རུ་ཁག་བཞི་བདམས་ཐོན་བྱུང་འདུག

བོད་ནང་རྒྱལ་གཅེས་དཔའ་བོ་དཔའ་མོ་རྣམས་གཙོ་བྱས། གཞིས་སྡོད་བོད་མི་རྣམས་ལ་གདུང་སེམས་མཉམ་སྐྱེད་ངེས་པར་བྱེད་དགོས་ངེས་རེད། འོན་ཀྱང་། ཡོད་ཚད་དྷ་སའི་ཆབ་སྲིད་དུ་རློམ་པའི་ཁབ་མིག་མཐོང་རྒྱའི་ནང་བཅུག་པ་ཡིན་ན། ང་ཚོས་ཕྱོགས་ངོས་སོ་སོ་ནས་རང་བཙནད་ལོན་རྒྱུ་ཕར་ཞོག ཡབ་མེས་བཙན་པོའི་རླབས་ཆེན་གྱི་དབང་གིས་མེ་ཤུལ་དུ་བ་ལྟར་ད་དུང་ཕྱོགས་ངོས་ལ་ལ་ན་ལྷག་བསྡད་ཡོད་པའི་རང་བཙན་གྱི་ཆ་ཕྲ་མོའི་རིགས་དག་ཀྱང་རང་ཉིད་ཀྱིས་བསུབ་མི་འགྲོ་བའི་ངེས་པ་ཁྱོན་ནས་མེད་པ་མ་རེད། ད་ལྟའི་བཙན་བྱོལ་གྱི་གནས་ཚུལ་རིགས་ཁ་ཤས་དཔེ་རུ་དྲངས་ན། དཔེར་ན། སྔོན་ལྷ་གདན་ས་ཁག་གི་ཁ་ཆེན་དབང་ཆེན་ཚོས་རྐང་སྤོལ་སྟོན་པའི་དབུ་རུ་སྙད་དེ་ཐལ་བའི་རྡུལ་དུ་བརླག་པ་དང་། དེང་གི་ཆར་ཡང་ཟམ་གདོང་བླ་མ་ཆོས་བྱེད་བླ་མའི་སྡོམ་ཁྲིམས་ཁབ་མིག་ལས་བུད་མེད་ཀྱི་བླ་ཤ་དང་ནུ་འབུར་གྱི་སྒེག་ཉམས་མཐོང་མ་བཟོད་པར། བོད་ཀྱི་མཚེས་མ་འགྲན་བསྡུར་ལྟོས་ངན་དུ་བརྩིས་ཏེ་ས་འོག་ཏུ་བཅུག་པ་ལྟ་བུ་རེད།

དེ་རིང་གི་རྐང་རྩེད་སྤོ་ལོའི་འགྲན་བསྡུར་འདིས་ཀྱང་མ་འོངས་རང་རྐྱ་འཕེར་བ་ཞིག་ཏུ་གྱུར་ཏེ། རྒྱ་མིའི་རྐང་རྩེད་བ་དང་འགྲན་བཟོད་པ་དང་རྒྱལ་ཕོད་པ་ཞིག་བྱུང་བ་ཡིན་ན། འདིའང་རང་བཙན་གྱི་ཀང་རུས་ལ་ཚེ་སྲོག་ཟུང་ཁྲག་རྒྱུ་བའི་ཆ་ཕྲ་མོ་ཙམ་དུ་ཅི་ནས་མི་འགྱུར་ཨང་།
མ་གཞི་རང་བཙན་གྱི་ཐོབ་ཤོར་ནི་གློ་བུར་དུ་གནམ་ནས་ལྷུང་འོང་བ་ཞིག་དང་། ས་ནས་འབུར་ཐོན་པ་ཞིག་མ་ཡིན་པར། གཟུགས་གཞི་དར་ཞིང་རྣམ་དཔྱོད་རྒྱས་པའི་མི་སྟོབས་པོ་ཆེ་ཞིག་དང་འདྲ་བར། ཆ་ཡོངས་ནས་འདབ་ལག་རྒྱས་ཏེ་ཕྱོགས་ཡོང་ནས་རང་རྐྱ་འཕེར་བ་དང་རང་བཙན་ལྡན་པ་ཞིག་ཡོང་དགོས་དེ་རེད།
དཔྱོད་ཤེས་མིག་ལྡན་ཞིག་གིས་ཕྱིར་མིག་ཅིག་ལྟོས་ཚེ། འུ་ཅག་གི་རང་བཙན་དེའང་སྔར་རྐྱེན་རྒྱུ་འབྲས་གང་ལ་ཡང་རག་མ་ལས་པར་ ༥༩ ལོར་གློ་བུར་དུ་ཤོར་སོང་བ་ཞིག་མ་ཡིན་པ། དུས་ཡུན་རིང་པོ་ཞིག་གི་བརྒྱུད་རིམ་ཁྲོད་རང་ཉིད་ཀྱིས་རང་ཉིད་ཀྱི་རང་བཙན་གྱི་ཆ་ཕྲ་མོ་རྣམས་ཁ་བཏོགས་སྣ་བཏོགས་ཀྱིས་ཉམས་ཉེས་དང་མེད་པ་བཟོས་ཏེ། མཐར་རྒྱུ་རྐྱེན་འབྲས་བུ་ཡོངས་སུ་སྨིན་ཏེ་ ༥༩ རང་བཙན་ཡོངས་སུ་ཤོར་བའི་འབྲས་བུ་དེ་བྱུང་བ་རེད་དོ།
ངོས་ནི་ཉེ་ཆར་བོད་རྒྱལ་ཡོངས་རྐང་རྩེད་སྤོ་ལོ་རྩེད་འགྲན་སྐབས་ཀྱི་རུ་ཁག་རེ་འགའི་རྩེད་སྟངས་ལས་འུ་ཚོ་བོད་པར་ཡང་མ་འོངས་པར་འདིའི་ཕྱོགས་ནས་རྒྱ་ནག་དང་འགྲན་བཟོད་པ་ཞིག་གི་རེ་བ་ཆུང་ཆུང་ཞིག་རང་སེམས་ལ་མཐོང་སྟེ་དགའ་ནས་ཡོད་དོ།