ཟླ་འདིའི་ཕྱི་ཚེས་ ༢༨ ཉིན་སུད་སི་གནས་སྡོད་བོད་མི་དཀོན་མཆོག་བཀྲ་ཤིས་དང་ཀླུ་རྒྱལ་དོན་གྲུབ་གཉིས་གཙོས། དང་བླངས་བོད་མི་ཁག་ཅིག་གིས་གོ་སྒྲིག་འོག ༼བསམ་བློ་བརྗེ་རེས་དང་སྤོབས་པ་མཉམ་སྐྱེད༽ ཅེས་པའི་བགློ་གླེང་ཐེངས་གཉིས་པ་ཛོ་རིག་གྲོང་ཁྱེར་གྱི་ཝོ་ཁི་ཞའོ་སི་ (vokshaus ) ཞེས་པའི་ཚོགས་ཁང་དུ་ཚོགས་ཡོད་པ་དང་། བགྲོ་གླེང་སྟེང་བོད་མི་གཞོན་སྐྱེས་ ༣༠ མ་ཟིན་འདུ་འཛོམས་ཀྱིས། རྒྱ་གཞུང་གིས་བོད་མིའི་སྐད་ཡིག་རྩ་མེད་དུ་གཏོང་རྒྱུའི་སྲིད་ཐད་ཀྱི་སེམས་འཚབ་དང་། འཛམ་གླིང་རྒྱལ་ཁབ་འདྲ་མིན་དུ་ཡོད་པའི་རང་དབང་ལུང་པའི་བོད་མི་ཚོས། སྐད་ཡིག་ཇི་ལྟར་སྲུང་སྐྱོབ་བྱ་དགོས་མིན། མི་རིགས་སྲུང་སྐྱོབ་བྱ་ཐབས། བོད་ཀྱི་རིག་གཞུང་ལ་ངོས་འཛིན་གང་འདྲ་ཡོད་མེད། རྒྱ་གཞུང་གིས་བོད་ཐོག་འཛིན་པའི་སྲིད་བྱུས་ལ་གདོང་ལེན་དང་། འཐབ་རྩོད་ཀྱི་ལས་འགུལ་སྤེལ་ཐབས་བཅས་ཀྱི་ཐོག་གཏམ་བཤད་དང་དྲི་བ་དྲིས་ལན་གནང་ཡོད་འདུག
༼བསམ་བློ་བརྗེ་རེས་དང་སྤོབས་པ་མཉམ་སྐྱེད་༽ཅེས་པའི་བགློ་གླེང་དེའི་དམིགས་ཡུལ་གཙོ་བོ། སློབ་གསོའི་རྒྱབ་ལྗོངས་དང་ཁོར་ཡུག་མི་འདྲ་བའི་ནང་འཚར་ལོངས་བྱུང་བའི་བོད་ཀྱི་གཞོན་སྐྱེས་བར་བསམ་བློ་བརྗེ་རེས་བྱས་ཏེ། མ་འོངས་བོད་ཀྱི་མདུན་ལམ་ཐད་ནུས་ཤུགས་མཉམ་སྤུངས་བྱ་རྒྱུ་དང་། འཛམ་གླིང་རྒྱལ་ཁབ་འདྲ་མིན་ནང་འཚར་ལོངས་བྱུང་བའི་གཞོན་སྐྱེས་ཚོར་བོད་ཀྱི་རིག་གཞུང་གི་བག་ཆགས་འཇོག་ཐབས། བོད་ཕྱི་ནང་གཉིས་ཀྱི་གཞོན་སྐྱེས་ཚོ་རྡོག་རྩ་ཆིག་སྒྲིལ་དང་ནུས་པ་མཉམ་སྤུངས་བྱ་རྒྱུ་བཅས་ལ་དམིགས་པ་ཞིག་ཡིན་འདུག
༼ བསམ་བློ་བརྗེ་རེས་དང་སྤོབས་པ་མཉམ་སྐྱེད༽ ཅེས་པའི་བགྲོ་གླེང་ཐེངས་དང་པོ་དེ་ཕྱི་ཟླ་ ༦ པའི་ཚེས་ ༢༢ ཉིན་ཚོགས་ཡོད་ཅིང་། སྐབས་དེར་གཞོན་སྐྱེས་ ༣༨ ལྷག་གིས་༼ ཐོབ་ཐང་དང་འོས་འགན༽ ཞེས་པའི་བརྗོད་གཞིའི་འོག བཙན་བྱོལ་བོད་མིའི་ཐོབ་ཐང་དང་ལས་འགན་གང་ཡིན་དང་། མ་འོངས་པར་རང་ངོས་ནས་ལས་འགན་ཇི་ལྟར་བསྒྲུབ་མིན། ཛོ་རིག་མེ་འཁོར་འབབ་ཚུགས་སུ་ཤོ་དང་རྒྱན་འཛུགས་བྱེད་ཀྱིན་པ་དེས་མི་རིགས་གཞན་ལ་བག་ཆགས་གང་འདྲ་འཇོག་གི་ཡོད་མེད། མི་སྒེར་གྱི་ངོས་ནས་བོད་པའི་སྤྱི་ཚོགས་ལ་ལས་དོན་གང་འདྲ་བསྒྲུབ་མིན་དང་བསྒྲུབ་ཐབས་བཅས་ཀྱི་ཐོག་གྲོས་བསྡུར་གནང་ཡོད་འདུག
དངོས་གནས་བགྲོ་གླེང་ཡག་པོ་གནང་འདུག་ཐུགས་རྗེ་ཆེ་། བསམ་བློ་བརྗེ་རེས་དང་སྤོབས་པ་མཉམ་སྐྱེད་ཀྱི་བགྲོ་གླེང་གི་ལེགས་ཆ་དེ་ཚོ་ང་ཚོ་ལ་སྙིང་ནས་བརྩེ་བའི་གྲོགས་མཆོག་ཏང་ཨུ་ཡོན་ལྷན་ཁང་གི་ཚོགས་མི་རྣམས་ཀྱིས་ལེན་ཚར་འདུག། ང་རང་ཚོ་བོད་པ་ཚོས་ལས་འགུལ་སྤེལ་ཚུལ་ལ་བལྟས་ན་དགོད་བྲོ་བ་ཅན་ཞིག་རེད་འདུག་ཧ་ཧ་ཧ་ཧ་
བོད་མི་རིགས་འདི་ནི་བགྲོ་གླེང་ལ་མི་དགའ་ཞིང་། སྤྲོ་སྐྱིད་གཏོང་རྒྱུར་ཤིན་ཏུ་དགའ་བའི་མི་རིགས་ཤིག་ཡིན། གཟིགས་དང་བགྲོ་གླེང་དང་པོར་གཞོན་སྐྱེས་གྲངས་ ༣༨ བགྲོ་གླེང་གཉིས་པར་གཞོན་སྐྱེས་གྲངས་ ༣༠ ཐམ་པ། བགྲོ་གླེང་གསུམ་པ་དང་བཞི་པར་ད་དུང་མི་གྲངས་ཇེ་ཉུང་དུ་འགྲོ་རྒྱུ་གཏན་འཁེལ་རེད། འོན་ཀྱང་སྤྲོ་སྐྱིད་ཞིག་ལ་ཆ་བཞག་ན་ཐེངས་དང་པོ་ལས་ཐེངས་གཉིས་པ་མི་གྲངས་མང་བ་དང་དེ་བས་ཀྱང་དེང་གསུམ་པ་དང་བཞི་པར་ལྡབ་གྱུར་གྱི་མི་མང་ཇེ་མང་དུ་འགྲོ་བཞིན་པའི་གནས་སྟངས་དེ་ཚོ་དྲན་དུས་སེམས་ལ་ཚོར་བ་གང་འདྲ་ཞིག་འདུག་གམ་གསུངས་དང་། འོན་ཀྱང་བགྲོ་གླེང་གོ་སྒྲིགས་གནང་མཁན་གྱི་ལྷག་བསམ་དང་ལ་རྒྱ་ལ་གུས་བསྐུར་དང་ཆེད་བསྟོད་ཞུ་འོས་པ་ཞིག་ཡིན།
བཟང་ངོ། བགྲོ་གླེང་གི་གཏམ་བཤད་ཁག་ལ་ཇི་ལྟར་ལྟ་ཉན་ཐུབ་བམ།