གང་ཟག་གི་དབང་བསྒྱུར་ལ་ལྡོག་འགྲོས།

༄༅། ། ཁྲིམས་ཀྱི་དབང་བསྒྱུར་ནས་གང་ཟག་གི་དབང་བསྒྱུར་ལ་ལྡོག་བགྲོད་བྱས་པ་མ་རེད་དམ།

གཞུང་པ་ཚེ་དབང་བསོད་ནམས།

བོད་ཀྱི་དུས་བབས་སྤྱིའི་འདོན་ཐེངས་ ༥༥༩ ཕྱི་ལོ་ ༢༠༡༢།༧།༣༠ འཁོད་པའི་ནང་མགོ་བརྗོད་དུ་རང་བཙན་ཆེད་བོད་ཀྱི་རྒྱལ་ཡོངས་ལྷན་ཚོགས་གསར་འཛུགས་ཞེས་པའི་ནང་གི་གཟའ་ལྷག་པའི་ཉིན་ངྷ་ས་གང་སྐྱིད་དཔེ་མཛོད་ཚོགས་ཁང་དུ་རང་བཙན་ཚོགས་འདུ་ཞིག་ཚོགས་ཏེ། བོད་ཀྱི་རྒྱལ་ཡོངས་ལྷན་ཚོགས་འཛུགས་རྒྱུར་མོས་མཐུན་རྒྱབ་སྐྱོར་དང་ལོ་རྗེས་མར་རང་བཙན་ཚོགས་ཆེན་འཚོགས་རྒྱུར་གོ་སྒྲིག་ཚོགས་ཆུང་ཞིག་ཀྱང་གསར་འཛུགས་གནང་སོང་ཟེར་བ་དང་། རང་བཙན་ཚོགས་འདུའི་ནང་བོད་མི་མང་གི་སྐུ་ཚབ་སྤྱི་འཐུས་ལས་ཐོག་པ་བཅུ་ཡོད་པ་དང་མ་འོངས་པར་བོད་ཀྱི་རྒྱལ་ཡོངས་ལྷན་ཚོགས་འཛུགས་རྒྱུར་གྲོས་འཆམ་བྱུང་བ་དང་། ལོ་རྗེས་མར་རང་བཙན་ཚོགས་ཆེན་གོ་སྒྲིག་ཚོགས་ཆུང་ཞིག་བསྐོ་འཛུགས་ཀྱིས་བོད་མི་མང་སྤྱི་འཐུས་ལས་ཐོག་པ་བློ་བཟང་ཡེ་ཤེས། སྤྱི་འཐུས་གསེར་རྟ་ཚུལ་ཁྲིམས། སྤྱི་འཐུས་ཀརྨ་ཡེ་ཤེས་སོགས་ཚོགས་མིར་བསྐོས་སོང་ཟེར་བའི་གསར་གནས་དེ་བཀླགས་སྐབས། ང་ལ་གོ་རྟོགས་དང་བསམ་ཚུལ་གང་བྱུང་བ་དེ་དག་དམངས་གཙོ་དང་ཁྲིམས་ཀྱི་དབང་བསྒྱུར་ལ་འགན་འཁུར་ནས་གླེང་འདོད་བྱུང་།

བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་བརྩི་བཀུར་ཉམས་ལེན་ཞུས་ཏེ། བཅའ་ཁྲིམས་དོན་ཚན་བཅུ་གསུམ་ནང་དུ་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་མཁན་གྱི་ཚོགས་པ་ག་ཚོད་མང་ན་ཡང་དགའ་བསུ་ཞུ་རྒྱུ་དང་། བཅའ་ཁྲིམས་རིན་པོ་ཆེ་ངོ་མ་འཕྲོད་པའི་ཚོགས་པ་གཅིག་ལས་མེད་ཀྱང་། དེ་ཡང་མང་སྐྱོན་ཡིན་པར་ངོས་འཛིན་དང་བཅས་ཕྱི་ལོ་ ༡༩༩༡ ཕྱི་ཟླ་ ༥ པའི་ཚེས་ ༢༩ ཉིན་བོད་མི་མང་སྤྱི་འཐུས་སྐབས་བཅུ་གཅིག་པའི་ཁྲིམས་བཟོའི་འགན་འཁུར་བླངས་ཏེ། བཙན་བྱོལ་བོད་མིའི་བཅའ་ཁྲིམས་དོན་ཚན་ ༡༡༥ ཅན་དེ་གཏན་འབེབས་ཀྱིས་གང་ཟག་གི་དབང་བསྒྱུར་ནས་ཁྲིམས་ཀྱི་དབང་བསྒྱུར་ལ་ཁ་ཕྱོགས་པའི་དུས་ཚོད་གལ་ཆེན་ཞིག་ཡིན་པའི་ངོ་སྤྲོད་སྐབས་དེའི་ཚོགས་གཙོ་མཁས་དབང་ཟམ་གདོང་རིན་པོ་ཆེ་མཆོག་གིས་བཀའ་སློབ་ཕེབས་ཡོད་ལ། བཅའ་ཁྲིམས་དོན་ཚན་ ༡༡༥ ཅན་དེའི་ནང་བོད་རང་བཙན་ཟེར་བའི་ཚིག་རྐང་གཅིག་བཅའ་ཁྲིམས་ཀྱི་ནང་དུ་འཁོད་མ་ཐུབ་པར་བོད་དོན་བདེན་མཐའ་གསལ་ཐབས་ལ་ཁ་ཕྱོགས་ཏེ། གཞིས་བྱེས་རྒྱ་ཆེ་མང་ཚོགས་ནས་ཀྱང་བཅའ་ཁྲིམས་དོན་ཚན་བཅུ་གསུམ་ནང་དུ་གསལ་བའི་བོད་ཀྱི་ཡུལ་མིའི་ལས་འགན་བསྒྲུབས་ཏེ་ཁྲིམས་བཟོ་ལྷན་ཚོགས་ནས་གཏན་འབེབས་གནང་བའི་བཅའ་ཁྲིམས་ལ་ཡིད་ཆེས་དང་བརྩི་བཀུར་བློ་གཏད་ཉམས་ལེན་ཞུས་ཏེ་ལོ་ངོ་ ༢༡ ཙམ་འགྲོ་བཞིན་ཡོད།

ཕྱི་ལོ་ ༡༩༩༧ ཟླ་ ༩ ཚེས་ ༡༨ ཉིན་བོད་མི་མང་སྤྱི་འཐུས་གྲོས་ཚོགས་ནས་སྤྱི་མོས་ཀྱི་གྲོས་ཆོད་བཞག་པ་ནས་དུས་ད་ལྟའི་བར་གཞིས་བྱེས་བོད་མི་ཚང་མས་དབུ་མའི་ལམ་གྱི་སྲིད་བྱུས་ལ་ཡིད་ཆེས་དང་བློ་གཏད་བརྩི་བཀུར་ཞུས་ནས་བཅའ་ཁྲིམས་དོན་ཚན་ ༡༥ ནང་དུ་གསལ་བའི་བོད་དོན་བདེན་མཐའ་གསལ་ཐབས་ལ་འགན་འཁུར་ཏེ། དུས་ཚོད་ནམ་བྱུང་དང་གོ་སྐབས་ནམ་ཐོབ་ལ་རྒྱ་དམར་སྲིད་གཞུང་ལ་ངོ་རྒོལ་བྱེད་མཁན་གྱི་རང་བཙན་འཐབ་རྩོད་པ་སྤྱི་མཚུངས་ཤིག་ཡིན་པ་ལས་མི་མང་ཉལ་ནས་བསྡད་དེ། མི་འགའ་ཤས་ཤིག་གིས་རང་བཙན་འཐབ་རྩོད་བྱེད་ཀྱི་ཡོད་པ་ངས་ནམ་ཡང་མཐོང་མ་སོང་ལ་གོ་ཡང་མ་མྱོང་། ད་ལམ་ལས་ཐོག་སྤྱི་འཐུས་གསུམ་ནས་ལོ་རྗེས་མར་རང་བཙན་ཚོགས་ཆེན་གོ་སྒྲིག་ཚོགས་ཆུང་གི་ཚོགས་མིར་མཉམ་ཞུགས་གནང་བ་སོགས་ལ་དཔྱད་སྐབས། ང་ཚོ་ཁྲིམས་ཀྱི་དབང་བསྒྱུར་འོག་ཏུ་གནས་དགོས་པ་རེད་དམ་གང་ཟག་གི་དབང་བསྒྱུར་འོག་ཏུ་ཁ་ཕྱོགས་དགོས་པ་རེད། དེ་ཡང་གསལ་པོ་བཟོ་དགོས་པ་དང་། དེང་སྐབས་རང་རེའི་བཙན་བྱོལ་སྤྱི་ཚོགས་ནང་དམངས་གཙོ་དང་རང་དབང་ཁ་ལ་འཁྱེར་ནས་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་མིག་ཟུར་དུ་བཞག་ནས་རང་བཙན་དང་རང་དབང་། མང་གཙོ་དང་དམངས་གཙོ། མི་མང་དང་མི་དམངས་སོགས་དོན་གཅིག་མིང་གི་རྣམ་གྲངས་ལ་ངོས་འཛིན་གནང་མཁན་གྱི་གྲངས་འབོར་དེ་ཉུང་ཉུང་མ་རེད།

བཀའ་ཁྲི་ལ་སྲིད་བློན་ནམ་སྲིད་འཛིན། སྲིད་སྐྱོང་བཅས་ཀྱི་ཆེ་བསྟོད་ཞུ་མཁན་ཡང་འདུག་ན། བཅའ་ཁྲིམས་བསྐྱར་བཅོས་བརྒྱུད་དེ་བོད་ཀྱི་ཡུལ་མི་ཚང་མས་གཅིག་གྱུར་དུ་ངོས་འཛིན་དང་བེད་སྤྱོད་བྱ་དགོས་པ་དེ་ཁྲིམས་མཐུན་ངོ་མ་དེ་ཡིན་པ་ལས། དེ་མིན་ད་མུས་བཞིན་དུ་མ་དག་པའི་ཚིག་རྒྱུན་འཇགས་སུ་བསྡད་ཚེ་ང་ཚོས་བཅའ་ཁྲིམས་རིན་པོ་ཆེ་ཞུ་སའི་ཁྲིམས་ཡིག་གལ་ཆེན་དེ་དག་ཕྲུ་གུའི་རྩེད་མོ་རྩེ་བྱེད་ཀྱི་ཤོག་བྱང་ཞིག་གི་འདུ་ཤེས་ལས་མེད་པ་ཆགས་མི་སྲིད་པའི་ངེས་པའང་མི་འདུག་པས་ན། བསམ་ཡོད་བློ་ལྡན་ཚང་མས་ཐུགས་གཟབ་གནང་དགོས་པའི་འབོད་སྐུལ་དང་བཅས་བཅའ་ཁྲིམས་ལ་བསྐྱར་བཅོས་མ་སོང་བར་ལས་ཐོག་སྤྱི་འཐུས་བཅུ་ཡིས་རང་བཙན་ཚོགས་འདུར་མཉམ་ཞུགས་གནང་བ་དང་། ལོ་རྗེས་མར་རང་བཙན་ཚོགས་ཆེན་གོ་སྒྲིག་ཚོགས་ཆུང་གི་ཚོགས་མིར་སྤྱི་འཐུས་གསུམ་ནས་འགན་འཁུར་བཞེས་རྒྱུ་དེ་དག་འོས་བསྡུའི་སྒྲིག་གཞིའི་དོན་ཚན་ ༣༩ པ་བོད་མི་མང་སྤྱི་འཐུས་ཀྱི་འོས་ཆོས་ཟེར་བའི་ནང་གསེས་ ༡༠ པའི་ནང་། “བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད” ཟེར་བ་དང་། བཅའ་ཁྲིམས་དོན་ཚན་ ༡༣ པ་ཡུལ་མིའི་ལས་འགན་ཟེར་བའི་ནང་གསེས་ ༢ པའི་ནང་ “བཅའ་ཁྲིམས་དང་ཁྲིམས་ལུགས་ཁག་ལ་སྙིང་ནས་བརྩི་བཀུར་དང་ཉམས་ལེན” ཟེར་བ། སྤྱི་འཐུས་ཀྱི་ལས་ཁུར་དམ་བཅའི་ནང་ “བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་ཀྱི་ཐོག་ནས་སྤྱི་འཐུས་ཀྱི་ལས་ཁུར་ཞུ་སྒོ་མཐའ་དག་བཅའ་ཁྲིམས་ཀྱི་འབྲུ་དོན་འགལ་མེད་ཐོག” ཟེར་བ་སོགས་དང་། ལྷག་དོན་དུ་ཕྱི་ལོ་ ༡༩༩༧ ཟླ་ ༩ ཚེས་ ༡༨ ཉིན་སྤྱི་འཐུས་གྲོས་ཚོགས་ནས་སྤྱི་མོས་གྲོས་ཆོད་བཞག་པ་དེ་དག་དུས་ལས་ཡོལ་མེད་ན་དེ་དག་དང་ཕྱོགས་མཐུན་ཡོང་གི་ཡོད་མེད་ཐོག་དགོངས་པ་གཏིང་ཞབ་བཞེས་དགོས་པར་འདོད།  

གང་ལྟར་ཡང་བོད་ནང་གི་ཛ་དྲག་གནས་སྟངས་ལ་བོད་མི་ཚང་མས་འགན་ཁུར་བླངས་ཏེ། བཅའ་ཁྲིམས་དོན་ཚན་ ༡༥ ནང་དུ་འཁོད་པའི་བོད་དོན་བདེན་མཐའ་གསལ་ཐབས་ལ་རིང་མིན་འཚོགས་ལ་ཉེ་བའི་ཚོགས་ཆེན་ཀྱི་ཐོག་ཏུ་ང་ཚོའི་ཐོག་མའི་དམིགས་ཡུལ་དང་དམ་བཅའ་ཇི་བཞིན་རང་བཙན་གཙང་མ་ལ་ཁ་ཕྱོགས་དགོས་ཀྱི་ཡོད་ན་འདྲ་ལ། དབུ་མའི་ལམ་གྱི་དགོས་འདུན་ཆོལ་གསུམ་བོད་རིགས་ཡོངས་རྫོགས་གཅིག་ཏུ་བསྒྲིལ་བའི་ཆེས་མཐོའི་རང་སྲིད་རང་སྐྱོང་ལ་ཁ་ཕྱོགས་དགོས་ཀྱི་ཡོད་ནའང་འདྲ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་ཁྲིམས་མཐུན་གྱི་ཐོབ་ཐང་ཡོད་པའི་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་གནས་བབས་ཚད་ལྡན་ཟེར་བའི་གོ་རྟོགས་དཀའ་བའི་ཆབ་སྲིད་ཀྱི་ལྟ་གྲུབ་ལ་ཁ་ཕྱོགས་དགོས་ཀྱི་ཡོད་ན་འདྲ་ལ། མཉམ་འབྲེལ་རྒྱལ་ཚོགས་ནས་ཡོངས་ཁྱབ་གསལ་བསྒྲགས་གནང་བའི་གཞི་རིམ་འགྲོ་བ་མིའི་ཐོབ་ཐང་རང་ཐག་རང་གཅོད་ལ་ཁ་ཕྱོགས་དགོས་ཀྱི་ཡོད་ནའང་འདྲ། གསར་དུ་འཁྲུངས་པའི་བདེན་པའི་ཨུ་ཚུགས་ལ་ཁ་ཕྱོགས་ཀྱི་ཡོད་ནའང་རེད།

གང་ལྟར། རྟ་འབབ་བོང་ཞོན་བྱ་དགོས་ཀྱི་ཡོད་ནའང་རེད་ལ། བོང་བསྐྱུར་རྟ་ཞོན་བྱ་དགོས་ཀྱི་ཡོད་ནའང་རེད། མཐོ་ས་ནས་དམའ་སར་འབབ་དགོས་ནའང་རེད་ལ། དམའ་ས་ནས་མཐོ་སར་འཛེགས་དགོས་ནའང་རེད། བཙན་བྱོལ་སྤྱི་ཚོགས་ནང་གི་ཨ་ཡོད་ནང་གི་ད་ཡོད་དང་། སྒོ་ངའི་ནང་གི་སེར་རིལ་སྟོང་གི་ནང་ནས་གདམས། བརྒྱ་ཡི་ནང་གི་རྩེ་ཕུད་མི་མང་གི་འཐུས་མིའི་ཚོགས་ཆེན་འདིའི་ཐོག་ནས་བོད་རྒྱའི་དཀའ་རྙོག་ད་མུས་བཞིན་དུ་མ་ལྷག་པར་བཟང་ཐག་ངན་ཐག་གཅོད་དགོས་པ་དེ་བོད་མི་རིགས་འདི་འཛམ་གླིང་མི་མང་གི་མདུན་དུ་ངོ་ཚ་མི་དགོས་པ་ཞིག་དགོས་པ་ལས་ཁ་དམག་རྒྱག་ཐུབ་པ་ཙམ་གྱི་བོད་རྒྱའི་དཀའ་རྙོག་ནམ་ཡང་སེལ་མི་ཐུབ་ལ། རྫོགས་རྒྱུ་མེད་པའི་གཏམ་བཤད་ལ་མི་མང་མགོ་འཁོར་ནས་བསྡད་པས་དེ་བས་ཀྱང་བོད་རྒྱའི་དཀའ་རྙོག་སེལ་ཐབས་མེད།  

བོད་རྒྱའི་དཀའ་རྙོག་སེལ་ཐུབ་པ་ལ་ཆབ་སྲིད་ཀྱི་ཐབས་ལམ་འཚོལ་དགོས་པ་དེ་བོད་རྒྱའི་མགོ་འཁྲིད་རྣམ་པའི་ཐུགས་འགན་ངོ་མ་དེ་ཡིན་པ་ལས་ཞི་བའི་མི་མང་ལ་ནམ་ཡང་ཉེས་པ་དང་ཁག་དཀྲི་གཡོག་མི་ཉན་པ་བཅས་ཕྱི་ལོ་ ༢༠༠༨ དང་། ཕྱི་ལོ་ ༢༠༡༡ བཅས་ཀྱི་ཚོགས་ཆེན་ལྟ་བུའི་གྲོས་ཆོད་ལུང་པ་གང་བཞག་སྟེ། ཚོགས་ཆེན་གྱི་དོན་གོ་འགྲུབ་པར་ངོས་འཛིན་གནང་མ་དགོས་པ་ཞིག་དང་། ཁྲིམས་ཀྱི་དབང་བསྒྱུར་ནས་གང་ཟག་གི་དབང་བསྒྱུར་ལ་གོམ་གང་མདུན་སྤོ་བྱས་ཏེ། ཞི་བའི་མི་མང་ཚོགས་པ་སྐྱིད་སྡུག་གི་སྣེ་འཁྲིད་འོག་སྣ་མང་ལས་འགུལ་ནང་གཡས་འཐེན་གཡོན་འཐེན་གྱིས་དུས་ཚོད་རྫོགས་མ་དགོས་པའི་ཐོག་ནས་མགོ་འཁྲིད་གཅིག་དང་དར་ཆ་གཅིག་གི་འོག་ཏུ། དགོས་འདུན་གཅིག་དང་འབོད་སྒྲ་གཅིག་གི་ལམ་ནས། དུས་ཚོད་གཅིག་དང་རྣམ་འགྱུར་གཅིག་གི་ལས་འགུལ་ནང་། ཆོས་ལུགས་ཆོལ་གསུམ་དང་བཅས་པའི་གཞིས་བྱེས་བོད་མི་ཚང་མཉམ་ཞུགས་དང་། བསྡེབས་ལངས་ཐུབ་པའི་ཁྲིམས་ལུགས་སམ་སྒྲིག་གཞིའི་ལམ་སྟོན་བརྒྱུད་དེ། བོད་རྒྱའི་དཀའ་རྙོག་སེལ་ཐུབ་པའི་འགན་འཁུར་བཞེས་དགོས་པ་དེ་ཚོགས་ཆེན་ཚོགས་པའི་དོན་གོ་འགྲུབ་དགོས་པའི་འབོད་སྐུལ་དང་བཅས། རྒྱལ་ཁབ་དང་མི་རིགས་ཀྱིས་ཆབ་སྲིད་ལ་འགན་འཁུར་ནས་བཅའ་ཁྲིམས་དོན་ཚན་ ༡༣ པའི་ནང་དུ་གསལ་བའི་བོད་ཀྱི་ཡུལ་མིའི་ལས་འགན་བསྒྲུབས་ཏེ། གང་ཟག་སྒེར་གྱི་བསམ་ཚུལ་གླེང་པ་འདིའི་ཀྱང་བོད་རྒྱའི་དཀའ་རྙོག་མྱུར་དུ་སེལ་ཐབས་སུ་བསྔོ་བའོ།།

ཀོ་ལི་གྷ་གཞིས་ཆགས་ནས། ༢༠༡༢། ༧ ། ༢༤ །