གཟའ་ལྷག་པའི་ཁམས་དཀར་མཛེས་རྫོང་ཐོག་ཏུ་བོད་མི་གཞོན་སྐྱེས་ཤིག་གི་རྒྱ་གཞུང་ལ་ཞི་བའི་སྐད་འབོད་ཀྱི་ལས་འགུལ་སྤེལ་ཏེ་འཛིན་བཟུང་བཙོན་འཇུག་བྱས་འདུག
སེར་བྱེས་ཏྲེ་ཧོར་ཁམས་ཚན་གྱི་གྲྭ་བྱམས་པ་ཚེ་རིང་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཕྱི་ཚེས་ ༤ ཉིན་གྱི་ཉིན་གུང་ཆུ་ཚོད་ ༡༡ ཡས་མས་སུ་ཁམས་དཀར་མཛེས་རྫོང་ཐོག་ཏུ་རང་ལོ་ ༢༢ ཡིན་པའི་སྐལ་བཟང་བསྟན་འཛིན་འབོད་པའི་བོད་མི་གཞོན་སྐྱེས་ཤིག་གིས། “ ༸གོང་ས་མཆོག་བོད་ལ་གདན་འདྲེན་ཞུ་དགོས། བོད་ཆོལ་གསུམ་གྱི་ཆབ་སྲིད་བཙོན་པ་རྣམས་ཀློད་གྲོལ་གཏོང་དགོས། ” ཞེས་རྫོང་གི་ཁྲོམ་གཞུང་དུ་དུས་ཡུན་སྐར་མ་ ༡༥ ཙམ་ལ་ཞི་བའི་སྐད་འབོད་བྱས་ཡོད་འདུག་ལ། རྗེས་སུ་རྫོང་ཉེན་རྟོག་པ་དང་དྲག་ཆས་དམག་མི་མང་པོ་ཡོང་སྟེ་ཁོང་ལ་ཉེས་རྡུང་དྲག་པོ་བཏང་རྗེས། འཇུ་བཟུང་བཙན་འཁྲིད་ཀྱིས་རྫོང་ཐོག་ཏུ་ཡོད་པའི་བཙོན་ཁང་དུ་བཙོན་འཇུག་བཀག་ཉར་བྱས་ཏེ། ད་ལྟའི་ཆར་ནང་མི་ཚོས་གནས་སྟངས་གང་འདྲ་ཆགས་ཡོད་མེད་མ་ཤེས་པར་ལྷག་འདུག
སྐལ་བཟང་བསྟན་འཛིན་ལགས་ནི། དཀར་མཛེས་བོད་རིགས་རང་སྐྱོང་ཁུལ་དཀར་མཛེས་རྫོང་མཐིང་ཁ་ཞང་ཀེ་ཐོག་གྲོང་ཚོའི་ཕ་བློ་བཟང་རྒྱལ་མཚན་དང་མ་བཀྲ་ཤིས་མཁའ་འགྲོ་གཉིས་ཀྱི་བུ་ཡིན་པ་དང་། ད་ལྟའི་བར་སློབ་གྲྭར་འགྲོ་མྱོང་མེད་ཀྱང་། ལོ་འགའི་སྔོན་ནས་བཟུང་ལྷ་བྲིས་སྒྱུ་རྩལ་ལ་སློབ་སྦྱོང་བྱས་ཏེ་སོ་སོའི་ཁྱིམ་དུ་ཐང་ག་འབྲི་བཞེངས་ཀྱི་ལས་ཀ་བྱེད་ཀྱི་ཡོད་འདུག
ཉེ་ལམ་ངོ་རྒོལ་གྱི་གནས་ཚུལ་བྱུང་མ་ཐག་རྒྱ་ནག་གཞུང་གིས་དཀར་མཛེས་རྫོང་གི་ས་གནས་ཡོངས་སུ་དྲག་ཆས་དམག་མི་དང་ཉེན་རྟོག་པ། བདེ་འཇགས་ཉེན་རྟོག་པ་བཅས་འགྲེམས་འཇོག་གིས་དམ་དྲག་དང་། ས་གནས་ཀྱི་རྒྱུད་ལམ་ཁག་ལ་སྟངས་འཛིན་ནན་མོ་བྱས་ཡོད་པ་མ་ཟད། སྐལ་བཟང་བསྟན་འཛིན་ལགས་ཀྱི་ནང་མི་ཚོར་ཁོང་དང་ཐུག་འཕྲད་བྱེད་པར་བཀག་འགོག་བྱས་ཡོད་འདུག
གསར་འགོད་པ། དོན་གོ