བཀའ་ཁྲི་མཆོག་ཨོ་སི་ཊོ་ལི་ཡར་ཕེབས་འདུག

ཉིན་འདི་འགར་བཀའ་ཁྲི་མཆོག་གིས་ཨོ་སི་ཊོ་ལི་ཡའི་གྲོས་ཚོཊ་འཐུས་མི་དང་། རྒྱ་རིཊ་མང་གཙོ་དོན་གཉེར་བ་ཚོར་མཇལ་འཕྲད། ས་གནས་བོད་མི་ཚོར་བཀའ་ཤག་གི་སྲིད་བྱུས་ངོ་སྤྲོད་གནང་བཞིན་ཡོད། 

ཟླ་འདིའི་ཕྱི་ཚེས་ ༢༤ ཉིན་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག ལྡི་ལི་ནས་མཁའ་ལམ་བརྒྱུད་ཨོ་ལི་ཊོ་ལི་ཡའི་གྲོང་ཁྱེར་མེལ་བྷོན་དུ་འབྱོར་སྐབས། ཡུལ་དེར་གནས་སྡོད་སྐུ་ཚབ་དོན་གཅོད་གཙོས་བོད་རིགས་ཚོཊ་པའི་སྐུ་ཚབ་དང་ནང་པའི་འཐུས་མི་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད་འདུག

ཕྱི་ཚེས་ ༢༤ ཉིན་གྱི་སྔ་དྲོ་བཀའ་ཁྲི་བློ་བཟང་སེང་གེ་མཆོག་གིས་གསར་འགོད་ལྷན་ཚོགས་ཤིག་གི་ཐོག བཙན་བྱོལ་བོད་མིའི་མང་གཙོ་འཕེལ་རིམ་དང་། བོད་ནང་རང་ལུས་མེར་བསྲེགས་གཏོང་བཞིན་པའི་གནས་སྟངས། རྒྱ་གཞུང་གིས་བོད་ནང་གི་བོད་མི་ཚོར་དམ་དྲག་བྱེད་སྟངས་སོགས་ངོ་སྤྲོད་དང་། བོད་མིའི་འཚེ་མེད་ཞི་བའི་འཐབ་རྩོད་ལ་རྒྱལ་སྤྱིའི་སྟེང་རྒྱབ་སྐྱོར་ཐོབ་ཚུལ། བོད་མིའི་སྒྲིག་འཛུགས་ཀྱི་ལམ་དབུ་མའི་སྲིད་བྱུས། དེ་བཞིན་རྒྱ་ནག་མང་གཙོ་ཅན་དུ་གྱུར་ན་བོད་ལ་ཁེ་ཕན་ཅི་ཡོད་སྐོར་གཏམ་བཤད་སྤེལ་ཡོད་འདུག

ཉིན་དེའི་ཕྱི་དྲོ་བཀའ་ཁྲི་མཆོག་གིས་མེལ་བྷོན་གྲོང་ཁྱེར་གནས་སྡོད་རྒྱ་རིགས་མང་གཙོ་དོན་གཉེར་བ་དང་རྩོམ་པ་པོ། བོད་དོན་རྒྱབ་སྐྱོར་བ། སློབ་ཕྲུག་བཅས་ལ་ཐུག་འཕྲད་གནང་སྟེ། བོད་མིའི་སྒྲིག་འཛུགས་ཀྱི་སྲིད་བྱུས་ལངས་ཕྱོགས་དང་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་དང་དྲི་བ་དྲིས་ལན་གནང་འདུག དེའི་རྗེས་ཁུལ་དེར་གནས་སྡོད་ཆབ་སྲིད་བཙོན་པ་གཙོས་པའི་བོད་རིགས་མང་ཚོགས་ལ་བོད་ནང་གི་གནས་སྟངས་དང་བཀའ་ཤག་གི་སྲིད་བྱུས་ངོ་སྤྲོད། ཕྱི་རྒྱལ་བོད་རིགས་ཚོགས་པ་ཁག་གིས་རྒྱ་བལ་འབྲུག་གསུམ་གྱི་གཞིས་མི་ཉམ་ཆུང་ཚོར་རོགས་རམ་གནང་དགོས་པའི་འབོད་སྐུལ་བཅས་གནང་འདུག

ཕྱི་ཚེས་ ༢༥ ཉིན་བཀའ་ཁྲི་མཆོག་གིས་ཨོ་སི་ཊོ་ལི་ཡའི་གསར་ཁང་གྲགས་ཅན་ (ABC News Breakfast) ཡི་བཅར་འདྲི་དང་ལེན་གནང་ཡོད་པ་མ་ཟད། ཨོ་སི་ཊོ་ལི་ཡའི་ལྗང་ཁུ་ཚོགས་པའི་མགོ་ཁྲིད་ཟུར་པའམ་བོད་དོན་རྒྱབ་སྐྱོར་བ་བྷོབ་བྷོ་རོན་ (Bob Brown) མཆོག་དང་མཇལ་འཕྲད་གནང་འདུག་ལ། སྐབས་དེར་ཌེ་ཀིང་གཙུག་ལག་སློབ་ཁང་ (Deakin University) དུ་ཚོགས་པའི་མཁས་པའི་བགྲོ་གླེང་སྟེང་མཉམ་ཞུགས་དང་། ཨོ་སི་ཊོ་ལི་ཡའི་བོད་དོན་རྒྱབ་སྐྱོར་བ་ཚོར་མང་གཙོ་དང་ནང་ཆོས། ཨེ་ཤ་ཡའི་མདུན་ལམ་ཞེས་པའི་བརྗོད་གཞིའི་ཐོག་གཏམ་བཤད་གནང་ཡོད་འདུག 

གསར་འགོད་པ། དཔལ་ལྡན།