བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ཟུར་པ་ངག་དབང་འོད་འབར་ལགས་ཀྱིས་གསར་ལམ་དུ་གནས་ཚུལ་མཁོ་སྤྲོད་བྱས་པ་ལྟར་ན། ཟླ་སྔོན་མའི་ཕྱི་ཚེས་ ༡༧ ཉིན་སྔོན་བོད་མདོ་སྨད་བླ་བྲང་འབོ་རའི་རྡོ་རྗེ་ཚེ་བརྟན་ལགས་དང་། རྔ་པ་རྫོང་ཆོས་རྗེ་སོ་རུ་མ་སྡེ་བའི་དར་རྒྱས་ལགས་གཉིས་ཀྱིས་ལྷ་སའི་ཇོ་ཁང་མདུན་དུ་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་རྗེས། རྒྱ་གཞུང་གིས་མཚོ་སྔོན་དང་ཀན་སུའུ། སི་ཁྲོན། ཡུན་ནན་བཅས་ཁམས་དང་ཨ་མདོའི་ཕྱོགས་ནས་ལྷ་སར་ཡོང་སྟེ། གནས་སྡོད་བྱེད་མཁན་བོད་མི་ཚོར་ཉེན་རྟོག་པས་ལྷ་སའི་བར་སྐོར་སོགས་སུ་གློ་བུར་དུ་ཐོབ་ཐང་ལག་འཁྱེར་ཡོད་མེད་ལ་ཞིབ་བཤེར་བྱས་ཏེ། བོད་རང་སྐྱོང་ལྗོངས་ཀྱི་ས་གནས་ཡུལ་མི་མིན་ཚེ་འཛིན་བཟུང་གིས་ཕྱིར་རང་ཡུལ་དུ་ཕྱིར་ཕུད་བྱེད་ཀྱིན་པ་མ་ཟད། ལོ་མང་པོིའི་ཡང་སྔོན་ནས་ལྷ་སར་གཏན་སྡོད་བྱས་ཡོད་པའི་ཁམས་དང་ཨ་མདོ་ཕྱོགས་ཀྱི་བོད་མི་ཚོང་བ་ཚོར་རྩ་བ་ཉིད་ནས་བསྡད་མི་ཆོག་པའི་བཙན་བཀའ་བཏང་སྟེ་ཕྱིར་ཕུད་བྱེད་བཞིན་ཡོད་འདུག
དེ་བཞིན་བོད་རང་སྐྱོང་ལྗོངས་ཀྱི་ཡུལ་མི་ཚོར་ཡང་ཡིག་ཆ་ཁག་༥ ཚང་དགོས་པ་དག་ནི། དང་པོ། སྡོད་སའི་མགྲོན་ཁང་དང་གནས་ཚང་གི་རྒྱབ་གཉེར་ཡི་གེ གཉིས་པ། གནས་སྡོད་བྱེད་སའི་ས་ཁུལ་དེའི་ཆེས་མཐོའི་ཨུ་ཡོན་ལྷན་ཁང་གི་ངོ་སྤྲོད་ཡི་གེ གསུམ་པ། རང་ཉིད་ཀྱི་ཐོབ་ཁོངས་ཡི་གེ བཞི་པ། ཐོབ་ཐང་ལག་འཁྱེར། ལྔ་པ། ལྷ་སར་གནས་སྡོད་ཆོག་པའི་ཡི་གེ་བཅས་ཚང་དགོས་ཀྱི་ཡོད་འདུག གལ་སྲིད། ཡིག་ཆ་དེ་དག་ལས་གཅིག་མ་ཚང་ཚེ་བོད་རང་སྐྱོངས་ལྗོངས་ཀྱི་ཡུལ་མི་ཡིན་ཡང་ལྷ་སར་གནས་སྡོད་མི་ཆོག་པའི་སྲིད་ཇུས་ལག་བསྟར་བྱས་ཏེ་དམ་དྲག་ཤུགས་ཆེར་བྱེད་ཀྱི་ཡོད་འདུག
རྒྱ་འདྲེ་ཚོ་ཕྱིར་འབུད་མི་གཏོང་བར་བོད་ཀྱི་བདག་པོ་ངོ་མ་ཚོ་ཕྱིར་ཕུད་ག་རེ་བྱས་ནས་གཏོང་དགོས་པ་ཡིན་ནམ། བོད་ཀྱི་ས་ཐོག་ཏུ་བོད་མི་འགྲོ་སྡོད་བྱས་མ་ཆོག་པ་དེ་ཧ་ཅང་ཐལ་དྲགས་པའི་བྱ་སྤྱོད་ཅིག་རེད། དེ་འུར་སྒྲོག་ལ་དགའ་བའི་སེང་གེ་བཀའ་ཤག་གི་ལྟ་གྲུབ་དང་མཐུན་སོང་བ་ཡིན་ལས་ཆེ།