བོད་མིའི་སྐུ་ཚབ་ཕྱིར་འབུད་བྱ་ཐབས་བྱས་མཐར་སོ་སོ་ཕྱིར་ཐོན་དགོས་བྱུང་འདུག

ཉེ་ཆར་ལྷོ་ཀོ་རུ་ཡའི་རྒྱལ་ས་སིའོ་ཡོལ་(Seoul) ) དུ་ཚོགས་བཞིན་པའི་འཛམ་གླིང་ནང་པའི་ཚོགས་ཆེན་ཐོག རྒྱ་མིའི་སྐུ་ཚབ་ཚོས་བོད་མིའི་སྐུ་ཚབ་རྣམས་ལ་རྙོག་གླེང་བཟོས་ཡོད་པ་ལྟར། དེ་འབྲེལ་གནས་ཚུལ་ཐད་ཆོས་རིག་ལས་ཁུངས་ཀྱིས་ཡིག་ཐོག་གསར་འགོད་གསལ་བསྒྲགས་ཤིག་སྤེལ་འདུག

ཕྱི་ཚེས་ ༡༢ ཉིན་ནས་དབུ་འཛུགས་ཀྱིས་ལྷོ་ཀོ་རི་ཡའི་རྒྱལ་ས་སིའོ་ཡོལ་དུ་ཚོགས་བཞིན་འཛམ་གླིང་ནང་པའི་རྒྱལ་སྤྱིའི་ཆོས་ཚོགས་ཐེངས་ ༢༦ སྟེང་། རྒྱ་གཞུང་གི་སྐུ་ཚབ་ཚོས་དབུས་བོད་མིའི་སྒྲིག་འཛུགས་ཀྱི་སྐུ་ཚབ་རྣམ་པར་ངོ་རྒོལ་གྱིས་ཕྱིར་ཐོན་ཡོད་པ་ལྟར། ཁ་སང་ཕྱི་ཚེས་ ༡༤ ཉིན་གྱི་སྔ་དྲོ་ཆོས་རིག་བཀའ་བློན་མཆོག་གིས་ཁ་པར་བརྒྱུད། རྒྱ་མིའི་སྐུ་ཚབ་ཚོས་བོད་མིའི་སྐུ་ཚབ་ལ་ཆེད་དམིགས་རྙོག་གླེང་བཟོས་པའི་འབྲེལ་ཡོད་གནས་སྟངས་སྐོར། དབུས་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ལ་སྙན་གསན་ཕུལ་འདུག་ལ། དབུས་བོད་མིའི་ཆོས་རིག་ལས་ཁུངས་ཀྱིས་གནས་ཚུལ་དེའི་ཐད་ཡིག་ཐོག་གི་གསར་འགོད་གསལ་བསྒྲགས་ཤིག་སྤེལ་འདུག

གསར་འགོད་གསལ་བསྒྲགས་ནང་། “ད་རེས་ཚོགས་འདུ་འདིའི་ཐོག་རྒྱ་མིའི་སྐུ་ཚབ་ཚོས་བོད་པའི་སྐུ་ཚབ་ཕྱིར་འབུད་བྱ་ཐབས་བྱས་ཀྱང་། དེ་ལས་བཟློག་སྟེ་རྒྱ་མིའི་སྐུ་ཚབ་ ༡༧ རྣམས་ཚོགས་འདུ་ནས་ཕྱིར་ཐོན་བྱ་དགོས་བྱུང་འདུག ”ཅེས་བཀོད་དེ། ཐེངས་འདིའི་འཛམ་གླིང་ནང་པའི་རྒྱལ་སྤྱིའི་ཆོས་ཚོགས་ཐོག རྒྱ་གཞུང་གིས་བོད་མིའི་སྐུ་ཚབ་རྣམས་ཚོགས་ཞུགས་མི་ཐུབ་པའི་ཆེད་དུ། དངོས་ཤུགས་བརྒྱུད་གསུམ་ནས་འགོག་རྐྱེན་བར་ཆད་སྣ་ཚོགས་བཟོས་ཀྱང་། རྒྱ་གཞུང་གི་བློ་འདོད་དེར་གྲུབ་འབྲས་གང་ཡང་མ་སོན་པའི་སྐོར་གསལ་འདོན་བྱས་ཡོད་པ་རེད།

གསར་འགོད་གསལ་བསྒྲགས་ནང་བཀོད་པའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༡༢ ཉིན་ཚོགས་ཞུགས་པ་རྣམས་ཚོགས་འདུའི་དབུ་འབྱེད་མཛད་སྒོར་ངོ་བཅར་ཞུ་སྐབས། རྒྱ་མིའི་སྐུ་ཚབ་ཚོས་ཚོགས་འདུའི་གོ་སྒྲིག་པ་འཛམ་གླིང་ནང་པའི་རྒྱལ་སྤྱིའི་ཆོས་ཚོགས་ལ། ཆོས་རིག་བཀའ་བློན་པདྨ་ཆོས་འབྱོར་མཆོག་ཚོགས་འདུ་ནས་ཕྱིར་འཐེན་དགོས་པའི་འདོད་འདུན་བཏོན་སྟབས།  ཚོགས་ཆེན་གོ་སྒྲིག་པས་བཀའ་བློན་མཆོག་ལ་ཁྱུག་ཙམ་རིང་ཚོགས་བཅར་མི་གནང་བའི་འབོད་སྐུལ་ཞུས་པར། བཀའ་བློན་མཆོག་གིས་ཁོང་ཉིད་འཛམ་གླིང་རྒྱལ་སྤྱིའི་ནང་པའི་ཆོས་ཚོགས་ཀྱིས་མགྲོན་འབོད་གནང་བ་ལྟར་ཚོགས་བཅར་ཞུ་བཞིན་པར་མ་ཟད། ལྷོ་ཀོ་རི་ཡ་ནི་རང་དབང་ལྡན་པའི་རྒྱལ་ཁབ་ཅིག་ཡིན་པར་བརྟེན། རྒྱ་གཞུང་གི་གནོན་ཤུགས་འོག་འགྲོ་དགོས་དོན་མེད་ཀྱང་།   ཚོགས་བཅར་བ་ཡོངས་ལ་སྐུ་ངལ་མི་འབྱུང་བ་དང་ཚོགས་འདུ་གོ་སྒྲིག་པར་མཛད་དཀའ་མི་འབྱུང་ཆེད་ཕྱིར་བཞུགས་གནང་རྒྱུ་ཞལ་བཞེས་གནང་སྟེ། དབུ་འབྱེད་མཛད་སྒོའི་ཚོགས་འདུ་ནས་ཕྱིར་ཕེབས་འཕྲལ། རྒྱལ་སྤྱིའི་གསར་འགོད་པ་མང་པོས་ཆུ་ཚོད་ ༡ ཙམ་རིང་ཁོང་དང་དྲི་བ་དྲིས་ལན་གནང་སྟེ། བོད་མིའི་སྐུ་ཚབ་ལ་དོ་སྣང་ཤུགས་ཆེན་པོ་གནང་ཡོད་འདུག  

ཉིན་གུང་གསོལ་ཚིག་རྗེས་ཆོས་རིག་བཀའ་བློན་མཆོག་ཚོགས་འདུར་ཕེབས་བཞུགས་གནང་སྐབས། རྒྱ་མིའི་སྐུ་ཚབ་ཚོས་ངོ་རྒོལ་གྱི་རྣམ་པའི་ཐོག་ནས་ཚོགས་འདུ་ནས་ཕྱིར་ཐོན་ཡོད་པ་མ་ཟད། ཕྱི་ཚེས་ ༡༣ ཉིན་གྱི་སྔ་དྲོ་རྒྱའི་སྐུ་ཚབ་ཚོས་བཀའ་བློན་པདྨ་ཆོས་འབྱོར་མཆོག་ལ་ཨ་རིའི་ཕྱག་འཁྱེར་ཡོད་རུང་། དོན་གྱིས་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་ཡིན་པའི་འགྲེལ་བརྗོད་དང་། དེ་འབྲེལ་གྱི་དཔང་རྟགས་ཡིག་རིགས་སོགས་བཏོན་ཏེ།  ཚོགས་འདུར་མཉམ་ཞུགས་མི་ཐུབ་ཆེད་འགོག་རྐྱེན་གང་ཡོང་བཟོས་ཡོད་ཀྱང་། ཉན་འཇོག་ཆ་འཛིན་གནང་མཁན་སུ་གང་ཡང་བྱུང་མེད་པ་རེད།

གཞན་ཡང་། རྒྱ་མིའི་སྐུ་ཚབ་ཀྱིས་རྒྱ་གར་བྱང་ཕྱོགས་ཨ་རུ་ན་ཅལ་མངའ་སྡེ་ནས་ཕེབས་པའི་མཚོ་སྣ་རིན་པོ་ཆེ་ལའང་རྙོག་གླེང་གང་ཐུབ་བཟོས་ཡོད་ཀྱང་། རིན་པོ་ཆེ་མཆོག་གིས་ཁོང་ཉིད་རྒྱ་གར་གྱི་མི་སེར་ཡིན་པ་གསལ་བརྗོད་གནང་ཡོད་པ་དང་།  རྒྱ་མིའི་སྐུ་ཚབ་ཚོས་ཚོགས་བཅར་བ་རྣམས་ལ་ཆེད་དུ་རྙོག་གླེང་སུན་གཙེར་བཟོས་པར་བརྟེན། སུད་སིའི་སྐུ་ཚབ་མི་སྣ་ཞིག་གིས་རྒྱའི་སྐུ་ཚབ་ཚོར་མི་འདོད་པའི་གཏམ་བཤད་དང་རྣམ་འགྱུར་ཡང་བསྟན་ཡོད་འདུག

ཐེངས་འདིའི་གླེང་རྙོག་བརྒྱུད་རིམ་ཁྲོད་ཆོས་རིག་བཀའ་བློན་མཆོག་གིས་བཟོད་སྲན་གུ་ཡངས་གནང་པའི་ཐད། ཚོགས་འདུ་གོ་སྒྲིག་པའི་ངོས་ནས་བོད་མིའི་སྐུ་ཚབ་ཆོས་རིག་བཀའ་བློན་མཆོག་ལ་དགོངས་སེལ་བསྔགས་བརྗོད་དང་འབྲེལ།  བཀའ་བློན་མཆོག་གི་གནམ་གྲུའི་གླ་ཆ་དང་ཚོགས་དོད་བཅས་ཆག་ཡང་ཞུ་རྒྱུ་ཡིན་པ་སྙན་གསན་ཞུས་ཡོད་པ་མ་ཟད།  འཛམ་གླིང་རྒྱལ་ཁབ་ཁག་ནས་ཕེབས་པའི་ཚོགས་བཅར་བ་དག་གིས་ཀྱང་བོད་མིའི་སྐུ་ཚབ་ལ་རྒྱབ་སྐྱོར་གྱི་རྣམ་འགྱུར་བསྟན་ཡོད་འདུག

འདི་ལོ་ལྷོ་ཀོ་རི་ཀར་ཚོགས་པའི་འཛམ་གླིང་ནང་པའི་རྒྱལ་སྤྱིའི་ཆོས་ཚོགས་ཐེངས་ ༢༦ པའི་སྟེང་། འཛམ་གླིང་རྒྱལ་ཁབ་ཁག་ ༤༩ ནས་ཚོགས་ཞུགས་སྐུ་ཚབ་མི་གྲངས་ ༡༠༠༠ ལྷག་ཕེབས་ཡོད་པ་དང་། ཚོགས་འདུའི་དབུ་འབྱེད་མཛད་སྒོའི་ཐོག་ལྷོ་ཀོ་རི་ཡའི་སྲིད་བློན་དང་ཕྱི་སྲིད་བློན་ཆེན། ཆོས་རིག་བློན་ཆེན་དང་། གནད་ཡོད་བླ་མ་ཁག་གིས་གསུང་བཤད་གནང་རྗེས་རིག་གཞུང་གཞས་སྣ་ཁྲབ་སྟོན་ཞུས་ཡོད་པ་རེད། ཐེངས་འདིའི་འཛམ་གླིང་ནང་པའི་ཚོགས་ཆེན་ཐོག་རྒྱ་མིའི་སྐུ་ཚབ་ ༡༧ འབྱོར་ཡོད་ཀྱང་། མཐར་མཇུག་རྒྱ་ནག་དམར་གཞུང་གི་སྟངས་འཛིན་བཀའ་བཀོད་ལྟར་ཕྱིར་ལོག་ཡོད་འདུག