སྟོན་པ་ཤཱཀྱ་ཐུབ་པའི་འཁྲུངས་སྐར་སྲུང་གཙི་ཐེངས་དང་པོ།

ཁ་སང་གངས་སྐྱིད་བོད་ཀྱི་དཔེ་མཛོད་ཁང་དུ་སྟོན་པ་ཤཱཀྱ་ཐུབ་པ་སྐུ་འཁྲུངས་ཏེ་ལོ་ངོ་ ༢༦༣༧ འཁོར་བའི་འཁྲུངས་སྐར་སྲུང་གཙི་དང་འབྲེལ། གདན་ཞུའི་སྐུ་མགྲོན་ཁག་ཅིག་གིས་སྟོན་པ་མཆོག་གི་འཁྲུངས་འདས་དང་མཛད་རྣམ་ཐོག་བགྲོ་གླེང་བཅས་གནང་སོང་།

ཁ་སང་ཕྱི་ཚེས་ ༢༨ ཉིན་བཞུགས་སྒར་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། བོད་ཀྱི་དཔེ་མཛོད་ཁང་གི་ཆོས་རིག་ཟབ་སྦྱོང་ཐེངས་གཉིས་པའི་སློབ་མ་ཐུན་མོང་གི་གོ་སྒྲིག་འོག སྟོན་པ་ཤཱཀྱ་ཐུབ་པ་སྐུ་འཁྲུངས་ཏེ་མི་ལོ་  ༢༦༣༧ འཁོར་པའི་འཁྲུངས་སྐར་དུས་ཆེན་ཐེངས་དང་པོ་དེ་སྲུང་གཙི་གནང་སོང་ལ། དེ་དང་མཉམ་དུ་སྟོན་པའི་འཁྲུངས་སྐར་སྲུང་གཙིའི་དགོས་དམིགས་དང་འཁྲུངས་འདས་ལོ་ཚིགས་ལ་དཔྱད་བསྡུར། སྟོན་པའི་མཛད་རྣམ་བཅས་ཀྱི་ཐོག་བགྲོ་གླེང་བཅས་གནང་སོང་། སྐུ་མགྲོན་གཙོ་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དང་དཔེ་མཛོད་དཔར་སྐྲུན་སྡེ་ཚན་གྱི་འགན་འཛིན་ནཱ་ག་སངས་རྒྱས་བསྟན་དར་ལགས། དགེ་བཤེས་བློ་བཟང་བརྩོན་འགྲུས་ལགས། མཁན་པོ་འཇུ་བསྟན་སྐྱོང་ལགས། དེ་བཞིན་ཟབ་སྦྱོང་འཛིན་གྲྭའི་སློབ་མ་དང་ཟུར་ཉན་པ་བཅས་མཉམ་ཞུགས་གནང་སོང་།

སྐབས་དེར་བགྲོ་གླེང་གོ་སྒྲིག་པས་འཛམ་གླིང་ནང་ཡེ་ཤུའི་འཁྲུངས་སྐར་སྲུང་བརྩི་བྱེད་ཀྱི་ཡོད་པ་དང་། འབྲུག་དང་འབར་མ། ཤེ་རི་ལན་ཁཱ་སོགས་ཀྱི་ནང་སྟོན་པའི་འཁྲུངས་སྐར་སྲུང་གཙི་བྱེད་ཀྱི་ཡོད་ཀྱང་། བོད་པ་ཚོར་ནང་པ་མ་རེད་ཅེས་ལབ་པ་ཡིན་ན་ཁོང་ཁྲོ་ལངས་ངེས་ཀྱང་། སྟོན་པ་ལ་དེ་ཙམ་དོ་སྣང་མེད་པ་ཙམ་མ་ཟད། མང་པོ་ཞིག་གིས་ངོ་ཡང་འཕྲོད་ཀྱི་མེད་པའི་གནས་སྟངས་ཆགས་ཡོད་སྟབས། བཙན་བྱོལ་གཞུང་དམངས་གཉིས་ངོས་ནས་ལོ་ལྟར་སྟོན་པའི་འཁྲུངས་སྐར་སྲུང་གཙི་ཞུ་རྒྱུ་གལ་ཆེན་ཡིན་སྐོར་བརྗོད་བྱུང་།

དེའི་རྗེས་སྐུ་མགྲོན་གཙོ་བོ་དགེ་བཤེས་ལྷག་རྡོར་ལགས་ཀྱིས་བོད་ནང་དུ་༧གོང་ས་མཆོག་གི་འཁྲུངས་སྐར་དང་སྟོན་པའི་འཁྲུངས་སྐར་སྲུང་གཙི་ཞུ་རྒྱུའི་འདོད་མོས་ཡོད་ཀྱང་། རྒྱ་གཞུང་གིས་འགོག་རྐྱེན་བཟོས་གོ་སྐབས་རག་གི་མེད་པ་དང་། རང་དབང་ལུང་པའི་བོད་མི་ཚོས་དེ་འདྲའི་རིགས་ལ་དོ་སྣང་དང་། བོད་ཀྱི་ཆོས་རིག་སྐད་ཡིག་ལ་སློབ་སྦྱོང་བྱ་དགོས་པ། ནང་པ་སངས་རྒྱས་པའི་ཆོས་ནི་དུས་རབས་ཉེར་གཅིག་ཙམ་མ་ཟད། དུས་རབས་ང་གཅིག་པ་བསླེབ་ཀྱང་ལུས་ཀྱི་ནད་ཚ་བཅོས་ཕྱིར་སྨན་དགོས་པ་ཇི་བཞིན། ནང་གི་ནད་ཚ་བཅོས་རྒྱུར་ནང་པའི་ཆོས་ལུགས་དུས་ནམ་ཡང་རྙིང་པ་ཆགས་འགྲོ་རྒྱུ་དང་། དེ་ལ་བཅོས་སྒྱུར་བྱ་དགོས་པ་ཞིག་མཐོང་གི་མེད་སྐོར་བརྗོད་སོང་།

དགེ་བཤེས་ལགས་ཀྱིས་བོད་མིའི་རང་ལུས་མེར་བསྲེགས་སྐོར་ལ། སྟག་མོའི་ལུས་སྦྱིན་སོགས་སྟོན་པའི་མཛད་རྣམ་དང་ནང་པའི་ཆོས་འབྱུང་ཁག་ཏུ། རྣམ་པ་ཅི་རིགས་ཀྱི་སྒོ་ནས་རང་གི་ལུས་སྲོག་གཞན་དོན་དུ་ཕུལ་བའི་རྒྱལ་སྲས་བྱང་ཆུབ་སེམས་དཔའི་མཛད་རྣམ་མང་དུ་བྱུང་མྱོང་ཡོད་པ་ལྟར། དེང་སྐབས་རྒྱ་ནག་གི་དཀའ་སྡུག་མནར་གཙོད་འོག་ཡོད་པའི་བོད་མི་མང་པོ་ཞིག་གིས་བོད་མིའི་རང་དབང་དང་ཐོབ་ཐང་། སངས་རྒྱས་བསྟན་པ་བཅས་གཞན་དོན་ཆེད། དགྲ་གཉེན་སུ་ལའང་གནོན་འཚེ་མ་བྱས་པར་རང་སྲོག་བློས་གཏོང་བྱེད་བཞིན་པའི་ཐད་མང་པོ་ཞིག་གིས་ནང་ཆོས་དང་འགལ་ཡོད་མེད་དང་། འཚེ་བ་ཡིན་མིན་སོགས་ཀྱི་སྐད་ཆ་ཤོད་ཀྱི་ཡོད་པ་དེ་ནི་འོས་བབ་མིན་པ་ཞིག་དང་འགན་མ་ཁུར་པ་ཞིག་ཡིན་སྐོར་བཅས་གསུངས་དོན། “དེང་སྐབས་ཨེ་རག་དང་ཨེ་རན་སོགས་འཛམ་གླིང་གང་སར་སྤྱི་ཚོགས་དང་མི་གཞན་གྱི་ཚེ་སྲོག་ལ་གནོན་འཚེ་དང་བརྡབ་གསིག་གཏོང་པའི་རང་སྲོག་བློས་གཏོང་གི་བྱ་སྤྱོད་རིགས་སྤེལ་གྱི་ཡོད་པར་སུ་ཞིག་གིས་ཆོས་དང་འགལ་ཡོད་མེད་ཀྱི་སྐད་ཆ་བཤད་ཀྱི་ཡོད་” ཅེས་བརྗོད་སོང་།

རྒན་ནཱ་ག་སངས་རྒྱས་བསྟན་དར་ལགས་ཀྱིས་སྟོན་པའི་འཁྲུངས་ལོ་དང་འབྲེལ་ཏེ། ནང་པ་སངས་རྒྱས་པའི་རྗེས་འཇུག་ཚོས་ས་ག་ཟླ་བ་ནི་སྟོན་པ་ཤཱཀྱ་ཐུབ་པ་སྐུ་འཁྲུངས་པ་དང་སངས་རྒྱས་པ། མྱ་ངན་ལས་འདས་པ་སོགས་ཀྱི་དུས་ཆེན་ཁྱད་པར་བ་ཞིག་ཏུ་རྩི་སྲོལ་ཡོད་པ་དང་། ཡང་ས་ག་ཟླ་བའི་ནང་གི་ཚེས་དུས་ལའང་མུ་མཐུན་པ་ཡོད་པ་ཙམ་མ་ཟད། ས་ག་ཟླ་བ་ཡང་བོད་ཟླ་ ༣ པའི་ནང་འཁེལ་བ་དང་བོད་ཟླ་ ༤ ནང་འཁེལ་བ་སོགས་རྩི་སྲོལ་སྣ་ཚོགས་ཤིག་ཡོད་ཀྱང་། སྨན་རྩིས་ཁང་གི་རབ་གནས་ཆུ་འབྲུག་ལོའི་ལོ་ཐོ་རྒྱས་པ་དང་། Rigpa Tibetan Calendar 2012-2013 གཉིས་གཞིར་བཟུང་སྟེ། བོད་ཟླ་བཞི་བ་ས་ག་ཟླ་བའི་ཚེས་ ༧ ཏེ། ཕྱི་ཟླ་ ༥ ཚེས་ ༢༨ ཉིན་སྟོན་པའི་འཁྲུངས་སྐར་སྲུང་གཙི་བྱས་པ་ཞིག་ཡིན་པར་བརྗོད་བྱུང་།

གངས་སྐྱིད་བོད་ཀྱི་དཔེ་མཛོད་ཁང་གིས་ཕྱི་ཟླ་ ༤ ཚེས་ ༡༦ ནས་ཕྱི་ཟླ་ ༦ ཚེས་ ༡༦ བར་ཟླ་གཉིས་རིང་གི་༼བོད་ཀྱི་ཆོས་དང་རིག་གཞུང་གི་སློབ་མའི་ཟབ་སྦྱོང་ཐེངས་གཉིས་པ་ ༽དེ་སྤྲོད་བཞིན་ཡོད་པ་དང་། ཐེངས་འདིར་སློབ་ཕྲུག་ ༢༨ ཙམ་ལ་བོད་ཀྱི་ལོ་རྒྱུས་དང་ནང་ཆོས། སྐད་ཡིག་སོགས་ཀྱི་ཟབ་སྦྱོང་སློབ་ཁྲིད་བྱེད་ཀྱི་ཡོད་འདུག་ལ། ཟབ་སྦྱོང་འཛིན་གྲྭའི་སློབ་མ་ཚོའི་གོ་སྒྲིག་འོག་ཐེངས་འདི་སྟོན་པའི་འཁྲུངས་སྐར་སྲུང་གཙི་ཐེངས་དང་པོ་དེ་གནང་ཡོད་པ་རེད།

གསར་འགོད་པ། བནྡེ་སྐྱབས།