་ཙམ་ལས་མཐོང་སྣང་དུ་འཇོག་གི་མེད་པའི་ཁར། ད་དུང་དྲག་སྤྱོད་ཡིན་ཚུལ་དང་ཕྱིའི་ཁ་བྲལ་རིང་ལུགས་པས་ངན་སྐུལ་བྱས་ཚུལ་གྱིས་རང་སྐྱོན་གཞན་འགེབ་བྱེད་ཀྱིན་པ་ནི་ཇི་འདྲའི་སྐྱི་ཡ་བ་ཞིག་རེད་ཨང་། འུ་ཅག་གི་མེ་ལྕེའི་དགོས་དོན་གྱི་ཆ་ནས་ངོ་བོ་དང་འགྲུབ་ཐབས་ལ་བསམ་ན། ཡིད་སྐྱོ་བ་ཞིག་ལ་འབར་ཟིན་པའི་བོད་ཀྱི་མེ་ལྕེ་ཡི་ཕུང་བོ་དག་ནི་བར་སྣང་སྟོང་བའི་དབྱིངས་སུ་ཡལ། ཤུལ་ཏུ་ལུས་པའི་བོད་མི་ས་ཡ་དྲུག་གིས་མིག་མཆུ་རྒྱ་མཚོའི་རླབས་རླངས་དང་འགྲོགས་ཏེ་ཡལ་ཟིན་པའི་མེ་ལྕེ་ཡི་རྗེས་སུ་ཐོར། བཙན་བྱོལ་གཞུང་མང་ཡོངས་ཀྱིས “རང་གི་རིགས་ལ་ཞེན་པ་དཀར་བོའི་མདངས”སྙིང་ཁུང་རིས་པའི་སྟེང་ནས་མངོན་པར་བྱས་ཏེ་མཚམས་འཇོག་དང་དམར་ལུགས་པའི་དྲག་སྤྱོད་ཞི་བསྒྱུར་གནང་བཞེད་ཀྱི་ཐབས་ཤེས་རྒྱུད་མར་གནང་གིན་ཡོད་པ་དེ་ལྟར་ཡང་། བོད་ཀྱི་དཔྱད་བརྗོད་པ་འགས་ནི“རང་ཤ་སྟེར་ལ་གུས་པར་བྱས་”པའི་དཔའ་རྒོད་རྣམས་ཀྱི་མེ་ལྕེའི་གྲུབ་འབྲས་གནས་སྐབས་སུ་“སྣང་དུ་མི་རུང་”བའི་ཕྱིར་ན། རང་གཞན་གཉིས་ཕན་གྱི་དབུ་མའི་གྲོས་མོལ་གྱི་སྒོ་མོ་ཕྱེས་དང་འབྱེད་བཞིན་པའི་ལངས་ཕྱོགས་འདི་ནས། འཛམ་གླིང་དུས་འགྱུར་གྱི་ཚ་རླབས་ལ་རྒྱང་ལྟ་བྱེད་དགོས་པར་བརྗོད་ཀྱི་ཡོད།

དེ་ཡང་དཀྱིལ་ཤར་ཨ་རབ་ཀྱི་སྒེར་གཅོད་པ་རྣམས་ལྔ་ལམ་དུ་བརྫངས་པའི་མང་གཙོའི་འགུལ་སྐྱོད་དང་འབར་མའི་འགྱུར་ལྡོག་གི་ངོ་བོ་ལྟར་ལྡོག་ཏུ་མེད་ཅིང་མངོན་པར་མི་གསལ་ལ། ངོས་འཛིན་མི་ནུས་པའི་ཚ་རླབས་མེ་ལྟར་འབར་བའི་ནང་ཁུལ་འཐབ་རྩོད་ཀྱི་འབར་རྫས་ནི་དྲག་སྤྱོད་སྲིད་གཞུང་གི་མིག་སྔར་འཕྱུར་བ་ལ་མངོན་དུ་ཕྱོགས་ཟིན་པར་དགོངས་པ་ཡིན་སྲིད་མོད། དེ་ཡང་མེ་ལྕེའི་དགོས་དོན་གྱི་དོན་གནད་དང་ཉེ་བའི་བཤད་ཕྱོགས་ཤིག་ཡིན་པར་མི་སེམས་ཏེ། དམར་པོ་མེ་རུ་གྱུར་ཟིན་པའི་བཙན་པོའི་དཔའ་རྒྱུད་ཚོའི་ཞལ་ཆེམས་སུ་ངེས་གསལ་བྱུང་བ་ནི། ཁོང་ཚོས་རང་ཉིད་དམར་བོ་མེ་རུ་བསྒྱུར་བའི་སྐབས་སུ་༸གོང་ས་མཆོག་གི་གསེར་ཞལ་རིན་པོ་ཆེ་ཕོ་བྲང་ཆེན་པོ་པོ་ཏ་ལའི་ཁྲི་འཕང་མཐོན་པོའི་སྟེང་དུ་མཇལ་བའི་སྐལ་བ་མེད་པར་“རྒྱལ་ངན་གཞན་གྱིས་གཙེས་”པའི་འོག་ནས་འཚོ་བ་ལས་འཆི་བ་དགའ་ལ། འཆི་བ་ཡང་༸མགོན་པོ་གང་གི་གསེར་ཞལ་མི་རབས་རྗེས་མ་རྣམས་ཀྱིས་མཇལ་བའི་ཕྱིར་དུ་ཡིན་པར་བརྗོད་པས་སོ།། དེ་ཡང་ཇི་འདྲའི་ཚིག་ཉུང་ལ་དོན་ཀུན་འདུས་པ་ཞིག་རེད་ཨང་༸གོང་ས་སྐྱབས་མགོན་ཆེན་པོ་རྣམ་འདྲེན་བཞི་བའི་ཞལ་སྐྱིན་གང་ཉིད་རང་ཡུལ་བོད་དུ་ཞབས་སོར་འཁོད་པ་ཡིན་ན། ཇི་ལྟར་ཉིད་བྱེད་དབང་བོ་གླིང་བཞིར་བགྲོད་པའི་ཚེ་ན་འཛམ་གླིང་སྣང་བར་བྱེད་པའི་འོད་ཟེར་ཀུན་ནས་འཕྲོ་བ་དང་བཅས་པ་ལྟར། བོད་མི་རྣམས་ཀྱི་ལོ་ངོ་དྲུག་ཅུའི་རིང་གི་བཙན་གནོན་དང་དྲག་སྤྱོད་ཀྱི་འོག་ནས་“ཡུན་རིང་སྙིང་ལ་བརྣགས་པའི་འདོད་དོན་”འགྲུབ་པའི་ཕྱིར་རོ།།

གཉིས་པ།  མེ་ལྕེ་ཞལ་ཆེམས་ཀྱི་འབོད་བསྐུལ།

ལར་རྒྱ་བོད་གཉིས་ཀྱི་ལོ་རྒྱུས་ཁྲོད་འགྲོ་མགོན་ཆོས་རྒྱལ་འཕགས་པ་དང་༸གོང་ས་སྔ་མ་རྣམས་ཀྱིས་དུས་རབས་མང་བོར་འཚེ་མེད་ཞི་བདེས་རྒྱ་བོད་སོག་གསུམ་བུ་བསྐྱངས་པར་གསལ་བ་དང་ལྷག་པར་དུ་༸གོང་ས་རྣམ་འདྲེན་བཅུ་བཞི་བའི་སྙིང་རྗེའི་འོད་དཀར་གྱིས་འཛམ་གླིང་སྐྱེས་འགྲོ་ཀུན་“སྲིད་ལམ་དུད་པར་འཁྱམས་པ་ངལ་གསོ་”བསྩལ་ཐོབ་མཛད་ཀྱང་། བོད་མི་ས་ཡ་དྲུག་གི་“བདེ་བླག་རྩ་བ་དྲིན་ཆེན་བླ་མ”་སྟེ། བྱམས་བརྩེའི་མ་ཡུམ་གཅིག་བུ་དང་ཡུན་རིང་ཁ་ཁར་བཏང་བས་མགོན་པོ་གང་ཉིད་དྲན་པའི་འབོད་སྐུལ་དམར་པོ་མེ་ལྕེ་ཡི་རྣམ་པའི་སྒོ་ནས་བསྟན་པས་སོ།། དེ་ཡང་ང་ཚོས་དྲང་འཁྱོག་གང་ཡིན་དངོས་ཡོད་གནས་སྟངས་ལ་གཏུགས་ནས་བཤད་དགོས་པས་ན། སྙིགས་དུས་ཀྱི་སེམས་དཔའ་ཆེན་པོ་སྤྲུལ་སྐུ་བསོད་བྷ་ལགས་ཀྱི་མེ་ལྕེ་ཞམ་ཆེམས་སུ་“ད་ང་རང་གི་མི་སྒེར་གྱི་དབང་གིས་འདི་ལྟ་བུའི་ལས་བགྱིས་པ་མ་ཡིན་ལ། འདོད་དང་བསྙེན་བཀུར་གྱི་དབང་གིས་ཡང་འདི་ལྟ་བུ་བྱས་པ་མ་ཡིན། རང་གི་བསམ་པ་རྣམ་པར་དག་པའི་སྒོ་ནས་རང་གི་ཚེ་འདི་སྙིང་སྟོབས་ཆེན་པོས་སྟག་མོ་ལ་ལུས་ཡོངས་སུ་བཏང་བ་ལྟར་བཏང་བ་ཡིན། དེ་བཞིན་དུ་བོད་ཀྱི་དཔའ་བོ་དཔའ་མོ་རྣམས་ཀྱིས་ཀྱང་དེ་བཞིན་སྲོག་བཏང་བ་ཡིན་མོད། ལག་ལེན་གྱི་ཐོག་ནས་ཞེ་སྡང་ལྟ་བུའི་ངང་ནས་གཤེགས་སོང་བ་ཡིན་པས་ཐར་ལམ་བགྲོད་ཐུབ་མིན་དཀའ་མོ་རེད།

དེར་བརྟེན་དེ་དག་གི་ལམ་སྣ་འདྲེན་པའི་དེད་དཔོན་དང་། འདི་ལྟ་བུའི་མཆོད་པ་ཕུལ་བའི་དགེ་བའི་མཐུ་ལ་བརྟེན་ནས་མ་འོངས་པར་སེམས་ཅན་ཐམས་ཅད་རྣམ་མཁྱེན་བླ་ན་མེད་པ་སངས་རྒྱས་ཀྱི་སར་བགྲོད་པའི་སྨོན་འདུན་དང་། རྒྱལ་ཁབ་ཕྱི་ནང་གི་བླ་སྤྲུལ་ཡོངས་ཀྱི་སྐུ་ཚེ་བརྟན་པ་དང་། ཁྱད་པར་དུ་༸རྒྱལ་དབང་བསྟན་འཛིན་རྒྱ་མཚོ་མི་འཇིགས་གདོང་ལྔའི་ཁྲི་ལ་མངའ་གསོལ་ཏེ། བོད་ཀྱི་ཆོས་སྲིད་གཉིས་ཀྱི་མངའ་བདག་ཏུ་བཞུགས་པའི་སྨོན་འདུན་དུ།།”འཚེ་མེད་ཞི་བའི་ངོ་རྒོལ་གྱི་རྩེ་མོར་སོན་པའི་ལས་འགུལ་གསར་བའམ། ཡང་ན་བྱེད་ཐབས་གཞན་ཟད་ཀྱི་ལས་འགུལ་སྟེ། ཡ་ཆད་ཅིང་འུ་ལ་ཐུག་པའི་ཞི་རྒོལ་གྱི་འབོད་བསྐུལ་ཞུ་བ་ལྟ་བུའོ།། དེས་ན་གཞན་ལ་འཚེ་བ་ནི་ལྟ་ཅི་གཞན་གྱི་རང་དབང་དང་གཞི་རྩའི་ཐོབ་ཐང་གི་ཆེད་དང་། བོད་མི་རྣམས་ཀྱི་ཆོས་དད་རང་དབང་སྟེ། བོད་མི་རྣམས་གང་ལ་དད་མོས་ཡོད་ན་དེར་དད་པ་དང་གུས་བཀུར། ཞལ་མཇལ་གསུང་ཞུས་མི་ཆོག་པར་མ་ཟད། མཚན་སྨོད་དང་སྒྲོ་སྐུར་ཡིད་ཀྱིས་མི་བཟོད་པ་བྱ་དགོས་པའི་མུན་པ་མུན་ནག་གི་བཙོན་ཁང་ལས་རྒྱལ་བའི་ཕྱིར་དུ། རང་ལུས་མེ་ལ་བསྟིམས་ནས་འབོད་བསྐུལ་ཞུས་པ་ནི་ཡོ་གཟུར་མེད་པ་ཞིག་གོ། གལ་སྲིད་གཞན་ལ་འཚེ་བའི་སྒོ་ནས་རང་གི་མངོན་འདོད་སྒྲུབ་པ་ཡིན་ན་ཞི་བདེ་དང་ནང་བསྟན་ལ་མི་རུང་བ་དེའི་ཕྱིར་ན། སེམས་དཔའ་ཆེན་པོ་འདི་དག་གིས“རང་ཉིད་གཅེས་འཛིན་རྒུད་པ་ཀུན་གྱི་སྒོ།།”རུ་དམིགས་ཏེ། གཞན་གྱི་ཞི་བདེ་དང་རང་དབང་གི་ཕྱིར་དུ་རང་གཞན་ཕན་ཚུན་བརྗེ་བ་སྟེ། “ཀུན་ལ་ཐམས་ཅད་སྙིང་རྗེ་ཡིས།། སྦྱིན་པར་བྱེད་པས་སྦྱིན་པ་རྫོགས།། ཆགས་བཅས་ཡན་ལག་བཅད་ཀྱང་ནི།། མི་འཁྲུགས་བཟོད་དང་ཚུལ་ཁྲིམས་ཀྱི།།”ཕ་རོལ་དུ་ཕྱིན་པའི་སྤྱོད་པ་ལ་བསླབ་ཅིང་སློབས་པའི་འབོད་བསྐུལ་གནང་བའོ།།

མདོར་ན། གཞན་ཕན་གྱི་གནས་ཚད་མཐོན་པོར་བསྙེགས་པའི་མེ་ལྕེའི་འབོད་སྐུལ་གྱིས་འདྲེན་ངེས་པ་ནི། དྲག་སྤྱོད་པའི་དཀྱིལ་དུ་དཀྱིལ་ཤར་ཨ་རབ་ཀྱི་སྒེར་གཅོད་མགོ་གཏིང་བརྗེ་བ་ལྟ་བུའི་མེ་དཔུང་འབར་རྒྱུ་དེ་ཡིན་ལ། མི་འགྱིང་བར་ང་ཚོས་ངང་སྒུག་བྱེད་འོས་པ་ཡང་དམར་ལུགས་མགོ་གཙོ་རྣམས་ཀྱིས་རྒྱ་བོད་མི་མང་གི་མདུན་དུ་ནག་ཉེས་ངོས་ལེན་བྱེད་ཚུལ་ཀྱི་ལྟད་མོར་བལྟ་རྒྱུ་དེ་ཡིན་པར་བརྗོད་པ་ལྟར་རམ། དེ་བས་ཀྱང་མེ་ལྕེའི་འབོད་སྒྲའི་བསྟན་དོན་གྱི་ཟུར་ཆ་གཅིག་སྟེ། བོད་མི་རང་ངོས་ནས་སོ་སོའི་ཆོས་དང་རིག་གཞུང་། སྲོལ་རྒྱུན་བཅས་རང་ཉིད་གང་དུ་གནས་པ་ཡིན་ནའང་། དེ་དག་གི་སྣ་སྣེ་རེའི་ངོ་ཚབ་བྱེད་ནུས་པ་ཞིག་ཅི་ནས་ཀྱང་རང་དབང་མ་ཐོབ་པར་དུ་བྱེད་དགོས་པའི་ཁར། མི་རབས་རྗེས་མ་རྣམས་ལ་རྡོ་ལག་རྒྱུད་ཀྱི་ཚུལ་དུ་འཕྲོད་དགོས་པའི་དྲན་བསྐུལ་བྱས་ཡོད། གལ་ཏེ་དེ་ལྟར་མ་བྱུང་བ་ཡིན་ན་མེ་ལྕེ་ཞལ་ཆེམས་ཀྱི་འབྱུང་རྐྱེན་དང་། དགོས་དོན། འབོད་སྐུལ་བཅས་ཀྱི་དོན་གནད་མ་འགྲུབ་པ་ཡིན་ནོ།། དེས་ན་འུ་ཅག་གི་མེ་ལྕེའི་འབོད་བསྐུལ་གྱིས་གསལ་འདེབས་བྱས་པའི་འོས་འགན་སྙིང་དུ་བཅིངས་ཏེ། ཁ་ཙམ་ཚིག་ཙམ་མ་ཡིན་པར། མཁས་མདོག་འཇོན་མདོག་མ་སྟོན་པར། ཕྱོགས་དང་རིས་སུ་མ་བཅད་པར་བཤེགས་ཟིན་པའི་རྒྱལ་གཅེས་དཔའ་བོ་ཕོ་མོ་རྣམས་ཀྱི་ཤུལ་བཞག་གི་ཞལ་ཆེམས་ལག་ལེན་ཏུ་བསྟར་རྒྱུ་ནི་མེ་ལྕེའི་འབོད་སྐུལ་དང་འབོད་བསྐུལ་གྱི་གནད་དོན་དེ་ཡིན་ནོ།།

གསམ་པ། མེ་ལྕེའི་སྔ་རྗེས་སུ་རྒྱ་གཞུང་གི་དྲིལ་བསྒྲགས།

ལར་རྒྱ་ནག་དམར་གཞུང་གི་དྲིལ་བསྒྲགས་ཀྱི་ངོ་བོ་ལ་རིགས་གཉིས་མཆིས་ཤིང་། གཅིག་ནི་དམར་ལུགས་པའི་བཟུང་བ་ནས་གསར་བརྗེ་དང་འཛུགས་བསྐྲུན་སོགས་ཀྱི་ཐད་ཡར་རྒྱས་ཀྱི་ཕྱོགས་སུ་བསྐྱོད་པའི་སྐོར་དང་། གཉིས་པ་ནི་རང་སྐྱོན་གཞན་འགེབ་ཀྱི་དྲིལ་བསྒྲགས་སྐོར་རེད། རིགས་གཉིས་སུ་འདུ་བའི་དྲིལ་བསྒྲགས་ནི་“ཧམ་པ་རི་འདྲ་ཞིག་བཤད་ན་ཁེ་བབ་གཡག་འདྲ་ཞིག་བྱུང་”པའི་དཔེ་ལྟར། སྒེར་གཅོད་པའི་སྲིད་དབང་བརྟན་ཆེད་ཡིན། མི་ལོ་དྲུག་ཅུ་སོང་མཚམས་ནས་དམར་ལུགས་པའི་དྲིལ་བསྒྲགས་ལྟར་འཛུགས་བསྐྲུན་སོགས་ཀྱི་ཐད་ཡར་རྒྱས་ཀྱི་རྨང་གཞིར་བལྟས་པ་ཡིན་ན། དུས་རབས་དང་མཐུན་པའི་སློབ་གསོས་མཚོན་མི་མང་གི་རྨང་གཞིའི་ཤེས་ཡོན་ནས་ཆེད་ལས་པའི་རིགས་ཅན་རྣམས་སྐྱེད་སྲིང་ཚད་ལྡན་བྱུང་མིན་ཤེས་ཐུབ་ལ། དེ་ལས་དེ་དག་གིས་གསར་སྐྲུན་བྱས་པའི་ཕྱིའི་འཛུགས་སྐྲུན་གྱི་རྨང་གཞི་བརྟན་པོ་བྱུང་ཡོད་མེད་ཀྱང་རྗེས་སུ་འགྲོ་ལྡོག་གི་ཚུལ་གྱིས་ཤེས་ནུས་པ་ཞིག་ཡིན། སྤྱིར་བཏང་དང་དམིགས་བསམ་གྱི་ཤེས་ཡོན་ཚད་གཞི་ཚད་ལྡན་བྱུང་བ་ཡིན་ན་དེའི་འབྲས་བུར་གྱུར་པའི་ཡར་རྒྱས་དང་འཛུགས་སྐྲུན་བརྟན་ཚད་ཀྱིས་དུས་རབས་གསར་བའི་རྗེས་ཟིན་པ་ཡིན། ང་ཚོས་དམར་ལུགས་པའི་དྲིལ་བསྒྲགས་ཀྱི་ཡར་རྒྱས་འཛུགས་སྐྲུན་ཐད་ཕྱིར་དྲན་ཞིག་བྱས་ཏེ་བསྒྲགས་ཚོད་དང་གནས་ཚོད་མཐུན་མིན་བལྟ་བ་ཡིན་ན། རྒྱ་གཞུང་གི་དྲིལ་བསྒྲགས་ཀྱི་བརྗོད་དོན་སྟོང་བར་རྟོགས་ནུས་པ་ཡིན།

ལར་འཛམ་གླིང་གང་སར་རང་བྱུང་གི་འབྱུང་བ་ཆེན་པོས་བཟོ་བསྐྲུན་དང་ཡར་རྒྱས་ལ་ཚོད་ལྟ་བྱ་སྲོལ་མཆིས་པ་ལྟར། ༢༠༠༨ ལོར་ཐོལ་གྱིས་སླེབས་པའི་ཁྲིན་ཏུའུའི་ས་ཡོམ་གྱིས་གུང་ཁྲན་དམར་གཞུང་གི་འཛུགས་བསྐྲུན་ཡར་རྒྱས་སུ་རློམ་པར་ཚོད་ལྟ་ཐེངས་གཅིག་བྱས་པ་རེད། ཐེངས་འདིའི་ཚོད་ལྟ་ལས་མི་མང་ཁྲི་སྟོང་མང་བོའི་ཤི་སྐྱོན་འཚབ་ཆེན་བྱུང་བས་དམར་གཞུང་གི་གང་བཤད་གང་བྱས་ཐམས་ཅད་མི་མང་གི་ཆེད་དུ་བྱས་པ་མ་ཡིན་པ་གསལ་བོར་བསྟན་པ་རེད། དེ་མཚུངས་སུ་ཡུལ་ཤུལ་ས་ཡོམ་ཞིག་གསོའི་ཁང་བརྩེགས་འགྲུབ་མ་ཐག་རྒྱུ་མེད་རྐྱེན་མེད་དུ་ཞིག་འཐོར་གྱིས་ལས་མི་ལྔ་ཙམ་ཤི་རྐྱེན་བྱུང་བས་དམར་གཞུང་གིས་འཛུགས་བསྐྲུན་ལ་ཞེ་སྣང་གིས་ཅི་བྱ་གཏོལ་བྲལ་དུ་གྱུར་ཅིང་། བོད་མི་རྣམས་ལོ་ངོ་གཉིས་ཀྱི་རྗེས་སུའང་སྔར་གྱི་ས་ཡོམ་བྱུང་མ་ཐག་པའི་གནས་སྟངས་འོག་ཡོད་པ་དཔར་རིས་ལས་ཤེས་ཐུབ། གོང་དུ་བཀོད་པའི་དོན་རྐྱེན་དག་གིས་གསལ་བཤད་བྱས་པ་ལྟར་ན་ཀྲུང་གོ་གསར་བའི་ཡར་རྒྱས་དང་འཛུགས་བསྐྲུན་གྱི་རྨང་གཞི་ལ་སྤྱི་སྡོམ་རྒྱག་ཐུབ་པ་ཞིག་ཆགས་ཡོད་པར་མ་ཟད། དམར་གཞུང་གིས་རྟག་ཏུ་བསྒྲགས་དང་སྒྲོག་བཞིན་པའི་ཡར་རྒྱས་དང་། འཛུགས་བསྐྲུན་ནི་དོན་དངོས་སུ་ཕྱི་ཤུན་ཙམ་ཏུ་གྲུབ་པར་ངོ་སྤྲོད་བྱས་པ་ཞིག་ཡིན་འདུག

མེ་ཆུའི་འགལ་ཟླ་བཞིན་དུ་བདེན་རྫུན་གཉིས་གཞི་གཅིག་ཏུ་གྲུབ་ཐབས་མེད་པར་བརྟེན་དམར་གཞུང་གིས་ཇི་ཙམ་གྱིས་རྫུན་སྒྲོག་ཤུགས་ཆེར་བྱས་པ་ཡིན་ན། དངོས་ཡོད་གནས་ཚུལ་རྣམས་བཀག་ཀྱང་མི་ཁོག་པར་ཁ་གཏད་དུ་ལངས་པ་ཡང་འགལ་ཟླའི་ཆོས་ཉིད་ཅིག་ཆགས་པས་ཡིན། དེར་བརྟེན། དམར་ལུགས་པའི་སྲིད་ཇུས་དང་དངོས་ཡོད་གནས་ཚུལ་གཉིས་མདུང་རྩེ་ཁ་སྤྲོད་ཀྱི་རྣམ་པར་ངང་གིས་འཕེལ་ཏེ། བདེན་ལུགས་ཅན་གྱི་མི་གཅིག་དམར་གསོད་བྱས་པ་ཡིན་ན་གཞན་ཞིག་ཀྱང་ངང་གིས་གསོད་དགོས་པའི་དོན་དངོས་ཀྱི་འབྲེལ་ཐེག་མཚམས་ཆད་མེད་པར་བརྟེན། གཅིག་ སྟེང་ཉིས་བརྩིགས་ཀྱི་དྲག་སྤྱོད་ཚད་ལས་འདས་པ་མི་བྱ་ཐབས་མེད་བྱུང་བ་ཡིན་འདུག་ལ། དེ་དང་ཆབས་ཅིག་གཅིག་སྟེང་ཉིས་བརྩིགས་ཀྱི་རྫུན་སྒྲོག་ཀྱང་སྣ་ཚོགས་བྱ་དགོས་བྱུང་བ་རེད། དེ་ཡང་རྫུན་གྱི་མུར་རྫུན་དང་དྲག་སྤྱོད་ཀྱི་མུར་དྲག་སྤྱོད་ལ་མི་བརྟེན་ཐབས་མེད་ཀྱི་གནད་ཐུག་ས་ནི་རྒྱ་གཞུང་གི་སྲིད་ཇུས་རྙིང་ཧྲིལ་ཅན་གྱི་ཐུན་མོང་མ་ཡིན་པའི་ཁྱད་ཆོས་ཏེ། བཙན་གནོན་དང་དྲག་སྤྱོད་ཀྱི་སྒོ་ནས་གསར་བརྗེ་དང་བརྟན་ལྷིང་། འཆམ་མཐུན། སྲུང་སྐྱོབས། འཕྲོད་བསྟེན། སློབ་གསོ་བཅས་ཡར་རྒྱས་བཏང་དང་གཏོང་འདོད་ཀྱི་སྒེར་སེམས་དེས་ལེན་པ་ཡིན་ནོ།། དེའི་དབང་གིས་རིག་གསར་གྱི་སྐྱོ་གར་སླར་ཡང་འཁྲབ་དགོས་བྱུང་པ་སྟེ། དཔེར་ན། བོད་ཡུལ་དབུས་སུ“གུང་ཁྲན་དམར་ལུགས་མེད་ན། ཀྲུང་གོ་གསར་བ་མེད་”ཅེས་བཙན་དབང་གིས་བསྒྲགས་དགོས་ཀྱི་ཁྲིམས་བཟོས་པ་ལྟ་བུའོ།། དོན་ལ་ནི། སྒེར་གཅོད་རིང་ལུགས་མེད་ན། ཀྲུང་གོའི་མུན་ནག་མེད་ཅིང་། གུང་ཁྲན་དམར་ལུགས་མེད་ན། དྲག་སྤྱོད་ལམ་ལུགས་མེད་དོ།། ཅེས་སྒྲོག་པ་ཡིན་ན་དོན་དངོས་དང་མཐུན་པ་ཞིག་ཅི་ལ་མིན། དེ་བས་“ང་ཚོ་བོད་ཀྱི་ལུང་བར།། ནོར་བུ་མེད་ཅེས་མ་ཟེར།། རྒྱལ་བ་ཡིད་བཞིན་ནོར་བུ།། ནོར་བུ་མིན་ན་ཅི་རེད།།”ཅེས་དབྱངས་སྙན་ངག་ལ་གྱེར་སྲོལ་ཡོད་པ་ནི་ཇི་འདྲའི་ཞི་བདེའི་ཚོར་བ་སྦྱིན་ནུས་པ་ཞིག་རེད་ཨང་།

བོད་ཀྱི་རིག་གཞུང་དང་འབྲེལ་བའི་སྲོལ་རྒྱུན་དུ་ནོར་བུ་འོད་འབར་ཞེས་པ་གཟུགས་ཅན་སྣང་བྱེད་དུ་འདོད་ཀྱི་ཡོད་ལ། ནོར་བུས་གཟུགས་སྣང་བར་བྱེད་པ་བཞིན་དུ་༸གོང་ས་སྐྱབས་མགོན་བཅུ་བཞི་བ་ཆེན་མོས་བླང་དོར་གྱི་རྣམ་གཞག་གསལ་བར་སྟོན་པ་སྤྱིའི་ཆ་ནས་དང་། བྱེ་བྲག་ཏུ་དུས་རབས་དང་མཐུན་པའི་དམངས་གཙོ་བཅོས་བསྒྱུར་གྱི་སློབ་སྟོན་དང་ཕྱག་ལེན་དུ་མཛད་པའི་སྒོ་ནས་དཔེ་དོན་མཚུངས་སྦྱར་གྱིས་གླུ་རུ་ལེན་སྲོལ་མཆིས་པ་ཡིན་ནོ།། དཔར་རིས་ཀྱི་ལམ་ནས་ཀྱང་རིག་གསར་གོ་ཆད་སླར་ཡང་སྤེལ་བའི་མཚོན་བྱེད་ནི། མོའོ་སོགས་ཀྱི་དཔར་ཁྱིམ་དང་དགོན་པར་གཤམ་དགོས་པའི་བཙན་དབང་བཏང་སྟེ་བོད་མི་རྣམས་ཀྱིས་མི་འདོད་བཞིན་ཏུ་འགེལ་དགོས་བྱུང་འདུག ད་ལྟའི་དུས་རབས་དང་མཐུན་པར་མཛད་པའི་ཞི་བདེ་ཀུན་ཕན་གྱི་གཏེར་བདག་༸གོང་ས་ཡིད་བཞིན་ནོར་བུའི་འཕྲིན་ལས་བཀག་ནས་རྒྱ་བོད་མི་མང་དུང་ཕྱུར་གསུམ་ལྷག་དམར་གསོད་བྱེད་མཁན་གྱི་ལག་དམར་མོའོ་སོགས་ཀྱི་དཔར་བཙན་བསྒྲིགས་བྱེད་བཅུག་གི་ཡོད་འདུག་པས། རྒྱ་བོད་ཀྱི་ལུགས་སྲོལ་ལ་༸སངས་རྒྱས་དང་༸གོང་ས་མཆོག་གི་སྐུ་དཔར་གཤམ་ཏེ་མཆོད་འབུལ་བྱེད་པ་ནི།“ཁྱོད་ཀྱིས་ཇི་སྙད་བཀའ་བསྩལ་བ།། རྟེན་འབྲེལ་ཉིད་ལ་བརྩམས་ཏེ་འཇུག། དེ་ཡང་མྱ་ངན་འདའ་ཕྱིར་ཏེ།། ཞི་འགྱུར་མི་མཛད་ཁྱོད་ལ་མེད”པའི་ཕྱིར་ན། ཞི་བ་དང་ཕན་བདེའི་མཛད་འཕྲིན་རྗེས་དྲན་བྱེད་ཆེད་ཡིན་མོད། མོའོ་སོགས་ཀྱི་དཔར་གཤམ་ནས་མིའི་ཤ་ཁྲག་རི་ལྟར་སྤུང་བ་རྗེས་དྲན་བྱེད་དགོས་པ་ལས་གཞན་དུ་ཅི། དེས་ན་དམར་ལུགས་སྒེར་གཅོད་པས་བོད་དང་རྒྱ་ནག་སྐམ་ས་ཆེན་པོར་མུན་ནག་གི་འཇིག་རྟེན་བསྐྲུན་པ་སེལ་ཕྱིར་གཅེས་སྲོག་དམར་པོ་སྣང་བྱེད་ཀྱི་མེ་རུ་སྤར་བ་ནི་ཐེ་ཚོམ་མེད་པ་ཞིག་གོ།

མདོར་ན་རང་སྲོག་མེར་བསྲེགས་ཀྱི་ལས་འགུལ་༸གོང་ས་མཆོག་དང་བཙན་བྱོལ་གཞུང་མང་གང་རུང་གིས་བསྐུལ་བའམ་ཡང་ན་དྲག་སྤྱོད་པའི་ཉེས་མིང་འོག་སླར་ཡང་དམར་གསོད་ཀྱི་དུས་རབས་ཤིག་བསྐྲུན་འདོད་པ་ཡིན་དུ་སྲིད་མོད། བོད་མི་ས་ཡ་དྲུག་ལ་རང་གི་ཐུན་མོང་མ་ཡིན་པའི་ཁྱད་ཆོས་འཛོམས་པའི་ཁར། དམངས་གཙོའི་ལམ་ལུགས་ཀྱི་དབུ་འབྱེད་ཟིན་པ་ཡིན་པའི་ཕྱིར་ན། དེ་ལ་སྒྲོ་སྐུར་དང་རྫུན་སྒྲོག་སྣ་ཚོགས་ཀྱིས་རྒྱ་ནག་མི་མང་རྨོངས་སུ་འཇུག་ནུས་སུ་ཆུགས་ཀྱང་། དམར་གཞུང་གི་སྲིད་ཇུས་དང་། ཁྲིམས་ལུགས། སློབ་གསོ། དཔལ་འབྱོར་སོགས་ཡོད་ཚད་དྲག་སྤྱོད་ལ་བརྟེན་པ་ཞིག་ཡིན་པས་ན། བཙོན་ཁང་ལྟ་བུའི་རྒྱལ་ཁབ་འདི་ལས་ཐཪ་ན་བསམ་སྟེ། དབུལ་ཕྱུགས་དབྱེ་མེད་ཀྱི་རྒྱ་ནག་མི་མང་རྣམས་ར་ལུག་བཤའ་རྭ་ནས་འབྲོ་བ་བཞིན་རང་སྲོག་འབེན་ལ་བཙུགས་ནས་ཕྱི་རྒྱལ་ཏུ་ཐཪ་ཐབས་བྱེད་ཀྱི་ཡོད། དེ་ཡང་མཁའ་ལམ་དང་མཚོ་ལམ་སོགས་འགྲོ་ལམ་ཡོད་མེད་ལ་མ་བལྟས་པར་ཐབས་ཤེས་སྣ་ཚོགས་སྤྱད་དེ་འབྲོས་དང་འབྲོ་བཞིན་ཡོད་པ་རེད། ད་གཟོད་དེ་དག་ཀྱང་༸གོང་ས་མཆོག་དང་བོད་ཀྱི་སྲིད་སྐྱོང་བ་དབུ་ལས་ཀྱིས་བརྒྱུད་བསྐུལ་བྱས་པ་ཞིག་རེད་ཅེས་དྲིལ་བསྒྲགས་དགོས་རྒྱུར་འདུག་པས་སྒེར་གཅོད་སྨྱོ་འབག་ཅན་གྱི་བསྒྲགས་གཏམ་ལ་ཆ་འཇོག་ཅི་ཡོད་དེ་མེད་དོ།།