སུད་སིར་ཚོགས་པའི་རྒྱལ་ཚོཊ་འགྲོ་བ་མིའི་ཐང་ལྷན་ཚོཊ་ཐོག ཨ་རི་དང་ཡུ་རོབ་མཐུན་ཚོགས་གཙོས་རྒྱལ་ཁབ་ ༨ ཀྱིས་བོད་ནང་གི་འགྲོ་བ་མིའི་ཐོབ་ཐང་ཐོག་སེམས་འཚབ་ཡོད་སྐོར་བརྗོད་འདུག
ཉེ་ལམ་སུད་སི་གྲོང་ཁྱེར་འཇི་ནེ་ཝར་ཚོཊ་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོང་ཚོཊ་ཆེན་སྟེང་། ཡུ་རོབ་མཐུན་ཚོགས་ཀྱི་སྐུ་ཚབ་དང་ཨ་རི། ཅེག་སྤྱི་མཐུན་རྒྱལ་ཁབ། ཧྥ་རན་སི། སུད་སི། སུ་ཝེ་ཊིན། ཁེ་ན་ཌ། སྦེལ་ཇམ་སྐུ་ཚབ་བཅས་ཀྱིས་བོད་ནང་གི་འགྲོ་བ་མིའི་ཐོབ་ཐང་ཐོག་སེམས་འཚབ་ཡོད་སྐོར་གྱི་གཏམ་བཤད་སྤེལ་འདུག
ཚོགས་འདུའི་སྟེང་ཌན་མག་ཡུ་རོབ་མཐུན་ཚོགས་སྐུ་ཚབ་ཀྱིས་བརྗོད་དོན་ལྟར་ན། ཡུ་རོབ་མཐུན་ཚོགས་ཀྱིས་བོད་རང་སྐྱོང་ལྗོངས་དང་བོད་རིགས་ས་ཁུལ་གཞན་དང་། ལྷག་པར་དུ་སི་ཁྲོན་ཁུལ་གྱི་བོད་མིའི་གནས་སྟངས་ཇེ་སྡུག་ཏུ་འགྲོ་བཞིན་པར་སེམས་འཚབ་ཡོད་སྐོར་དང་། རྒྱ་གཞུང་གིས་བོད་མི་མང་པོ་གང་བྱུང་འཛིན་བཟུང་བྱས་སྟབས། ལྷ་ས་གཙོས་བོད་ཀྱི་ས་ཁུལ་ཁག་ཏུ་རང་ལུས་མེར་སྲེག་གཏོང་མཁན་ཇེ་མང་དུ་འགྲོ་བཞིན་ཡོད་པ་དང་། གནད་དོན་དེའི་རྐྱེན་པས་རྒྱ་གཞུང་གིས་བོད་རང་སྐྱོང་ལྗོངས་ཀྱི་ཡུལ་སྐོར་སྤྲོ་འཆམ་པ་ཚོར་བཀག་འགོག་བྱས་པར་སེམས་འཚབ་དང་། ཡུ་རོབ་མཐུན་ཚོགས་ཀྱིས་བོད་དང་ཤིང་ཅང་གཙོས་པའི་གྲངས་ཉུང་མི་རིགས་ཚོའི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། འདུ་འཛོམས་དང་སྐད་ཡིག་རང་དབང་། ཐུན་མིན་གོམས་སྲོལ། ཆོས་དད་རང་དབང་ལ་བརྩི་བཀུར་དགོས་པའི་འབོད་སྐུལ་ཞུས་འདུག
སྐབས་དེར་ཨ་རིའི་སྐུ་ཚབ་ཀྱིས་རྒྱ་གཞུང་གིས་སོ་སོའི་གཞུང་དང་ལྟ་བ་མི་མཐུན་པ་ཚོར་ཆེད་དམིགས་ཀྱིས་ཉེས་འཛུགས་བྱས་ཏེ། མི་མང་པོ་ཞིག་འཛིན་བཟུང་བཙོན་འཇུག་དང་གར་སོང་ཆ་མེད་དུ་གྱུར་བ། ཁྲིམས་འགལ་ཉེས་ཆད་གཅོད་པ། དྲ་རྒྱར་བཀག་སྡོམ་བྱེད་པ། འགྲོ་བ་མིའི་ཐོབ་ཐང་ལས་འགུལ་བ་དང་ཁྲིམས་རྩོད་པར་ཁྲིམས་ཐག་གཅོད་པ། ཆོས་ལུགས་དད་མོས་ལ་དམ་དྲག་སོགས་བྱེད་ཀྱི་ཡོད་ཅིང་། ཁྱད་པར་དུ་རྒྱ་གཞུང་གིས་བོད་དང་ཤིན་ཅང་སོགས་ཀྱི་ཆོས་དང་སྐད་ཡིག ཐུན་མོང་མིན་པའི་རིག་གཞུང་གཏོང་བཤིག་གཏོང་བཞིན་པའི་གནས་སྟངས་ལ་ཐུགས་འཚབ་ཡོད་སྐོར་བརྗོད་འདུག
བྷེལ་ཇམ་སྐུ་ཚབ་ཀྱིས་རྒྱ་གཞུང་གིས་བཙན་དབང་ཐོག་འཛིན་བཟུང་བཙོན་འཇུག་བྱས་པ་དང་བོར་བརླག་ཏུ་ཕྱིན་པའི་བོད་མི་ཚོའི་གནས་སྟངས་ཐོག་སེམས་འཚབ་དང་། གནད་དོན་དེའི་ཐད་རྒྱ་གཞུང་གིས་ངེས་པར་གསལ་བཤད་དགོས་རྒྱུ་དང་། བོད་མི་ཚོས་རང་ལུས་མེར་བསྲེགས་བཏང་བ་དེས་བོད་མིར་ཆོས་དང་རིག་གཞུང་སྲུང་སྐྱོབ་ཐོབ་ཐང་མེད་པ་གསལ་པོར་བསྟན་ཡོད་སྐོར་བརྗོད་འདུག
དེ་བཞིན། ཁེ་ན་ཌའི་སྐུ་ཚབ་ཀྱིས་བོད་རིགས་གནས་སྡོད་ཀྱི་ས་ཁུལ་ཁག་ཏུ་ཆོས་ལུགས་དད་མོས་ཐོག་དམ་དྲག་བྱེད་པ་དེར་སེམས་འཚབ་ཡོད་སྐོར་དང་། ཅེག་སྤྱི་མཐུན་རྒྱལ་ཁབ་ཀྱིས་ཀྱང་བོད་ནང་གི་ཛ་དྲག་གནས་སྟངས་ལ་དམིགས་ཏེ། རྒྱ་གཞུང་གིས་བོད་ཀྱི་ས་ཁུལ་ཁག་ཏུ་ཕྱི་རྒྱལ་གཞུང་ཚབ་དང་གསར་འགོད་པ། རང་དབང་ལྡན་པའི་རྟོགས་ཞིབ་ཚོཊ་པ་བཅས་གཏོང་དགོས་རྒྱུ། ཧྥ་རན་སི་དང་སུད་སི་གཉིས་ཀྱིས་ཀྱང་བོད་ནང་གི་གནས་སྟངས་ཐོག་སེམས་འཚབ་ཆེན་པོ་ཡོད་སྐོར་བརྗོད་འདུག
གསར་འགོད་པ། དཔལ་ལྡན།
