གཟའ་སྤེན་པ་ནས་ཉིན་གསུམ་རིང་ངྷ་སར་ལྡི་ལི་རྒྱ་གར་བོད་དོན་རྒྱབ་སྐྱོར་ཚོགས་པ་དང་ཕྱི་དྲིལ་ལས་ཁུངས་མཉམ་འབྲེལ་གོ་སྒྲིག་འོག རྒྱ་གར་བོད་དོན་རྒྱལ་སྐྱོར་ཚོགས་པའི་རྒྱལ་ཡོངས་ཚོགས་ཆེན་ཐེངས་བཞི་བ་མགོ་འཛུགས་སྟེང་། ༧གོང་ས་མཆོག་ཆིབས་སྒྱུར་བཀའ་སློབ་བསྩམ་སོང་།
ཕྱི་ཕྱི་ཚེས་ ༩ ནས་ཚེས་ ༡༡ བར་ཉིན་གསུམ་རིང་ངྷ་ས་ཟློས་གར་ཚོགས་ཁང་དུ་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བཞི་བ་འཚོགས་བཞིན་ཡོད་པ་དང་། ཚོགས་ཆེན་ཉིན་དང་པོའི་སྐུ་འགྲོན་གཙོ་བོར་༧གོང་ས་མཆོག་དང་། དེ་བཞིན་རྒྱ་གར་ཕྱི་སྲིད་དྲུང་ཆེ་ཟུར་བ་ལཱ་ལེ་ཊི་མན་སེན། རྒྱ་གར་གྲོས་ཚོགས་འཐུས་མི་ལྕམ་ཅཱན་ཌི་རེ་ཤི་ཀུ་མར། བཀའ་ཁྲི་བློ་བཟང་སེང་གེ་མཆོག གཞན་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་སྤྱི་ཁྱབ་འགན་འཛིན་དང་འགན་འཛིན་གཞོན་པ། ལྡི་ལི་དོན་གཅོད་བསྟན་པ་ཚེ་རིང་། བཙན་བྱོལ་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་བཅས་ཚོགས་ཞུགས་གནང་ཡོད་པ་དང་། ཐེངས་འདིའི་ཚོགས་ཆེན་སྟེང་རྒྱ་གར་ས་གནས་གང་ས་ནས་བོད་དོན་རྒྱབ་སྐྱོར་བ་ ༡༥༠ ལྷག་ཚོགས་བཅར་མཉམ་ཞུགས་བྱས་འདུག
ཚོགས་ཆེན་སྟེང་༧གོང་ས་མཆོག་གིས་རྒྱ་ནག་གཞུང་གིས་བོད་ལ་དབང་སྒྱུར་བྱས་ཡོད་ཀྱང་བོད་མིའི་ནང་བསམ་བློར་དབང་སྒྱུར་ཐེབས་མེད་པ། རྒྱ་གར་ནས་དར་བའི་བོད་བརྒྱུད་ནང་བསྟན་ཆོས་ལུགས་གཙོ་བར་གྱུར་བའི་བོད་ཀྱི་རིག་གཞུང་ནང་པ་ཙམ་མ་ཡིན་པར་སྤྱི་ཚོགས་ཁྱོན་ཡོངས་ལ་ཕན་ཐོགས་ཆེན་པོ་ཡོད་པའི་སྐོར་ནས་ཁོང་གིས། “དུས་རབས་མང་པོའི་གོང་ནས་བོད་དུ་བོད་རིགས་ཁ་ཆེ་ཆོས་ལུགས་པ་ཡོད་པ་དང་། དེང་སང་ཁོང་ཚོ་མང་པོ་ཞིག་ཤཱི་རེ་ནཱ་གྷར་དུ་གཞིས་ཆགས་ཡོད་ཅིང་། ཁོང་ཚོའི་ཆོས་ཁ་ཆེ་ཆོས་ལུགས་ཡིན་ཡང་བོད་ཀྱི་རིག་གཞུང་གི་ལྟ་སྤྱོད་ཤུགས་ཆེན་པོ་ཡོད་སྟབས། ཁོང་ཚོ་དུས་རྒྱུན་འཚེ་བ་མེད་པ་དང་བྱམས་སྙིང་རྗེ་ལྡན་པ་རྐྱང་ཡིན། ཟླ་རྗེ་མར་ང་ཁོང་ཚོར་བལྟ་རུ་འགྲོ་རྒྱུ་ཡིན་”ཞེས་གསུངས་སོང་ལ། དེ་ལྟ་བུའི་བོད་ཀྱི་རིག་གཞུང་དང་འཛམ་གླིང་གི་སྣེ་གསུམ་པར་འབོད་པའི་བོད་ཀྱི་ཁོར་ཡུག་བོད་མི་ཙམ་མིན་པར་ཨེ་ཤ་ཡ་དང་རྒྱ་ཆེ་ས་ནས་འཛམ་གླིང་སྤྱི་གཅེས་སྤྲས་བྱ་གཞི་ཞིག་ཡིན་པ། བོད་དང་རྒྱ་གར་གཉིས་བར་ལོ་རྒྱུས་དང་རིག་གཞུང་གང་གི་ཐད་ནས་དམིགས་གསལ་ཐུན་མོང་མ་ཡིན་པའི་འབྲེལ་བ་ཡོད་པ། ད་ལྟ་ཁོང་གིས་སྲིད་དབང་མི་རབས་གསར་པར་རྩིས་སྤྲོད་བྱས་ཡོད་པ་དང་མི་ཚེ་ལྷག་མ་འཛམ་གླིང་ཞི་བདེ་དང་ཆོས་ལུགས་མཐུན་སྒྲིལ་ཐད་ནུས་ཤུགས་འདོན་རྒྱུ་ཡིན་པ། ཚོགས་ཞུགས་པ་རྣམས་ཚོགས་འདུར་བཅར་ཐུབ་པ་ཙམ་མ་ཡིན་པར་ཚོགས་ཆེན་སྟེང་གྲོས་བསྡུར་གང་བྱུང་རིགས་ཕྱིར་ཕེབས་རྗེས་ལག་ལེན་བསྟར་རྒྱུ་གལ་ཆེ་ཤོས་ཡིན་པ་སོགས་ཀྱི་བཀའ་སློབ་བསྩལ་ཡོད།
དེ་བཞིན་རྒྱ་གར་མི་སྣ་ཁག་ཅིག་གིས་རྒྱ་གར་གྱི་སྲིད་བློན་དང་པོ་ནའེ་རོ་ཡིས་བོད་ཐོག་བཟུང་པའི་རྒྱ་གར་གཞུང་གི་སྲིད་ཇུས་ལ་ནོར་འཁྲུལ་ཤོར་ཡོད་པ། བོད་ཀྱི་གནད་དོན་ནི་རྒྱ་གར་གྱི་བདེ་འཇགས་དང་རིག་གཞུང་གང་གི་ཐད་ནས་གཡོལ་ཐབས་མེད་པའི་རྩ་དོན་ཞིག་ཆགས་ཡོད་པ། རྒྱ་ནག་གིས་བོད་བཅིངས་འགྲོལ་གཏོང་རྒྱུ་ཡིན་ལུགས་ཁ་ལ་ཁྱེར་ཏེ་བོད་མི་རྣམས་བྲན་གཡོག་ཅན་དུ་བསྒྱུར་ཡོད་པ། བོད་ནས་འབབ་པའི་ཆུ་ཆེན་དག་དང་བོད་ཀྱི་ཁོར་ཡུག་ལ་སྲུང་སྐྱོབ་བྱ་རྒྱུ་དེ་ཨེ་ཤ་ཡ་དང་ལྷག་པར་དུ་རྒྱ་གར་ལ་འགན་ཆེན་པོ་ཡོད་པ། བོད་འདི་འཛམ་གླིང་ནང་བསྐྱར་དུ་རང་དབང་ཅན་གྱི་རྒྱལ་ཁབ་ཅིག་ཏུ་གནས་ཐུབ་རྒྱུར་རྒྱབ་སྐྱོར་དང་མཉམ་ལས་འཐབ་རྩོད་མཐའ་གཅིག་ཏུ་བྱ་རྒྱུ་ཡིན་ཚུལ་སོགས་ཀྱི་སྐོར་བརྗོད་སོང་།
བཀའ་ཁྲི་བློ་བཟང་སེང་གེ་མཆོག་གིས་ཨ་རི་དང་རྒྱ་ནག་ནི་རྒྱ་གར་ཕྱི་འབྲེལ་ཐད་གལ་ཆེན་པོ་ཆགས་ཡོད་པ་དང་། རྒྱ་གར་དང་རྒྱལ་སྤྱིའི་གནས་བབ་ཐད་རྒྱ་གར་གཞུང་གིས་ཁོང་ཚོ་དང་ཕྱི་འབྲེལ་འཛིན་རྒྱུ་གལ་ཆེན་པོ་ཡིན་ཡང་། བོད་ནི་རྒྱ་གར་གྱི་བདེ་འཇགས་ཐད་གཞན་ལས་གལ་ཆེན་པོ་ཡིན་སྐོར། འདས་པའི་ལོ་ ༥༠ ལྷག་རིང་རྒྱ་གར་གཞུང་དམངས་གཉིས་ནི་རྒྱལ་ཁབ་གཞན་གང་ལས་ཀྱང་བོད་མི་ཚོར་བཀའ་དྲིན་ཆེན་པོ་དང་། འབྲེལ་ལམ་རྒྱུན་རིང་ཤོས། ཡིད་ཆེ་བློ་གཏད་འཕེར་ཤོས་དེ་ཡིན་སྐོར་སོགས་གསུངས་སོང་།
ཚོགས་ཆེན་ཉིན་དང་པོར་འབྲེལ་ཡོད་རྒྱ་གར་དང་བོད་མིའི་གནད་ཡོད་མི་སྣ་ཁག་ཅིག་གིས་ད་ལྟའི་བོད་ནང་གི་གནས་བབ། བོད་དང་རྒྱ་དཀར་ནག་གི་ཕྱི་འབྲེལ། བོད་ཀྱི་ཉེན་འཚབ་རང་བཞིན་གྱི་ཁོར་ཡུག་གནས་བབ་དང་དེས་ཁྱིམ་མཚེས་རྒྱལ་དག་ལ་ཐེབས་པའིཤུགས་རྐྱེན། རྒྱ་གར་བོད་དོན་རྒྱབ་སྐྱོར་ཚོགས་པ་དག་གི་བོད་དོན་ལས་འགུལ་ལ་བསྐྱར་ཞིབ་དང་དེ་དག་གི་ཤུགས་རྐྱེན་སོགས་ཀྱི་ཐད་གཏམ་བཤད་དང་དྲི་བ་དྲིས་ལན་གནང་ཡོད་ཅིང་། ཉིན་གཉིས་པར་ནང་ཁུལ་སྡེ་ཚན་ཁག་བགོས་ཐོག རྒྱ་གར་བོད་དོན་རྒྱབ་སྐྱོར་བ་རྒྱ་སྐྱེད་བྱ་ཕྱོགས་དང་། རྒྱ་གར་གྱི་སློབ་གྲྭ་ཁག་དང་མཐོ་སློབ་ཁག གཙུག་ལག་སློབ་ཆེན་སོགས་ཀྱི་ནང་བོད་དོན་གོ་རྟོགས་སྤེལ་ཕྱོགས། ད་སྔའི་བོད་ཐོག་འཛིན་པའི་རྒྱ་གར་གཞུང་གི་སྲིད་ཇུས་བསྐྱར་ཞིབ་བྱ་རྒྱུར་རྒྱ་གར་བོད་དོན་རྒྱབ་སྐྱོར་བ་ཚོས་ནུས་པ་ཇི་ལྟར་འདོན་དགོས་པ་སོགས་ཀྱི་སྐོར་ལ་གྲོས་བསྡུར་བྱ་འཆར་དང་། ཉིན་གསུམ་པར་གྲོས་ཆོད་གཏན་འབེབས་བྱ་རྒྱུ་དང་། རྒྱ་གར་བོད་དོན་རྒྱབ་སྐྱོར་བ་དང་བོད་མིའི་གཞིས་ཆགས་ཁག་གི་འགན་འཛིན་བཅས་ཀྱི་བར་མཉམ་ལས་བྱ་ཕྱོགས་སྐོར་གྲོས་བསྡུར་བྱ་རྒྱུ་བཅས་ཡིན་འདུག
ཐེངས་འདིའི་ཚོགས་ཆེན་སྟེང་རྒྱལ་གར་རྒྱལ་ཡོངས་བོད་དོན་རྒྱབ་སྐྱོར་བ་ ༡༥༠ ལྷག་མཉམ་ཞུགས་བྱས་ཡོད་འདུག རྒྱ་གར་བོད་དོན་རྒྱབ་སྐྱོར་ཚོགས་པའི་རྒྱལ་ཡོངས་ཚོགས་ཆེན་ཐེངས་དང་པོ་ ༢༠༠༣ ལོར་ཅཱན་ངྷི་གར་དུ་ཚོགས་ཡོད་པ་དང་། ཚོགས་ཆེན་ཐེངས་གཉིས་པ་ ༢༠༠༦ ལོར་རྡོ་རྗེ་གདན་དུ་ཚོགས། ཚོགས་ཆེན་ཐེངས་གསུམ་པ་ ༢༠༠༩ ལོར་ལྡི་ལིར་ཚོགས་ཡོད་འདུག
གནས་ཚུལ་རྒྱས་པ་ཕྱི་ཚེས་ ༢༠ ཉིན་གྱི་དུས་བབ་ཚགས་པར་ལ་གཟིགས།
གསར་འགོད་པ། བནྡེ་སྐྱབས།
དེང་སང་རྒྱ་གར་ནང་དུ་ཤེས་ཡོན་པ་མིན་གང་ལྟར་ཀྱང་ཆབ་སྲིད་ལ་དོ་སྣང་ཡོད་མཁན་གྱི་གྲས་སུ་༼རྒྱ་གར་གྱི་སྲིད་བློན་དང་པོ་ནའེ་རོ་ཡིས་བོད་ཐོག་བཟུང་པའི་རྒྱ་གར་གཞུང་གི་སྲིད་ཇུས་ལ་ནོར་འཁྲུལ་ཤོར་ཡོད་༽པ་ངོ་མ་རེད། སྐད་ཆ་འདི་ངས་ཀྱང་རྒྱ་གར་བ་མང་པོའི་ཁ ནས་གོ་མྱོང་། ད་སྔོན་མ་ནི་ནོར་ཡོད་མེད་གང་ལྟར་ཡང་མི་ལོ་༥༠ ནས་༦༠ འདས་ཟིན་པ་རེད།
རྒྱ་གར་གཞུང་དང་མི་དམངས་མཁས་བླུན་སུ་ཡིན་ཡང་བོད་འདི་ལ་ལྟ་སྟངས་༼བོད་ནི་རྒྱ་གར་གྱི་བདེ་འཇགས་ཐད་གཞན་ལས་གལ་ཆེན་པོ་ཡིན་སྐོར། འདས་པའི་ལོ་ ༥༠ ལྷག་རིང་རྒྱ་གར་གཞུང་དམངས་གཉིས་ནི་རྒྱལ་ཁབ་གཞན་གང་ལས་ཀྱང་བོད་མི་ཚོར་བཀའ་དྲིན་ཆེན་པོ་དང་། འབྲེལ་ལམ་རྒྱུན་རིང་ཤོས། ཡིད་ཆེ་བློ་གཏད་འཕེར་ཤོས་དེ་ཡིན་༽ཟེར་བ་སོགས་བདེན་པ་ངོ་མ་ཡིན་ཚེ། ད་ནི་བོད་དོན་ཐོག་ལ་དངོས་སུ་ཁ་གྲགས་རན་རེད། ལས་ཀ་བྱེད་རན་རེད།
རྒྱ་གར་ཚོས་ཁ་ལ་མ་ཉན། རྒྱ་ནག་གིས་ག་ལེར་འགྲམ་ལྕག་བཞུ་གི་རེད་ལ། དེ་དུས་༼སིམ་ལའི་ཆིངས་ཡིག༽གླེང་ཡོང་གི་རེད། གལ་ཏེ་ང་རང་བཀའ་ཁྲི་ཡིན་ན། སྐབས་དེར་ཐོག་མར་རྒྱ་གར་གཞུང་གིས་ཡོངས་ཁྱབ་ཀྱི་ངོས་ནས་བོད་ལ་བཟོད་གསོལ་ཞུ་དགོས་ཞེས་བཤད་སྲིད། གལ་སྲིད་དེ་ལས་ལྡོག་ན། ལ་དྭགས་བཅས་པའི་མངའ་ཁོངས་ཕལ་ཆེ་བ་རྒྱ་ནག་གིས་འཕྲོག་སྲིད་པ་ནི་ཟུར་བལྟས་ལེབ་མཐོང་རང་རེད། ལྟད་མོ་དེ་མགྱོགས་པོར་སླེབས་ངེས་ཡིན་པས། བོད་པ་ཚོར་གྲ་སྒྲིག་ཡོད་དམ། ངོས་ཀྱིས་བལྟས་ན་ཅི་ཡང་མི་འདུག