བོད་
གདན་ས་ཁག་ཏུ་གྲྭ་རྒྱུན་ཇེ་ཉུང་དུ་འགྲོ་བཞིན་ཡོད་པའི་གླེང་སློང་ཞིག་སྔོན་མ་ནས་ཡོད། ད་ལྟ་གནས་སྟངས་དེ་ཧ་ཅང་མངོན་གསལ་ཆགས་ཏེ་བོད་མི་དང་བོད་མི་མ་ཡིན་པ་བརྒྱ་ཆ་བསྡུར་ཚད་ལོངས་པ་ཞིག་ཆགས་སོང་། གནས་ཚུལ་འདི་ལས་གསར་པ་གཞན་ཞིག་ནི། ཉེ་བའི་ལོ་འགའི་ཚུན་ལ་བཙན་བྱོལ་བོད་མིའི་སློབ་གྲྭ་ཁག་གི་སློབ་ཕྲུག་ཇེ་ཉུང་དུ་འགྲོ་མགོ་ཚུགས་ཡོད། སྤྱིར་གྲངས་ཚད་དང་སྤུས་ཚད་གཉིས་ལས་སྤུས་ཚད་གཙོ་མོད། གྲངས་ཚད་མེད་ན་སྤུས་ཚད་ཀྱི་འབྱུང་ཁུངས་ཀྱང་མེད་འགྲོ་བ་ལྟོས་གྲུབ་ཡིན།
ང་ཚོས་གསལ་བོ་ཤེས་དགོས་པ་ཞིག་ནི། བཙན་བྱོལ་བོད་མིའི་སྤྱི་ཚོགས་རྩ་གཏོར་དུ་གཏོང་རྒྱུ་དེ་རྒྱ་གཞུང་གི་མིག་འབེན་ཡིན། དམིགས་ཡུལ་དེ་འགྲུབ་ཆེད་སྔ་ཕྱི་བར་གསུམ་དུ་ལྐོག་ཇུས་སྣ་ཚོགས་འཐེན་ཡོད། ལོ་གཉིས་གསུམ་གོང་ནས་རྒྱ་གཞུང་གི་འདྲེ་ལག་བཙན་བྱོལ་བོད་མིའི་སློབ་གྲྭ་ཁག་ནང་རྐྱོང་མགོ་བརྩམས་ཏེ། བྱིས་པ་སྐོར་ཞིག་གི་རྒྱབ་ཀྱི་དཔེ་ཁུག་དང་ལག་གི་སྨྱུ་གུ་ཕྲོགས་ཏེ་ཕྱིར་ཁྲིད་སོང་། ཉེ་ལམ་ལྷ་ས་སྲིད་གྲོས་ནང་ཆེད་དུ་རྐུབ་སྟེགས་བཞག་སྟེ་ཕྱི་ཕྱོགས་ཀྱི་བོད་མི་བསླུ་འགུག་གི་རྒྱ་རྙི་བཙུགས་ཡོད།
བཙན་བྱོལ་བོད་མིའི་སློབ་གྲྭ་ཁག་ནང་སློབ་ཕྲུག་ཇེ་ཉུང་དུ་འགྲོ་བཞིན་པར་རྒྱུ་རྐྱེན་གཙོ་བོ་གསུམ་ཡོད། དང་པོ། ཞི་རྒོལ་ཆེན་མོའི་རྗེས་བོད་ཡུལ་སྟོད་སྨད་བར་གསུམ་རྒྱ་དམག་གིས་ལེབ་གནོན་བྱས། ལག་འཁྱེར་འཐུས་ཚང་མེད་ན་རང་ས་རང་ཡུལ་ནས་ཀྱང་འགུལ་སྐྱོད་རྒྱག་འཇུག་གི་མེད། མཆོད་མཇལ་གནས་སྐོར་དུ་འགྲོ་བར་ཡང་ཁྲིམས་མཐུན་ཡིག་ཆ་མང་པོ་བཟོ་དགོས། གཉིས་པ། བཙན་བྱོལ་ནས་ཕྱིར་བཙན་འོག་ཏུ་ལོག་མཁན་ལོ་རེ་བཞིན་ཇེ་མང་དུ་འགྲོ་བཞིན་ཡོད། གདན་ས་ཁག་དང་སློབ་གྲྭ་ཁག་གི་སློབ་གཉེར་བ་མང་པོ་ཞིག་ཕྱིར་བོད་དུ་ལོག་གི་ཡོད། ལྡི་ལི་རྒྱ་ནག་གཞུང་ཚབ་སྒོ་ཁར་ཉིན་མཚན་གཉིས་ཀར་བོད་དུ་ལོག་བྱེད་ཀྱི་ལག་འཁྱེར་ལེན་མཁན་བང་སྒྲིག་བསྡད་ཡོད། གསུམ་པ། རྒྱ་གཞུང་གིས་ལོ་ངོ་བཅུ་ཕྲག་གོང་ནས་སློབ་གསོའི་ལས་དོན་ཐོག་ཤུགས་རྒྱག་མགོ་ཚུགས་ཡོད། བོད་ཐེ་བའི་གྲངས་ཉུང་མི་རིགས་ས་ཁུལ་དུ་ལོ་དགུའི་འོས་འགན་སློབ་གསོ་རིན་མེད་ཐོག་སྤྲོད་བཞིན་ཡོད། གྲོང་གསེབ་ཀྱི་ཕྲུ་གུ་དག་ཀྱང་བཙན་གྱིས་འཁྲིད་ཡོང་ནས་གཅིག་གྱུར་སློབ་གྲྭར་འཇུག་གི་ཡོད།
ན་ནིང་དང་ད་ལོར་བཙན་བྱོལ་ནང་གསར་འབྱོར་རྐྱང་པ་སློབ་འཇུག་བྱེད་སའི་སློབ་གྲྭ་ཁག་ཅིག་ཀྱང་སྟོང་པ་ཆགས་གྲབས་ཡོད། ཧི་མ་ལ་ཡའི་རི་རྒྱུད་ཀྱི་བཀའ་དྲིན་ལ་ད་སྔ་སློབ་གྲྭ་སྒོ་རྒྱག་དགོས་པའི་གནས་ཚུལ་བྱུང་མེད་མོད། སློབ་ཕྲུག་མང་ཆེ་བའི་བཞིན་མདངས་གཞན་དུ་འགྱུར་ཚར་ཡོད་ལ། བོད་སྐད་ལས་ཧིན་སྐད་ལ་བག་ཆགས་མཐུག་པ་དང་། བོད་ཡིག་ལས་དབྱིན་ཡིག་ལ་སྤྲོ་བ་ཆེ་བའི་ཕྲུ་གུ་མང་པོ་ཞིག་འཚར་ལོངས་འབྱུང་བཞིན་ཡོད། འདི་བོད་པའི་ཆོས་དང་རིག་གཞུང་སྲུང་སྐྱོབ་ཀྱི་དམིགས་རྣམ་སྐྱོང་སྟངས་གཞན་ཞིག་ཡིན་སྲིད་མོད། ཤེས་ཡོན་སྲིད་བྱུས་གསར་པའི་དགོངས་དོན་མངོན་འགྱུར་ལ་ལམ་ཐག་རྦད་དེ་ཇེ་རིང་དུ་ཕྱིན་སོང་།
རྒྱ་གཞུང་གིས་བོད་ནང་གི་བོད་ཕྲུག་ཚོར་ཤེས་ཡོན་རིན་མེད་ཐོག་སྤྲོད་ཐུབ་ན། ང་ཚོས་བཙན་བྱོལ་ནས་སོ་སོའི་ཕྲུ་གུར་ཅིའི་ཕྱིར་ཤེས་ཡོན་རིན་མེད་ཐོག་སྤྲོད་མ་ཐུབ་པ་རེད། ཕར་ཕྱོགས་ཀྱི་རྔ་རྡུང་སྟངས་ལ་གཞིགས་ཏེ་ཚུར་ཕྱོགས་ནས་བྲོ་འཁྲབ་སྟངས་ཤིག་ཡོད་དགོས། ངྷ་རམ་ས་ལ་གཡས་གཡོན་དང་ས་གནས་གཞིས་ཆགས་ཁག་ནང་། བོད་པ་རང་གི་བྱིས་པར་སློབ་ཡོན་མཐོན་པོ་ལེན་པ་དང་ཆ་རྐྱེན་མང་པོ་བགྲང་སྟེ། ཕ་མ་ཉམ་ཐག་ཚོའི་ཕྲུ་གུ་སློབ་གྲྭར་འཇུག་ཐུབ་ཀྱི་མེད་པ་འདི་དག་སློབ་འཇུག་བྱས་ཏེ་ཤེས་ཡོན་རིན་མེད་ཐོག་སྤྲད་ན་ངོ་མཚར་མི་ཆེ་འམ།།
༄། རྒྱ་ནག་གཞུང་གིས་བོད་ནང་ཤེས་ཡོན་རིན་མེད་བཏང་ཏེ་ཕྱི་ཚུལ་ནས་བོད་མིའི་ཞིང་འབྲོག་ཉམས་ཐག་གི་སློབ་གསོར་མཐོང་ཆེན་བྱེད་ཁུལ་ཡིན་ཀྱང་། དོན་དངོས་སུ་བོད་རང་སྐྱོང་ལྗོངས་ནས་འགོ་བཙུགས་ཏེ་ལོ་ངོ་བཅུ་ལྷག་ཕྱིན་པའི་སློབ་གྲྭའི་སློབ་གཞི་རྒྱ་ཡིག་ཅན་དུ་གྱུརཏེ་བོད་མི་རིགས་རྩ་མེད་བཟོ་བའི་སྲིད་བྱུས་ཀྱི་ཆ་ཤས་ཞིག་ཡིན་པ་ང་ཚོས་ཤེས་ཐུབ། ལས་དོན་དེ་ཚོའི་མྱོང་བའི་གྲུབ་འབྲས་ལ་བལྟས་ཏེ་མཚོ་སྔོན་ཕྱོགས་སུའང་སློབ་གཞི་རྒྱ་ཡིག་ཅན་གྱུར་ཏེ་བོད་མི་རིགས་ཀྱི་བསམ་བློ་དེ་མེད་པ་བཟོ་བར་ད་དུང་གང་འདྲ་བྱེད་དགོས་སྙམ་པ་འདི་རེད།