བོད་མིར་ཁེ་དབང་སྤྲོད་དགོས་པ་ནན་བརྗོད།

གཟའ་མིག་དམར་ཉིན་ཡུ་རོབ་གྲོས་ཚོགས་ནང་ལྕམ་ཨ་ཞིས་ཊོན་གྱིས་རྒྱ་གཞུང་གིས་བོད་མིར་ཁེ་དབང་སྤྲོད་དགོས་པ་ནན་བརྗོད་བྱས་འདུག

ཕྱི་ཚེས་ ༡༢ ཉིན་ཡུ་རོབ་མཐུན་ཚོགས་ཀྱི་ཕྱི་འབྲེལ་ཆབ་སྲིད་འགན་འཛིན་ལྕམ་ཨ་ཞིས་ཊོན་(Ashton)གྱིས། རྒྱ་གཞུང་གིས་བོད་མིར་སྨྲ་བརྗོད་རང་དབང་དང་འདུ་འཛོམས་རང་དབང་། རང་ཉིད་ཀྱི་སྐད་ཡིག་དང་རིག་གཞུང་བེད་སྤྱོད། ནང་པའི་ཆོས་ལ་དད་མོས་བཅས་ཀྱི་ཁེ་དབང་སྤྲོད་དགོས་པ་ནན་བརྗོད་བྱས་འདུག

ལྕམ་ཨ་ཞིས་ཊོན་གྱིས་ཡུ་རོབ་གྲོས་ཚོགས་ནང་གཏམ་བཤད་གནང་སྐབས།  རྒྱ་གཞུང་གིས་ཕྱིའི་རྒྱལ་ཁབ་ཁག་གི་ཕྱི་འབྲེལ་དཔོན་རིགས་དང་གསར་འགོད་པ་རྣམས་བོད་ཀྱི་ས་ཁུལ་སོ་སོའི་ནང་བསྐྱོད་འཇུག་དགོས་པའི་འབོད་སྐུལ་དང་། ད་ལྟའི་ཆར་རྒྱ་གཞུང་གིས་བོདམིའི་ཆོས་ལུགས་བྱ་འགུལ་ཐད་སྔར་ལས་བཀག་སྡོམ་ཤུགས་ཆེ་རུ་གཏོང་བཞིན་པ་དེར་ཡུ་རོབ་མཐུན་ཚོགས་ཀྱིས་དོ་སྣང་གནང་གི་ཡོད་ལ། རྒྱ་གཞུང་གི་བྱེད་སྟངས་དེས་བོད་མི་རྣམས་ལ་སྔར་ལས་བློ་ཕམ་ཡི་ཆད་དང་། བོད་ནང་བསྐྱར་དུ་ངོ་རྒོལ་ལས་འགུལ་སློང་སྲིད་པ་གསལ་འདོན་བྱས་ཡོད་པ་རེད།

དེ་བཞིན། ཁོང་མོས་ཡུ་རོབ་མཐུན་ཚོགས་ཀྱི་ངོས་ནས། རྒྱ་གཞུང་གིས་བོད་ཁུལ་གྱི་འབྲོག་པ་མང་ཚོགས་རྣམས་གྲོང་རྡལ་ཅན་དུ་བསྒྱུར་བཞིན་པའི་སྲིད་ཇུས་དེར་དོ་སྣང་ཤུགས་ཆེན་པོ་བྱེད་བཞིན་ཡོད་ལ། ས་གནས་བོད་མི་འབྲོང་པ་མང་ཚོགས་ཀྱིས་ཀྱང་རྒྱ་གཞུང་གི་སྲིད་ཇུས་དེས་བོད་མི་རིགས་ཀྱི་ཐུན་མིན་རིག་གནས་འཚོ་བ་དང་ཤེས་རིག་རྩ་གཏོར་འགྲོ་རྒྱུར་བློ་འཚབ་གནང་བཞིན་ཡོད་པ་བརྗོད་འདུག