དབང་འདུས་ཕོ་བྲང་ལ་མེ་སྐྱོན།

ཟླ་འདིའི་ཕྱི་ཚེས་ ༢༤ ཉིན་གྱི་ཕྱི་དྲོའི་ཆུ་ཚོད་ ༤ བ་ཡས་མས་སུ་འབྲུག་རྒྱལ་ཁབ་ཀྱི་ལོ་ ༤༠༠ ལྷག་གི་ལོ་རྒྱུས་ལྡན་པའི་དབང་འདུས་ཕོ་བྲང་ཞེས་པར་མེ་སྐྱོན་བྱུང་ཡོད་པ་དང་།  དུས་ཡུན་ཆུ་ཚོད་ ༥ རིང་གི་མེ་སྐྱོན་ཁྲོད་མི་གཉིས་ལ་རྨས་སྐྱོན་ཚབས་ཆེན་བྱུང་ཡོད་པ་མ་ཟད། ཕོ་བྲང་ནང་གི་རྩ་ཆེ་བའི་ལོ་རྒྱུས་ཀྱི་ཤུལ་རྫས་མང་པོ་འཕྲོ་བརླག་ཏུ་ཕྱིན་པ་དང་། རྫོང་གི་ལས་ཁུངས་མང་པོ་ཞིག་ལ་གཏོར་སྐྱོན་ཚབས་ཆེན་བྱུང་ཡོད་འདུག      

ཉེ་ལམ་མེ་སྐྱོན་དེ་རྫོང་གི་ལས་ཁུངས་ཞིག་ནས་རིམ་གྱིས་མཆེད་པ་ཞིག་ཡིན་པ་ཙམ་ལས་མེ་སྐྱོན་གྱི་བྱུང་རྐྱེན་གསལ་བོ་ཤེས་ཀྱི་མེད་ཀྱང་།  གནས་ཚུལ་བྱུང་རྗེས་འབྲུག་རྒྱལ་བོ་དང་ནང་སྲིད་བློན་ཆེན་སོགས་ས་གནས་སུ་གཟིགས་སྐོར་དུ་ཕེབས་ཏེ། ཐེངས་འདིའི་མེ་སྐྱོན་དེ་ནི་འབྲུག་རྒྱལ་ཁབ་དང་མི་དམངས་ཀྱི་ གྱོང་གུན་ཆེ་ཤོས་ཡིན་པར་འགྲེལ་བརྗོད་བྱས་ཡོད་འདུག

དབང་འདུས་ཕོ་བྲང་ནི།  སྤྱི་ལོ་ ༡༦༣༨ ལོར་བོད་ཀྱི་བླ་མ་ཞབས་དྲུང་ངག་དབང་རྣམ་རྒྱལ་གྱིས་འབྲུག་ཡུལ་དབང་བསྒྱུར་བྱེད་པའི་སྐབས་སུ་གསར་བཞེངས་གནང་བ་ཞིག་དང་། འབྲུག་ཡུལ་གྱི་རྫོང་ཁག་རྙིང་ཤོས་གསུམ་པ་དེ་ཆགས་ཡོད་འདུག

ཕྱི་ཚེས་ ༢༡ ཉིན་རྒྱ་ནག་གི་སྲིད་བློན་ཝུན་ཅཱ་པའོ་དང་འབྲུག་རྒྱལ་ཁབ་ཀྱི་བློན་ཆེན་འཇིགས་མེད་འཕྲིན་ལས་གཉིས་སྦེལ་ཇམ་གྱི་རྒྱལ་ས་སྦེལ་སིལ་དུ་ཐུག་འཕྲད་ཀྱིས། རྒྱལ་ཁབ་གཉིས་ཀྱི་ས་མཚམས་དང་བདེ་འཇགས་སྐོར་ལ་གྲོས་མོལ་བྱས་ཡོད་འདུག་ལ། རྒྱ་ནག་གཞུང་འབྲེལ་དྲ་བའི་སྟེང་སྐབས་དེར་འབྲུག་གི་བློན་ཆེན་གྱིས་རྒྱ་ནག་གཅིག་གི་སྲིད་ཇུས་ལ་རྒྱབ་སྐྱོར་བྱས་ཡོད་པའི་གནས་ཚུལ་སྤེལ་འདུག  ཐེངས་འདི་ནི་རྒྱ་ནག་དང་འབྲུག་གི་ཆེས་མཐོའི་དཔོན་རིགས་ཐུག་འཕྲད་བྱས་པ་ཐོག་མ་དེ་ཆགས་ཡོད་འདུག

གསར་འགོད་པ། དོན་གོ