དོ་ནུབ་དབྱིན་ཡུལ་གྱི་ཆུ་ཚོད་ ༩ པའི་སྟེང་རྒྱལ་ས་ལོན་ཌོན་དུ་འདི་ལོའི་རྒྱལ་སྤྱིའི་ཨོ་རྩེད་འགྲན་ཚོགས་ཀྱི་དབུ་འབྱེད་མཛད་སྒོ་དངོས་སུ་དབུ་འབྱེད་གནང་རྒྱུ་རེད།
ཟླ་འདིའི་ཕྱི་ཚེས་ ༢༧ ཉིན་གྱི་དགོང་མོའི་དབྱིན་ཡུལ་གྱི་ཆུ་ཚོད་ ༩ སྟེང་། ༢༠༡༢ ལོའི་འཛམ་གླིང་ཨོ་རྩེད་འགྲན་ཚོགས་(Olympic games )ཐེངས་ ༣༠ པ་དེ་དབྱིན་ཡུལ་རྒྱལ་ས་ལན་ཌོན་དུ་དངོས་སུ་དབུ་འབྱེད་བྱ་རྒྱུ་ཡིན་པ་དང་། ཟླ་འགའི་གོང་འཛམ་གླིང་ཨོ་རྩེད་དཔལ་འབར་དེ་གྷི་རེ་སི་(Greece)ནས་མགོ་འཛུགས་ཀྱིས་རྒྱལ་ཁབ་དང་གྲོང་ཁྱེར། ས་གནས་ཁག་བརྒྱ་ཕྲག་ནང་སྐོར་སྐྱོད་ཀྱིས་དབྱིན་ཡུལ་རྒྱལ་ས་ལོན་ཌོན་དུ་འབྱོར་ཡོད་པ་དང་། དོ་ནུབ་དབྱིན་ཡུལ་གྱི་ཆུ་ཚོད་ ༩ སྟེང་ཨོ་རྩེད་གླིང་གའི་དཔལ་འབར་སྟེགས་བུའི་སྟེང་གི་མཆོད་གོང་ནང་མེ་ལྕེ་སྒྲོན་པ་དང་དུས་མཉམ། དབྱིན་ཇིའི་རྒྱལ་མོ་སྐུ་ཕྲེང་གཉིས་པ་ (Elizabeth II Alexandra Mary)མཆོག་གིས་རྒྱལ་སྤྱིའི་ཨོ་ལིམ་ཕིག་ལུས་རྩེད་འགྲན་ཚོགས་ཐེངས་ ༣༠ པ་དངོས་སུ་དབུ་འབྱེད་གནང་བའི་ཁྱབ་བསྒྲགས་གཏམ་བཤད་བྱ་རྒྱུ་ཡིན་འདུག
འཛམ་གླིང་ཨོ་རྩེད་དངོས་སུ་དབུ་འབྱེད་ཁྱབ་བསྒྲགས་བྱས་རྗེས་དབྱིན་ཇིའི་རིག་གཞུང་རང་བཞིན་གྱི་འཁྲབ་སྟོན་དང་རོལ་དབྱངས་སྣ་ཚོགས་འཁྲབ་སྟོན་གྲུབ་མཚམས་སུ། ཨོ་རྩེད་འགྲན་ཚོགས་ཀྱི་ཕ་ཡུལ་གྷི་རེ་སི་སྣེ་དྲངས་ཏེ། རྩེད་འགྲན་ཁྲོད་མཉམ་ཞུགས་བྱེད་མཁན་འཛམ་གླིང་རྒྱལ་ཁབ་ཁག་གི་སྐུ་ཚབ་དབྱིན་ཡིག་གི་གསལ་བྱེད་ཨང་རིམ་ལྟར་ཨོ་རྩེད་གླིང་གའི་ཐང་ཆེན་དུ་སོ་སོའི་རྒྱལ་ཁབ་ཀྱི་རྒྱལ་དར་འཕྱར་ཏེ་རུ་བསྒྲིག་རྒྱུ་ཡིན་པ་དང་། ཐེངས་འདིའི་ཨོ་རྩེད་འགྲན་ཚོགས་ནང་རྒྱལ་ཁབ་ ༢༠༤ ནས་རྩེད་འགྲན་པ་ ༡༠༠༠༠ ལྷག་མཉམ་ཞུགས་བྱས་ཡོད་འདུག
ད་ལོའི་དབྱིན་ཡུལ་ཨོ་རྩེད་འགྲན་ཚོགས་སྟེང་། རྒྱལ་ཁབ་ཁག་འདྲ་མིན་གྱི་བརྙན་འཕྲིན་ཁང་ ༢༨༠༠ ཙམ་དང་གསར་འགོད་པ་ ༢༠༠༠༠ ལྷག་འབྱོར་ཏེ་ཐོ་འགོད་བྱས་ཡོད་པ་དང་། བརྒྱུད་ལམ་འདྲ་མིན་བརྒྱུད་འཛམ་གླིང་མི་མང་ཐེར་འབུལ་ ༤ ཙམ་ལ་གཟིགས་འབུལ་ཞུ་ཐུབ་པར་ཚོད་དཔག་བྱེད་ཀྱི་ཡོད་འདུག
རྩེད་རིགས་ཆེད་མཁས་པ་དག་གིས། འདི་ལོའི་ཨོ་རྩེད་འགྲན་ཚོགས་ཀྱི་རྩེ་ཕུལ་གསེར་གྱི་རྟགས་མ་གཙོ་བོ་ཨ་རི་དང་རྒྱ་ནག རཱ་ཤི་ཡ་གསུམ་གྱི་བར་འགྲན་རྩོད་ཆེན་པོ་ཡོང་རྒྱུ་ཡིན་པ་དང་། རྩེད་འགྲན་ཚོགས་ཡུལ་གྱི་ཆ་ནས་དབྱིན་ཡུལ་གོང་གི་རྒྱལ་ཁབ་གསུམ་གྱི་གྲས་སུ་ཚུད་ཐུབ་པའི་རེ་བ་ཆེན་པོ་ཡོད་ཚུལ་ཚོད་དཔག་བྱེད་ཀྱིན་ཡོད།
དབྱིན་ཡུལ་དུ་འཚོགས་བཞིན་པའི་ཨོ་རྩེད་འགྲན་ཚོགས་ཀྱི་བྱུང་སོང་དངུལ་རྩིས་ཐད། དབྱིན་ཇིའི་སྲིད་བློན་ཌ་ཝེ་ཌི་ལགས་ཀྱིས་ “འདི་ལོའི་ཨོ་རྩེད་ཀྱི་སྤྱིའི་འགྲོ་གྲོན་དབྱིན་སྒོར་ཐེར་འབུམ་ ༩ ཙམ་གནས་ཀྱི་ཡོད་ཀྱང་། ཨོ་རྩེད་ལས་དབྱིན་ཡུལ་ལ་དབྱིན་སྒོར་ཐེར་འབུམ་ ༡༣ ཙམ་གྱི་ཁེ་བཟང་འཐོབ་རྒྱུ་ཡིན་པར་ཚོད་དཔག་བྱེད་ཀྱི་ཡོད་”ཅེས་བརྗོད་འདུག
ད་ལྟ་མུ་མཐུད་བཞིན་པའི་དེང་རབས་ཨོ་རྩེད་འགྲན་ཚོགས་འདི་ནི་ཕྱི་ལོ་ ༡༨༩༦ བསྐྱར་འཛུགས་བྱས་པ་ཞིག་ཡིན་ཞིང་། དེ་ནི་ཐོག་མར་ཕྱི་ལོ་ ༣༩༤ ལོར་གནའ་བོའི་རྒྱལ་ཁབ་གྷི་རེ་སིའི་ཨོ་རྩེད་འགྲན་ཚོགས་བར་མཚམས་ཆད་དེ། ལོ་ངོ་ ༡༥༠༠ ལྷག་ཕྱིན་པའི་རྗེས་སུ་བསྐྱར་གསོ་བྱུང་པ་ཞིག་དང་། ཐེངས་འདི་ནི་དབྱིན་ཡུལ་དུ་ཚོགས་ཐེངས་གསུམ་པ་དེ་ཆགས་ཡོད་འདུག
མཛད་སྒོ་དབུ་འབྱེད་ཀྱི་དུས་ཚོད་ཏག་ཏག་ནི། དབྱིན་ཡུལ་གྱི་ཕྱི་ཚེས་ ༢༧ ཉིན་གྱི་དགོང་དྲོའི་ཆུ་ཚོད་ ༩ པ། རྒྱ་གར་གྱི་ཕྱི་ཚེས་ ༢༧ ཉིན་གྱི་མཚན་རྒྱབ་ཆུ་ཚོད་ ༡།༣༠ པ། བོད་ནང་ཕྱི་ཚེས་ ༢༨ ཉིན་གྱི་ཐོ་རངས་ཆུ་ཚོད་ ༤ པ།
གསར་འགོད་པ། བནྡེ་སྐྱབས།
དྲྭ་གྲོགས་ཚོས་འོ་རྩེད་འགྲན་བསྡུར་ཐད་གཏོང་བྱེད་སའི་དྲྭ་བྱང་ཤེས་ན་འདིར་མཆན་དུ་འགོད་རོགས།
ལྟད་མོ་ངོ་མཚར་ཆེ། འགྲན་རྩོད་འཇིགས་སྣང་ཆེ། རྒྱལ་ཕམ་སེམས་ཁུར་ཆེ། ཆེ་བ་རྣམ་གསུམ་ཡིན།
ཆུང་བ་རྣམ་གསུམ་གང།
བོད་རིགས་བུ་མོ་ཨེ་མ་སྒྲོལ་མ་གཡུ་ཐོགས་ལགས་ཀྱང་ཨོ་སི་ཊོ་ལི་ཡའི་རྒྱལ་ཡོངས་མིག་མངས་རྩེད་འགྲན་རུ་མིའི་ནང་དུ་བདམས་ཐོན་གྱིས། ལོན་ཊོན་ཨོ་རྩེད་ལ་ཞུགས་བཞིན་ཡོད་ཚོད་འདུག
༼ བོད་པའི་བུ་མོ་གཉིས་མཐོང་ཨེ་བྱུང ༽
བགྲང་བྱ་ ༡༦༡༨ ལྷག་གི་ལོ་རྒྱུས་ལྡན་པའི་ཨོ་ལིམ་པིག་རྩེད་འགྲན་ཟེར་བ་འདིར། བོད་དང་བོད་མི་ཚོར་འབྲེལ་བ་ཙམ་ཡང་མེད་པར་མི་ངོ་ ༡༦༡༨ ཙམ་ཕྱིན། དེ་རིང་གཞི་ནས་འབྲེལ་བ་མེད་པ་ནས་ཡོད་པ་དང་། ཡོད་པ་ནས་སྤོབས་པ་དང་། རེ་བ་ཆེན་པོ་བྱེད་ཆོག་པའི་དུས་ཚོད་ཅིག་ཤར།
དེ་ནི་ད་ལོའི་ལོན་ཌོན་ཨོ་རྩེད་འགྲན་ཚོགས་ཀྱི་འདུར་རྒྱུགས་རྩེད་འགྲན་ཁྲོད་ཕ་ཡུལ་མཚོ་སྔོན་འདབ་བཞི་ནས་ཡིན་པའི་བོད་པའི་བུ་མོ་ཆོས་དབྱངས་སྐྱིད་མཉམ་ཞུགས་བྱེད་ཀྱི་ཡོད་ལ། གྱད་རྩལ་འཇུ་རེས་རྩེད་འགྲན་ཁྲོད་ཕ་ཡུལ་གོང་པོ་ཉིང་ཁྲི་ནས་ཡིན་པའི་བུ་མོ་ཤི་ལོག་སྒྲོལ་མ་མཉམ་ཞུགས་བྱེད་ཀྱི་ཡོད།
འོན་ཀྱང་རེ་དོགས་གཞན་ཞིག་ཡོད་པ་ནི། ཁོང་མོ་གཉིས་ཐེངས་འདིའི་རྩེད་འགྲན་ནང་ཞུགས་རྒྱུའི་ནུས་པ་དང་ཆ་རྐྱེན་ཚང་མ་འཛོམས་ཡོད་པ་མ་ཟད། དེ་སྔོན་རྒྱ་ནག་གི་ཞིང་ཆེན་རིམ་པའི་འདེམ་སྒྲུག་སྐབས་ལེགས་འདེམས་བྱུང་ཡོད། འོན་ཀྱང་དེ་རིང་དངོས་སུ་ལོན་ཌོན་རྩེད་འགྲན་སྟེང་ཞུགས་པར་རྒྱ་གཞུང་གིས་བར་ཆད་འདྲ་བཟོས་ཨེ་ཡོད།
གནས་ཚང་རྒྱ་གར་ལ་གསར་གྱི་རྟགས་མ་མང་དུ་འཐོབ་པར་ཤོག
ཨ་རིས་རྒྱ་ནག་གི་ཁ་གཏད་བཅོག་པར་ཤོག
ཡོ་རོབ་ཕྱོགས་ལའང་རྒྱལ་ཁའི་རྟགས་མ་མང་ཙམ་ཐོབ་ནས་རྒྱ་ནག་ལ་འཇིགས་པའི་འགྲན་སེམས་སློང་ཐུབ་པར་ཤོག