གཟའ་པ་སངས་ཉིན་ཤིན་ཅང་ཧི་ཐེན་གྲོང་ཁྱེར་ནས་ཝུ་རའོ་མུའུ་ཆིར་འཕུར་སྐྱོད་བྱེད་པའི་གནམ་གྲུ་ཞིག་ལ། ཡུ་གུར་བ་ ༦ གིས་རྒོལ་འཛིང་བྱ་སྤྱོད་སྤེལ་རྩིས་བྱས་ཡོད་སྐོར་རྒྱ་གཞུང་གིས་བརྗོད་འདུག
ཕྱི་ཟླ་ ༦ ཚེས་ ༢༩ ཉིན་ཤིན་ཅང་ཧི་ཐེན་གྲོང་ཁྱེར་ནས་ཝུ་རའོ་མུའུ་ཆི་རུ་འཕུར་སྐྱོད་བྱེད་བཞིན་པའི་ GS ༧༥༥༤ རྟགས་ཀྱི་གནམ་གྲུའི་ནང་། ཡུ་གུར་བ་མི་ ༦ གིས་གནམ་གྲུ་བཙན་འཕྲོག་བྱ་འཆར་གྱི་རྒོལ་འཛིང་དོན་རྐྱེན་ཞིག་བསླངས་ཡོད་འདུག རྒྱ་གཞུང་ཉེན་རྟོག་སྡེ་ཁག་གིས་གསལ་བསྒྲགས་བྱས་པ་ལྟར་ན། ཉིན་དེའི་ཆུ་ཚོད་ ༡༢ དང་སྐར་མ་ ༢༥ སྟེང་གནམ་གྲུ་ཞིག་ཧི་ཐེན་གནམ་ཐང་ནས་འཕུར་ཏེ་སྐར་མ་ ༡༠ རིང་མཁའ་ལམ་དུ་བསྐྱོད་རྗེས། ཡུ་གུར་བ་མི་ ༦ གིས་གནམ་གྲུ་བཙན་འཕྲོག་གི་རྒོལ་འཛིང་བྱ་སྤྱོད་སྤེལ་ཡོད་ཀྱང་། སྐབས་དེར་མཁའ་བསྐྱོད་ལས་སྣེ་བ་དང་མགྲོན་པོ་རྣམས་ཀྱིས་ཡུ་གུར་བ་དེ་དག་འཇུ་བཟུང་བྱས་པ་མ་ཟད། གནམ་གྲུ་ཕྱིར་ཧི་ཐེན་གནམ་ཐང་དུ་བབ་ཡོད་སྐོར་བརྗོད་འདུག
འཛམ་གླིང་ཡུ་གུར་མཐུན་ཚོགས་ཀྱི་མགྲིན་ཚབ་པ་ཏིས་ལིས་ཞཱ་ཏིས་ལགས་ཀྱིས། དོན་རྐྱེན་དེའི་ཐད་ཧི་ཐེན་ས་གནས་ནས་འབྱོར་བའི་གནས་ཚུལ་ཡོང་ཁུངས་གཉིས་ཀྱིས་བརྗོད་པ་ལྟར་ན། དོན་རྐྱེན་དེའི་འབྱུང་རྐྱེན་གཙོ་བོ་ནི་གནམ་གྲུའི་ནང་ཡུ་གུར་བ་དང་རྒྱ་རིགས་བར་རྐུབ་སྟེགས་རྩོད་རེས་ཀྱི་ཁ་རྩོད་ཤོར་ཏེ། རྒྱ་རིགས་ཚོས་ཡུ་གུར་བ་རྣམས་ལ་དམའ་འབེབས་བརྙས་བཅོས་ཀྱི་སྐད་ཆ་བཤད་པར་བརྟེན། ཡུ་གུར་བ་དང་རྒྱ་རིགས་བར་འཁྲུག་འཛིང་ཤོར་ཡོད་པ་དང་། གནམ་གྲུའི་ནང་གི་མགྲོན་པོའི་བརྒྱ་ཆ་ ༩༠ རྒྱ་རིགས་ཡིན་སྐོར་བརྗོད་དེ། རྒྱལ་སྤྱིའི་སྒྲིག་འཛུགས་དང་རང་དབང་ལྡན་པའི་བརྒྱུད་ལམ་ཁག་གིས་དོན་རྐྱེན་དེའི་དངོས་ཡོད་གནས་སྟངས་ཐད་ཞིབ་འཇུག་བྱ་དགོས་པའི་འབོད་སྐུལ་ཀྱང་ཞུས་ཡོད་པ་རེད།
ཕྱི་ཟླ་ ༦ ཚེས་ ༣༠ ཉིན་རྒྱ་གཞུང་ཤིན་ཧྭ་དྲ་བའི་སྟེང་། གནམ་གྲུ་དེའི་ནང་འགྲུལ་བ་མི་ ༩༢ དང་མཁའ་སྐྱོད་ལས་སྣེ་བ་མི་ ༩ བཅས་ཡོད་པ་དང་། དོན་རྐྱེན་ཁྲོད་འགྲུལ་བ་ ༦ ལ་རྨས་སྐྱོན་ཕོག་ཡོད་ལ། གནམ་གྲུ་བཙན་འཕྲོག་གི་རྒོལ་འཛིང་བྱ་སྤྱོད་སྤེལ་མཁན་ཡུ་གུར་བ་ ༦ ནི། མུའུ་ཧྲ་ཡིས་སུའུ་ཕུ་དང་། ཨ་བྷེ་ཧུར་ཡའེ་བྷེལ་ཡུ་མུའུ། ཝར་ཞི་ཏི་ཁེལ་ཡུ་མཱེན། མའེ་ཐི་ཝེལ་ཡུས་སུའོ། ཡ་སིན་མའེ་ཐེའུ། ཝུ་མེར་ཡུ་མཱེན་བཅས་ཡིན་པ་དང་། ཁོ་ཚོ་ཚང་མ་སྐྱེས་པ་རྐྱང་ཡིན་སྐོར་བཀོད་འདུག
དེ་རིང་ཕྱི་ཚེས་ ༢ ཉིན་བྷེ་བྷེ་སི་གསར་ཁང་གིས་སྤེལ་བའི་གནས་ཚུལ་ནང་། རྒོལ་འཛིང་བྱེད་མཁན་ཡུ་གུར་བ་ ༦ ལ་འཇུ་བཟུང་སྐབས་མཁའ་འགྲུལ་ཉེན་རྟོག་པ་དང་འགྲུལ་བའི་རུབ་རྡུང་བྱས་ཏེ། ཡུ་གུར་བ་ ༤ མགོ་ལ་རྨས་སྐྱོན་ཕོག་ཡོད་པའི་ཁྲོད་ནས། ཡུ་གུར་གཉིས་འདས་གྲོངས་སུ་ཕྱིན་ཡོད་པ་དང་། གཞན་གཉིས་ལའང་རྨས་སྐྱོན་ཚབ་ཆེན་ཕོག་སྟེ་སྨན་ཁང་དུ་བསྡད་ཡོད་སྐོར་བཀོད་འདུག
གསར་ལམ་ཁག་ཏུ་གནས་ཚུལ་སྤེལ་བར་གཞིགས་ན། དོན་རྐྱེན་དེ་བྱུང་རྗེས་རྒྱ་གཞུང་གིས་མཁའ་ལམ་འགྲུལ་སྐྱོད་ཐད་དོགས་ཟོན་བཀག་སྡོམ་ཤུགས་ཆེ་རུ་བཏང་ཡོད་འདུག རྒྱ་ནག་གི་རྐང་སྤོལ་དཔྱད་བརྗོད་པ་ཧུང་ཅན་ཞཱང་གིས་ཝའེ་པའོ་གནས་འཕྲིན་དྲ་བའི་སྟེང་། གནམ་ཐང་དུ་ཁོས་གནམ་གྲུར་སྒུག་སྡོད་སྐབས། མཁའ་སྐྱོད་ཞབས་ཞུ་མས་རྒྱང་བསྒྲགས་བརྒྱུད་པེ་ཅིན་དུ་དམིགས་གསལ་མཁའ་ཐོག་ལས་འགུལ་ཞིག་ཡོད་པའི་དབང་གིས། པེ་ཅིན་དུ་འཕུར་སྐྱོད་བྱེད་པའི་གནམ་གྲུ་ཆ་ཚང་གནས་སྐབས་རིང་འཕུར་མི་ཆོག་པ་བསྒྲགས་ཡོད་སྐོར་བརྗོད་ཡོད་པ་རེད།
དེ་བཞིན། མཁའ་སྐྱོད་ལས་སྣེ་བ་ཞིག་གིས་ཧྥ་རན་སིའི་རླུང་འཕྲིན་གསར་ཁང་ལ་གནས་ཚུལ་བརྗོད་པ་ལྟར་ན། ཉེ་སྔོན་རྒྱ་གཞུང་མཁའ་འགྲུལ་ལས་ཁུངས་ཀྱིས་ཆེད་དམིགས་བོད་དང་ཤིན་ཅང་། དཀྱིལ་ཤར་ཡུལ་གྲུ་དང་ཨ་ཧྥུ་རི་ཀ་བཅས་ཀྱི་མཁའ་ལམ་བརྒྱུད་འཕུར་སྐྱེད་བྱེད་མཁན་གནམ་གྲུ་དག་ལ་ཞིབ་བཤེར་དོགས་ཟོན་ནན་མོ་བྱས་ཏེ། གནམ་གྲུའི་ནང་མི་སེར་དཀྱུས་མའི་ལྭ་གྱོན་པའི་གསང་བའི་ཉེན་སྲུང་བ་དང་དྲག་ཆས་དམག་མི་གོ་སྒྲིག་དང་། གནམ་གྲུའི་ནང་ཆེད་དུ་ཉེན་འགོག་མཚོན་ཆའི་རིགས་སྒྲིག་འགོད་བྱས་ཡོད་ལ། ལྷག་པར་དུ་གནམ་ཐང་ཁག་ཏུ་བོད་དང་ཤིན་ཅང་དུ་བསྐྱོད་མཁན་འགྲུལ་བ་རྣམས་ལོགས་སུ་རུ་སྒྲིག་ཏུ་བཅུག་སྟེ། ཞིབ་བཤེར་འདྲི་གཅོད་ནན་མོ་བྱེད་བཞིན་ཡོད་འདུག
ཤིན་ཅང་ཧི་ཐེན་དུ་བྱུང་བའི་གནམ་གྲུའི་དོན་རྐྱེན་དེའི་ཐད། རྒྱ་གཞུང་དང་ས་གནས་ཡུལ་མི་གཉིས་ཀྱི་བཤད་སྟངས་གཅིག་མཐུན་མིན་པར་མ་ཟད། ས་གནས་ཡུལ་མི་རྣམས་ཀྱིས་རྒྱ་གཞུང་གི་དོན་རྐྱེན་དེར་ཁ་གཡར་ཏེ། ཤིན་ཅང་ནང་དམ་དྲག་ཤུགས་ཆེ་རུ་བཏང་ནས་ས་གནས་ཡུ་གུར་མང་ཚོགས་ལ་མཛད་དཀའ་བཟོ་རྒྱུར་བློ་འཚབ་གནང་གི་ཡོད་འདུག
