བཙན་བྱོལ་མཐོ་རིམ་སློབ་ཕྲུག་སྐོར་ཞིག་དང་གླེང་མོལ་བྱས།

ཕྱི་ཟླ་ ༥ ཚེས་ ༡༢ ནས་ཕྱི་ཟླ་ ༦ ཚེས་ ༡༢ བར་སཱ་ར་མཐོ་སློབ་ཏུ་བོད་རིགས་མཐོ་རིམ་སློབ་མ་ཚོར་བོད་ཀྱི་སྐད་ཡིག་རིག་གཞུང་སྐོར་གྱི་ཟབ་སྦྱོང་འཛིན་གྲྭ་ཞིག་འཚོགས་བཞིན་པའི་སྐབས་དང་བསྟུན། སློབ་མ་ཁག་ཅིག་ལ་བཅར་འདྲི་བྱས་ཡོད།

དབྱར་ཁའི་གུང་གསེང་དང་བསྟུན་ཏེ་ལོ་ལྟར་སཱ་ར་མཐོ་སློབ་ཏུ་རྒྱ་གར་མཐོ་སློབ་ཁག་གི་བོད་རིགས་སློབ་ཕྲུག་ཚོར་བོད་པའི་རྒྱལ་རབས་ལོ་རྒྱུས་དང་། སྐད་ཡིག་རིག་གཞུང་། ནང་ཆོས། ༧གོང་ས་མཆོག་གི་དགོངས་བཞེད་སོགས་སློབ་ཁྲིད། དེ་བཞིན་ཆེད་མཁས་མི་སྣའི་གཏམ་བཤད་སོགས་ཀྱི་ཟབ་སྦྱོང་འཛིན་གྲྭ་ཞིག་སྒྲུབ་ཀྱི་ཡོད་པ་ལྟར། ད་ལོར་ཡང་ཕྱི་ཟླ་ ༥ ཚེས་ ༡༢ ནས་ཕྱི་ཟླ་ ༦ ཚེས་ ༡༢ བར་གྱི་ཟབ་སྦྱོང་དེ་སཱ་ར་མཐོ་སློབ་ཏུ་ཚོགས་ཡོད་ཅིང་། དེར་ས་གནས་ཁག་ ༦ གི་མཐོ་སློབ་ཁག་གི་སློབ་མ་ ༥༠ ཙམ་མཉམ་ཞུགས་བྱས་འདུག

སཱ་ར་མཐོ་སློབ་གྱི་སློབ་སྤྱི་འཇམ་དཔལ་གྲགས་པ་ལགས་ཀྱིས་ངོ་སྤྲོད་གནང་པ་ལྟར་ན། ཟབ་སྦྱོང་འཛིན་གྲྭ་འདི་༧གོང་ས་མཆོག་གི་བཀའ་དགོངས་ལྟར་ ༢༠༠༠ ལོ་ནས་མགོ་འཛུགས་བྱས་པ་ཞིག་ཡིན་པ་དང་། སློབ་ཟབ་སྦྱོང་དང་སློབ་མའི་འགྲོ་གྲོན་ཡང་༧སྐུ་སྒེར་ཡིག་ཚང་ནས་གནང་གི་ཡོད་འདུག ཁོང་གིས་ད་སྔའི་མྱོང་ཚོར་སྐོར་ནས་མཐོ་རིམ་སློབ་གྲྭ་འགྲིམ་བཞིན་པའི་བོད་རིགས་སློབ་མ་ཚོར་སློབ་སྦྱོང་དང་མཉམ་དུ་ཁ་ཕྱོགས་བརྟན་པོ་མེད་པ་དང་། ལྷག་པར་དུ་དཔལ་འབྱོར་གསོག་སྒྲུབ་ཙམ་ལས་མི་རིགས་དང་རྒྱལ་ཁབ་སླར་གསོའི་བསམ་བློ་ཡོད་མཁན་དཀོན་པ། དེ་ལ་གཞི་རིམ་གྱི་རྒྱུ་རྐྱེན་སྣ་མང་ཞིག་ཡོད་ངེས་ཀྱང་གཙོ་བོ་ཁྱིམ་ཚང་དང་ཕ་མས་སོ་སོའི་ཕྲུ་གུ་ཚོ་ཆུང་དུས་ནས་དཔལ་འབྱོར་གྱི་འཐབ་རྩོད་ནང་ཚུད་ཐབས་བྱས་པའི་བསམ་བློའི་སློབ་གསོ་ཤུགས་ཆེན་པོ་ཐེབས་རྐྱེན་ཞིག་ཡིན་པར་བརྗོད་བྱུང་།

མཱ་ངྷི་རཱ་སི་ཡུ་ཤེ་མཐོ་སློབ་ནང་ཆབ་སྲིད་ཚན་རིག་ལོ་རིམ་གསུམ་པའི་ནང་སློབ་གཉེར་བྱེད་བཞིན་པའི་རྡོ་རྗེ་ཚེ་རིང་ལགས་ཀྱིས་ཟླ་གཅིག་རིང་གི་གུང་སེང་དེ་ནང་ནས་བསྐྱལ་བ་ཡིན་ན་ཟ་ཉལ་རྒྱག་རྒྱུ་ལས་གང་ཡང་རག་གི་མེད་སྟབས། སོ་སོས་སྔོན་མ་སློབ་གྲྭ་ནས་བོད་ཡིག་ཅུང་ཙམ་སྦྱངས་ཡོད་པ་དེ་མ་བརྗེད་པའི་ཆེད་དུ་ཟབ་སྦྱོང་ལ་ཡོང་ཡོད་སྐོར་བརྗོད་བྱུང་། ཁོང་ལ་བོད་ཀྱི་འཐབ་རྩོད་ལ་ངོས་འཛིན་ཅི་འདྲ་བྱེད་ཀྱི་ཡོད་སྐོར་དྲིས་པར་ཁོང་གིས། “ང་ཚོ་བོད་མི་ཞིག་ཏུ་སྐྱེས་པ་ནས་བོད་མིའི་འཐབ་རྩོད་པ་ཞིག་གི་ངོ་བོར་གནས་ཡོད་པ་དང་། བོད་ཀྱི་འཐབ་རྩོད་འདི་གང་ཟག་སྒེར་གཅིག་གཉིས་ཤིག་མིན་པར་རྩམ་གཟན་ཚང་མའི་འཐབ་རྩོད་ཅིག་ཆགས་ཡོད་པ་རེད་”ཅེས་བརྗོད་སོང་།

ཅེ་ནའེ་ཨེ་ཐི་རཱ་ཇི་བུད་མེད་མཐོ་སློབ་ནང་དབྱིན་ཡིག་ལོ་རིམ་གསུམ་པའི་ནང་སློབ་གཉེར་བྱེད་བཞིན་པ་པདྨ་དབང་མོ་ལགས་ཀྱིས་བོད་ཡིག་དང་རྒྱལ་རབས་སོགས་ལས་ནང་ཆོས་ངོ་སྤྲོད་དང་སྒོམ་རྒྱག་སྟངས་སྐོར་གྱི་སློབ་ཁྲིད་གཉིས་ཕན་ཐོགས་ཆེ་ཤོས་བྱུང་ཟེར། ཁོ་མོར་སློབ་མཐར་ཕྱིན་རྗེས་ག་རེ་བྱ་འཆར་ཡོད་མེད་དྲིས་པར། “ལས་ཀ་འདི་བྱ་རྒྱུ་ཡིན་ཞེས་ཁ་ཚོད་གཅོད་ཁག་ཀྱང་། ཆུང་དུས་ནས་བོད་གཞུང་གིས་གསོས་ནས་ཡོང་བ་ཞིག་ཡིན་སྟབས། སློབ་མཐར་ཕྱིན་རྗེས་བོད་པའི་སྤྱི་ཚོགས་ནང་ལས་ཀ་བྱ་འཆར་ཡོད་”ཅེས་ལན་འདེབས་བྱས་སོང་།

ཝེ་ཇི་ཝ་རཱ་གྲོང་ཁྱེར་གྱི་ཨན་ཌི་རཱ་མཐོ་སློབ་ཏུ་ཚོང་ལས་ལོ་རིམ་གསུམ་པའི་ནང་སློབ་གཉེར་བྱེད་བཞིན་པ་བསྟན་འཛིན་རིག་གྲོལ་གྱིས་བོད་ཡིག་ཡར་རྒྱས་གཏོང་ཕྱིར་དང་། རྗེས་མ་གཞུང་ཞབས་སུ་ཡིག་རྒྱུགས་གཏོང་འཆར་ཡོད་པས་བོད་ཡིག་སྦྱང་གི་ཡོང་པ་ཡིན་ཟེར། ཁོང་ལ་མུ་མཐུད་ཚོང་ལས་ཐོག་སློབ་སྦྱོང་མཐར་ཕྱིན་པ་སྦྱང་རྩིས་ཡོད་མེད་དྲིས་པར། “སོ་སོས་ཚོང་ལས་ཐོག་ག་ཚོད་སློབ་སྦྱོང་ཐོན་པ་བྱ་དགོས་བསམ་ཡང་། བོད་པའི་སྤྱི་ཚོགས་ནང་ལས་ཁུངས་ཤིག་ནས་རྩིས་པ་འདྲ་བོ་ཞིག་བྱ་རྒྱུ་ཙམ་ལས་མདུན་ལམ་མི་འདུག ཁྲོམ་ར་སོགས་ཚོང་ལས་སྡེ་ཚན་ནང་ལས་ཀ་བྱ་རྒྱུའི་མདུན་ལམ་བོད་པའི་སྤྱི་ཚོགས་ནང་མེད་སྟབས། ལས་ཀ་ལེགས་པ་དང་ཆེ་མཐོང་ལྡན་པ་ཞིག་གང་ནས་རག་ན་དེར་འགྲོ་རྒྱུ་ཡིན་”ཟེར།

བྷ་རོ་ཌ་ཨེམ་ཨེ་སི་གཙུག་ལག་སློབ་གྲྭར་དཔལ་འབྱོར་རིག་པ་ལོ་རིམ་གསུམ་པའི་ནང་སློབ་གཉེར་བྱེད་བཞིན་པ་ཚེ་དབང་ལགས་ཀྱིས་མཐོ་སློབ་སྐབས་བོད་ཀྱི་དུས་བབ་མཚམས་རེར་ཀློག་ཐུབ་པ་ཙམ་ལས་ལོ་ ༣ རིང་བོད་ཡིག་འབྲི་ཀློག་དང་ཁ་བྲལ་སོང་། དེར་བརྟེན་ཐེངས་འདིར་ཆེད་དུ་བོད་ཡིག་བསྐྱར་སྦྱོང་བྱེད་དུ་ཡོང་བ་ཡིན་ཟེར། ཁོང་ལ་དཔལ་འབྱོར་རིག་པར་སློབ་སྦྱོང་བྱ་རྒྱུ་དེ་ཁོང་གི་ཕུགས་བསམ་ཡིན་མིན་དྲིས་པར། “ངའི་དམིགས་ཡུལ་དངུལ་ཁང་སྐོར་ལ་སློབ་སྦྱོང་བྱ་རྒྱུ་དེ་ཡིན། འོན་ཀྱང་། དངུལ་ཁང་གི་སློབ་སྦྱོང་ཐོན་ཡང་ཡུལ་མིའི་མི་སེར་མིན་ན་ལས་ཀ་རག་གི་མེད་སྟབས། དཔལ་འབྱོར་རིག་པའི་སྐོར་ལ་སློབ་སྦྱོང་བྱ་རྒྱུར་དམིགས་ཡུལ་ལ་འགྱུར་བ་གཏོང་དགོས་བྱུང་སོང་”ཞེས་བརྗོད་བྱུང་།

བྷ་རོ་ཌ་ཨེམ་ཨེ་སི་གཙིག་ལག་སློབ་གྲྭར་ཆབ་སྲིད་རིག་པའི་རིག་གནས་རབ་འབྱམས་པ་ལོ་རིམ་དང་པོའི་ནང་སློབ་གཉེར་བྱེད་མཁན་པ་སངས་ཚེ་རིང་ལགས་ཀྱིས་མཐོ་སློབ་ནང་བོད་པའི་གློག་བརྙན་སྟོན་པ་དང་དུས་སྟོན་སྲུང་གཙི། བོད་ནས་ཡོང་མཁན་ཚོས་སོ་སོའི་ལོ་རྒྱུས་ངོ་སྤྲོད་སོགས་བྱེད་ཀྱི་ཡོད་པར། རྒྱ་གར་གྱི་དགེ་རྒན་དང་སློབ་མ་ཚོས་བོད་དོན་ལ་དོ་སྣང་ཆེ་རུ་འགྲོ་ཡི་འདུག་ཟེར། ཁོང་ལ་ད་ལྟའི་བོད་མིའི་འཐབ་རྩོད་ལ་གྲུབ་འབྲས་གང་འདྲ་མཐོང་གི་ཡོད་མེད་དྲིས་པར། “རྒྱ་གར་གྱིས་འཚེ་མེད་ཞི་བའི་འཐབ་རྩོད་ལ་བརྟེན་ནས་རང་བཙན་བླངས་པ་རེད། ཨ་རིས་དམག་བརྒྱབ་སྟེ་རང་བཙན་བླངས་པ་རེད། བོད་པས་ཆོས་རིག་སྲུང་སྐྱོབ་ཀྱི་འཐབ་རྩོད་བྱེད་ཀྱི་ཡོད་པ་རེད། གང་ལྟར་ངས་བཤད་ཤེས་མ་སོང་”ཟེར།

ཅན་ངྷི་གྷར་དུ་མཐོ་སློབ་འགྲིམས་བཞིན་པའི་ཆོས་གྲགས་ལགས་ལ་རྒྱ་གར་མཐོ་སློབ་ཁག་གི་བོད་རིགས་མཐོ་རིམ་སློབ་མ་ཚོའི་གནས་སྟངས་སྐོར་དྲིས་པར་ཁོང་གིས། “རེ་ཟུང་མ་གཏོགས་བོད་པའི་སློབ་ཕྲུག་མང་ཆེ་བ་འཛིན་རིམ་བཅུ་གཉིས་ཐོན་ཏེ། རྒྱ་གར་མཐོ་སློབ་ཁག་ཏུ་ཞུགས་རྗེས་བོད་པའི་ངོ་བོ་བརླག་འགྲོ་བ་རེད། དེ་ནི་བོད་ཡིག་འབྲི་ཀློག་གི་གཤིས་ཀ་བརླག་འགྲོ་བ་དང་། བོད་སྐད་བཤད་པ་དང་བོད་ཆས་གྱོན་པའི་སྲོལ་བརླག་འགྲོ་བ། བོད་པའི་སེམས་ཁམས་བརླག་འགྲོ་བ་སོགས་ཀྱི་ཐད་ནས་བཤད་ཀྱི་ཡོད་”ཅེས་བརྗོད་བྱུང་།

ལྡི་ལི་ནའེ་རོ་གཙུག་ལག་སློབ་གྲྭར་དབྱིན་ཡིག་རྩོམ་རིག་སྟེང་གཙུག་ལག་རབ་འབྱམས་པ་ལོ་རིམ་གཉིས་པའི་ནང་སློབ་གཉེར་བྱེད་བཞིན་པ་ངག་དབང་དཔལ་མོ་ལགས་སུ་མཐོ་སློབ་ཁག་གི་རྒྱ་གར་བ་ཚོས་བོད་མིར་ལྟ་སྟངས་གང་འདྲ་ཡིན་པ་དྲིས་པར“ང་སྔོན་མ་རྒྱ་གར་ལྷོ་ཕྱོགས་སུ་མཐོ་སློབ་ནང་ཡོད་སྐབས་ས་གནས་དེར་བོད་པ་དེ་ཙམ་མང་པོ་མེད་སྟབས། རྒྱ་གར་བ་ཚོས་བོད་མི་ཚོར་དགའ་བོ་བྱེད་ཀྱི་ཡོད་ཀྱང་། ད་ཆར་ལྡི་ལིར་ཡོང་སྐབས་བོད་མི་མང་པོ་ཡོད་པ་དང་། རྒྱ་གར་བའི་མིག་ནང་བོད་པ་ལབ་ན་མགོ་བདེ་བོ་དང་མ་རབས་ཚ་བོ་ཞིག་ལ་ངོས་འཛིན་བྱེད་ཀྱི་འདུག ངའི་རེ་བར་བོད་མི་རྒན་གཞོན་སུ་ཡིན་རུང་། སོ་སོ་ནང་པ་ཞིག་ཡིན་པ་དང་། ལྷག་པར་དུ་རང་ཉིད་སྐྱབས་བཅོལ་བ་ཞིག་ཡིན་པ་ངོ་འཕྲོད་པའི་ཐོག་རྒྱ་གར་ཡུལ་མི་དང་མཐུན་པའི་བྱ་སྤྱོད་འཛིན་རྒྱུ་གལ་ཆེན་པོ་རེད། གཞན་ཉིན་གཅིག་རྒྱ་གར་བ་ཚོ་བོད་པར་མི་དགའ་བ་ཞིག་ཆགས་ན་དཀའ་ངལ་ཆེན་པོ་འཕྲད་ཡོང་གི་རེད་”ཅེས་བརྗོད་བྱུང་།

ལྡི་ལི་ཧན་སི་རཱ་ཇི་མཐོ་སློབ་ཏུ་ཚན་རིག་ལོ་རིམ་གསུམ་པའི་ནང་སློབ་གཉེར་བྱེད་བཞིན་པ་ཚེ་དབང་ལགས་ཀྱིས་དེང་སྐབས་བོད་ནང་རང་ལུས་མེར་བསྲེགས་གཏོང་མཁན་དག་གི་འབོད་ཚིག་༧གོང་ས་མཆོག་བོད་དུ་ཕེབས་འཇུག་དགོས་པ་དང་བོད་ཀྱི་རིག་གཞུང་ལ་སྲུང་སྐྱོབ་བྱ་དགོས་པ་སོགས་ཡིན་སྟབས། སོ་སོས་ཐུབ་པ་དེ་བོད་ཡིག་ལ་དོ་སྣང་བྱ་རྒྱུ་དེ་ཡིན་པས་ཟབ་སྦྱོང་ལ་ཡོང་པ་ཡིན་ཟེར། ཁོང་ལ་བོད་པའི་སྤྱི་ཚོགས་ནང་ལྡི་ལིར་ཡོད་པའི་བོད་རིགས་མཐོ་རིམ་སློབ་མ་ཚོ་འཕྲོ་བརླག་ཏུ་འགྲོ་བཞིན་པའི་གླེང་སློང་ཞིག་ཡོང་གི་ཡོད་པ་དེའི་སྐོར་དྲིས་པར། “ཅིག་སྡུག་ཅག་རེད་ཅེས་སྐད་ཆ་ཞིག་གོ་ཡོང་དུས་ཚང་མས་དེ་ནག་པོ་བཟོ་བ་དེ་བོད་མི་ཚོའི་གཤིས་ཀ་ཞིག་རེད། མཚན་ཚོགས་ལ་འགྲོ་བ་དང་དགའ་རོགས་སྒྲིག་ཡ་དེ་ལྡི་ལི་ཙམ་ཡིན་པར་ས་གནས་གཞན་གྱི་མཐོ་སློབ་ཁག་ཏུའང་གཅིག་མཚུངས་སུ་ཡོད་པ་རེད། འོན་ཀྱང་། ལྡི་ལིར་མཚོན་ན་ལོ་རེའི་ནང་ཡིག་རྒྱུགས་ཐེངས་གཅིག་མ་གཏོགས་མེད་སྟབས། སློབ་སྦྱོང་དང་སློབ་མའི་འགན་འཁྲུ་ཧ་ཅང་གུ་ཡངས་དྲགས་ཏེ་འཐུས་ཤོར་ལ་འགྲོ་བཞིན་ཡོད་པ་ཞིག་མཐོང་སོང་”ཟེར།

མཐར་བྷིང་ལོར་གྲོང་ཁྱེར་ནང་གསར་འགོད་རིག་པ་ལོ་རིམ་གསུམ་པའི་ནང་སློབ་གཉེར་བྱེད་བཞིན་པའི་བསྟན་འཛིན་གསལ་སྒྲོན་ལགས་ཀྱིས་ཐེངས་འདིར་ཆེད་དུ་བོད་ཡིག་ཡར་རྒྱས་སུ་གཏོང་གི་ཡོང་བ་ཞིག་ཡིན་ཚུལ་དང་། འཛིན་རིམ་བཅུ་གཉིས་པར་བོད་པའི་སློབ་གྲྭར་ཕྱིན་ཡང་བོད་ཡིག་ཡག་པོ་མ་ཤེས་པ་སོ་སོས་འབད་བརྩོན་མ་བྱས་པར་འཐུས་ཤོར་དུ་བཏང་བ་ཞིག་ལ་ངོས་འཛིན་བྱེད་ཀྱི་ཡོད་ཟེར། ཁོང་ལ་རྒྱལ་སྤྱིའི་ནང་གི་བོད་མིའི་འཐབ་རྩོད་དེ་ཚད་གང་འདྲ་ཞིག་ལ་སླེབས་ཡོད་པར་ངོས་འཛིན་གྱི་སྐོར་དྲིས་པར་ཁོང་གིས། “ ང་ཚོར་མཚོན་ན་རྒྱལ་ཁབ་གཞན་ཞིག་གི་ས་ཐོག་ནས་བོད་དོན་འཐབ་རྩོད་བྱེད་ཀྱི་ཡོད་པ་འདིས་གནད་དུ་སྨིན་པ་ཞིག་ཡོང་ཐུབ་མེད་པ་དང་། ད་སྔ་རྒྱལ་སྤྱིའི་ཐོག་ཏུའང་ཕྱི་གསལ་ནང་གསལ་ཐོག་བོད་དོན་ལ་རྒྱབ་སྐྱོར་བྱེད་མཁན་གྱི་རྒྱལ་ཁབ་དཀོན་པོ་ཆགས་ཡོད་པ་བཅས་ཀྱིས་བོད་དོན་དེ་ལས་བསླ་བོར་སེལ་ཐུབ་པ་ཞིག་མ་རེད་དྲན་གྱི་ཡོད། ཡིན་ནའང་རྒྱལ་སྤྱིའི་མི་དམངས་ཚོས་བོད་དོན་ལ་རྒྱབ་སྐྱོར་བྱེད་བཞིན་པ་དེ་ཁ་ཞེ་གཉིས་མེད་ཡིན་སྟབས། ང་ཚོའི་ལས་འགུལ་གྱི་ཁ་ཕྱོགས་མི་དམངས་གཙོ་བོར་འཛིན་རྒྱུ་གལ་ཆེན་པོ་རེད་སྙམ”ཅེས་བརྗོད་སོང་།

གསར་འགོད་པ། བནྡེ་སྐྱབས།