བུ་ཆུང་ཚེ་རིང་།
ད་ཆ་ཨ་མེ་རི་ཀའི་སྤྱི་མཐུན་ཚོཌ་པའི་ངོས་ནས་ཨ་རིའི་སྲིད་འཛིན་འོས་མིར་སྐུ་ཞབས་མིཊ་རོམ་ཎི་(Mitt Romney)རོམ་ཎི་ཐུགས་གཏན་འཁེལ་བ་ལྟ་བུ་ཡིན་དུས་ཨ་མེ་རི་ཀའི་བོད་མི་ཚོས་འདི་ལོའི་སྲིད་འཛིན་འོས་བསྡུའི་ཐོག་དགོངས་པ་གཏིང་ཟབ་བཞེས་རྒྱུ་དུས་ལ་བབས་ཡོད།
སྤྱིར་བཏང་ཨ་མེ་རི་ཀའི་ནང་ཕྱིའི་རྒྱལ་ཁབ་ནས་ཡུལ་མི་གསར་པ་ཆགས་མཁན་ཚོའི་གོམས་སྲོལ་གཅིག་ནི་རང་ཉིད་ཀྱི་འོས་སུ་ལ་འཕེན་དགོས་མིན་དེ་གནད་དོན་གཅིག་གི་ཐོག་ནས་ཐུགས་ཐག་གཅོད་ཀྱི་ཡོད་པ་དེ་རེད། ཨ་རིའི་བོད་མི་ཚོར་གནད་དོན་དེ་ནི་དམངས་གཙོ་ཚོགས་པའི་འོས་མི་ཨོ་བྷ་མ་(Obama)དང་། སྤྱི་མཐུན་ཚོགས་པའི་འོས་མི་རོམ་ཎི་གཉིས་ལས་སུས་བོད་ཐོག་ལས་དོན་ཤུགས་ཆེ་བ་གནང་ཐུབ་མིན་དེ་ཡིན།
ཨ་རིའི་བོད་མིས་རང་ཉིད་ཀྱི་ལྟ་བའི་ལངས་ཕྱོགས་གང་ཡིན་ལ་མ་ལྟོས་པར་གནད་དོན་འདི་ཁོ་ནའི་ཐོག་ནས་འོས་བསྡུའི་སྐོར་ཐག་གཅོད་གནང་གི་ཡོད་པ་དེ་གསལ་པོ་རེད། དེ་སྔ་གུས་རང་གི་ངོ་ཤེས་ནང་དམངས་གཙོ་ཚོགས་པའི་ལྟ་བ་ཡོད་མཁན་བོད་མིས་སྤྱི་མཐུན་ཚོགས་པའི་འོས་མི་འཇོར་རྗེ་སྦུ་ཤི་ལགས་སུ་འོས་འཕེན་གནང་མཁན་ཡོད།
ཨ་མེ་རི་ཀའི་བོད་མི་ཚོ་ནི་ཨ་རིའི་ནང་གི་མི་རིགས་ཉུང་ཤོས་ཤིག་ཡིན་རུང་ང་ཚོའི་ནུས་པ་དེ་མི་རིགས་གཞན་དང་མ་འདྲ་བ་ཡོད་པས་དེ་བེད་སྤྱོད་ལེགས་པོ་ཡོང་ཆེད་ཨ་རིའི་བོད་མི་ཚོས་རྒྱལ་ཁབ་འདིའི་ཆབ་སྲིད་གནད་དོན་ཐོག་དགོངས་པ་གཏིང་ཟབ་མོ་བཞེས་ཐུབ་ཐབས་གནང་དགོས། དཔེར་ན་འདི་ལོའི་སྲིད་འཛིན་གྱི་འོས་བསྡུའི་ཐོག་གྲ་སྒྲིག་ཡག་པོ་ཡོང་པར་འོས་མི་གཉིས་ཀྱི་དགོངས་པ་གང་ཡིན་མཁྱེན་ཐུབ་ཐབས་གནང་དགོས།
སྐུ་ཞབས་ཨོ་བྷ་མ་ཡིན་ན་ཁོང་ནས་སྲིད་འཛིན་ཐེངས་གཅིག་གནང་ཡོད་པའི་སྐབས་དང་དེའི་གོང་གྲོས་ཚོགས་འཐུས་མི་གནང་བའི་སྐབས་སུ་བོད་དོན་ཐོག་དགོངས་པ་ག་རེ་བཞེས་ཡོད་མིན་ལོ་རྒྱུས་ཐོག་ཡོད། དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་ནས་ཨ་མེ་རི་ཀའི་སྲིད་འཛིན་གནང་འདོད་ཡོད་མཁན་ཚོར་བོད་དོན་ཐོག་དྲི་ཤོག་ཕུལ་བར་སྐུ་ཞབས་ཨོ་བྷ་མས་བཀའ་ལན་ཡང་གནང་ཡོད།
སྐུ་ཞབས་རོམ་ཎི་ནས་ད་བར་བོད་དོན་ཐོག་དགོངས་ཚུལ་ག་རེ་ཡིན་མེད་སྐོར་ལོ་རྒྱུས་མེད་པ་མ་ཟད་ང་ཚོའི་དྲི་ཤོག་ལ་ད་བར་བཀའ་ལན་གནང་མེད། ཡིནའང་ཁོང་ནས་ད་བར་འདུ་འཛོམས་དང་གསར་འགྱུར་བརྒྱུད་ལམ་ཐོག་རྒྱ་ནག་ཐོག་དགོངས་པ་བཞེས་ཕྱོགས་ཐོག་བཀའ་གནང་ཡོད།
འོན་ཀྱང་འོས་མི་གཉིས་ཀྱི་དྲ་ཚིགས་ཐོག་ཕེབས་ཡིན་ན་ཁོང་གཉིས་ཀྱི་རྒྱ་ནག་ཐོག་དགོངས་པ་བཞེས་སྟངས་ག་རེ་ཡིན་མིན་དང་། དེ་བཞིན་འགྲོ་བ་མིའི་གནད་དོན་ཐོག་དགོངས་ཚུལ་ག་རེ་ཡིན་མིན་སོགས་སྐོར་མཁྱེན་ཐུབ། གལ་ཏེ་དེ་འདྲའི་གནད་དོན་སྐོར་དྲ་ཚིགས་ཐོག་གསལ་གྱི་མེད་ན་དེས་འོས་མི་དེས་གནད་དོན་གལ་ཆེན་པོ་རྩིས་ཀྱི་ཡོད་མིན་གསལ་པོ་ཡིན།
གང་ལྟར་འདི་ལོའི་ཨ་རིའི་སྲིད་འཛིན་འོས་བསྡུར་ཨ་རིའི་བོད་མིས་སྔར་ལགས་མཉམ་ཞུགས་གནང་ནས་རང་ཉིད་ཀྱི་འདེམས་པའི་ཡུལ་འདིའི་གནད་དོན་ཐོག་ཐུགས་སྣང་ཡོང་བའི་རེ་བ་ཞུ་བཞིན་ཡོད།
གསལ་བཤད། ༼ གོང་བཀོད་རྩོམ་ཡིག་དེ་རྒྱལ་སྤྱི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་ཀྱིས་ཕྱི་ཟླ་ ༥ ཚེས་ ༡༨ ཉིན་ཁོང་གི་ཟིན་བྲིས་སྟེང་བཀོད་ཡོད་པ་འདིར་བདམས་བཀོད་བྱས་པ་ཡིན། ༽
སྐབས་འདིར་བུ་ཆུང་ཚེ་རིང་ལགས་ཞེས་པ་ཞིག་གིས་ཨ་རིའི་མི་སེར་ཆགས་ཟིན་པའི་བོད་རིགས་ཚོ་ལ་འོས་ཤོག་སུ་འཕེན་དགོས་མིན་གྱི་སྐོར་བསླབ་བྱ་རྒྱབ་ཁུལ་བྱེད་རྒྱུ་འདི་ནི་ཧ་ཅང་ཐལ་དྲག་པའི་སྐད་ཆ་རེད། དང་པོ་དམང་གཙོ་ལམ་ལུགས་སམ་འགྲོ་བ་མིའི་ཐོབ་ཐང་ལ་སྟེང་འཛིན་བྱས་པ་དང་། གཉིས་པ་ནི་ཨ་རིའི་མི་སེར་ཆགས་ཟིན་པའི་བོད་མི་ཚོའི་རང་དབང་ལ་མཐོང་ཆུང་བྱས་པ་ཞིག་རེད། དེར་མ་ཟད་སྐུ་དྲག་ལམ་ལུགས་སམ་བཀའི་བཀོད་རྒྱུད་འཛིན་རང་ལུགས་ཀྱི་བསམ་བློ་མ་དོར་བ་ཞིག་ཀྱང་རེད།
སྐབས་འདིར་ང་ཚོའི་རང་གི་ཀླད་པ་བེད་བྱད་བྱས་དེ་འོས་ཤོག་འཕེན་རྒྱུ་རེད་མ་གཏོགས་ངས་ཁྱེད་ཀྱི་བཀོད་འདོམ་ལ་རེ་བ་བྱེད་ཀྱིེད་མེད།
ང་ཚོ་བོད་སྤྱི་པའི་དོན་ལ་སེམས་ཁུར་ཁྱེད་ལས་ཀྱང་མི་དམན་པ་ཞིག་ཡོད་སྙམས་པའི་གདེངས་ཚོད་ཡོད།
ཨ་རིའི་མི་སེར་ཡིན་པའི་བོད་མི་ཚོས་རང་གི་འོས་ཤོག་རྐྱང་གཅིག་པོ་དེ་མི་གཡོ་ཅན་འགའ་རེའི་ཉོག་གཏམ་གྱི་གཡོ་འོག་ཏུ་མི་ཚུད་པར། ཁྲམ་པ་ནག་རིལ་ཨོ་བྷ་མ་ཟེར་པའི་མི་གཡོ་ཅན་དེ་ལ་མི་གཡུག་རོགས་གནང། ཁོ་ནི་ཁ་སྟིང་མི་མཚུངས་པའི་མི་གཡོ་ཅན་ཞིག་རེད།
ཁོ་སྲིད་འཛིན་བྱས་པའི་རྒྱུད་རིམ་ནང་འཛམ་གླིང་སྤྱི་དང་ལྷག་པར་དུ་བོད་དོན་ཐོག་ལ་ཕན་ནུས་ལྡན་པའི་རྒྱབ་སྐྱོར་གང་ཡང་བྱས་མེད།
ཁྱོད་ཚོས་འདི་འདྲ་རྐྱང་རྐྱང་བཤད་ནས་བསྡད་པ་རེད། ཨོ་སྦ་མ་ལ་ཁྱོད་ཚོས་རྒྱབ་སྐྱོར་ཤུགས་ཆེན་བྱས་པ་རེད། ཡིན་ན་ཡང་་་་ཨོ་སྦ་མས་བོད་དོན་ཐོག་ལ་ག་རེ་བྱས་སོང་ངམ། ཁོ་རང་གི་ཁ་དན་ཚིག་ལ་གནས་སོང་ངམ། ཐོག་མར་ཁྱེད་ཚོས་ཞིབ་དཔྱོད་ཡག་པོ་གནང་རོགས།