ཆོས་ཁྲིམས་དང་འགལ་བའི་ཆོས་དཔོན་ཁྲི་འདོན།

གཟའ་ལྷག་པའི་ཉིན་འཛམ་གླིང་ཡེ་ཤེས་ཆོས་ཀྱི་གདན་ས་གཙོ་བོ་ཝེ་ཌེ་ཁཱེན་གྱིས། རྒྱ་ནག་ཧ་ཨར་པཱེན་གྱི་ཆོས་དཔོན་ཁྲི་འདོན་ནི་ཆོས་ཁྲིམས་དང་འགལ་ཡོད་པ་བསྒྲགས་འདུག

ཁ་སང་ཕྱི་ཚེས་ ༤ ཉིན་ཨི་ཊ་ལིའི་རྒྱལ་སར་ཡོད་པའི་འཛམ་གླིང་ཡེ་ཤེས་ཆོས་ལུགས་ཀྱི་གདན་ས་གཙོ་བོ་ཝེ་ཌེ་ཁཱེན (Vatican) གྱིས་བསྒྲགས་གཏམ་སྤེལ་ཏེ། ཟླ་འདིའི་ཕྱི་ཚེས་ ༦ ཉིན་རྒྱ་ནག་ཧ་ཨར་པཱེན་གྲོང་ཁྱེར་དུ་ཚོགས་བཞིན་པའི་ཆོས་དཔོན་ཁྲི་འདོན་གྱི་མཛད་སྒོ་དེ་ནི་ཡེ་ཤེས་ཆོས་ཁྲིམས་དང་འགལ་ཡོད་པ་གསལ་འདོན་དང་། ཆོས་དཔོན་ཁྲི་འདོན་ནི་ཆབ་སྲིད་གནད་དོན་ཞིག་མ་ཡིན་པར་ཆོས་ཕྱོགས་ཁོ་ནའི་ལས་དོན་ཞིག་ཡིན་ལ། ཡེ་ཤེས་བླ་ཆེན་གྱིས་འཛམ་གླིང་ས་གནས་སོ་སོར་ཆོས་དཔོན་ཁྲི་འདོན་བྱེད་དགོས་པ་དེ་ནི། ཆོས་དཔོན་སོ་སོའི་ཆོས་ཕྱོགས་ཀྱི་གོ་ཐོབ་ངོས་འཛིན་ཅིག་ཡིན་པ་ལས། རྒྱལ་ཁབ་གཞན་གྱི་ནང་སྲིད་ལ་ཐེ་ཇུས་དང་རྒྱལ་ཁབ་ཀྱི་བདག་དབང་དང་འགལ་བའི་ལས་དོན་ཞིག་མིན་པ་བརྗོད་འདུག

གཟའ་ལྷག་པའི་ཉིན་རྒྱ་ནག་ཆོས་དོན་ལྷན་ཁང་གིས། ཝེ་ཌེ་ཁཱེན་གྱིས་རྒྱ་ནག་གི་ཡེ་ཤེས་ཆོས་དཔོན་རྣམས་ཀྱི་འདོད་འདུན་ལ་གུས་རྩི་བྱེད་དགོས་པ་དང་། ཆོས་ཁྲིམས་ཀྱིས་འཇིགས་སྐུལ་བྱས་ཏེ་རྒྱ་ནང་གི་ཡེ་ཤེས་ཆོས་ལུགས་པའི་བར་འགལ་ཟླ་དང་རྙོག་ཟིང་བཟོ་མི་ཆོག་པའི་སྐོར་བརྗོད་པ་རེད།

རྒྱ་གཞུང་གིས་ཐེངས་འདིའི་ཧ་ཨར་པཱེན་གྱི་ཆོས་དཔོན་ཁྲི་འདོན་མཛད་སྒོའི་ཐོག འཛམ་གླིང་ཡེ་ཤེས་ཆོས་ལུགས་ཀྱི་གདན་ས་ཝེ་ཌེ་ཁཱེན་གྱི་ངོས་འཛིན་དང་འབྲེལ་བ་ཡོད་པའི་ཆོས་དཔོན་ ༦ མཉམ་ཞུགས་བྱ་རྒྱུར་བཀག་འགོག་བྱས་ཡོད་པ་དང་། ཧ་ཨར་པེན་ས་གནས་ཀྱི་ཆོས་དཔོན་རེ་འགའ་ཤས་ཡེ་ཤེས་ཆོས་ཁྲིམས་དང་འགལ་བའི་ཁྲི་འདོན་མཛད་སྒོ་དེར་ཞུགས་མ་འདོད་པར་ས་གནས་གཞན་དུ་བྲོས་བྱོལ་བྱས་ཡོད་འདུག མ་གཞི་ཁྲི་འདོན་མཛད་སྒོ་དེ་ཕྱི་ཟླ་ ༦ ཚེས་ ༢༩ ཉིན་ཚོགས་གཏན་ཁེལ་ཡོད་ཀྱང་། རྒྱ་གཞུང་གིས་སོ་སོས་འདེམས་སྐོ་བྱས་པའི་ཆོས་དཔོན་མང་པོ་ཞིག་མཉམ་ཞུགས་ཆེད་མཛད་སྒོ་ཕྱི་སྣུར་བྱས་ཡོད་པ་རེད། ཡིན་ནའང་། ཁྲི་འདོན་མཛད་སྒོ་དེར་ཆོས་དཔོན་ཁྲི་འདོན་སྐབས་ཀྱི་འདོན་རྟ་དབྱངས་སོགས་ཆོ་ག་མང་པོ་ཞིག་ཚང་མེད་པར་མ་ཟད། ཆོས་ཁང་མཐའ་འཁོར་དུ་ཉེན་རྟོག་པ་དང་དམག་མིས་སྐོར་སྲུང་དམ་དྲག་བྱས་ཡོད་འདུག

ཟླ་འདིའི་ཕྱི་ཚེས་ ༧ ཉིན་རྒྱ་ནག་ཧྲང་ཧེ་རུ་ཡང་ས་གནས་ཆོས་དཔོན་ཁྲི་འདོན་གྱི་མཛད་སྒོ་ཞིག་ཚོགས་རྒྱུ་ཡིན་པ་དང་། མཛད་སྒོ་དེའི་སྟེང་ཡེ་ཤེས་ཆོས་ཀྱི་གདན་ས་ནས་ཆོས་ཁྲིམས་དང་འགལ་པའི་བཀའ་ཁྱབ་བཏང་ཡོད་པའི་རྒྱའི་ཆོས་དཔོན་འགའ་ཤས་མཉམ་ཞུགས་བྱ་འཆར་ཡོད་འདུག