བཙན་བྱོལ་བོད་མིའི་སློབ་གྲྭ་ཁག་གི་མདུན་ལམ་སློབ་སྟོན་ཟབ་སྦྱོང་ཐེངས་གསུམ་པའི་སྟེང་། ཨ་རི་དང་རྒྱ་གར་མཐོ་སློབ་ཁག་ནས་སློབ་སྟོན་པ་ ༡༡ གདན་ཞུས་གནང་འདུག
དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག བཙན་བྱོལ་བོད་མིའི་སློབ་གྲྭ་ཁག་གི་མདུན་ལམ་སློབ་སྟོན་ཟབ་སྦྱོང་ཐེངས་གསུམ་པ་དེ། ཟླ་འདིའི་ཕྱི་ཚེས་ ༡༡ ནས་ ༡༤ ཉིན་བར་ངྷ་ས་གངས་སྐྱིད་དཔེ་མཛོད་ཚོགས་ཁང་དུ་མགོ་འཛུགས་གནང་ཡོད་ཅིང་། ཐེངས་འདིའི་ཟབ་སྦྱོང་སྟེང་ཨ་རི་དང་རྒྱ་གར་མཐོ་སློབ་ཁག་གི་དགེ་རྒན་ཆེན་མོ་བ་དང་། ཤེས་ཡོན་འགན་འཛིན་བཅས་ཁྱོན་མི་ ༡༡ ཙམ་གདན་ཞུ་གནང་སྟེ། དེང་དུས་དང་མཐུན་པའི་མདུན་ལམ་སློབ་སྟོན་གནང་ཕྱོགས་ཀྱི་བརྗོད་གཞི་ཁག་ ༡༣ ཐོག་ཟབ་ཁྲིད་གནང་མགོ་བཙུགས་ཡོད་ལ། ཐེངས་འདིའི་ཟབ་སྦྱོང་གི་སྐབས་དང་བསྟུན་ཏེ། ངྷ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། ཚོགས་ཞུགས་པ་ཡོངས་ལ་ཚན་རིག་དང་ནང་ཆོས་ཟུང་འབྲེལ་ཐོག་སློབ་མའི་སེམས་ཞི་བར་གནས་ཐབས་དང་སྙིང་རྗེ་བསྐྱེད་ཐབས། སློབ་སྦྱོང་གི་དུས་སུ་བློ་སེམས་རྩེ་གཅིག་ཏུ་སྒྲིམ་ཐབས་སྐོར་གཏམ་བཤད་སྤེལ་རྒྱུ་ཡིན་འདུག
གནས་སྟངས་དེའི་ཐད་ཤེས་རིག་ལས་ཁུངས་ཀྱི་མདུན་ལམ་སློབ་སྟོན་པ་སྒྲོལ་དཀར་དབང་མོ་ལགས་ཀྱིས་ངོ་སྤྲོད་གནང་བ་ལྟར་ན། ཐེངས་འདིའི་མདུན་ལམ་སློབ་སྟོན་ཟབ་སྦྱོང་དེ་ནི། བཙན་བྱོལ་བོད་མི་ཁྱད་ལས་པ་དང་ཕྱི་རྒྱལ་ཁྱད་ལས་པ་གཉིས་བར་ཕན་ཚུན་བསམ་ཚུལ་དང་ཉམས་མྱོང་བརྗེ་རེས་བྱ་ཆེད་ཡིན་འདུག་ལ། ད་ལོར་སྔར་དང་མ་འདྲ་བར་ཨ་རི་དང་རྒྱ་གར་ནས་མདུན་ལམ་སློབ་སྟོན་པ་བཅུ་གཅིག་གདན་ཞུས་ཀྱིས། རྒྱ་བལ་གཉིས་ཀྱི་བཙན་བྱོལ་བོད་མིའི་སློབ་གྲྭ་ཁག་གི་མདུན་ལམ་སློབ་སྟོན་ཁྱད་ལས་པ་ ༡༦ ཙམ་ལ། དེང་དུས་དང་མཐུན་པའི་སློབ་ཕྲུག་ཚོར་མདུན་ལམ་སློབ་སྟོན་གནང་ཕྱོགས་ཐོག་ཟབ་ཁྲིད་གནང་བཞིན་ཡོད་ཡོད་འདུག
གསར་འགོད་པས་ཤེས་རིག་མདུན་ལམ་སློབ་སྟོན་འགན་འཛིན་སྒྲོལ་དཀར་དབང་མོ་ལགས་སུ། བཙན་བྱོལ་བོད་མིའི་མདུན་ལམ་སློབ་སྟོན་གྱི་གལ་གནད་སྐོར་བཀའ་འདྲི་ཞུས་པར། བཀའ་ཁྲི་བློ་བཟང་སེང་གེ་མཆོག་གིས་འཛིན་སྐྱོང་གི་དུས་ཡུན་རིང་ཁྱད་ལས་པ་ ༡༠༠༠ ཙམ་ཐོན་ཐུབ་རྒྱུའི་རེ་བ་རྒྱག་བཞིན་ཡོད་པ་ལྟར། ང་རང་གིས་ཀྱང་ཁྱད་ལས་པ་དེ་ཧ་ཅང་གལ་ཆེན་པོར་མཐོང་གི་ཡོད། སྤྱིར་བཏང་ལས་ཀ་མང་པོ་ཞིག་ཁྱད་ལས་པའི་ལས་ཀ་ཆགས་ཡོད་སྟབས། ཁྱད་ལས་མིན་པའི་ལས་ཀ་བྱས་ན་དེས་ཕན་གནོད་གང་འདྲ་ཡོང་མིན་ཞུ་ཁག་པོ་ཆགས་ཡོད། གཞུང་གི་སྡེ་ཚན་མང་པོ་ཞིག་གི་ནང་ཁྱད་ལས་པ་ཡོད་ན། འཛིན་སྐྱོང་གི་ལས་དོན་གནང་ཕྱོགས་ཐོག་ཕན་ཐོགས་ཆེན་པོ་ཡོང་གི་རེད ” ཅེས་བརྗོད་བྱུང་།
སློབ་མའི་མདུན་ལམ་སློབ་སྟོན་ཟབ་སྦྱོང་འདི་ནི། ཤེས་རིག་མདུན་ལམ་སློབ་སྟོན་ཚན་པའི་ལས་འཆར་འོག ལོ་གཉིས་རེའི་མཚམས་སུ་ཕྱི་རྒྱལ་རོགས་ཚོགས་ཀྱི་མཐུན་འགྱུར་འོག་གོ་སྒྲིག་ཞུ་བཞིན་པ་ཞིག་ཡིན་ལ། ཟབ་སྦྱོང་ཐེངས་དང་པོ་དེ་ ༢༠༠༨ ལོར་ཚོགས་ཡོད་ཅིང་། གཉིས་པ་ ༢༠༡༠ ལོར་ཚོགས་ཏེ་ཟབ་སྦྱོང་གི་སྦྱིན་བདག་ཨ་རིའི་གཞུང་དང་སི་ཝེ་ཌེན་རོགས་ཚོགས་གཉིས་ཀྱིས་གནང་ཡོད་འདུག
གསར་འགོད་པ། དཔལ་ལྡན།
སྐད་ཡིག་མ་བརྗེད་རོགས།
དོན་དམ་གྱི་བོད་མི་ཁྱད་ལས་པ་དགོས་ཀྱི་ཡོད་ན། ཉམས་ཆག་ཏུ་འགྲོ་བཞིན་པའི་བོད་ཀྱི་སྐད་ཡིག་གཞིར་བཞག་གི་ཐོག་ནས་བོད་ཀྱི་རིག་གཞུང་དང་འབྲེལ་ཡོད་ཀྱི་ཁྱད་པས་པ་གསོ་སྐྱོང་གནང་དགོས་གལ་ཆེ། དེ་མིན་བཀའ་ཁྲི་བློ་སེང་གིས་བཏོན་པའི་ཁྱད་ལས་པ་དང་། སློབ་ཐོན་པ། ཤེས་ཡོན་པའི་གྲངས་འབོར་ཚད་བཞག་དེ་དག་ལ་ཡིད་ཆེས་གཏན་ནས་མེད། འཛིན་སྐྱོང་ནས་ལོ་ངོ་གཅིག་འཁོར་ལ་ཉེ་བ་འདིས་ཀྱང་ལྷག་འཕྲོས་རྣམས་ཧ་ཅང་གསལ་ཐག་ཆོད་འདུག
མདུན་ལམ་ལམ་སྟོན་བྱེད་པར་གལ་ཆེ་མོད། མདུན་ལམ་སྤྲད་ཐུབ་ན་དེ་བས་ཀྱང་གལ་ཆེ་བར་སྣང་། མ་གཏོགས་རྗེས་མར་རྒྱ་གར་དུ་བོད་པ་ལྷག་ས་མ་རེད་ད།
ཞིས་ཆགས་བ་ལ་བྱ་བའི་མདུན་ལམ་ཆུང་།།
གསར་འབྱོར་བ་ལ་འཚོ་བའི་མདུན་ལམ་ཆུང་།།
ཆུང་ཆུང་་གཉིས་དང་གསུམ་གྱི་སུམ་མདོ་ནས།།
བོད་པ་ཤར་ནུབ་གླིང་ལ་འཐོར་ཉེན་མཐོང་།།
མདུན་ལམ་སློབ་སྟོན་དང་ཟབ་སྦྱོང་བརྒྱུད་་་་་མདུན་ལམ་རྙེད་མཁན་ཚོས་བོད་དོན་ཡ་ཆུང་ནས་མ་ཤོར་བ་བྱ་རྒྱུ་དེ་་་་་་སེམས་ཁུང་གི་རེ་བ་ཡིན་་་་་མ་གཏོགས་་