རྒྱ་གར་གྱིས་འཛམ་གླིང་གི་མེ་འཁོར་ལྕགས་ལམ་མཐོ་ཤོས་འཛུགས་སྐྲུན་བྱ་འཆར་འདུག

རྒྱ་གར་གཞུང་གིས་རྒྱ་གར་གྱི་མངའ་སྡེ་ཧི་མ་ཅལ་གྱི་བྷི་ལ་སི་པོར་ (Bilaspur) ནས་ལ་དྭགས་ཀྱི་རྒྱལ་ས་གླེ་བར་མེ་འཁོར་ལྕགས་ལམ་འཛུགས་སྐྲུན་གྱི་ལས་འཆར་བསྒྲིགས་ཡོད་ཅིང་། དེ་ནི་འཛམ་གླིང་གི་ས་བབ་མཐོ་ཤོས་ཀྱི་མེ་འཁོར་ལྕགས་ལམ་ཞིག་ཏུ་འགྱུར་རྒྱུ་ཡིན་འདུག

དེ་འབྲེལ་རྒྱ་གར་གྱི་ (News24) གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་གྱི་ས་བབ་མཐོ་བའི་ཧི་མ་ལ་ཡའི་རི་རྒྱུད་ཁུལ་གྱི་མེ་འཁོར་ལྕགས་ལམ་དེའི་རིང་ཚད་ལ་སྤྱི་ལེ་ ༤༨༩ དང་ལྕགས་ལམ་གྱི་བརྒྱ་ཆ་ ༥༥ ཙམ་ས་འོག་ཕུག་ལམ་ཡིན་འདུག ལས་གཞི་དེའི་ཁྲོད་ཕུག་ལམ་ ༦༢ དང་ཟམ་ཆེན་ ༡༡༦ ། དེ་བཞིན།  མེ་འཁོར་འབབ་ཚིགས་ ༤༠ བཅས་འཛུགས་སྐྲུན་བྱ་འཆར་འདུག་པ་མ་ཟད། མེ་འཁོར་ལྕགས་ལམ་དེའི་ཆེད་འགྲོ་གྲོན་ཧིན་སྒོར་དུང་ཕྱུར་ ༡༣༡༠ ཡི་སྔོན་རྩིས་རྒྱག་གི་འདུག

མེ་འཁོར་ལྕགས་ལམ་གྱི་ལས་གཞི་དེ་ཧི་མ་ཅལ་གྱི་བྷི་ལ་སི་པོར་ (Bilaspur) ནས་མན་ཌི་དང་། དེ་ནས་མ་ན་ལི་བརྒྱུད་རོ་ཐང་དང་སྐྱིད་ལུང་། དར་ལྕོགས། གསེར་ཆུ། སྤང་། སྟག་གླང་ལ་བརྒྱུད་ནས་ལ་དྭགས་ཀྱི་རྒྱལ་ས་གླེ་བར་མཐུད་ཀྱི་ཡོད་ཅིང་། སྟག་གླང་ལའི་མཐོ་ཚད་ནི་མེ་ཊར་ ༥༣༥༩ ཡིན་སྟབས། དེ་སྔ་རྒྱ་ནག་གིས་འཛམ་གླིང་གི་ས་བབ་མཐོ་ཤོས་སུ་བགྲང་བཞིན་པའི་མཚོ་བོད་མེ་འཁོར་ལྕགས་ལམ་ཟེར་བ་ལས་ཀྱང་མེ་ཊར་  ༥༩ ལས་མཐོ་བ་ཡོད་འདུག་ལ། ཧི་མ་ཅལ་ནས་ལ་དྭགས་བར་གྱི་མེ་འཁོར་ལྕགས་ལམ་གྱི་ལས་གཞི་དེས་རྒྱ་གར་གྱི་མངའ་ཁོངས་ཧི་མ་ལ་ཡའི་རི་རྒྱུད་ཀྱི་ས་ཁུལ་ཁུག་གྱོག་མང་དག་ཅིག་ཐོག་མར་འབྲེལ་མཐུད་བྱེད་ཀྱི་ཡོད་འདུག་ལ། ད་ལྟ་མེ་འཁོར་ལྕགས་ལམ་གྱི་ལས་གཞིའི་འཆར་འགོད་དེར་རྒྱ་གར་དབུས་རྒྱལ་སྲུང་ལྷན་ཁང་གིས་ཞིབ་འཇུག་གནང་མུས་ཡིན་ཞིང་། མཐའ་མའི་བཀའ་འཁྲོལ་གཏན་འབེབས་ཟིན་རྗེས་དངོས་སུ་ལག་བསྟར་བྱ་འཆར་འདུག

ཡང་གནས་ཚུལ་ནང་། ནམ་རྒྱུན་རྒྱ་གར་གྱི་རྒྱལ་ས་ལྡི་ལི་ནས་ལ་དྭགས་ཀྱི་རྒྱལ་སའི་བར་གཞུང་ལམ་བརྒྱུད་ནས་ཆུ་ཚོད་ ༤༠ ཙམ་གྱི་རིང་འགྲུལ་བཞུད་བྱེད་དགོས་ཀྱི་ཡོད་ཀྱང་། མེ་འཁོར་ལམ་གསར་འཛུགས་ལ་བརྟེན་ནས་ཆུ་ཚུད་ ༢༠ ཙམ་ལས་འགོར་གྱི་མེད་པ་དང་། མེ་འཁོར་ལྕགས་ལམ་དེ་ས་བབ་མཐོ་བའི་རི་རྒྱུད་དུ་ཁེལ་ཡོད་སྟབས། མེ་འཁོར་ནང་སྲོག་རླུང་དང་གྲང་ངར་ཆེ་བའི་གནམ་གཤིས་ལ་གདོང་ལེན་ཐུབ་པའི་མཐུན་རྐྱེན་བསྐྲུན་ནས་མི་མང་ལ་འགྲུལ་བཞུད་བདེ་འཇགས་དང་སྟབས་བདེ་བསྐྲུན་རྒྱུ་མ་ཟད། ས་བབ་མཐོ་བའི་ལ་དྭགས་ཁུལ་དུ་བགྲོད་ལམ་གསར་མཐུད་དང་ཡུལ་སྐོར་བ་དང་ཐབས་ཇུས་ཀྱི་སྟོབས་ཤུགས་རྒྱ་སྐྱེད་གཏོང་བར་གལ་གནད་ཆེན་པོ་ཆགས་ཀྱི་ཡོད་སྐོར་སོགས་བརྗོད་འདུག

གསར་འགོད་པ། སྐལ་བཟང་སྦྱིན་པ།