རྒྱ་གར་གཞུང་གིས་ཁྲིམས་གསར་པ་ཞིག་བཟོས་ཏེ། རྒྱ་གར་བ་སུ་ཞིག་གིས་རྒྱ་གར་བྱང་ཤར་ཁུལ་གྱི་མི་ཚོར་ཅཱེན་ཀེ་ཞེས་བརྗོད་ཚེ་ལོ་ ༥ ཁྲིམས་ཐག་གཅོད་རྒྱུའི་ཁྱབ་བསྒྲགས་བྱས་འདུག
ཕྱི་ཚེས་ ༦ ཉིན་ཐོན་པའི་གནས་ཚུལ་ལྟར་ན། རྒྱ་གར་གཞུང་གིས་སྐྱེས་ཁོངས་དང་གྲལ་རིམ་དབྱེ་འབྱེད་འགོག་སྲུང་གི་རྩ་ཁྲིམས་འོག རྒྱ་གར་བྱང་ཤར་ཁུལ་གྱི་མི་སུ་ཞིག་ལ་ཅཱེན་ཀེ་(Chinki) ཞེས་མིའི་ཤ་མདོག་ལ་དབྱེ་འབྱེད་ཀྱི་ཐ་སྙད་བེད་སྤྱོད་བྱས་ཚེ། གང་ཟག་དེར་ལོ་ ༥ བར་གྱི་བཙོན་འཛུགས་ཁྲིམས་ཐག་གཅོད་རྒྱུའི་ཁྲིམས་གསར་པ་གཏན་འབེབས་བྱས་ཡོད་པ་མ་ཟད། རྒྱ་གར་ནང་སྲིད་ལས་ཁུངས་ཀྱིས་མངའ་སྡེ་ཚང་མས་ནང་ཁྲིམས་གསར་པ་དེ་ལག་བསྟར་བྱ་དགོས་པའི་བཀའ་རྒྱ་བཏང་ཡོད་འདུག
ཅཱེན་ཀེ་ཞེས་པ་དེ་ནི་རྒྱ་གར་བྱང་ཤར་ཁུལ་གྱི་བོད་དང་སོག་པོའི་གདོང་དབྱིབས་དང་ཤ་མདོག་ཅན་ཚོར་གོ་བ་དང་། ཚིག་དོན་གྱི་ཆ་ནས་གྲལ་རིམ་དབྱེ་འབྱེད་ཀྱི་ཚིག་གམ་གཞན་ལ་དམའ་འབེབ་པའི་ཚིག་ཅིག་མིན་ཡང་། དུས་སྐབས་ཤིག་ནས་ཐ་སྙད་དེ་ནི་རྒྱ་གར་བ་ཚོས་རྒྱ་གར་བྱང་ཤར་ཁུལ་གྱི་མི་ཚོ་ཡུལ་མཐའ་འཁོབ་དང་། སྤྱི་ཚོགས་ཀྱི་རྗེས་ལུས་ཡིན་པར་ཟུར་ཟ་དང་ཁྱད་གསོད་བྱེད་པའི་ཐ་སྙད་ཅིག་ཆགས་ཡོད།
རྒྱ་གར་གཞུང་གིས་ཁྲིམས་གསར་པ་དེ་གཏན་འབེབས་བྱས་རྗེས་རྒྱ་གར་དུས་བབ་གསར་ཁང་(Times of India) གིས། རྒྱ་གར་བྱང་ཤར་ཁུལ་ནས་ཡིན་པའི་མི་ཁག་ཅིག་གི་བསམ་ཚུལ་བླངས་པའི་ནང་། གཅིག་གིས་སྔོན་མ་གྷན་ངྷི་ཇེ་ཨ་ཧྥི་རི་ཀའི་ནང་ཡོད་སྐབས་ཤ་མདོག་དབྱེ་འབྱེད་ཀྱི་གཉའ་གནོན་འོག་ཁོང་མེ་འཁོར་ནས་ཕྱིར་ཕུད་བཏང་སྟབས། གྷན་ངྷི་ཇེ་ཡིས་འཐབ་རྩོད་མགོ་བཙུགས་པ་ཞིག་ཡིན་ཡང་། ད་ཆར་སོ་སོའི་རྒྱལ་ཁོངས་སུ་ཤ་མདོག་དབྱེ་འབྱེད་ཀྱི་གྲལ་རིམ་སླེབས་ཡོད་སྟབས། ཁྲིམས་དེ་འདྲ་བཟོས་དགོས་ངེས་ཡིན་པར་བརྗོད་འདུག་ལ། ཡང་གཞན་ཞིག་གིས་ “ལྡི་ལི་ནང་གི་མི་དེ་ཚོས་བྱང་ཤར་ཁུལ་གྱི་བུད་མེད་ཚོར་ཅཱེན་ཀེ་ཞེས་འབོད་སྐབས་ཁོང་ཚོ་སླ་བོ་ཡིན་པའི་ཟུར་ཟ་བྱེད་ཀྱི་ཡོད་པ་རེད”ཅེས་བརྗོད་འདུག
གསར་འགོད་པ། བནྡེ་སྐྱབས།
དེ་བཞིན་བཙན་བྱོལ་བོད་གཞུང་གི་ལས་བྱེད་པ་ཚོས་ཀྱང་བོད་ནས་གསར་དུ་འབྱོར་བའི་བོད་མི་རྣམས་ལ ་་ཀ་ཅྰ་་ ཞེས་ཟུར་ཟ་དང་མཐོང་ཆུང་བྱས་ཚེ་ལོ་ལྔའི་རིང་ལས་གནས་ནས་ཕྱིར་འབུད་གཏོང་རྒྱུ་དང་། གཞིས་ཆགས་བོད་མི་ཚོས་གསར་འབྱོར་དག་ལ ་་པ་འགོ་་ ཞེས་མཐོང་ཆུང་བྱས་ཚེ་ལོ་ལྔའི་རིང་བཙོན་འཇུག་བྱ་རྒྱུ་བཅས་གསལ་བསྒྲགས་སུ།
ད་བཙན་བྱོལ་བོད་གཞུང་གིས་ཀྱང་གསར་འབྱོར་ཀ་ཅ་ཟེར་མཁན་དེ་ཚོར་ཁྲིམས་ཤིག་བཟོ་དགོས་མིན་འགྲོ། ཚིག་འདིས་བོད་རིགས་ཀྱི་ཆིག་སྒྲིལ་ལ་གནོད་པ་མ་ཟད་བོད་ནས་ཡོང་མཁན་རྣམ་ལ་མཐོང་ཆུང་དང་གྲལ་རིམ་དབྱེ་འབྱེད་ཀྱི་ལྟ་བ་མངོན་གསལ་དོོད་པོས་སྟོན་གྱིན་འདུག
གྲོགས་པོ་བཛྲ་སུ་མ་ཏི་ལགས། ཁྱེད་ཀྱིས་བཤད་པ་བདེན། ངས་ཀྱང་ཁྱོད་ཀྱི་བཤད་པ་དེ་འདོད་པའི་ཁར་ལྡོག་འདྲི་བྱེད་བཞིན་པ་ནི། ཁ་ནས་མཐོང་ཆུང་ཟུར་ཟ་བྱས་པའི་ཚིག་སྐམ་ཙམ་གཞིར་བཞག་ནས་ལོ་ལྔའི་བཙོན་འཇུག་དེ་འཁུར་དགོས་ན། ཁྱོད་ཡིན་ན་འཁུར་ཐུབ་ས་རེད་དམ། གཞི་ལ་བབས་པའི་ཁྲིམས་ཤིག་ལོས་དགོས་ཀྱང་དགོས། འདི་ཐད་དྲག་པ་མ་ཡིན་ནམ་ཟེར་བ་ཡིན།
གྲོགས་པོ་ཀླུ་ཚང་། ཨ་འཕྲིན་ལགས། སྨྲ་བརྗོད་རང་དབང་གི་ནང་དོན་ཁ་ནས་གང་བྱུང་བརྗོད་ཆོག་པའི་དོན་མ་རེད། གོང་དུ་བརྗོད་ཡོད་པ་བཞིན་མི་རིགས་དབྱེ་འབྱེད་དང་མཐོང་ཆུང་ཟུར་ཟ་ཡིན་ན་དེ་ངེས་བར་དུ་ཁྲིམས་དང་ཐུག་ངེས་རེད། ལྷག་པར་དུ་གང་ཡང་བརྗོད་ཆོག་ཀྱང་གང་བརྗོད་པ་དེའི་འགན་ཡང་འཁྱེར་དགོས་པ་རེད། འགན་མེད་པར་གང་ཡང་བརྗོད་ཆོག་པ་སྨྲ་བརྗོད་རང་དབང་གི་དོན་མ་རེད།
ཁྲིམས་ཆད་དེ་འདྲ་དགོས་ངེས་ཤིག་རེད། ཁ་ནང་ཐོན་ཚད་མཐའ་དག་སྨྲ་བརྗོད་རང་དབང་ག་ལ་ཡིན། གཞན་ལ་ཟུར་ཟ་དང་ཁྱད་གསོད་བྱེད་པའི་ཚིག་ངན་སྤྱོད་མཁན་རིགས་ཁྲིམས་སར་ཞུ་གཏུག་བྱེད་ས་ཡོད་པ་དེ་ཡག་པོ་རེད། དམངས་གཙོའི་རྒྱལ་ཁབ་མང་པོར་ཁྲིམས་ཆད་འདི་འདྲ་ཡོད་པ་རེད།
རྒྱ་གར་ནང་སྲིད་ཀྱིས་ཁྲིམས་ལུགས་གཏན་འབེབས་ཀྱིས་མངའ་སྡེ་ཁག་ལ་འདི་ལྟར་བཀའ་གནང་སྟངས་དང་། དེ་མིན་ལོ་དེ་ཙམ་གྱི་ཁྲིམས་གཅོད་ལ་བལྟས་ན། གནས་ཚུལ་དེ་དེ་འདྲའི་གནས་སྟངས་ཛ་དྲག་པོ་ཞིག་ཆགས་ཡོད་དམ། ཡང་ན་རྒྱ་གར་ཡང་སྨྲ་བརྗོད་རང་དབང་ཐད་ཅུང་ཐད་དྲག་པའི་སྲིད་ཇུས་འཛིན་མཁན་གྱི་གྲལ་དུ་སྙེག་བཞིན་པ་རེད།