ཧེ་ལཱ་རེ་རྒྱལ་ཁབ་ ༡༠༠ ལ་ཕྱོགས་སྐྱོད།

ཨ་རིའི་རྒྱལ་དོན་དྲུང་ཆེ་ཧེ་ལཱ་རེ་དྲུང་ཆེའི་ལས་ཁུར་ཞུས་པའི་ལོ་གསུམ་དང་ཕྱེད་ཀའི་རིང་འཛམ་གླིང་གི་རྒྱལ་ཁབ་ ༡༠༠ ནང་ཕྱོགས་སྐྱོད་བྱས་ཡོད་ཅིང་། དེ་ནི་ལོ་རྒྱུས་ཀྱི་ཟིན་ཐོ་ཞིག་ཏུ་གྱུར་ཡོད་འདུག

ཕྱི་ཚེས་ ༢༨ ཉིན་ཨ་རིའི་རྒྱལ་དོན་དྲུང་ཆེ་ཧེ་ལཱ་རེ་(Hillary Clinton) ལཱ་ཊི་ཝི་ཡཱའི་(Latvia) རྒྱལ་ས་རཱེ་གྷའི་ནང་རྒྱལ་དོན་གཟིགས་སྐོར་དུ་ཕྱིན་པ་དེ་ནི། ཨ་རིའི་ལོ་རྒྱུས་ནང་གི་རྒྱལ་དོན་དྲུང་ཆེ་ཞིག་རྒྱལ་ཁབ་ ༡༠༠ ནང་སྐོར་སྐྱོད་བྱས་པ་ཐོག་མ་དེ་ཆགས་ཡོད་ཅིང་། ཧེ་ལཱ་རེ་ནི་དུས་རབས་ཤིག་གི་ཨ་རིའི་དྲུང་ཆེའི་ཚབ་མཚོན་མི་སྣ་ཞིག་ཏུ་གྱུར་ཡོད་པ་མ་ཟད། བུད་མེད་ཀྱི་ཚབ་མཚོན་མི་སྣ་ཞིག་ཀྱང་ཆགས་ཡོད་པ་རེད།

ད་སྔ་ཨ་རིའི་རྒྱལ་དོན་དྲུང་ཆེ་རྣམས་ཀྱི་ཁྲོད་དྲུང་ཆེའི་ལས་ཁུར་སྐབས་རྒྱལ་ཁབ་ ༩༦ ལས་མང་བར་སྐྱོད་མྱོང་མཁན་བྱུང་མྱོང་མེད་པ་དང་། ཧེ་ལཱ་རེའི་གོང་དུ་རྒྱལ་ཁབ་མང་ཤོས་ནང་ཕྱོགས་སྐྱོད་བྱེད་མཁན་ནི། སྲིད་འཛིན་ཟུར་པ་བྷེལ་ཁཱི་ལེན་ཊོན་(Bill Clinton) གྱི་སྲིད་འཛིན་སྐབས་གཉིས་པའི་དུས་ཀྱི་རྒྱལ་དོན་དྲུང་ཆེ་ཨལ་བྷི་རའེ་ཊི་(Madeleine Albright) ཡིན་འདུག

ཨ་རིའི་ཕྱི་སྲིད་ལས་ཁུངས་ཀྱིས་སྤེལ་བའི་གནས་ཚུལ་ནང་། ཧེ་ལཱ་རེ་རྒྱལ་དོན་དྲུང་ཆེར་བསྡད་ནས་ལོ་༣དང་ཕྱེད་ཀའི་ནང་ཉི་མ་ ༣༣༧ ཕྱོགས་སྐྱོད་ལམ་བར་ནས་བཏང་ཡོད་འདུག

གསར་འགོད་པ། བནྡེ་སྐྱབས།