གཟའ་ཟླ་བའི་ཉིན་བོད་ཀྱི་དགུ་བཅུ་གསུལ་ལས་འགུལ་ཚོགས་པའི་སྐབས་ ༡༣ པའི་སློབ་ཐོན་མཐར་ཕྱིན་དང་། སྐབས་ ༡༤ པའི་གསར་ཞུགས་སློབ་མ་མགོ་འཛུགས་མཛད་སྒོ་ཚོགས་སོང་།
དེ་རིང་ཞོགས་པར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་ཁང་དུ་སྐུ་མགྲོན་གཙོ་བོར་བོད་མི་མང་སྤྱི་འཐུས་རྒྱུན་ལས་རྒྱ་རིགས་ཐར་ལགས་ཆེད་ཕེབས་ཐོག མཐར་ཕྱིན་སློབ་མ་ཁག་ཅིག་ལ་ཆེད་བསྟོན་བྱ་དགའ་དང་། མཐར་ཕྱིན་སློབ་མའི་ལག་འཁྱེར་གནང་པ་དང་ཆབས་ཅིག གསར་ཞུགས་སློབ་མ་ཚོར་ཕེབས་བསུའི་མཛད་སྒོ་ཚོགས་སོང་།
མཛད་སྒོའི་ཐོག་མར་དགུ་བཅུ་གསུམ་གྱི་ཚོགས་གཞོན་ཀླུ་མཁར་བྱམས་ལགས་ཀྱིས་ལོ་གཅིག་གི་སློབ་ཡུན་རིང་སློབ་མ་ཚོར་སོ་སོ་སྤྱི་ཚོགས་ནང་ཐོན་འགྲོ་སྐབས་སློབ་སྦྱོང་གི་ཐད་ནས་གདེང་སྤོབས་ཡོད་པ་ཞིག་བཟོ་ཐུབ་མེད་པ། སློབ་མ་རྙིང་པ་ཚོ་ཐོན་འགྲོ་བ་དང་གསར་པ་ཚོ་སླེབས་ཡོང་གི་ཡོད་པ་ལྟར། ཚོགས་པའི་འཛིན་སྐྱོང་གི་མི་ཐོག་རིམ་བཞིན་འགྱུར་འགྲོ་བ་ཞིག་ཡིན་སྟབས། སློབ་མ་ཚོ་ཆབ་སྲིད་བཙོན་ཟུར་རམ་འབྲེལ་ཆགས་ཀྱང་ཆགས་ཡོད་པས། རྗེས་ཕྱོགས་བོད་ཀྱི་དགུ་བཅུ་གསུམ་ཚོགས་པའི་རྒྱུན་གནས་འཕེལ་རྒྱས་ཐད་དོ་ཁུར་བྱ་དགོས་པ། ལྷག་པར་དུ་དགུ་བཅུ་གསུམ་ཚོགས་པ་འདི་བོད་ཀྱི་རྒྱལ་གཅེས་དཔའ་བོ་དཔའ་མོ་ཚོའི་མིང་ཁུར་ནས་གནས་ཡོད་པ་ཞིག་ཡིན་སྟབས། ཚང་མས་ཆེ་ས་ནས་བོད་རྒྱལ་ཁབ་ཆེད་ཞབས་འདེགས་བསྒྲུབ་ཐུབ་པ་ཞིག་དང་། ཆུང་ས་ནས་སོ་སོའི་ལྟོ་གོས་ལ་འགན་འཁུར་ཐུབ་པ་ཞིག་བྱ་དགོས་པ་བཅས་ཀྱི་སྐོར་བརྗོད་སོང་།
སྐུ་མགྲོན་གཙོ་བོ་བོད་མི་མང་སྤྱི་འཐུས་རྒྱུན་ལས་རྒྱ་རིགས་ཐར་ལགས་ཀྱིས་བོད་ཀྱི་དགུ་བཅུ་གསུམ་ལས་འགུལ་ཚོགས་པ་ནི་དམིགས་བསལ་ཁྱད་ཆོས་ལྡན་པ་ཞིག་ཡིན་པ། ཚོགས་པ་དེའི་ནང་གི་ལས་ཀ་བྱེད་མཁན་དང་ཚོགས་མི་ཚོ་བོད་ནས་ཤི་གསོན་གྱི་འཐབ་རྩོད་འོག་ནས་ཡོང་མཁན་རྐྱང་ཡིན་པ། སོ་སོའི་གཉེན་འབྲེལ་བོད་ནང་ཡོད་མཁན་དང་བོད་ནང་གི་གནས་བབ་ལ་རྒྱུས་ལོན་ཡོད་མཁན་རྐྱང་ཡིན་སྟབས་དུས་རྒྱུན་བོད་ནང་འབྲེལ་བ་བྱ་དགོས་པ། ༧གོང་ས་མཆོག་གི་སྐུ་རིང་ལ་བོད་ཀྱི་བདེན་མཐའ་སེལ་མ་ཐུབ་ན་ཕྱིན་ཆད་བོད་མིའི་འདོད་བློ་ཁེངས་པ་ཞིག་ཡོང་དཀའ་བ་སོགས་ཀྱི་སྐོར་གསུངས་བྱུང་།
མཐར་ཚོགས་པའི་ཤེས་ཡོན་སྡེ་ཚན་གྱི་སློབ་སྤྱི་ལྷ་ཆབ་སྦྱིན་པ་ལགས་ཀྱིས། ལོ་སྔོན་མར་སྐབས་ ༡༣ པའི་སློབ་མ་གསར་ཞུགས་སྐབས་སློབ་མ་གྲངས་ ༡༩ ཡོད་ཀྱང་། ད་སྔ་སློབ་མ་ཁག་ཅིག་གིས་དགོངས་ཞུ་བྱས་པ་དང་། ཁག་ཅིག་གིས་དགོངས་ཞུ་ཡང་མ་བྱས་པར་ཁྱོན་སློབ་མ་ ༨ ལོ་གཅིག་གི་སློབ་སྦྱོང་གི་དུས་ཡུན་མཐའ་མ་འཁྱོལ་བར་ཐོན་ཡོད་པར་བློ་ཕམ་ཆེན་པོ་ཡོད་པ་དང་། ཁོ་ཚོས་སོ་སོའི་གོ་སྐབས་དང་ཚོགས་པའི་རེ་བ་སྟོང་ཟད་དུ་བཏང་ཡོད་པ་མ་ཟད། སློབ་ཞུགས་བྱ་འདོད་ཡོད་མཁན་གཞན་པ་ཚོའི་གོ་སྐབས་ཀྱང་འཕྲོ་བརླག་ཏུ་བཏང་ཡོད་པས། འདི་ལོའི་སློབ་མ་དག་གིས་གནས་ཚུལ་དེ་འདྲ་མི་འབྱུང་པར་བྱ་དགོས་པའི་རེ་སྐུལ་གནང་སོང་།
བོད་ཀྱི་དགུ་བཅུ་གསུམ་ལས་འགུལ་ཚོགས་པས་ལོ་ལྟར་ཆབ་སྲིད་བཙོན་ཟུར་དང་ཆབ་སྲིད་བཙོན་པའི་འབྲེལ་ཆགས་ཁག་ཅིག་ལ་གློག་ཀླད་དང་དབྱིན་ཡིག བོད་ཡིག་སོགས་ལོ་གཅིག་རིང་སློབ་སྦྱོང་སྤྲོད་ཀྱི་ཡོད་པ་དང་། འདི་ལོ་གསར་ཞུགས་སློབ་མ་གྲངས་ ༩ བྱུང་ཡོད་པའི་ཁར། ཟུར་ཞུགས་སློབ་མ་ ༦ ཙམ་བསྡུ་འཆར་ཡོད་འདུག
གསར་འགོད་པ། བནྡེ་སྐྱབས།
