ཨི་ཇིབ་ཀྱི་སྲིད་དབང་འཐབ་རྩོད་རྣོ་ངར་ཅན་དུ་གྱུར།

གཟའ་ཉི་མའི་ཉིན་ཨི་ཇིབ་སྲིད་འཛིན་གསར་པ་མཱོར་སེ་ཡིས་བར་བརྒལ་གཞུང་གི་ཆེས་མཐོའི་དམག་དོན་ལྷན་ཁང་དང་ཆེས་མཐོའི་ཁྲིམས་ཁང་གཉིས་ཀྱི་ཐག་གཅོད་སྣང་མེད་ཐོག དེ་སྔའི་ཨི་ཇིབ་གྲོས་ཚོགས་བསྐྱར་གསོ་བྱ་དགོས་པའི་བཀའ་ཁྱབ་བསྒྲགས་འདུག

ཕྱི་ཚེས་ ༨ ཉིན་ཨི་ཇིབ་སྲིད་འཛིན་གསར་པ་མཱོར་སེ་(Mohammed Morsi) ཡིས་དེ་སྔོན་བར་བརྒལ་དམག་མིའི་གཞུང་གིས་རྩོ་གཏོར་བཏང་ཟིན་པའི་གྲོས་ཚོགས་དེ་བསྐྱར་དུ་བསྡུ་སྐོང་བྱ་རྒྱུའི་བཀའ་རྒྱ་བཏང་ཡོད་ཅིང་། དེ་ནི་མཱོར་སེ་ཁོང་སྲིད་འཛིན་དུ་བསླེབས་རྗེས་ཐད་ཀར་བར་བརྒལ་དམག་མིའི་གཞུང་གི་ཐག་གཅོད་ལ་རྩིས་མེད་ཀྱི་བྱ་སྤྱོད་བཟུང་པ་དང་པོ་དེ་ཆགས་ཡོད་འདུག

ཁ་སང་ཕྱི་ཚེས་ ༩ ཉིན་ཨི་ཇིབ་བར་བརྒལ་གཞུང་གི་ཆེས་མཐོའི་དམག་དོན་ལྷན་ཁང་(The Supreme Council of the Armed Forces) དང་ཆེས་མཐོའི་ཁྲིམས་ཁང་གཉིས་ཀྱིས་སྲིད་འཛིན་མཱོར་སེའི་ཐག་གཅོད་ཐད་ཛ་དྲག་ཚོགས་འདུ་བསྐོངས་ཏེ། སྲིད་འཛིན་མཱོར་སེའི་ཐག་གཅོད་ལ་ངོས་ལེན་བྱས་མེད་པ་མ་ཟད། རྒྱལ་ཁོངས་ཚོགས་སྡེ་ཚང་མས་རྒྱལ་ཁབ་ཀྱི་ཁྲིམས་དང་རྩ་ཁྲིམས་ལ་གཙི་སྲུང་བྱ་དགོས་ཚུལ་བསྒྲགས་ཡོད་འདུག

བར་བརྒལ་དམག་མིའི་གཞུང་ནི་ཨི་ཇིབ་སྲིད་དབང་སྒེར་འཛིན་པ་མཱུ་བྷ་རག་མགོ་རྟིང་སློག་རྗེས་ཀྱི་བར་བརྒལ་སྲིད་གཞུང་ཞིག་དང་། ཆེས་མཐོའི་དམག་དོན་ལྷན་ཁང་ནི་དམག་མིའི་བར་བརྒལ་གཞུང་གི་དབང་འཛིན་ལྷན་ཁང་ཆགས་ཡོད།

ཉེ་སྔོན་སྲིད་འཛིན་འོས་བསྡུའི་གོང་དུ་བར་བརྒལ་གཞུང་གི་ཆེས་མཐོའི་དམག་དོན་ལྷན་ཁང་གིས་དེ་སྔོན་གྲོས་ཚོགས་འོས་བསྡུ་དེ་ཁྲིམས་མཐུན་བྱུང་མེད་སྐོར་བརྗོད་དེ་ཆེས་མཐོའི་ཁྲིམས་ཁང་དང་མཉམ་འབྲེལ་ཐོག་ཨི་ཇིབ་ཁ་ཆེ་སྤུན་ཟླ་ཚོགས་པའི་འཐུས་མིའི་གྲངས་འབོར་མང་ཤོས་ཟིན་པའི་གྲོས་ཚོགས་དེ་རྩ་གཏོར་བཏང་སྟེ། གཞུང་གི་དབང་ཤུགས་ཁོ་ཚོའི་སྟངས་འཛིན་འོག་གནས་ཐབས་བྱས་ཡོད་སྟབས། ཨི་ཇིབ་མི་མང་དང་རྒྱལ་སྤྱིའི་སྤྱི་ཚོགས་ཁྲོད་སྲིད་འཛིན་གསར་པ་འོས་འདེམས་བྱས་ཡོད་ཀྱང་དབང་ཆ་ཆེས་མཐོའི་དམག་དོན་ལྷག་ཁང་གི་སྟངས་འཛིན་འོག་གནས་སྲིད་པའི་དངངས་འཚབ་བྱེད་ཀྱི་ཡོད།

སྲིད་འཛིན་མཱོར་སེ་ཡི་བཀའ་ཁྱབ་ལྟར་དེ་རིང་ཕྱི་ཚེས་ ༡༠ ཉིན་གྲོས་ཚོགས་བསྡུ་སྐོང་བྱས་སྐབས། བར་བརྒལ་གཞུང་གིས་དམག་མི་འབོར་ཆེན་བཏང་སྟེ་གྲོས་ཚོགས་རཱ་བ་སྐོར་ཡོད་ཅིང་། སྐབས་དེར་ཡུལ་མི་སྟོང་ཕྲག་མང་པོ་གྲོས་ཚོགས་རཱ་བའི་མཐའ་ཁོར་དུ་འཛོམས་ཏེ་གྲོས་ཚོགས་ལ་སྲུང་སྐྱོབ་བྱས་ཡོད་པ་མ་ཟད། ཨི་ཇིབ་ཁ་ཆེ་སྤུན་ཟླ་ཚོགས་པས་མི་མང་ཁྲི་ཕྲག་མང་པོ་མཉམ་འཛོམ་གྱིས་སྲིད་འཛིན་གྱི་ཐག་གཅོད་ལ་རྒྱབ་སྐྱོར་དང་གྲོས་ཚོགས་བསྐྱར་གསོ་ཡོང་རྒྱུར་རམས་འདེགས་བྱ་དགོས་སྐོར་མང་ཚོགས་ལ་སྐུལ་སློང་བྱས་ཡོད་འདུག

ཨི་ཇིབ་སྲིད་འཛིན་དང་དམག་དོན་ལྷན་ཁང་བར་གྱི་རྩོད་ཉོག་ཐད་བྷེ་བྷེ་སེའི་གསར་འགོད་པ་ཇོན་ལཱའེ་ནེ་(Jon Leyne)ཡིས་བརྗོད་པ་ལྟར་ན། བདུན་ཕྲག་གཅིག་ལྷག་གི་གོང་སྲིད་འཛིན་གསར་པ་སྲིད་སྟེགས་སུ་བསླེབས་པ་ནས་ཨི་ཇིབ་ནང་གི་ཆབ་སྲིད་ཀྱི་རྙོག་གླེང་འཇམ་པ་ལྟ་བུའི་སྣང་ཚུལ་ཞིག་བྱུང་ཡོད་ཀྱང་། ཞི་འཇམ་གྱི་སྣང་ཚུལ་དེ་རྒྱུན་རིང་གནས་མ་ཐུབ་པར་གཟའ་ཉི་མིའི་ཉིན་སྲིད་འཛིན་གསར་པས་ཆེས་མཐོའི་དམག་དོན་ལྷན་ཁང་གི་ཐག་གཅོད་ལ་རྩིས་མེད་ཀྱིས་གྲོས་ཚོགས་བསྐྱར་གསོ་བྱ་དགོས་པའི་བཀའ་ཁྱབ་བཏང་རྗེས། བསྐྱར་དུ་དབང་ཤུགས་འཐབ་རྩོད་ཀྱི་མཁའ་དབུགས་རྣོ་ངར་ཅན་དུ་གྱུར་ཡོད་པ་དང་། ཆེས་མཐོའི་དམག་དོན་ལྷན་ཁང་གིས་སྲིད་འཛིན་མཱོར་སེ་ཡིས་ཁྲིམས་ལུགས་ལ་གཙི་སྲུང་བྱ་དགོས་པའི་ཉེན་བརྡ་བཏང་ཡོད་འདུག

ཐེངས་འདིར་མཱོར་སེ་ཡིས་ཆེས་མཐོའི་དམག་དོན་ལྷན་ཁང་དང་ཆེས་མཐོའི་ཁྲིམས་ཁང་གཉིས་ཀྱི་ཐག་གཅོད་རྩིས་མེད་བྱས་པ་དེས་ཕྱོགས་གཅིག་ནས་སྲིད་འཛིན་གྱིས་རང་གི་དབང་ཤུགས་ལ་རྩོད་ལེན་བྱས་པ་ཞིག་དང་། ཕྱོགས་གཞན་ཞིག་ནས་སྲིད་འཛིན་གསར་པ་དང་དམག་དོན་ལྷན་ཁང་པར་འགལ་ཟླ་འབྱུང་བའི་ཉེན་ཁ་ཞིག་འཕྲད་བཞིན་ཡོད་འདུག

སྲིད་འཛིན་གསར་པ་མཱོར་སེའི་མདུན་དུ་ལྷག་པའི་དཀའ་ངལ་ཁག་ནི། ཆེས་མཐོའི་དམག་དོན་ལྷན་ཁང་དང་དབང་ཆའི་འཐབ་རྩོད། གཉིས་པ་རྒྱལ་ཁོངས་ཆིག་སྒྲིལ་གྱི་དཀའ་ངལ། སྲིད་འཛིན་འོས་བསྡུའི་ཁྲོད་མི་མང་བརྒྱ་ཆ་ ༤༨ གྱིས་མཱུ་བྷ་རག་སྐབས་ཀྱི་སྲིད་བློན་ཤཱ་ཧྥེག་(Ahmed Shafiq) ལ་ཐོབ་པ་དེས་མི་མང་ས་ཡ་མང་པོས་མཱོར་སེ་ལ་རྒྱབ་སྐྱོར་མེད་པ་མཚོན་ཡོད། གསུམ་པ་ཨི་ཇིབ་ནང་གསར་བརྗེ་གྱེན་ལངས་བྱུང་རྗེས་ཡུལ་ཁྲིམས་འཐོར་ཏེ་རྐུན་མ་དང་ཇག་པ། ནག་ཚོང་རྒྱག་མཁན་མང་པའི་སྤྱི་ཚོགས་བདེ་འཇགས་ཀྱི་དཀའ་ངལ། བཞི་བ་ད་ཆར་ཨི་ཇིབ་ཀྱི་མི་འབོར་བརྒྱ་ཆ་  ༤༠ ཙམ་ཉམ་ཐག་(Below poverty line) ཡོད་སྟབས་དཔལ་འབྱོར་གྱི་དཀའ་ངལ། གཞན་ཨེ་ཛི་རལ་དང་ནུབ་ཕྱོགས་པར་ཕྱི་འབྲེལ་འཛུགས་རྒྱུ་སོགས་ཀྱི་དཀའ་ངལ་འཕྲད་བཞིན་ཡོད།