འདི་ལོའི་ཕྱི་ཟླ་ ༥ པའི་ཚེས་ ༢༧ ཉིན་ལྷ་སའི་ཇོ་ཁང་མདུན་ཐང་དུ་མདོ་སྨད་བླ་བྲང་བསང་ཆུ་རྫོང་འབོ་ར་དཔེ་ལུང་སྡེ་བའི་རང་ལོ་ ༡༩ ཡིན་པའི་རྡོ་རྗེ་ཚེ་བརྟན་ལགས་དང་། རྔ་པ་སོ་རུ་མའི་རང་ལོ་ ༢༥ ཡིན་པའི་དར་རྒྱས་ལགས་རྣམ་གཉིས་ཀྱིས་རང་ལུས་མེར་བསྲེགས་ཀྱིས་རྒྱ་གཞུང་གི་དྲག་གནོན་སྲིད་ཇུས་ངོ་རྒོལ་བྱས་ཏེ། ཉིན་དེའི་ཉིན་རྒྱབ་ཆུ་ཚོད་ ༢ པ་ཡས་མས་སུ་རྡོ་རྗེ་ཚེ་བརྟན་ལགས་སྐུ་གྲོངས་ཡོད་ཅིང་། དར་རྒྱས་ལགས་ཉིན་དེར་སྤྱི་བདེ་ཉེན་རྟོག་པས་སྨན་ཁང་དུ་འཁྲིད་དེ་ད་ལྟའི་བར་ནང་མི་གཉེན་འབྲེལ་ཚོར་ཐུག་འཕྲད་བྱས་མ་བཅུག་པར་དམ་དྲག་ཁྲོད་སྨ་བཅོས་བྱེད་དགོས་བྱུང་ཡོད་ཀྱང་། ཟླ་འདིའི་ཕྱི་ཚེས་ ༧ ཉིན་སེ་ར་དགོན་པའི་ཉེ་འགྲམ་གྱི་དམག་མིའི་སྨན་ཁང་ཞིག་ཏུ་སྐུ་གྲོངས་ཡོད་པའི་གནས་ཚུལ་ཐོན་འདུག
རང་ལོ་ ༢༥ ཡིན་པའི་དར་རྒྱས་ལགས་ནི། མདོ་སྨད་རྔ་པ་རྫོང་ཆོས་རྗེ་མ་ཞང་སོ་རུ་མ་སྡེ་བའི་ཕ་ལོ་དེ་དང་མ་ཞེས་སྐྱིད་གཉིས་ཀྱི་ཁྱིམ་དུ་སྐྱེས་ཤིང་། ཁོང་ལ་སྤུན་དྲུག་ཡོད་པའི་ནང་ནས་ཆུང་ཤོས་ཡིན་འདུག ཁོང་ཆུང་དུས་རྔ་པ་ཀིརྟི་དགོན་པར་གྲྭ་བ་བྱས་ཡོད་པ་དང་། ལོ་ཤས་གོང་སྐྱ་སར་བབ་སྟེ་ལྷ་སའི་ཁྲིམ་གཟིགས་སྒང་གི་ ༼ཉི་མའི་གླིང་༽ ཞེས་པའི་ཟ་ཁང་དུ་དངུལ་གཉེར་གྱི་ལས་ཀ་བྱས་ཡོད་འདུག
ཁ་སང་ངས་འདིར་ཆན་གཅིག་བྲིས་ཀྱང་འདིར་བཀོད་མི་འདུག
སྐུ་ཟེར་བའི་ལྷ་སའི་ཞེ་ཚིག་དང་གྲོངས་ཟེར་བ་དེ་ཕལ་ཚིག་ཞིག་རེད། སྐུ་ཞེས་ཞེ་ཚིག་དགོས་ན་དེའི་མཐུག་ཏུ་སྐུ་གཤེགས་ལྟ་བུ་འབྲི་དགོས།
ཡང་ན་དར་རྒྱས་གྲོངས་འདུག་་་་་་་ཡང་ན་དར་རྒྱས་སྐུ་གཤེགས་འདུག་་་ཅེས་འབྲི་དགོས། སྔོན་མ་ང་ཕོད་ཀྱི་གནས་ཚུལ་ཐོན་སྐབས་ང་ཕོད་སྐུ་གྲོངས་འདུག་ཅེས་བཀོད་སོང་།
ཕྱིས་འབྱུང་དོ་སྣང་གནང་རོགས། སྐྱོན་བརྗོད་རོགས་རམ་ཟེར་བ་ལྟར་ཆགས་སྲིད།
ཨོཾ་མ་ནི་པདྨེ་ཧུྃ།་
སྐུ་གྲོངས་པ་རེད་དམ་སྐུ་བཀྲོང་པ་རེད། རྒྱའི་དམག་མིས་ཁོང་ཚོ་ལས་སླ་པོ་མི་འཇོག་ཁོ་ཐག་ཡིན་པ་ཧ་གོ་གཏིང་གསལ་རེད་པ།
རྒྱལ་གཅེས་དཔའ་བོ་དར་རྒྱས་ལགས་སྐུ་གྲོངས་རྗེས་སྐུ་ཕུང་ཁོང་གི་ནང་མི་དང་གཉེན་ཉེར་སྤྲད་འདུག་གམ། ཡང་ན་རྒྱ་གཞུང་གིས་ཁོང་གི་གཉེན་ཚན་སོགས་ཁོང་དང་འབྲེལ་ཡོད་ཚོ་ལ་ཁོང་གི་སྐུ་གདུང་དངོས་སུ་བསྟན་འདུག་གམ། དེ་ལྟར་བྱུང་མེད་པར། རྒྱ་དམར་གྱིས་ཁོང་གྲོངས་སོང་ཞེས་ཁྱབ་བསྒྲགས་བྱས་པ་ཙམ་ཡིན་ན། དེ་ཙམ་ལ་ང་ཚོ་བོད་དང་བོད་དོན་སྐྱབ་སྐྱོར་བ་བཅས་ཀྱིས་ཡིད་ཆེས་གནང་མི་འོས། རྒྱ་དམར་དྲག་པོའི་སྲིད་གཞུང་གིས་དེ་འདྲ་ཞིག་ཁྱབ་བསྒྲགས་བྱས་པ་དེས་ང་ཚོར་སེམས་འཚབས་ཆེ་རུ་བཏང་ཡོད། དེ་ལྟར་ཁྱབ་བསྒྲགས་དགོས་དོན་ནི་ཧ་ཅང་ཉེན་ཁའི་རང་བཞིན་ཡིན།
ངས་བཤད་འདོད་པ་ནི། ང་ཚོ་བོད་ཀྱི་བསྟན་པ་ཆབ་སྲིད་ཀྱི་ཆེད་དང་བོད་མི་རིགས་ཀྱི་བདེ་སྐྱིད་ཀྱི་ཆེད་དུ་ལུས་སྲོག་བློས་གཏོང་མཁན་གྱི་དཔའ་བོ་དང་དཔའ་མོ་རྣམས་ལ་གུས་འདུད་དང་། ཚེས་འདས་རྣམས་རིགས་དྲུག་སོ་སོའི་སྡུག་བསྔལ་ལས་གྲོལ་དེ་ཐར་བ་དང་ཐམས་ཅད་མཁྱེན་པའི་གོ་འཕང་མྱུར་དུ་ཐོབ་པ་དང་། ཚེ་དང་ལྡན་པ་རྣམས་ཀྱི་གནས་སྐབས་མི་འདོད་པའི་གདོན་བགེགས་ཐམས་ཅད་ཞི་ནས་ཚེའི་ལྷག་མ་གང་ཡོད་བདེ་སྐྱིད་ཕུན་སུམ་ཚོགས་པ་ཞིག་ཡོང་བའི་སྨོན་འདུན་ཞུ་རྒྱུ་དེ་ཡིན་ལགས།