གཟའ་ལྷག་པའི་ཉིན་སེ་རི་ཡའི་རྒྱལ་སའི་ནང་འགད་རྫས་གཏོར་ཏེ། བྷ་ཤར་སྲིད་གཞུང་གི་བདེ་སྲུང་བློན་ཆེན་ཚུད་པའི་མཐོ་རིམ་དཔོན་རིགས་གསུམ་དམར་གསོད་བཏང་འདུག
ཕྱི་ཚེས་ ༡༨ ཉིན་སེ་རི་ཡའི་རྒྱལ་ས་ཌ་མཱ་སི་ཀ་སི་ (Damascus) ནང་གཞུང་གི་མཐོ་རིམ་དཔོན་རིགས་ཀྱི་བདེ་འཇགས་ཚོགས་ཆེན་འཚོགས་བཞིན་པའི་སྐབས་སུ་འགད་རྫས་གཏོར་ཏེ། བྷ་ཤར་སྲིད་གཞུང་གི་བདེ་སྲུང་བློན་ཆེན་རཱ་ཇི་ཧ་(Dawoud Rajha) དང་བདེ་སྲུང་བློན་ཆེན་གཞོན་པ་དམག་དཔོན་ཤཱཝ་ཀཱ་ཊེ་(Assef Shawkat)། བདེ་སྲུང་བློན་ཆེན་ཟུར་པ་ཧཱ་སན་(Hassan Turkmani) གསུམ་རྐྱེན་ལམ་དུ་བཏང་ཡོད་པ་མ་ཟད་མཐོ་རིམ་དཔོན་རིགས་གཞན་ཁག་ཅིག་ལའང་རྨས་སྐྱོན་བཟོས་ཡོད་འདུག
བདེ་སྲུང་བློན་ཆེན་རཱ་ཇི་ཧཱ་ནི་དམག་དཔོན་ཟུར་པ་དང་ད་ཆར་བྷ་ཤར་གྱི་རྒྱབ་དཔུང་གལ་ཆེས་ཤོས་ཤིག་ཡིན་པ་དང་། བདེ་སྲུང་བློན་ཆེན་གཞོན་པ་ཤཱཝ་ཀཱ་ཊེ་ནི་བྷ་ཤར་གྱི་གཅེན་མོའི་གཟའ་ཟླ་དང་བྷ་ཤར་ཤོག་ཁག་གི་མི་སྣ་གལ་ཆེན་གྲོས་ཤིག་ཡིན་འདུག
དོན་རྐྱེན་དེ་བྱུང་རྗེས་ཨ་རིའི་སྲིད་འཛིན་ཨོ་བྷ་མས་ཁ་པར་བརྒྱུད་རཱ་ཤཱི་ཡའི་སྲིད་འཛིན་པུ་ཊེན་ལ་གླེང་མོལ་སྐབས། སེ་རི་ཡའི་སྲིད་འཛིན་བྷ་ཤར་སྲིད་གཞུང་ནི་ལོ་རྒྱུས་ཀྱི་ལམ་ལོག་ཏུ་འགྲོ་བཞིན་ཡོད་པར་བརྟེན། རཱ་ཤཱི་ཡས་ཁོ་ཚོར་རྒྱབ་སྐྱོར་མི་བྱ་བའི་སྐུལ་འདེད་བྱས་ཡོད་པ་མ་ཟད། ཕོ་བྲང་དཀར་པོས་བསྒྲགས་གཏམ་ཞིག་སྤེལ་ཏེ། ཉིན་དེར་སེ་རི་ཡའི་རྒྱལ་སར་འཚོགས་བཞིན་པའི་ཚོགས་ཆེན་སྟེང་འབར་རྫས་གཏོར་པ་དེས་བྷ་ཤར་གྱི་དབང་ཤུགས་ཤོར་བཞིན་ཡོད་པའི་རྟགས་མཚན་ཞིག་ཡིན་ཚུལ་དང་། སེ་རི་ཡའི་ནང་གི་དྲག་གནོན་ཉིན་རེ་བཞིན་ཤུགས་ཆེ་རུ་འགྲོ་བཞིན་ཡོད་སྟབས། རྒྱལ་སྤྱིའི་ནང་གི་ཨ་རིའི་མཉམ་ལས་སྲིད་གཞུང་དག་ཆིག་སྒྲིལ་བྱས་ཏེ་བྷ་ཤར་སྲིད་གཞུང་ལ་འཕོ་འགྱུར་གཏོང་དགོས་པ་བརྗོད་འདུག
སེ་རི་ཡའི་གཞུང་གིས་ཉིན་དེའི་འགད་རྫས་གཏོར་བ་དང་གཞུང་གི་མཐོ་རིམ་དཔོན་རིགས་དམར་གསོད་བཏང་པའི་ཐད། ཨ་རབ་དང་ནུབ་ཕྱོགས་རྒྱལ་ཁབ་དག་ལ་འགན་ཡོད་པ་དང་། ཁོ་ཚོས་སེ་རི་ཡའི་ནང་གི་དྲག་སྤྱོད་པར་དངོས་ཤུགས་བརྒྱུད་གསུམ་ནས་རོགས་འདེགས་བྱས་པ་ལས་བྱུང་པ་ཞིག་ཡིན་པའི་སྐྱོན་བརྗོད་བྱས་ཡོད་འདུག
