ཆོས་དཔེ་བཙོང་མཁན་ལ་ལོ་ ༡༠ ཁྲིམས་ཆད།

ཉེ་ཆར་ཤིན་ཅང་ཧི་ཐེན་གྲོང་ཁྱེར་ཁྲིམས་ཁང་གིས། ཁྲིམས་འགལ་ཐོག་ཆོས་དཔེ་ཚོང་སྒྱུར་བྱས་པའི་ཉེས་མིང་འོག ཡུ་གུར་བ་ཡའེ་པུ་ལ་ཡའེ་མུའུ་ལ་ལོ་ ༡༠ ཁྲིམས་ཐག་བཅད་འདུག

ཟླ་འདིའི་ཕྱི་ཚེས་ ༡༨ ཉིན་ཤིན་ཅང་ཧི་ཐེན་གྲོང་ཁྱེར་ཁྲིམས་ཁང་གིས། ཡུ་གུར་བ་ཡའེ་པུ་ལ་ཡའེ་མུའུ་ཡིས་ཁ་ཆེ་ཆོས་ལུགས་སྐོར་གྱི་དཔེ་དེབ་ཚོང་འགྲེམས་བྱས་པ་དེ་ནི། ཁྲིམས་འགལ་ཡིན་པའི་ཉེས་མིང་བཀལ་ཏེ་ལོ་ ༡༠ བཙོན་འཇུག་ཁྲིམས་ཐག་བཅད་པ་མ་ཟད། རྒྱ་སྒོར་ཁྲི་ ༢༠ ཆད་པ་དང་དཔེ་དེབ་ཡོངས་རྫོགས་ས་གནས་རྒྱ་གཞུང་གིས་བཙན་འཁྱེར་བྱས་ཡོད་འདུག 

གནད་དོན་དེའི་ཐད་འཛམ་གླིང་ཡུ་གུར་མཐུན་ཚོགས་ཀྱི་མགྲིན་ཚབ་པ་ཏིས་ལིས་ཞཱ་ཏིས་ལགས་ཀྱིས། རྒྱ་གཞུང་གིས་ཁྲིམས་གཅོད་དེ་ནི་མི་སུས་ཀྱང་ངོས་ལེན་བྱ་ཐབས་བྲལ་བ་ཞིག་ཡིན་པ་དང་།  དེང་སྐབས་རྒྱ་གཞུང་གིས་ཁྲིམས་ལུགས་ཁ་ལ་འཁྱེར་ཏེ་ཡུ་གུར་མི་རིགས་ཀྱི་ཆོས་དང་རིག་གཞུང་རྩ་གཏོར་གཏོང་བཞིན་ཡོད་ལ།  ཁྲིམས་ཐག་ལྕི་མོ་གཅོད་བཞིན་པའི་དམིགས་ཡུལ་ཡང་། ཆོས་རིག་སྤེལ་མཁན་ལ་བཀག་སྡོམ་དང་ས་གནས་ཡུ་གུར་བ་རྣམས་ལ་འཇིགས་སྐུལ་བྱ་ཆེད་ཡིན་པ་བརྗོད་འདུག 

རྒྱ་གཞུང་ཁྲིམས་ཁང་གིས་བཤད་ཚུལ་ལྟར་ན། ཡའེ་པུ་ལ་ཡའེ་མུའུ་ཡིས་ ༢༠༡༠ ཟླ་ ༡ ནས་བཟུང་སྟེ་དེབ་གྲངས་ ༣༣༥༥ ཙམ་ཧི་ཐེན་དང་ཀུ་ཧྲི། ཁུའུ་ཨར་ཀུའུ་སོགས་ཤིན་ཅང་གི་ས་ཁུལ་ཁག་ནང་ཚོང་འགྲེམས་དང་། ༢༠༡༡ ཟླ་ ༡༢ ཚེས་ ༡༦ ཉིན་ཁོ་འཇུ་བཟུང་སྐབས་ཆོས་དཔེ་གྲངས་ ༡༢༥༢༥༠ བསྡུ་ཉར་བྱས་ཡོད་པའི་ཁྲོད། ཁྲིམས་འགལ་ཡིན་པའི་དེབ་རིགས་ ༥༢ དང་། ཁྲིམས་འགལ་ཐོག་བསྐྱར་དཔར་བྱས་པའི་དེབ་རིགས་ ༢༠ ། ཕྱིར་འཚོང་ཁྲིམས་མཐུན་མིན་པའི་དེབ་རིགས་ ༧༦ ཡོད་སྐོར་བརྗོད་ཡོད་པ་རེད།

གནད་དོན་དེའི་ཐད་ཤིན་ཅང་དུ་གནས་སྡོད་རྒྱ་རིགས་ཝང་ཟེར་བ་ཞིག་གིས། “སངས་རྒྱས་ཆོས་ལུགས་དང་ཁ་ཆེ་ཆོས་ལུགས་ཚང་མས་བྱམས་དང་བརྩེ་བ་གཙོ་བོར་འཛིན་གྱིན་ཡོད་པ་རེད། ཁ་ཆེ་ཆོས་ལུགས་ལ་དད་མཁན་དག་གིས་ཆང་རག་དང་ཐ་མ་འཐེན་གྱི་མེད་ལ། དུས་རྒྱུན་ཁ་ཆེ་གཞོན་སྐྱེས་དག་གིས་རྒན་པ་དང་འཕྲད་དུས་གུས་ཞབས་ཆེན་པོ་གནང་གི་ཡོད། དེ་འདྲའི་བཟང་སྤྱོད་ཀྱི་རིགས་ནི་རྒྱ་རིགས་ཁྲོད་ཧ་ཅང་ཉུང་ཉུང་རེད། དེའི་ཐད་ང་ཚོ་རྒྱ་རིགས་ཚོས་ཁོང་ཚོར་སློབ་སྦྱོང་བྱེད་དགོས་ཀྱི་འདུག” ཅེས་བརྗོད་དེ། རྒྱ་གཞུང་བརྒྱུད་ལམ་ཁག་གིས་ཆོས་ལུགས་པ་རྣམས་ཐལ་སྤྱོད་པར་དྲིལ་སྒྲོག་བྱས་ཏེ། ཆོས་ལུགས་རྩ་གཏོར་གཏོང་བཞིན་པ་དེ་ནི་ནོར་འཁྲུལ་ཆེན་པོ་ཞིག་ཡིན་པ་མ་ཟད། དེང་སྐབས་རྒྱ་ནང་མི་རྣམས་ཆེས་དངངས་སྐྲག་སྐྱེས་ཡུལ་གཙོ་བོ་ནི་དད་མོས་བྱ་ཡུལ་མེད་པ་དེ་ཆགས་ཡོད་ལ།  གལ་སྲིད་གནས་སྟངས་འདི་ཚབ་ཆེ་རུ་ཕྱིན་ཚེ་སྤྱི་ཚོགས་ཧྲིལ་བོ་བདེ་འཇགས་མེད་པར་འགྱུར་སྲིད་པ་བརྗོད་ཡོད་པ་རེད།   

རྒྱ་གཞུང་གིས་དུས་ཡུན་རིང་པོའི་ནང་ཡུ་གུར་བའི་ཐོག་མི་རིགས་དབྱེ་འབྱེད་ཀྱི་དྲག་གནོན་སྲིད་ཇུས་རིམ་པར་སྤེལ་བར་བརྟེན། ༢༠༠༩ ཟླ་ ༦ ཚེས་ ༢༦ ཉིན་རྒྱ་ནག་ཀུང་ཏུང་ནང་ཡུ་གུར་བ་དང་རྒྱ་རིགས་ལས་བཟོ་བའི་བར་དམར་འཛིང་ཤོར་བ་དང་། ལོ་དེའི་ཕྱི་ཟླ་ ༧ ཚེས་ ༥ ཉིན་ཤིན་ཅང་ས་ཁུལ་གྱི་སྲིད་འཛིན་ལྟེ་གནས་གྲོང་ཁྱེར་ཝུ་རའོ་མུའུ་ཆིའི་ནང་ངོ་རྒོལ་ཟིང་འཁྲུག་བྱུང་སྟེ། མི་ ༢༠༠ ལྷག་རྐྱེན་འདས་དང་མི་ ༡༧༠༠ ལྷག་ལ་རྨས་སྐྱོན་ཕོག་པའི་རྗེས། རྒྱ་གཞུང་གིས་ལོ་ལྟར་དུས་ཚེས་དེར་ཤིན་ཅང་ནང་དམིགས་བསལ་བཀག་སྡོམ་དྲག་གནོན་ཤུགས་ཆེ་རུ་གཏོང་བཞིན་ཡོད།