ཉམ་ཐག་རོགས་སྐྱོར་ཐོབ་པའི་བོད་རིགས་བུ་མོ་ཞིག་ལ་ལྡི་ལི་གཞུང་གི་སློབ་གྲྭ་ཤེག་ཤཱ་བྷ་རཱ་ཊེ་ཞེས་པའི་ནང་གི་ད་ལོའི་འཛིན་རིམ་ ༡༠ སློབ་མ་ཡོངས་ཀྱི་རྒྱུགས་འབྲས་ཁྲོད། རྩེ་ཕུད་སློབ་མ་བཅུའི་གྲོས་སུ་བསླེབས་ཡོད་འདུག
དེ་རིང་གནས་ཚུལ་བཏང་འབྱོར་བྱུང་པ་ལྟར་ན། ལྡི་ལིར་རྟེན་གཞི་བྱས་པའི་རྒྱལ་སྤྱིའི་བྱམས་བརྩེ་བདེ་རྩ་ཚོགས་པའི་ལྟ་སྐྱོང་འོག ལྡི་ལིར་ཡོད་པའི་ཤེག་ཤཱ་བྷ་རཱ་ཊེ་(Shiksha Barati Public School) གཞུང་གི་སློབ་གྲྭའི་ནང་སློབ་གཉེར་བྱེད་བཞིན་པའི་རང་ལོ་ ༡༦ ཡིན་པ་བོད་རིགས་བུ་མོ་ཚེ་རིང་དབྱིངས་སྐྱིད་ལགས་ད་ལོའི་འཛིན་རིམ་བཅུ་བའི་ཡིག་རྒྱུགས་ཁྲོད་གྲུབ་འབྲས་བརྒྱ་ཆ་ ༩༦ བླངས་ཏེ། སློབ་གྲྭ་དེ་གའི་འཛིན་རིམ་བཅུ་བའི་སློབ་མ་ཡོངས་ཀྱི་རྩེ་ཕུད་སློབ་མ་བཅུའི་གྲོས་སུ་བསླེབས་ཡོད་འདུག སློབ་གྲྭ་དེར་སློབ་ཕྲུག་༡༥༠༠ཙམ་ཡོད་འདུག
གསར་འགོད་པས་བུ་མོ་ཚེ་རིང་དབྱངས་སྐྱིད་ལ་སློབ་གྲྭའི་རྩེ་ཕུད་གྲོས་སུ་བསླེབས་པར་ཚོར་སྣང་གང་འདྲ་བྱུང་པ་དང་སློབ་སྦྱོང་ཇི་ལྟར་བྱས་པ་སོགས་དྲིས་པར། ཁོ་མོས་རང་ཉིད་ལ་བརྒྱ་ཆ་ ༩༦ རག་ཐུབ་པའི་རེ་བ་བཟུང་མེད་ཀྱང་། རྒྱུགས་འབྲས་དེ་འདྲ་ཐོབ་ཐུབ་པ་ནི། གཙོ་བོ་བྱམས་བརྩེ་བདེ་རྩ་ཚོགས་པས་རང་ཉིད་ལ་སློབ་ཚན་ཟུར་ཁྲིད་སོགས་ཀྱི་མཐུན་རྐྱེན་ཡག་པོ་སྦྱར་བ། དགེ་རྒན་རྣམ་པའི་འཛུབ་སྟོན་བཅས་ཀྱི་གྲུབ་འབྲས་ཤིག་ཡིན་པར་བརྗོད་བྱུང་ལ། ཁོ་མོས་ “ང་སློབ་གྲྭའི་རྒྱུགས་འབྲས་རྩེ་ཕུད་ནང་བསླེབས་པར་ཚོགས་པའི་འགན་འཛིན་གྲགས་པ་རིན་པོ་ཆེ་མཆོག་གིས་ང་ལ་རྔན་པ་ག་རེ་དགོས་ན་སྤྲོད་ངེས་ཡིན་གསུང་གི་འདུག་”ཟེར།
ཚོགས་པའི་འགན་འཛིན་གྲགས་པ་རིན་པོ་ཆེ་མཆོག་གིས་བརྗོད་པ་ལྟར་ན། རང་ཉིད་ཀྱིས་རྒྱ་གར་ལྷོ་ཕྱོགས་འབྲས་སྤུངས་བློ་གསལ་གླིང་ནས་བསླབ་པ་མཐར་ཕྱིན་རྗེས། རྒྱ་གར་བོད་མིའི་གཞིས་ཆགས་ཁག་ཏུ་སྐྱོད་སྐབས་ཉམ་ཐག་ཅན་གྱི་བྱིས་པ་མང་པོ་ཞིག་མཐོང་པས་ཁོང་ལ་སེམས་འགུལ་ཆེན་པོ་བྱུང་སྟེ། ༧གོང་ས་མཆོག་དང་དགའ་ལྡན་ཁྲི་རིན་པོ་ཆེ་རྣམ་གཉིས་ཀྱི་བཀའ་སློབ་ལམ་སྟོན་དང་། ༧གོང་ས་མཆོག་གིས་བྱིས་པ་ཉམ་ཐག་ཚོར་རོགས་འདེགས་བྱ་རྒྱུའི་ལས་གཞི་མགོ་འཛུགས་ཆེད་ཧིན་སྒོར་འབུམ་གཅིག( ༡༠༠༠༠༠ ) གནང་པ་མ་རྩར་བཟུང་སྟེ། ད་ཆར་རྒྱལ་སྤྱིའི་ཚོགས་སྡེ་ཁག་དང་འབྲེལ་ལམ་ཐོག་ཚོགས་པ་ཞིག་གི་ངོ་བོར་རྒྱ་བསྐྱེད་གཏོང་བཞིན་ཡོད་འདུག
རྒྱལ་སྤྱིའི་བྱམས་བརྩེ་བདེ་རྩ་ཚོགས་པ་དེ་ ༡༩༩༧ ལོར་གྲགས་པ་རིན་པོ་ཆེ་ཡིས་གསར་འཛུགས་བྱས་པ་ཞིག་དང་། ཚོགས་པ་དེས་གཟིགས་པོ་བདེ་ཐང་མེད་པ། སེམས་ཁམས་བདེ་ཐང་གི་དཀའ་ངལ་ཡོད་པ། དཔལ་འབྱོར་གྱི་དཀའ་ངལ་ཡོད་པ་སོགས་ཉམ་ཐག་བྱིས་པ་ཚོར་ལྟ་རྟོག་གིས་སློབ་སྦྱོང་དང་། ཟས་གོས་སོགས་ཀྱི་མཐུན་འགྱུར་གནང་གི་ཡོད་འདུག
བུ་ཚེ་རིང་དབྱངས་སྐྱིད་ལགས་བཀྲིས་བདེེགས་གྲངས་མེད་ཞུ་བ་དང་ཆབ་གཅིག་ཏུ་ད་དུང་སྔར་ལྷག་འབད་བརྩོན་གནང་རྒྱུའི་རེ་བ་ཆེ།
བཀྲ་ཤིས་བདེ་ལེགས་ཡོད།
ལྷོད་ཡངས་སུ་མ་གཏོང་བུ་རྒོད་མ། ད་དུང་སྔར་ལས་ལྷག་པ་ཞིག་ཤུགས་རྒྱོབས་དང་མདུན་ལམ་ཡག་པོ་འདུག།
གཏམ་བཟང་། གཏམ་བཟང་། གངས་ཕྲུག་ཚོ། ད་དུང་ཤུགས་རྒྱོབས་ཨ།