ཉེ་ལམ་བོད་ཨ་མདོ་རྔ་པ་ཆུ་ཆེན་རྫོང་ཁོང་ནས་ཕེབས་པའི་མཁན་པོ་ཞིག་གིས་ཁོང་གི་ཕ་ཡུལ་གྱི་གནས་སྟངས་དང་། ཁོ་རང་ཉིད་ཀྱིས་འདས་པའི་ལོ་ཟླའི་ནང་བོད་དོན་ཐོག་ཕྱག་ལས་གང་འདྲ་གནང་ཡོད་མེད་སྐོར་ངོ་སྤྲོད་གནང་ཡོད།
འདི་ལོའི་དུས་འཁོར་དབང་ཆེན་སྐབས་བོད་ཨ་མདོ་རྔ་པ་ཁུལ་ཆུ་ཆེན་རྫོང་གསང་ཆེན་སྔ་འགྱུར་ཨ་ཁོ་རིས་ཐུབ་བསྟན་ཉི་ཤར་གླིང་གི་མཁན་པོ་ཆོས་འཕེལ་ལགས་རྒྱ་གར་རྡོ་རྗེ་གདན་དུ་༧གོང་ས་མཆོག་གི་དབང་ཞུ་རུ་ཕེབས་ཡོད་ཀྱང་། ཁོང་ཡོང་ཤུལ་དུ་རྒྱ་གཞུང་གི་ཉེན་རྟོག་པས་ཁོང་གི་ནང་མིར་སྐད་ཆ་འདྲི་བ་དང་། ཆུ་ཆེན་རྫོང་གསང་ཆེན་སྔ་འགྱུར་དགོན་ལ་རྩད་གཅོད་བྱས་པ་བཅས་ལ་བརྟེན། ཕ་ཡུལ་ནས་ཁོང་ཕྱིར་བོད་དུ་ལོག་ཚེ་རྒྱ་གཞུང་གིས་འཛིན་བཟུང་བྱེད་རྒྱུའི་ཉེན་ཁ་ཡོད་པའི་བརྡ་ལན་འབྱོར་བ་ལྟར། ཁོང་ཕྱིར་བོད་དུ་ལོག་མ་ཐུབ་པར་ངྷ་རམ་ས་ལའི་དབུས་སྣེ་ལེན་ཁང་དུ་བཞུགས་ཡོད།
ཉེ་ཆར་འདི་གའི་གསར་འགོད་པས་ཁོང་དང་ཐུག་འཕྲད་གནང་སྟེ། དེ་སྔ་ཕ་ཡུལ་ནས་བོད་དོན་དང་འབྲེལ་བའི་ཕྱག་ལས་ག་རེ་གནང་ཡོད་མེད་དང་། ཁོང་གི་ཕ་ཡུལ་ཀྱི་ད་ལྟའི་གནས་སྟངས་གང་འདྲ་ཡིན་མིན་སྐོར་ལ་གླེང་མོལ་བྱས་ཡོད། མཁན་པོ་ཆོས་འཕེལ་ལགས་ཀྱིས་བརྗོད་པ་ལྟར་ན། རྒྱ་གཞུང་གིས་ ༢༠༠༨ ལོའི་ཕྱི་ཟླ་ ༣ པའི་ཟླ་མགོར་ཨཱ་ཁོ་རིས་དགོན་པའི་ནང་དམག་མི་དང་ཉེན་རྟོག་པ། ས་གནས་ཀྱི་ལས་བྱེད་བཅས་མི་ ༣༠༠ ཡས་མས་ཤིག་ཡོང་སྟེ། ཟླ་ ༦ ལྷག་གི་རིང་རྒྱལ་གཅེས་ཆོས་གཅེས་ཟེར་བའི་སློབ་གསོ་སྤེལ་པ་དང་མཉམ་དུ་དགོན་པའི་འདུ་ཁང་དང་གྲྭ་ཤག་གི་སྟེང་དུ་རྒྱ་ནག་གི་རྒྱལ་དར་བསྒྲེངས་པ་དང་། ༸གོང་ས་མཆོག་ལ་ངོ་རྒོལ་དང་ཁོང་གི་སྐུ་པར་གཞུང་ལ་རྩིས་སྤྲོད་བྱེད་དགོས་པའི་བཙན་བཀའ་བཏང་སྟེ། དགོན་པའི་རྒྱུན་ལས་བསྡུ་སྐོང་གིས་ཚོགས་འདུ་རབ་དང་རིམ་པ་ཚོགས་ཡོད་སྐོར་ངོ་སྤྲོད་གནང་སོང་།
ཡང་ཁོ་རང་གིས་བོད་དོན་དང་འབྲེལ་བའི་ཕྱག་ལས་ཅི་གནང་སྐོར་བརྗོད་དོན། “ ང་རང་གིས་ཚོགས་འདུ་རིམ་པའི་ཁྲོད་ཀྱི་བརྗོད་གཞི་དང་ལས་བྱེད་ཚོའི་བྱེད་སྟངས་ལ་མཐའ་གཅིག་ཏུ་ངོ་རྒོལ་བྱས་པ་དང་། དམག་མི་དང་ཉེན་རྟོག་མི་སྣ། ལས་བྱེད་བཅས་ཀྱི་དགོན་གྲོང་གཉིས་ལ་གང་བྱུང་གཅར་རྡུང་འཛིན་བཟུང་བྱས་པའི་གནས་ཚུལ་དག་ཡིག་ཐོག་ཏུ་བཀོད་དེ། ཀྲུང་དབྱང་སྲིད་གཞུང་དང་རྔ་པ་རང་སྐྱོང་ཁུལ། ཆུ་ཆེན་རྫོང་བཅས་ཀྱི་མགོ་ཁྲིད་ལ་སྔ་ཕྱི་ཞུ་གཏུགས་ཡི་གེ་ཐེངས་བརྒྱད་བྲིས་ཡོད་ཡོད་ཀྱང་། གོང་རིམ་གྱིས་ས་གནས་ལ་བཟང་ཕྱོགས་ཀྱི་རྣམ་འགྱུར་གང་ཡང་བསྟན་མ་སོང” ཞེས་བརྗོད་སོང་།
ད་དུང་མཁན་པོ་ཁོང་གིས་ ༢༠༠༨ ལོའི་ཕྱི་ཟླ་ ༤ བའི་ནང་དགོན་པའི་ནང་རྒྱ་ནག་གི་དྲག་གནོན་སྲིད་ཇུས་ལ་ངོ་རྒོལ་གྱི་སྦྱར་ཡིག་ཅིག་བྲིས་ཏེ་དགོན་པའི་གླིང་གི་བརྩིག་གྱང་དང་རྒྱ་ནག་གི་རྒྱལ་དར་བསྒྲེངས་སའི་ལྕགས་སྡོང་། རྒྱ་ནག་གི་ལས་བྱེད་དང་དམག་མི་སྡོད་སའི་སྒོ་ངོས་སོགས་སུ་སྤྱར་ཏེ། བདུན་ཕྲག་གཅིག་ལྷག་རིང་དགོན་པའི་མདུན་ངོས་ཀྱི་རྫ་གསེབ་ཁག་ཏུ་བྲོས་བྱོལ་གནང་ཡོད་འདུག་པ་དང་། སྐབས་དེར་རྒྱ་ནག་གཞུང་གིས་དགོན་པ་དང་ཁོང་གི་ནང་མིར་ཁོ་རྩིས་སྤྲོད་དགོས་པའི་བཙན་བཀའ་བཏང་ཡོད་པ་མ་ཟད། འཛིན་བཟུང་གི་ཐབས་ཤེས་རིམ་པ་བྱས་ཀྱང་ཁོང་མི་མེད་ལུང་སྟོང་ཁག་ཏུ་ཉུལ་ཏེ་ཟླ་གཅིག་ལྷག་རིང་བཞུགས་ཡོད་ཅིང་། རྗེས་སུ་དགོན་གྲོང་གཉིས་ཀྱིས་ས་གནས་སྲིད་གཞུང་ལ་ཕྱིར་དགོན་པར་ཡོང་འཇུག་དགོས་པའི་རེ་འདུན་ཡང་ཡང་བཏོན་མཐར་ཁོང་ཕྱིར་དགོན་ནང་དུ་ཡོང་བཅུག་ཡོད་འདུག
སྐབས་དེར་ཟི་ཁྲོན་ཞིང་ཆེན་སྲིད་ཁྲིམས་ཨུ་ཡོན་ལྷན་ཁང་གི་དམར་ཤོག་དྲུང་ཆེ་དང་འཐབ་ཕྱོགས་གཅིག་གྱུར་ཁང་གི་དམར་ཤོག་དྲུང་ཆེ་སོགས་མཐོ་རིམ་དཔོན་རིགས་ཁག་ཅིག་དང་། ཉེན་རྟོག་པ་དང་དམག་མི་བཅས་ཀྱི་ཚོགས་འདུ་བསྐོངས་ཏེ་ཁོང་ལ་འདྲི་ཞིབ་དང་སློབ་གསོ་བཏང་ཡོད་པ་མ་ཟད། མ་འོངས་པར་དགོན་པའི་འཐུས་ཚབ་བྱས་ཏེ་ཚོགས་འདུར་བཅར་དགོས་པ་དང་། མ་འོངས་པར་མི་མང་ལ་ཁ་ཏ་སློབ་གསོ་བཏང་སྟེ་ལས་འགུལ་ནང་ཞུགས་མི་འཇུག་རྒྱུར་འགན་ལེན་བྱས་ཚེ་སྤྲུལ་སྐུའི་གོ་གནས་དང་ཐོབ་ཐང་སྤྲོད་རྒྱུ་ཡིན་ཚུལ་སོགས་བརྗོད་ཡོད་འདུག
གསར་འགོད་པས་ཁོང་ལ་རྒྱལ་རོང་ས་ཆར་བོད་ཀྱི་རིག་གཞུང་གི་གནས་སྟངས་གང་འདྲ་ཡོད་མེད་དྲིས་པའི་ལན་དུ། “རྒྱལ་རོང་ས་ཆར་མཚོན་ན། རིག་གནས་གསར་བརྗེ་དང་བཅོས་བསྒྱུར་སྒོ་འབྱེད་བཅས་ཀྱི་ཤུགས་རྐྱེན་འོག ད་ལྟའང་ཆུ་ཆེན་རྫོང་དང་འབར་ཁམས་རྫོང་། བཙན་ལྷ་རྫོང་བཅས་རྫོང་ཁག་གསུམ་ནང་དགོན་པ་རེ་ཟུང་ལས་བོད་ཡིག་གི་སློབ་གྲྭ་གཅིག་ཀྱང་ཡོད་པ་མ་རེད། རིག་གཞུང་དང་ཡུལ་སྲོལ། སྐད་ཡིག་ཉམས་དམས་སུ་སོང་བའི་རྒྱུ་རྐྱེན་གཙོ་བོ་འདིར་ཐུག་ཡོད་པ་རེད། ལྷག་པར་དུ་རོང་ཕྱོགས་ཀྱི་ས་གནས་ཁག་ཅིག་ཏུ་ཕ་མ་དག་ལ་རང་གི་རིག་གཞུང་དང་ཡུལ་སྲོལ། སྐད་ཡིག་སོགས་ཀྱི་བག་ཆགས་དང་སློབ་སྦྱོང་མེད་སྟབས། དེ་དག་གི་བྱིས་པ་ཚང་མས་མི་རིགས་རང་གི་རིག་གཞུང་གི་ཕྱོགས་ནས་ཡོད་ཚད་བརླགས་ཚར་འདུག་ལ། ཁག་ཅིག་གིས་བོད་སྐད་ལས་བོད་ཡིག་རྐང་གཅིག་ཀྱང་མི་ཤེས་པའི་ཚད་དུ་བསླེབས་ཡོད།
དེང་སྐབས་བྱིས་པ་ཚོ་རྒྱའི་སློབ་གྲྭར་གཏོང་གི་ཡོད་ཀྱང་། སློབ་གྲྭའི་དགེ་རྒན་མང་ཆེ་བ་མགོ་ཁྲིད་ཀྱི་གཉེན་ཉེ་དང་ཡིག་རྒྱུགས་མ་ལོན་པའི་རིགས། དམག་མིའི་ཁོངས་ནས་ཐོན་མཁན་སོགས་ཡིན་སྟབས། སློབ་གྲྭའི་ནང་ཤེས་ཡོན་སྤེལ་ཐུབ་ཀྱི་མེད་པའི་ཁར། བྱིས་པ་རྣམས་ཕ་མའི་ཁ་ལ་མི་ཉན་མཁན་དང་རྐུ་བྱེད་མཁན། ཆང་དང་ཐ་མག་འཐེན་མཁན་སོགས་སུ་འགྱུར་བཞིན་འདུག་པ་མ་ཟད། རྒྱན་འགུག་ཤོ་རྒྱག་གིས་ཁྲིམས་ཐོག་ཏུ་འགྲོ་དགོས་པའི་གནས་ཚུལ་ཡང་རེ་ཟུང་བྱུང་སྟབས། འབྲོག་པ་མང་པོ་ཞིག་གིས་བྱིས་པ་སློབ་གྲྭར་གཏོང་མ་འདོད་པར་ཕྱུགས་ཟོག་འཚོ་སྐྱོང་བྱེད་དུ་འཇུག་གི་ཡོད།
ང་ཚོའི་ས་ཁུལ་དུ་བོད་རིགས་ལས་བྱེད་ཧ་ཅང་དཀོན་པོ་རེད། རེ་ཟུང་ཡོད་པ་དག་གིས་ཀྱང་བོད་ཡིག་བོད་སྐད་མི་ཤེས་མཁན་དང་བོད་པར་ལ་ཞེན་མེད་མཁན་ཆགས་ཡོད། ལས་བྱེད་ཚང་མ་རྒྱ་མི་དང་དམག་ཁོངས་ནས་ཡོང་བ་རྐྱང་རེད། བོད་ཡིག་སློབ་གྲྭ་གསར་འཛུགས་ཀྱི་ཐད་ནས་རྒྱལ་རོང་ས་ཆའི་འཐུས་མི་ཚོགས་ཆེན་དུ་བཅར་མཁན་ཚོར་རེ་སྐུལ་ཐེངས་མང་ཞུས་ཀྱང་། རྫོང་དཔོན་གྱིས་བོད་ཡིག་སློབ་གྲྭ་གསར་འཛུགས་ཀྱི་བསམ་འཆར་འདོན་མི་ཆོག་ཚུལ་དང་། དེ་གོང་རིམ་གྱི་བཀའ་ཡིན་ཚུལ་བཤད་དེ་ད་ལྟའི་བར་བསྐྱར་དུ་གླེང་མཁན་བྱུང་ཡོད་པ་མ་རེད།” ཅེས་སོགས་ཀྱི་དཀའ་ངལ་བརྗོད་བྱུང་།
མཐར་ཁོང་གིས་ “ བོད་ནང་རང་ལུས་མེར་བསྲེགས་བཏང་བའི་གནས་ཚུལ་སྐོར་ཕྱི་ལོགས་ཀྱི་གསར་འགྱུར་བརྒྱུད་དེ་གོ་ཡོང་སྐབས། བོད་མི་མང་ཆེ་བས་སོ་སོའི་ནང་ནས་མཆོད་མེ་འཇོག་པ་དང་མ་ཎི་འདོན་པ་སོགས་བྱས་ཏེ། བོད་མི་ཚང་མ་སྐྱིད་ན་མཉམ་སྐྱིད་དང་སྡུག་ན་མཉམ་སྡུག་གི་བསམ་པ་སྟོན་གྱི་འདུག རྒྱ་གཞུང་གིས་གང་འདྲ་ཞིག་བྱས་ཀྱང་རྒྱ་གར་དུ་ཡོད་པའི་༧རྒྱལ་བ་རིན་པོ་ཆེ་དང་བོད་གཞུང་གི་ངོས་ནས་ཅིག་གནང་གི་རེད་སྙམ་པའི་རེ་བ་དང་ཡིད་ཆེ་ཆེན་པོ་གནང་བསྡད་འདུག ” ཅེས་སོགས་བརྗོད་བྱུང་།
གསར་འགོད་པ། དོན་གོ
