ནང་སྲིད་བཀའ་བློན་ཁེ་ཎ་ཌར་སྐྱོད།

ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཁེ་ཎ་ཌའི་ཕྱི་མི་གཞིས་སྤོ་བློན་ཆེན་གྱི་སློབ་སྟོན་པ་དང་མཇལ་འཕྲད་ཀྱིས། རྒྱ་གར་ཨ་རུ་ཎ་ཅལ་བོད་མིའི་གཞིས་སྤོའི་གནས་སྟངས་ཐོག་གྲོས་བསྡུར་གནང་འདུག

ཉེ་ལམ་༧གོང་ས་མཆོག་གི་སྐུའི་འཁྲུངས་སྐར་དང་བསྟུན་ཏེ་དབུས་བོད་མིའི་སྒྲིག་འཛུཊ་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཁེ་ཎ་ཌར་གཞུང་འབྲེལ་ཕྱོགས་སྐྱོད་གནང་ཡོད་ཅིང་། ཕྱི་ཚེས་ ༡༢ ཉིན་ཁེ་ཎ་ཌའི་ཕྱི་མི་གཞིས་སྤོ་ལྷན་ཁང་གི་བློན་ཆེན་ཁེ་ཐི་ལིན་ཝེལ་ (Kathleen Weil) མཆོག་གི་ཆབ་སྲིད་སློབ་སྟོན་པ་རྣམ་གཉིས་དང་མཇལ་འཕྲད་ཀྱིས། རྒྱ་གར་ཨ་རུ་ཎ་ཅལ་མངའ་སྡེའི་གཞིས་ཆགས་ཁག་ནས་བོད་མི་ ༡༠༠༠ ཙམ་ཁེ་ཎ་ཌར་གཞིས་སྤོ་བྱ་རྒྱུའི་ལས་གཞིའི་ཐོག་གྲོས་བསྡུར་གནང་ཡོད་ཅིང་། ཐེངས་འདིའི་མཇལ་འཕྲད་སྐབས་ཁེ་ཎ་ཌ་བོད་རིགས་ཚོགས་པའི་འགན་འཛིན་དང་ཚོགས་གཙོ། དེ་བཞིན་ཁུ་བྷིག་བོད་རིགས་སྤྱི་མཐུན་ཚོགས་པའི་རྒྱུན་ལས་བཅས་མཉམ་ཞུཊ་གནང་ཡོད་འདུག

ཕྱི་ཚེས་ ༡༡ ཉིན་གྲོང་ཁྱེར་མོན་ཊི་རེལ་ (Montreal) དུ་རྟེན་གཞི་བྱས་པའི་འཇམ་དབྱངས་ནང་པའི་ཆོས་ཚོགས་དུ་གཟིགས་སྐོར་དང་འབྲེལ། ས་གནས་དེའི་བོད་རིགས་མང་ཚོགས་བརྒྱ་སྐོར་ཞིག་ལ། རྒྱ་གར་ཨ་རུ་ཎ་ཅལ་ནས་ཁེ་ཎ་ཌར་བོད་མི་ཆིག་སྟོང་གཞིས་སྤོ་གནང་རྒྱུ་དང་དེར་ཁེ་ཎ་ཌར་གནས་སྡོད་བོད་མི་ཚོས་རོགས་རམ་གནང་ཕྱོགས། བོད་ནང་མེར་བསྲེགས་གཏོང་བཞིན་པའི་ཛ་དྲག་གནས་སྟངས། ད་ལོའི་ཕྱི་ཟླ་ ༨ པའི་ནང་༸གོང་ས་མཆོག་གིས་བོད་མིའི་ཆབ་སྲིད་འགན་དབང་རྩིས་སྤྲོད་དང་། བཀའ་ཁྲི་བློ་བཟང་སེང་གེ་མཆོག་གིས་ཆབ་སྲིད་ཐུགས་འགན་བཞེས་ཏེ་ལོ་གཅིག་ཧྲིལ་པོ་འཁོར་བ། ཕྱི་ཟླ་ ༩ པའི་ནང་བོད་གཞུང་དམངས་གཉིས་ཀྱིས་དམིགས་བསལ་ཚོཊ་ཆེན་བསྡུ་རྒྱུ། རྒྱ་གར་བཙན་བྱོལ་བོད་མིའི་གཞིས་ཆགས་ཁག་དང་ཕྱི་རྒྱལ་བོད་མིའི་ཚོགས་པ་ཁག་བར་མཐུན་ལམ་གོང་འཕེལ། ཕྱི་རྒྱལ་གནས་སྡོད་བོད་རིགས་ཚོགས་པ་ཁག་གིས་རྒྱ་གར་གནས་སྡོད་བོད་མི་ཚོར་དཔལ་འབྱོར་རོཊ་རམ་གནང་ཕྱོགས་ཐོག་གཏམ་བཤད་བཅས་སྤེལ་ཡོད་འདུག

སྐབས་འདི་དང་བསྟུན་ཏེ་དབུས་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ཀྱང་། དབྱིན་ཡུལ་རྒྱལ་ས་ལོན་ཊོན་ཝུལ་ཝི་ཆི་ (Woolwich ) ས་ཁུལ་དུ། ས་གནས་བོད་རིགས་མང་ཚོགས་ལ་འདས་པའི་ལོ་གཅིག་རིང་གི་བཀའ་ཤག་གི་ལས་བསྡོམས་དང་། བོད་ནང་རང་ལུས་མེར་བསྲེགས་གཏོང་བཞིན་པའི་ཛ་དྲག་གི་གནས་སྟངས་ངོ་སྤྲོད་བཅས་གནང་ཡོད་འདུག

གསར་འགོད་པ། དཔལ་ལྡན།