མདོ་སྨད་གཙན་ཚ་རྫོང་ཐོག་ཏུ་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་བྱེད་མཁན་རྟ་མགྲིན་ཐར་ལགས་ད་ལྟ་རང་རྫོང་ཐོག་ཏུ་སྐུ་གྲོངས་འདུག
འདི་གར་གནས་ཚུལ་འབྱོར་གསལ་ལྟར་ན། དེ་རིང་བོད་ནང་གི་ཞོགས་པའི་ཆུ་ཚོད་ ༦།༣༠ ཡས་མས་སུ། མདོ་སྨད་གཅན་ཚ་རྫོང་དྲག་ཆས་ཉེན་རྟོག་ལས་ཁུངས་མདུན་དུ། རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་བྱེད་མཁན་རྟ་མགྲིན་ཐར་ལགས་ད་ལྟ་རང་སྐུ་གྲོངས་ཡོད་འདུག་ལ། རྫོང་ཉེན་རྟོག་པས་ཁོང་གི་སྐུ་ཕུང་ནང་མིར་རྩིས་སྤྲོད་བྱས་ཏེ། ནང་མི་དང་སྡེ་བའི་མང་ཚོགས་ཀྱིས་སྐུ་ཕུང་ལོ་བ་སྡེ་བའི་རང་ཁྱིམ་དུ་གདན་འདྲེན་ཞུ་སྐབས། རྫོང་ཐོག་ཏུ་ཡོད་པའི་མི་མང་གིས་རེ་སྐུལ་ཞུས་པ་ལྟར་ཕྱིར་རྫོང་ཐོག་ཏུ་གདན་འདྲེན་ཞུས་ཏེ། ས་གནས་དགེ་འདུན་པ་དང་མི་མང་སྟོང་ཕྲག་མང་པོ་འདུ་འཛོམས་ཀྱིས་སྐུ་ཕུང་ལ་མཇལ་ཁ་དང་། ཁ་བཏགས་བསྒྲོན་འབུལ་གནང་སྟེ་གདུང་སེམས་མཉམ་སྐྱེད་དང་ནང་མིར་སེམས་གསོ་བྱས་ཡོད་འདུག་ལ། དེ་རིང་ཕྱི་དྲོ་གཅན་ཚ་རྫོང་ཐོག་ཏུ་སྐུ་ཕུང་བཞུགས་འབུལ་གནང་རྒྱུ་ཡིན་འདུག
རང་ལུས་མེར་བསྲེགས་གཏོང་མཁན་རྟ་མགྲིན་ཐར་ལགས་ནི། མཚོ་སྔོན་ཞིང་ཆེན་རྨ་ལྷོ་ཁུལ་གཅན་ཚ་རྫོང་གཅན་ཚ་ཐང་ཞང་ལོ་བ་སྡེ་བ་ནས་ཡིན་འདུག་ལ། ད་ལྟ་རང་ལོ་ ༦༠ མ་ཟིན་ཙམ་ཞིག་ཡིན་འདུག ཉེ་ཆར་ཁོང་གི་བྱིས་པ་རྣམས་དབྱར་རྩྭ་དགུན་འབུ་བརྐོ་རུ་ཕྱིན་རྗེས། ཁོང་རྫོང་ཐོག་ཏུ་བསྡད་དེ་སློབ་གྲྭར་འགྲོ་བཞིན་པའི་བྱིས་པ་ཞིག་ལ་ལྟ་སྐྱོང་བྱེད་བཞིན་ཡོད་འདུག
རང་ལུས་མེར་བསྲེགས་ཀྱི་གནས་ཚུལ་བྱུང་རྗེས། མི་མང་གིས་ཁོང་གི་སྐུ་ཕུང་ཉེན་རྟོག་ལས་ཁུངས་ནས་རྩིས་ལེན་བྱས་ཏེ། གདན་འདྲེན་ཞུ་ཡོད་འདུག་ལ། སྐབས་དེར་དྲག་ཆས་ཉེན་རྟོག་པ་དང་དམག་མི་མང་པོས་མི་མང་གི་མཐའ་བསྐོར་ཏེ་དམ་དྲག་བྱས་ཡོད་པ་མ་ཟད། ད་ལྟའི་ཆར་གཅན་ཚ་རྫོང་ཡོངས་སུ་ཉེན་རྟོག་པས་ལྟ་རྟོག་ནན་མོ་བྱེད་བཞིན་ཡོད་འདུག
གསར་འགོད་པ། དོན་གོ
ཨོ་ངས་ད་ལྟ་རང་ཕ་ཡུལ་ལ་འབྲེལ་བ་བྱས་ནས་སྐད་ཆ་དྲིས་བ་ཡིན། གཅན་ཚ་ཐང་ཞང་གི་འོག་ཏུའང་ལོ་བ་ཟེར་བའི་སྡེ་བ་ཆུང་ཆུང་ཞིག་ཡོད་ཚུལ་འདུག་ན། ངས་གོང་དུ་མཆན་བུ་ཞིག་བཏབ་པའི་ཚོ་དྲུག་ཞང་གི་ལོ་བ་དེ་དང་འདི་གཉིས་གཅིག་པ་རེད་མི་འདུག
གསར་འགོད་པར་ཞུ་རྒྱུ་ཞིག་ལ། སྤྱིར་ལོ་བ་ཞེས་པའི་སྡེ་བ་འདི་གཅན་ཚ་ཐང་ཞང་གི་མ་ཡིན་པར་ཚོ་དྲུག་ཞང་གི་ཁུངས་གཏོགས་ཡིན་མོད། ཁ་སང་དེ་རིང་གཅན་ཚ་ཐང་ཞང་གི་འོག་ཏུ་སྦྱར་ཡོད་པ་ཡིན་ནམ། སྔོན་ཆེད་ཡིན་ན་འདི་ཚོ་དྲུག་ཞང་གི་འོག་དང་དེ་ཡང་ཚོ་དྲུག་ཞང་དང་བར་ཐག་ཀྱང་ཅུང་ཉེ་བ་ཡིན།
མེར་སྲེག་གི་ལས་འགུལ་འདི་དག་གལ་ཆེན་དོན་ཆེན་ཡིན་པས་ཡིག་ཆ་ཁག་ཏུ་འདྲ་མི་འདྲ་མི་ཡོང་ངམ་སྙམ་ནས་ཞུས་པ་ཡིན།
རིན་ཆེན་སྐུ་སྲོག་མེ་ལ་སྒྲོན།། བརྩེ་བའི་ཤ་ཉེ་ཤུལ་དུ་བསྐྱུར།། ཚེ་འདིའི་བདེ་བ་ཡོངས་སུ་དོར།། ལ་རྒྱའི་ལག་རྡང་མཐོ་རུ་བཏགས།། རང་དབང་དོན་དུ་སྐུ་གཤེགས་པ།། རྒྱལ་གཅེས་དཔའ་བོའི་མཛད་པ་ཡིན།།
མྱ་ངན་དང་གདུང་སེམས་མཉམ་བསྐྱེད་ཞུ། དབུས་ལ་གཉིད་དཀྲོག་མཁན་ཞིག་སོང་རེད་དཱ། ཡིན་ན་ར། ད་དུང་ཡང་སྐྱར་གཉིད་ཁུག་སོང་ང་། ད་གང་དྲག་པ་འདུག ཉི་མ་ལྷ་ས།
ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ད་ཆ་བཙན་བྱོལ་བོད་མི་གང་ན་སུ་བཞུགས་གཞིས་བཞུགས་བོད་མིར་སེམས་གསོའི་ཁ་སྟོང་གི་གཉིད་ལམ་མ་བཤད་པར་གཉིས་ཕན་དབུ་མའི་ལམ་གྱི་དམིགས་ཡུལ་གཞིར་ཟུང་བོད་ནང་ལོག་དགོས།
དེ་མིན་བོད་ནང་བོད་མིའི་ཚེ་སྲོག་ནི་ང་ཚོ་དང་གཅིག་པ་ཡིན་ནོ།
གང་ན་བྱིན་རླབས་འོད་ཀྱིས་འཁྱུག་པ་ཡི།།
ཉམས་མེད་རྒྱལ་བ་བདེ་གཤེགས་འཁོར་བཅས་ཀྱིས།།
ཐར་ལམ་མཐོང་སྨོན་ཡིད་དགའ་ཆོས་འཛིན་ནས།།
དཔའ་བོ་དཔའ་མོ་བསུ་བའི་སྟ་གོན་མཛོད།།
ཨོྃ་མ་ཎི་པདྨེ་ཧཱུྃཿ་ ཨོྃ་མ་ཎི་པདྨེ་ཧཱུྃཿ ཨོྃ་མ་ཎི་པདྨེ་ཧཱུྃཿ་
དམར་བོ་མེ་ཡི་ཚལ་ནས་འཕུར་བ་ཡི།།
གངས་རིའི་རྣམ་ཤེས་ཚ་བའི་འཇིགས་པ་ཅན།།
ཐ་དག་མ་ལུས་བརྩེ་བའི་བདག་ཉིད་བ།།།
རྒྱལ་ཀུན་ཐུགས་བརྗེ་ཆར་གྱིས་བརླན་པར་མཁྱེན།།
ཨོྃ་མ་ཎི་པདྨེ་ཧཱུྃཿ་ ཨོྃ་མ་ཎི་པདྨེ་ཧཱུྃཿ ཨོྃ་མ་ཎི་པདྨེ་ཧཱུྃཿ་
ཅི་ཙམ་དགྲ་བོས་དྲག་གནོན་དེ་ཙམ་དུ། །
གངས་ལྗོངས་རྒྱལ་གཅེས་དཔའ་བོའི་སྙིང་སྟོབས་འཕེལ། །
ཇི་སྲིད་བོད་འདི་འཆི་ལམ་སྐྱེལ་འདོད་པ། །
དེ་སྲིད་མི་རིགས་འདི་ལ་གཅིག་གྱུར་འབྱུང་། །
འདས་པའི་ལོ་ནག་ལྔ་བཅུ་ལྷག་གི་རིང་། །
གདོང་དམར་ས་ཡ་གཅིག་དང་གཉིས་འབུམ་ལྷག །
ཇི་ལྟར་དམར་གསོད་དྲག་གནོན་བྱས་གྱུར་པ། །
དེ་ལྟར་རྒྱ་གཅེས་དཔའ་བོ་འཕེལ་བར་གྱུར། །
ད་དུང་རྒྱ་དམར་སྲིད་གཞུང་སྒེར་གཅོད་པས། །
སུམ་གཉིས་ས་ལ་དབང་བསྒྱུར་གངས་ཅན་པའི། །
ལོ་རྒྱུས་བདེན་དོན་རྫུན་བཟོ་བྱེད་བཞིན་ཏུ། །
ཉི་ཤར་ལག་པས་འགོག་སྙམ་འཁྲུལ་བ་ཡིན། །
མི་རྣམས་རྨོངས་གཉིད་སད་པའི་ཁུག་སོ་ན། །
ཚན་རྩལ་དུས་རབས་གསར་བའི་གསར་བརྗེ་ཡི། །
རང་དབང་ཐོབ་ཐང་རྩོད་པའི་མེ་དཔུང་གི། །
རྦ་རླབས་གསོད་ཐུབ་ཟེར་བ་ཉིང་འཁྲུལ་ཡིན། །
རྟ་མགྲིན་རྡོ་བདེ་བ་ཅན་དུ་སྐྱེ་པར་ཤོག ཁོང་གི་ནང་མིར་སེམས་གཏིང་ནས་སེམས་གསོ་ཞུ།
སྤྱིར་བོད་ནང་གི་མེར་སྲེག་ལས་འགུལ་འདི་མཚམས་ན་བསམ་ཡོད། དེ་མིན་ན་བོད་ཁམས་ཡོངས་ནས་ཤུགས་ཆེ་ཙམ་སྤེལ་མ་ཐུབ་པར་འདི་ལྟར་ས་ཁུལ་རེ་གཉིས་ནས་བར་དང་སྐབས་སུ་མི་རེ་གཉིས་ཀྱིས་རང་ལུས་མེར་སྲེག་གནང་བ་འདིས་ཕན་ཐོག་ཆེར་མི་འདུག་སྙམ།
མེ་ལྕེ་དམར་བོ་བོད་ནས་མཆེད་ཐལ།།
མི་རིགས་ལ་རྒྱ་བོད་ནས་གླེང་ཐལ།།
སྐད་དང་རིག་གཞུང་བོད་ནས་སྐྱོབ་ཐལ།།
བླ་མའི་བཀའ་ལ་བོད་ནས་བརྕིས་ཐལ།།
མི་ལུས་རིན་ཆེན་མེ་ལ་སྒྲོན་ཀྱང་།།
རྡ་སའི་རི་ན་གྲགས་འགུལ་མི་འདུག།
རང་དབང་མེད་པའི་ནང་གི་སྤུན་ཟླ།།
འཆི་བའི་གྲངས་ལ་ཡ་ལན་མེད་གི།
གཞོན་ནུ་ཟེར་བའི་ཚོགས་པ་ཡོད་ན།།
མདུན་དུ་རྒྱུགས་ནས་དོན་ཞིག་བསྒྲུབས་དང་།།
རྗེས་ལུས་སྤུན་ཟླའི་ན་ཟུག་ཚོར་ན།།
བུད་མེད་སློབ་བསྐུང་ནས་མ་འདུག།
བོད་མྱི་བཞི་བཅུ་མེ་རུ་སྒྲོན་ཀྱང་།།
གངས་རིའི་ལྟོ་བ་དམག་གིས་ཁེངས་ཀྱང་།།
གངས་ཅན་དཀྱིད་གིས་ལས་ཀྱི་མི་སྣའི།།
རྐང་རྩད་སྤོ་ལོའི་འགྲན་བརྡུར་བཤད་གི།།
ཁ་སང་རྔ་བའི་གྲྭ་བ་བུད་སོང་།།
དེརིང་གྲོང་གི་ཨ་ཕ་ཆས་སོང་།།
སྡིག་སྒྲུབ་མ་དག་ཁ་བ་རི་བའི།།
ལས་དབང་འདི་ལ་བདག་པོ་གང་ཡོད།།
ཡིག་དྲུག་ངག་གི་ཁ་ལྕེ་བར་ནས།།
གངས་རིའི་གྲོང་གི་སྤུན་ཟླ་མིང་སྲིང་།།
ལུས་སེམས་འཕང་མེད་བོད་ལ་འབུལ་བ།།
ཤ་གསེང་རུས་བའི་ནང་ནས་སྐྱོ་སོང་།།
རྒྱལ་གཅེས་དཔའ་བོ་རྟ་འགྲིན་མཐར་ཕྱིན་ལགས། བོད་ཀྱི་རྒྱལ་དོན་རང་ལུས་མེར་བསྲེགས་ཀྱིས་སྐུ་ཚེ་མ་ཟིན་པར། མགོ་བོ་བྲང་ཐོག་ལྷུང་སྟེ་མྱ་ངན་གུས་བཏུད་ཞུ། མ་ཎི་ཡིག་དྲུག་གིས་སྐྱེལ་མ་ཞུ་་་་་་་འདི་ནི་འདོད་པ་མེད་བཞིན་དུ་་་་་་
དཔའ་བོའི་གཟི་བརྗིད་ནམ་ཡང་ཉམས་པ་མེད།
ང་ཚོའི་བོད་མི་རིགས་འདི་ལ་ད་དུང་ཁྱེད་དང་ཁྱེད་ལྟ་བུའི་དཔའ་བོ་དང་དཔའ་མོ་གྲངས་ལས་འདས་པ་ཞིག་ཡོད་པ་འདི། ད་དུང་མི་རིགས་འདི་རྩ་སྟོངས་ལ་འགྲོ་བར་ཐག་རིང་བ་མཚོན་གྱི་ཡོད།
དཔའ་བོའི་གཟི་བརྗིད་ཀྱིས་བོད་མི་རིགས་ལ་དེབ་ཐེར་གསར་བ་ཞིག་འབྲི་བཞིན་ཡོད། དཔའ་བོའི་གཟི་བརྗིད་ལ་ནམ་ཡང་ཉམས་པ་མེད།
པར་འདི་དག་དངོས་ཡོད་ཀྱི་གནས་ཚུལ་ཁག་ཐེག་པའི་བདེན་དབང་བླ་མེད་དག་རེད།དེར་བརྟེན་པར་འདི་དག་ཆུད་ཟོས་སུ་མ་བཏང་བར་རྒྱལ་སྤྱིའི་སྒང་ལ་ཐོན་ཐུབ་པར་བྱེད་རྒྱུ་གལ་འགངས་ཆེན་པོ་རེད། རང་ཡུལ་ནས་རང་སྲོག་ལ་མ་འཛེམ་པར་འདིར་གཏོང་དོན་ཡང་ང་ཚོའི་ཤེས་ཆེད་མིན་པར་རྒྱལ་སྤྱིའི་སྤྱི་ཚོགས་ལ་རྒྱ་གཞུང་གི་མནར་གཅོད་འོག་གི་བོད་ཀྱི་དཀའ་སྡུག་རྣམས་གསལ་གསལ་ཐིང་ཐིང་བཟོས་བའི་ཆེད་དུ་ཡིན་པ་གདོན་མི་ཟ།
གསར་འགོད་པར་གསལ་འདེབས་ཞུ་རྒྱུ་ཞིག་ལ་རྒྱལ་གཅེས་པ་ཁོང་གི་ལོ་གྲངས་འདིར་ལོ་༦༠་མ་ཟིན་ཙམ་བཀོད་འདུག་ཀྱང་གསར་འགྱུར་འོག་མར་ཁོང་གི་ལོ་གྲངས་༤༠་བཀོད་འདུག དོན་དངོས་འདི་གཉིས་ལས་གང་ཁོང་གི་ལོ་གྲངས་ངོ་མ་དེ་ཡིན། འདི་ཡང་ཅུང་གལ་ཆེན་པོ་འདུག ལོ་གྲངས་ལ་གཅིག་གྱུར་ཡོང་རྒྱུ་འདི་བདག་རང་ངོས་ལ་མཚོན་གལ་ཆེན་ནང་གི་དོན་ཆེན་ཞིག་ལ་ངེས་འཛིན་བྱེད་བཞིན་ཡོད།
མེ་ལྕེ་གཅིག་རྗེས་གཉིས་འཐུད།། མིག་ཆུ་གཅིག་འཐོར་གཉིས་འཐོར།། སེམས་པ་གཅིག་འཚུབ་གཉིས་འཚུབ།། ཚེ་སྲོག་གཅིག་རྫོགས་གཉིས་རྫོགས།། རེ་བ་དང་ཡིད་ཆེས་ཀྱི་མནར་བའི་ཚེ་སྲོག་ཅིག་ཡང་ལམ་ལ་ཆས་སོང་།
ཡའའའའ། ཀྱེ་མ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ། ཨོཾ་མ་ཎི་པདྨེ་ཧཱུཾ།