བོད་ཡིག་བོད་སྐད་འཚོལ་མཁན་གྱི་བོད་ཕྲུག་སྐོར་ཞིག

ངྷ་སྟེང་བོད་ཁྱིམ་སློབ་གྲྭར་ཕྱི་རྒྱལ་ཁག་ ༦ ནས་རང་ལོ་ ༨ ནས་༡༩ བར་གྱི་བོད་ཕྲུག་ ༦༦ ཙམ་ལ། བོད་ཡིག་བོད་སྐད་གཙོས་པའི་བོད་ཀྱི་ལོ་རྒྱུས་དང་རང་བྱུང་ཁོར་ཡུག་ངོ་སྤྲོད། རིག་གཞུང་མྱོང་གོམས་སོགས་ཀྱི་དབྱར་ནང་གི་ལས་རིམ་ཞིག་འགྲོ་བཞིན་ཡོད།

ངྷ་སྟེང་བོད་ཕྲུག་ཁྱིམ་སྡེའི་གོ་སྒྲིག་འོག ད་ལོའི་ཕྱི་ཟླ་ ༧ ཚེས་ ༣ ནས་ཕྱི་ཟླ་ ༨ ཚེས་ ༨ བར་ངྷ་སྟེང་བོད་ཕྲུག་ཁྱིམ་སྡེའི་སློབ་གྲྭའི་ནང་། ཕྱི་རྒྱལ་ཁག་ཏུ་འཚར་ལོངས་འབྱུང་བཞིན་པའི་བོད་རིགས་བྱིས་པ་ཚོར་བོད་ཡིག་བོད་སྐད་དང་། བོད་པའི་ཡུལ་སྲོལ་གོམས་གཤིས་ངོ་སྤྲོད་ཀྱི་དབྱར་ནང་གི་ལས་རིམ་ཞིག་འཚོགས་བཞིན་ཡོད་ཅིང་། ལས་རིམ་སྐབས་བོད་ཡིག་དང་ལོ་རྒྱུས། བོད་ཀྱི་སྣོད་བཅུད་ཆགས་ཚུལ། ནང་ཆོས་ངོ་སྤྲོད། རྒྱ་ནག་གིས་བོད་བཙན་འཛུལ་བྱས་པའི་ལོ་རྒྱུས་ངོ་སྤྲོད། བོད་ཀྱི་སྲོལ་རྒྱུན་གླུ་གཞས་དང་། བོད་ཀྱི་དུས་ཆེན་ཁག དབུས་བོད་མིའི་སྒྲིག་འཛུགས་དང་གཞུང་འབྲེལ་མིན་པའི་ཚོགས་སྡེ་ཁག་ངོ་སྤྲོད། ཆེད་མཁས་མི་སྣའི་གསུང་བཤད་དང་། ངྷ་སའི་ཉེ་འཁོར་གྱི་སློབ་གྲྭ་དང་དགོན་སྡེ། རིག་གཞུང་ལྟེ་གནས་ཁག་ཅིག་ལ་གཟིགས་སྐོར། ༧གོང་ས་མཆོག་གི་དམིགས་བསལ་མཇལ་ཁ་སོགས་ཀྱི་ལས་རིམ་ཡོད་འདུག 

འདི་ལོའི་དབྱར་ནང་གི་ལས་རིམ་ནང་ཨ་རི་ནས་བོད་ཕྲུག་ ༤༠ དང་། སི་སུད་ནས་ ༡༥ ། ཁཱེ་ན་ཌ་ནས་ ༦ ། ནེ་ཐཱར་ལན་ཌི་ནས་ ༣ ། ཧྥ་རན་སི་ནས་ ༡ ། ཨོ་སི་ཊི་ལི་ཡ་ནས་ ༡ བཅས་རྒྱལ་ཁབ་ ༦ ནས་རང་ལོ་ ༨ ནས་ ༡༩ བར་གྱི་བོད་ཕྲུག་གྲངས་ ༦༦ ཙམ་འཛུལ་ཞུགས་བྱས་ཡོད་པ་དང་། སློབ་ཕྲུག་དེ་དག་གིས་སོ་སོའི་ས་གནས་བོད་རིགས་སྤྱི་མཐུན་ཚོགས་པ་དང་སྐུ་ཚབ་དོན་གཅོད་སོགས་བརྒྱུད་ཐོ་འགོད་བྱས་ཡོད་འདུག ལས་རིམ་འདིའི་ནང་འཛུལ་ཞུགས་བྱ་རྒྱུར་ཆ་རྐྱེན་གསུམ་ཚང་དགོས་པ་ནི། གཅིག བོད་རིགས་ཡིན་པའི་དཔང་རྟགས་སུ་བཙན་བྱོལ་བོད་མིའི་དང་བླངས་དཔྱ་དངུལ་ལག་དེབ་ཡོད་པ། གཉིས། ལོ་ ༡༠ ནས་ ༡༨ བར་ཡིན་པ་(ཐེངས་འདིར་ལ་ ༨ ནས་ ༡༩ བར་ཡང་འདུག )། གསུམ། སློབ་མ་རེར་འགྲོ་གྲོན་ཆེད་གོ་སྒྲིག་ཚོགས་ཆུང་ལ་ཨ་སྒོར་ ༣༥༠ འབུལ་དགོས་པ་བཅས་ཡིན་འདུག

དབྱར་ནང་གི་ལས་རིམ་འདི་ཐོག་མར་ ༢༠༠༠ ལོ་ཙམ་ནས་ཕྱི་རྒྱལ་ཁག་གི་བོད་ཕྲུག་གཅིག་གཉིས་རེ་བོད་ཁྱིམ་དུ་གོང་སེང་ལ་བླངས་ཏེ་བོད་ཡིག་བསླབ་པ་སོགས་བྱས་ཞིང་། ༢༠༠༥ ལོ་ཙམ་ནས་སློབ་ཕྲག་མང་དུ་ཕྱིན་རྗེས་ ༢༠༠༨ ལོ་ནས་དངོས་སུ་ད་ལྟའི་ལས་རིམ་འདི་མགོ་འཛུགས་བྱས་པ་ཞིག་དང་། ལོ་དེར་ཨ་རི་དང་སུད་སི། འཇར་མན་གསུམ་ནས་བོད་རིགས་སློབ་ཕྲུག་ ༢༩ ཡོང་པ་ནས་བཟུང་། ད་ལོའི་བར་རྒྱལ་ཁབ་ ༡༢ ནས་བོད་ཕྲུག་ ༢༩༠ ཙམ་འཛུལ་ཞུགས་བྱས་འདུག

དཔལ་མོ། ལོ་ ༡༦། འཛིན་རིམ་ ༡༢། ཨ་རི།

 དཔལ་མོ་ནི་བོད་རིགས་བུད་མེད་ཡེ་ཤེས་ཆོས་སྒྲོན་དང་ཨ་རི་བ་ཌོན་ཧྥར་བྷར་(Donfarber) གཉིས་གཉེན་སྒྲིག་བྱས་རྗེས་ཨ་རིར་སྐྱེས་ཡོད་ཅིང་། ཁོང་མོས་བོད་སྐད་སྒྲ་གདངས་དེ་ཙམ་དག་པོ་མེད་ཀྱང་གོ་བརྡ་སྤྲོད་ཐུབ་པ་ཞིག་བཤད་ཐུབ་ཀྱི་འདུག ཁོང་གིས་ “ང་རང་གིས་ཕ་མ་གཉིས་ལ་ད་ལོའི་དབྱར་ནང་གི་ལས་རིམ་ནང་བོད་སྐད་བོད་ཡིག་སྦྱོང་རྒྱུར་འགྲོ་འདོད་ཡོད་ཅེས་བཤད་པར་ཕ་མ་གཉིས་ཀྱིས་མོས་མཐུན་བྱས་སོང་། ང་རང་འགྲོ་སའི་སློབ་གྲྭ་དེར་སློབ་ཕྲུག་ ༤༠༠༠ ཙམ་ཡོད་པའི་ནང་ཕལ་ཆེར་ང་རང་གཅིག་པུ་ལས་བོད་རིགས་བྱིས་པ་མི་འདུག ང་ཚོའི་ནང་དུ་ཡང་བོད་སྐད་ཤོད་ཀྱི་མེད་དུས། ངས་བོད་སྐད་བོད་ཡིག་ཡག་པོ་ཤེས་ཀྱི་མེད་ཀྱང་སྦྱང་འདོད་ཆེན་པོ་ཡོད” ཅེས་བརྗོད་བྱུང་།

རིན་ཆེན་སྒྲོལ་མ། ལོ་ ༡༥། འཛིན་རིམ་ ༡༡། ཨ་རི།

རིན་ཆེན་སྒྲོལ་མ་ཨ་རིར་སྐྱེས་ཡོད་ཅིང་། ཁོང་གི་ཕ་མ་གཉིས་བོད་རིགས་ཡིན་པ་དང་། ཨ་ཕའི་མིང་ལ་ཨོ་རྒྱན་ཉི་མ་དང་། ཨ་མའི་མིང་ལ་བདེ་སྐྱིད་མཚོ་མོ་ཡིན་འདུག རིན་ཆེན་སྒྲོལ་མ་ཁོང་ཨ་རིར་ཡོད་པའི་གཟའ་ཉི་མའི་བོད་ཡིག་འཛིན་གྲྭར་སློབ་ཞུགས་བྱས་མྱོང་ཡོད་པ་མ་ཟད། ཐེངས་འདིར་ཡང་མོ་རང་ཉིད་ཀྱི་ཐག་གཅོད་ལྟར་ལས་རིམ་འདིའི་ནང་འཛུལ་ཞུགས་བྱས་ཤིང་། དམིགས་ཡུལ་ཕྱི་ལུགས་སྨན་པ་བྱ་རྒྱུ་དེ་ཡིན་ཟེར། ཁོང་གིས་ “དུས་རྒྱུན་ཕ་མ་གཉིས་ཀྱིས། ང་རང་གང་དུ་སྐྱེས་ཡོད་ཀྱང་རང་ཉིད་བོད་པ་ཞིག་ཡིན་སྟབས། བོད་སྐད་བོད་ཡིག་ཤེས་དགོས་པ་དང་། མི་གཞན་གྱིས་རང་ཉིད་ལ་བོད་པའི་སྐོར་སྐད་ཆ་འདྲི་སྐབས་འགྲེལ་བཤད་ཏག་ཏག་རྒྱག་ཐུབ་པ་ཞིག་དགོས་པ་རེད་ཟེར་ནས་བསླབ་བྱ་རྒྱག་གི་རེད་”ཟེར།

སྐལ་བཟང་ཕུན་ཚོགས། ལོ་ ༡༧། འཛིན་རིམ་ ༡༢།  ཁེ་ན་ཌ།

སྐལ་བཟང་ཕུན་ཚོགས་ནི་ཕ་རྡོ་རྗེ་དང་མ་བསྟན་འཛིན་ལྷ་སྐྱིད་གཉིས་སུ་ངྷ་སར་སྐྱེས་ཤིང་། ༢༠༠༣ ལོར་ཨ་རིར་ཕྱིན་ཡོད་པ་དང་། ༢༠༠༦ ལོར་ཕྱིར་ངྷ་སར་ཡོང་སྟེ་ཟླ་གཉིས་ཙམ་རིང་ཉི་མ་སློབ་གྲྭ་ནས་བོད་ཡིག་སྦྱངས་ཡོད་ཅིང་། ༢༠༠༩ ལོར་ཕ་མའི་འགྲོ་གྲོན་བཏང་སྟེ་ལས་རིམ་འདིའི་ནང་འཛུལ་ཞུགས་བྱས་འདུག ཐེངས་འདིའི་འགྲོ་གྲོན་སོ་སོས་སློབ་ཞོར་ལས་ཀ་བྱས་ཏེ་དངུལ་ཕྲན་བུ་གསོགས་ཡོད་པ་དེ་བཏང་ནས་ཡོང་བ་ཡིན་ཟེར། ཁོང་གིས་ “ངས་ཕ་མ་གཉིས་ལ་ནང་ནས་བོད་སྐད་བཤད་རོགས་ལབ་ཀྱི་ཡོད། འདིར་ཡོང་སྐབས་ལས་རིམ་ནང་འཛུལ་ཞུགས་བྱེད་མཁན་ཕལ་ཆེ་བས་བོད་སྐད་བཤད་ཤེས་ཀྱི་མེད་པ་མཐོང་སྐབས། ཕར་ཕྱོགས་ནས་རྒྱ་ནག་གིས་རྩ་མེད་བཟོས། ཚུར་ཕྱོགས་ནས་བོད་ཕྲུག་ཚོས་རང་སྐད་མ་ཤེས་པ་འདིས་བོད་ཀྱི་སྐད་ཡིག་ཁྱབ་ཚད་ཆུང་དུ་འགྲོ་ཡི་ཡོད་པའི་ཚོར་སྣང་དང་སེམས་འཚབ་བྱུང་”ཞེས་བརྗོད་བྱུང་།

བསྟན་འཛིན་དབང་ཕྱུག ལོ་ ༡༣། འཛིན་རིམ་ ༨། ཨོ་སི་ཊི་ལི་ཡ།

བསྟན་འཛིན་དབང་ཕྱུག་ཉི་ཧོང་ནས་སྐྱེས་ཤིང་། རྗེས་སུ་ཨ་མ་ཚེ་རིང་སྐྱིད་དང་ལྷན་དུ་ཨོ་སི་ཊི་ལི་ཡར་གནས་སྤོར་བྱས་འདུག ཁོང་གི་ཕ་ཉི་ཧོང་དོན་གཅོད་ལྷག་པ་མཚོ་སྒོ་ལགས་ཡིན་པ་དང་། ཁོས་བོད་སྐད་ཕྲན་བུ་ཞིག་ལས་བཤད་ཐུབ་ཀྱི་མེད་སྟབས་དབྱིན་སྐད་ནང་འདྲི་བ་དྲིས་ལན་བྱས་པ་ཡིན། ཁོང་གིས་ “ང་འདིར་བསླེབས་རྗེས་རང་ཉིད་སོ་སོའི་རིགས་ཀྱི་མི་དག་དང་འཕྲད་པའི་ཚོར་སྣང་བྱུང་། ནང་དུ་ཕ་མས་དབྱིན་སྐད་རྒྱག་གི་ཡོད་པས་ངས་བོད་སྐད་ཡག་པོ་ཤེས་ཀྱི་མེད། འོན་ཀྱང་། སྤུན་མཆེད་ཅིག་གིས་ཡོད་ཡིག་ཤེས་ཀྱི་ཡོད་པ་དེས་ང་ལ་བོད་ཡིག་སྦྱང་འདོད་ཀྱི་ཤུགས་རྐྱེན་བསླེབས་པ་རེད་”ཟེར།

བསྟན་འཛིན་ཚེ་རིང་། ལོ་ ༡༤། འཛིན་རིམ་ ༩། ནེ་ཐར་ལན་ཌི།

བསྟན་འཛིན་ཚེ་རིང་ནི་ནེ་ཐར་ལན་ཌིར་ཕ་ཚུལ་ཁྲིམས་རིན་ཆེན་རྡོ་རྗེ་དང་མ་ནེལ་རྗཱེ་(Neeltje Weinan) གཉིས་ཀྱི་བུར་སྐྱེས་ཤིང་། ལོ་སྔོན་མར་ཁོང་ལས་རིམ་འདིར་ཞུགས་ཡོད་པ་མ་ཟད། ཐེངས་འདིར་ཁོང་གིས་ནུ་མོ་ཆུང་ཆུང་གཉིས་ཁྲིད་དེ་ཡོང་འདུག ཁོང་ལ་མི་གཞན་ཞིག་གིས་ཁྱེད་ལ་བོད་པའི་སྐོར་སྐད་ཆ་དྲིས་ཚེ་ལན་གང་འདྲ་རྒྱག་ངེས་ཞེས་དྲིས་པར་ཁོང་གིས། “ངས་བོད་ནི་རང་བཙན་རྒྱལ་ཁབ་ཅིག་རེད། ༡༩༥༩ ལོར་རྒྱ་ནག་གིས་བཙན་འཛུལ་བྱས་རྗེས། བོད་པ་མང་པོ་ཕྱི་རྒྱལ་ཁག་ནང་བྲོས་བྱོལ་དུ་ཡོང་ཡོད་ཀྱང་། ད་དུང་བོད་པ་མང་པོ་བོད་ནང་དུ་ཡོད་པ་རེད། དེང་སྐབས་བོད་པ་མང་པོས་རང་ལུས་མེ་བསྲེགས་ཀྱིས་རྒྱ་གཞུང་ལ་ངོ་རྒོལ་བྱེད་ཀྱི་ཡོད་རེད་ཅེས་བཤད་ངེས་ཡིན་”ཟེར།

སྐལ་བཟང་བདེ་སྐྱིད། ལོ་ ༡༨། འཛིན་རིམ་ ༡༢། ཨ་རི།

སྐལ་བཟང་བདེ་སྐྱིད་ཀྱི་ཕ་མ་གཉིས་བོད་རིགས་ཡིན་པ་དང་། ཁོང་མོ་ཨ་རིར་སྐྱེས་པ་ཞིག་ཡིན་འདུག ཁོང་གིས་ “ང་ཕ་མ་གཉིས་ཀྱིས་ཨུ་ཚུགས་བརྒྱབ་སྟེ་ལས་རིམ་འདིར་བཏང་བྱུང་། འོན་ཀྱང་། འདིར་བསླེབས་རྗེས་ཕ་མས་བཏང་པ་དེ་འགྲིག་འདུག་བསམ་བྱུང་”ཟེར། ཁོང་ལ་རྗེས་ཕྱོགས་བོད་པའི་བུ་ཞིག་དང་མཉམ་དུ་མི་ཚེ་བསྐྱལ་འདོད་ཡོད་དམ་ཕྱི་རྒྱལ་བ་ཞིག་དང་ལྷན་དུ་བསྐྱལ་རྩིས་ཡོད་ཅེས་དྲིས་པར། བོད་པའི་བུ་ཡག་པོ་ཞིག་དང་འཕྲད་ན་བསམ་གྱི་འདུག དེ་མ་བྱུང་ན་ཕྱི་རྒྱལ་བ་ཡིན་ཡང་སོ་སོའི་སྣང་བ་མཐུན་ས་ཞིག་དང་མི་ཚེ་བསྐྱལ་རྒྱུ་དེ་རེད་ཅེས་ལན་འདེབས་བྱས་བྱུང་།

མཛེས་གསལ་རྒྱལ་མཚན། ལོ་ ༩། འཛིན་རིམ་ ༤། ཁེ་ན་ཌ།

བུ་མོ་ཆུང་ཆུང་མཛེས་གསལ་ནི་ཨ་མ་ཀུན་བདེ་གླེང་ཚེ་རིང་དབྱིངས་ཅན་དང་ཕ་འཇིགས་མེད་རྒྱལ་མཚན་གཉིས་ཀྱི་བུ་མོ་ཡིན་པ་དང་། ཁོང་མོ་སྐྱེས་ས་ཁེ་ན་ཌ་ཡིན་འདུག ཐེངས་འདིར་ཕ་མ་གཉིས་ཀྱིས་མོ་རང་དང་གཅེན་པོ། ཨ་ཞང་གི་བུ་མོ་བཅས་ལྷན་དུ་ཁྲིད་ཡོང་འདུག བུ་མོ་ཆུང་ཆུང་འདིས་དབྱིན་སྐད་རྐྱང་བཤད་ཀྱི་འདུག ཁོང་གིས་ “དང་པོ་ང་འདིར་འབྱོར་སྐབས་ཚང་མས་བོད་སྐད་བཤད་ཀྱི་ཡོད་སྟབས་ང་རང་ཁེར་རྐྱང་ཡིན་པ་ལྟ་བུ་ཞིག་ཚོར་སོང་། ད་ཆར་གོམས་འགྲོ་བཞིན་འདུག་ལ་སྐྱིད་པོ་ཡང་འདུག རྗེས་ཕྱོགས་ཡང་བསྐྱར་གོ་སྐབས་རག་ན་ང་ཡོང་འདོད་ཡོད། ངའི་བོད་སྐད་ཀྱང་ཡག་ཏུ་འགྲོ་ས་རེད་”ཟེར།

ཡེ་ཤེས་དཔལ་སྒྲོན། ལོ་ ༡༥། འཛིན་རིམ་ ༡༡། ཨ་རི།

ཡེ་ཤེས་དཔལ་སྒྲོན་ནི་ཕ་ཀླུ་མགོན་རྒྱལ་དང་མ་འཇིགས་མེད་ལྷ་འཛོམས་གཉིས་ཀྱི་བུ་མོ་ཡིན་ཞིང་། རྒྱ་གར་ནང་སྐྱེས་ཏེ་འབྲས་ལྗོངས་རྒྱ་གར་སློབ་གྲྭ་ཞིག་འགྲིམ་མཐར་ནང་མི་ལྷན་དུ་ཨ་རིར་ཕྱིན་ཏེ་སློབ་སྦྱོང་བྱེད་བཞིན་ཡོད་འདུག ཁོ་མོས་བོད་སྐད་དང་དབྱིན་སྐད། བལ་ཡུལ་སྐད་བཅས་ཧ་ཅང་ཡག་པོ་བཤད་ཀྱི་འདུག ཁོང་གིས་ “སྔོན་མ་ང་བལ་ཡུལ་སྐད་བཤད་ས་ནས་འཚར་ལོངས་བྱུང་པ་རེད། ད་ཆར་དབྱིན་སྐད་རྒྱག་སའི་ཁོར་ཡུག་ནང་ཡོད། འོན་ཀྱང་། ངས་སོ་སོའི་ཕ་སྐད་བོད་སྐད་གཙང་མ་བཤད་རྒྱུར་འབད་བརྩོན་ལྷོད་མ་མྱོང”ཞེས་དང་། ཡང་ཁོ་མོས་ “བོད་པ་ཚང་མས་སོ་སོ་ཁོར་ཡུག་གང་འདྲ་ཞིག་ཏུ་གནས་ཀྱང་། བོད་པ་ཞིག་བྱ་རྒྱུ་དང་བོད་པའི་ངོ་བོ་སྟོན་ཐུབ་པ་ཞིག་བྱ་རོགས། དུས་ནམ་ཡང་མི་རིགས་གཞན་ཞིག་ཡིན་མདོག་མ་བྱེད་རོགས་”ཞེས་འབོད་སྐུལ་བྱས་སོང་།

བསྟན་འཛིན་ཀུན་དགའ། ལོ་ ༡༣། འཛིན་རིམ་ ༧། སུད་སི།

བསྟན་འཛིན་ཀུན་དགའི་ཕ་མ་གཉིས་བོད་རིགས་ཡིན་པ་དང་། ཁོ་རང་སུད་སིར་སྐྱེས་འདུག ཁོང་ལོ་སྔོན་མར་ལས་རིམ་འདིར་འཛུལ་ཞུགས་བྱས་ཡོད་ཅིང་། ད་ལོ་སྤུན་ཆུང་བསྟན་འཛིན་ཆོས་འཛིན་ཁྲིད་དེ་ཡོང་འདུག་ལ། ཁོང་གིས་བོད་ཡིག་འབྲི་ཀློག་ཅུང་ཙམ་ཤེས་པ་དེ་ཡར་རྒྱས་གཏོང་ཆེད་དུ་ཡོང་པ་ཡིན་ཟེར། བསྟན་འཛིན་ཀུན་དགའ་ལ་ཁྱེད་རང་བོད་རང་བཙན་ལེན་རྒྱུར་འདོད་པ་ཡོད་མེད་དང་། ཡོད་ན་ཇི་ལྟར་ལེན་དགོས་པ་རེད་དྲན་ཡོད་མེད་དྲིས་པར། “ང་མེ་མདའ་ཁྱེར་ནས་དམག་རྒྱག་འདོད་མེད། མི་མང་པོ་ཤི་གི་རེད་”ཅེས་ལན་བཏབས་བྱུང་།

བསྟན་འཛིན་འཇིགས་བྲལ། ལོ་ ༡༥། འཛིན་རིམ་ ༨། སུད་སི།

བསྟན་འཛིན་འཇིགས་གྲལ་གྱི་ཕ་མ་གཉིས་བོད་རིགས་ཡིན་པ་དང་། བོད་ནས་སྐྱེས་ཏེ་ ༢༠༠༥ ལོར་རྒྱ་གར་དུ་འབྱོར་པའི་ཟླ་འགའི་རྗེས་སུ་ཕ་མ་གཉིས་ཀྱིས་སུད་སིར་འཐེན་ཡོད་འདུག བསྟན་འཛིན་འཇིགས་གྲལ་གྱིས་བརྗོད་པ་ལྟར་ན། ཁོང་ཚོ་ཡོད་ས་དེར་བོད་པ་ཉུང་ཞིང་བོད་ཡིག་སྦྱང་ས་མེད་ཀྱང་། ནང་དུ་ཚང་མས་བོད་སྐད་བཤད་ཀྱི་ཡོད་འདུག ཁོང་གིས་ “ད་ལྟ་ཁང་རྩེག་མཐོན་པོའི་ནང་སྡོད་པ་དང་ཟ་མ་འདྲ་མིན་ཡོད་ཀྱང་། བོད་ནང་གི་ཁང་པ་དེ་ཚོ་སྐྱིད་པ་དང་བོད་ཀྱི་ཟ་མ་ཞིམ་པ་འདུག རྗེས་མ་རྒན་འཁོགས་ཆགས་དུས་ཕྱིར་བོད་ལ་འགྲོ་འདོད་འདུག ”ཟེར། ཁོང་ལ་རང་བཙན་དང་དབུ་མའི་ལམ་གང་ལ་ཡིད་ཆེས་ཡོད་ཅེས་དྲིས་པར། རང་བཙན་དང་དབུ་མའི་ལམ་ཟེར་བ་གོ་མྱོང་བ་ལས་ནང་དོན་གསལ་བོ་མགོ་འཚོས་ཀྱི་མེད། བོད་པ་ཚང་མས་ཕ་ཡུལ་བོད་དུ་ལོག་ཐབས་ཐོག་ཤུགས་རྒྱག་དགོས་པ་རེད་ཟེར།

དབྱར་ནང་གི་ལས་གཞི་གོ་སྒྲིག་པའི་སྐད་ཆ།

བོད་ཁྱིམ་ཤེས་ཡོན་འགན་འཛིན་དང་ད་ལོའི་དབྱར་ནང་གི་ལས་རིམ་ཚོགས་ཆུང་གི་འགན་འཛིན་རྒན་བསོད་ནམས་སྒྲོལ་དཀར་ལགས་ཀྱིས་ངོ་སྤྲོད་གནང་དོན་ལྟར་ན། ལས་གཞིའི་དམིགས་ཡུལ་ནི་དེང་སྐབས་བོད་མི་ཚོ་སྐད་ཡིག་རིག་གཞུང་མི་གཅིག་པའི་རྒྱལ་ཁབ་འདྲ་མིན་ནང་ཁ་འཐོར་དུ་གནས་ཡོད་སྟབས། ཁོང་ཚོའི་ཕྲུ་གུ་ཚོར་བོད་ཡིག་དང་བོད་པའི་རིག་གཞུང་ཕར་གཞོག མཐའ་ན་བོད་སྐད་བཤད་མི་ཤེས་པའི་གནས་སྟངས་ཤིག་ཏུ་འགྱུར་བཞིན་ཡོད་པས། ཟླ་གཅིག་ཙམ་ལ་དེ་འདྲའི་ཡག་པོ་ཞིག་སྦྱོང་ཐུབ་རྒྱུ་ཁག་པོ་ཡིན་ཡང་། ཕྱི་རྒྱལ་ཁག་ཏུ་ཡོད་པའི་བོད་ཕྲུག་ཚོ་ཁོ་ཚོའི་གོང་སེང་སྐབས་དང་བསྟུན་ཏེ། འདིར་ཡོང་ནས་བོད་སྐད་བོད་ཡིག་དང་། ནང་ཆོས་ངོ་སྤྲོད། བོད་པ་ཁེ་གཙང་གི་ཁོར་ཡུག་ཅིག་མཐོང་ཐོས་ཡོད་པ། བོད་ཁྱིམ་གྱི་སློབ་ཕྲུག་ཚོ་དང་འགྲོག་འདྲིས་བཅས་བྱེད་དུ་བཅུག་སྟེ། ཁོང་ཚོར་བག་ཆགས་རེ་འཇོག་ཐུབ་རྒྱུ་སོགས་ལ་དམིགས་པ་ཞིག་ཡིན་པར་བརྗོད་བྱུང་།

དགེ་རྒན་གྱི་མྱོང་ཚོར།

དགེ་རྒན་ཚེ་རིང་དབང་འདུས་ལགས་ནི་དབྱར་ནང་གི་ལས་རིམ་ཁྲོད་ཉིན་ལྟར་སློབ་ཕྲུག་ཚོ་དང་མཉམ་འགྲོ་མཉམ་འདུག་གིས། ཁོང་ཚོར་ལྟ་རྟོག་བྱེད་བཞིན་འདུག ཁོང་གིས་བརྗོད་དོན། ལས་རིམ་ནང་ཞུགས་མཁན་ཕལ་ཆེ་བའི་ཕ་མ་གཉིས་ཀ་བོད་རིགས་ཡིན་ཡང་སོ་སོའི་ཕྲུ་གུ་དང་མཉམ་དུ་ཆུ་ཚོད་གཏོང་ཁོམ་མེད་པ་ཡིན་ནམ། ཡང་ན་བུ་ཕྲུག་ཚོ་གཏོང་སའི་སློབ་གྲྭའི་ཁོར་ཡུག་ན་བོད་པ་མེད་པས་ཡིན་གང་ལྟར། ནུབ་ཕྱོགས་ནས་ཡོང་པའི་བོད་ཕྲུག་ཚོར་བོད་པའི་མིང་བཏགས་ཡོད་པ་ཙམ་ལས། ཁོ་ཚོའི་སྟེང་ན་བོད་པའི་ཁྱད་ཆོས་ཁྱོན་ནས་མེད་པ་དེ་སེམས་སྐྱོ་བ་ཞིག་དང་། བསམ་བློ་གཏོང་སྟངས་དང་སྤྱོད་པའི་ཐད་ནས་སོ་སོ་མ་གཏོགས་གཞན་ལ་བསམ་བློ་གཏོང་པའི་ལུགས་སྲོལ་མེད་པ། དགེ་རྒན་དང་མི་རྒན་པར་བརྩི་བཀུར་བྱེད་པའི་གོམས་གཤིས་མེད་པ། ངོ་ཚ་འཚེར་སྣང་བྱེད་སྲོལ་ཞིག་ཁོ་ཚོའི་གཤིས་རྒྱུད་ན་མེད་པར་ར་ལང་ཆ་ལང་ཡིན་ཡང་།  ཁོང་ཚོར་ཆུ་ཚོད་ནམ་ཡོད་ལ་དེབ་ཀློག་པའི་གོམས་གཤིས་ཧ་ཅང་ཡག་པོ་ཞིག་དང་། འདིར་ཡོང་མཁན་ཚོ་ལོ་ ༨ ནས་ ༡༩ བར་རྐྱང་ཡིན་ཡང་སོ་སོ་རྗེས་མ་འདི་འདྲ་ཞིག་བྱེད་རྒྱུ་ཡིན་ཟེར་པའི་ཕུགས་བསམ་གཏན་པོ་ཡོད་པ་མ་ཟད། རང་ཉིད་སློབ་ཚན་ནམ་ལས་རིགས་གང་གི་ཕྱོགས་ལ་ནུས་པ་ཡོད་མེད་ངོ་འཕྲོད་ཐུབ་ཀྱི་ཡོད་པ་བཅས་ནི་འདི་ཕྱོགས་ཀྱི་ཕྲུ་གུ་ཚོ་དང་མ་འདྲ་བ་ཞིག་འདུག་ཟེར།

ཕྲུ་གུའི་ཕ་མའི་སྐད་ཆ།

ཁེ་ན་ཌ་ནས་ཡིན་པ་ཀུན་བདེ་གླིང་ཚེ་རིང་དབྱིངས་ཅན་ལགས་ཀྱིས་ཁོང་གི་ཕྲུ་གུ་གཉིས་དང་ཨ་རིར་ཡོད་པའི་ཁོང་གི་གཅེན་པོའི་བུ་མོ་གཅིག་བཅས་བཟའ་ཟླ་དང་ལྷན་དུ་ཕྲུ་གུ་གསུམ་ཁྲིད་ཡོང་སྟེ། སྒེར་དངོས་ནས་ཁང་པ་གླས་ནས་བསྡད་འདུག ཁོང་གིས་བརྗོད་པ་ལྟར་ན། ཕྲུ་གུ་ཚོས་བོད་སྐད་ཡག་པོ་ཤེས་ཀྱི་མེད་སྟབས་འདིར་ཁྲིད་ཡོང་ནས་བག་ཆགས་ཤིག་འཇོག་ཐུབ་ན་བསམ་འདུག ཁོང་ལ་ནུབ་ཕྱོགས་སུ་སྐྱེས་འཚར་བྱུང་པའི་བོད་ཕྲུག་ཚོས་བོད་སྐད་བོད་ཡིག་ཤེས་ཀྱི་མེད་པ་ཙམ་མ་ཟད། བོད་པའི་གཤིས་ཀའང་བརླག་འགྲོ་བཞིན་པའི་ཐད་འབྲེལ་ཡོད་ཕ་མ་ཚོས་དོ་ཁུར་གང་འདྲ་བྱེད་ཀྱི་ཡོད་མེད་དྲིས་པར། ཁོང་གིས་བོད་པ་ཚོ་སྔོན་མ་ཕྱི་རྒྱལ་ཁག་ཏུ་འབྱོར་སྐབས་འཚོ་ཐབས་ཀྱི་དཀའ་ངལ་འོག་བོད་སྐད་བོད་ཡིག་ལ་དེ་ཙམ་དོ་སྣང་སྤྲོད་ཐུབ་མེད་ཀྱང་། འདས་པའི་ལོ་དྲུག་བདུན་ཙམ་ནས་ཕ་མ་ཚོས་སོ་སོའི་ཕྲུ་གུ་ཚོར་སེམས་འཁྲལ་ཆེན་པོས་བོད་སྐད་བོད་ཡིག་སྦྱོང་རྒྱུར་འབད་བརྩོན་བྱེད་ཀྱིན་པའི་རྣམ་པ་ཞིག་མངོན་ཡོང་གི་ཡོད་པ། གཅིག་ནས་ནུབ་ཕྱོགས་པའི་སྤྱི་ཚོགས་ནང་སྐྱེས་འཚར་བྱུང་པའི་བོད་ཕྲུག་ཚོར་མཚོན་ན་བོད་པའི་ངོ་བོ་བརླག་འགྲོ་བའི་ཉེན་ཁ་ཞིག་འཕྲད་བཞིན་ཡོད་ཀྱང་། ད་ཆར་ཆུ་གསར་པ་བརྒྱབ་སྟེ་བསྐྱར་དུ་མེ་ཏོག་གི་ཞལ་ཁ་གསར་པ་ཕྱེ་ཡོང་གི་ཡོད་པའི་དུས་སྐབས་ཤིག་མངོན་འགྱུར་བྱེད་ཀྱི་ཡོད་ཚུལ་བརྗོད་བྱུང་།

༼ བོད་ཀྱི་དུས་བབ་ཚགས་པར་ལས་འདིར་བདམས་བཀོད་བྱས། ༽

གསར་འགོད་པ། བནྟེ་སྐྱབས།