གཟའ་ཕུར་བའི་ཉིན་ཤིན་ཅང་ཡུ་གུར་རང་སྐྱོང་ལྗོངས་ཀྱི་ཁྲིམས་ཁང་གིས། ཡུ་གུར་བ་ ༢༠ ལ་བཙོན་འཇུག་ཁྲིམས་ཐག་བཅད་འདུག
ཟླ་འདིའི་ཕྱི་ཚེས་ ༢ ཉིན་ཤིན་ཅང་ཡུ་གུར་རང་སྐྱོང་ལྗོངས་ཀྱི་ཆེས་མཐོའི་ཁྲིམས་ཁང་གིས། དེ་སྔོན་ཡུ་གུར་ནང་གནས་འཕྲིན་དྲ་རྒྱའི་སྟེང་རྩོམ་ཡིག་དང་གནས་ཚུལ་སྤེལ་མཁན་དང་། ཆོས་ལུགས་སྐོར་གྱི་འོད་སྡེར་དང་དཔེ་དེབ་སོགས་འགྲེམས་མཁན། དེ་བཞིན། ཞི་བའི་རང་དབང་འཐབ་རྩོད་ཀྱི་ལས་འགུལ་སྤེལ་མཁན་སོགས་གྱོད་དོན་ཁག་ལྔ་དང་འབྲེལ་བའི་ཐོག འཇུ་བཟུང་བཀག་བསྐྱིལ་བྱས་ཡོད་པའི་ཡུ་གུར་བ་མི་ ༢༠ ལ་ཁྲིམས་ཐག་བཅད་འདུག
ཤིན་ཅང་ཡུ་གུར་རང་སྐྱོང་ལྗོངས་ཀྱི་ས་གནས་ཆེས་མཐོའི་ཁྲིམས་ཁང་གིས། ཁྲིམས་གཅོད་བརྒྱུད་རིམ་ཁྲོད་ཤིན་ཅང་ནང་སྔ་རྗེས་བྱུང་བའི་གྱོད་དོན་ཁག་ལྔ་ལས། གྱོད་དོན་ཁག་བཞི་ལ་རྩ་འཛུགས་དང་སྣེ་ཁྲིད་ཡོད་པའི་ཐོག་ནས་དྲག་སྤྱོད་རྩ་འཛུགས་ཁྲོད་ཞུགས་པའི་ཉེས་མིང་དང་། གྱོན་དོན་ཁག་གཅིག་ལ་རྒྱལ་ཁབ་ཁ་བྲལ་དུ་གཏོང་བའི་ཉེས་མིང་བཏགས་སྟེ། བཙོན་འཇུག་དུས་ཡུན་ཐུང་ཤོས་ལོ་ ༡ དང་ཟླ་ ༦ དང་། རིང་ཤོས་ལོ་ ༡༥ བར་གྱི་ཁྲིམས་ཐག་བཅད་ཡོད་པ་རེད།
འཛམ་གླིང་ཡུ་གུར་མཐུན་ཚོགས་ཀྱི་མགྲིན་ཚབ་པ་ཏིས་ལིས་ཞ་ཏིས་ལགས་ཀྱིས། “ས་གནས་ས་ཐོག་ནས་གནས་ཚུལ་མཁོ་སྤྲོད་བྱུང་པ་ལྟར་ན། ཡུ་གུར་བ་དེ་དག་ལ་ཁྲིམས་ལུགས་གཞིར་བཟུང་ཞུ་གཏུགས་དང་། རང་དབང་ཐོག་ཁྲིམས་རྩོད་པ་བཙལ་རྒྱུའི་ཁེ་དབང་སྤྲད་མེད་པ་རེད། ” ཅེས་བརྗོད་དེ། རྒྱ་གཞུང་གིས་དྲག་སྤྱོད་པར་བཀག་སྡོམ་བྱ་བཞིན་པར་ཁ་གཡར་ཏེ། རང་དབང་བརྩོད་ལེན་དང་། གནས་འཕྲིན་དྲ་རྒྱའི་སྟེང་རྒྱ་གཞུང་གི་ལངས་ཕྱོགས་དང་མི་མཐུན་པའི་ཆབ་སྲིད་ལྟ་གྲུབ་གླེང་སློང་བྱེད་མཁན་ཡུ་གུར་བ་རྣམས་ལ་ཁྲིམས་ཐག་ལྕི་མོ་བཅད་དེ། རྒྱ་གཞུང་རང་གི་མི་སེར་སྤེལ་བའི་དབང་སྒྱུར་སྲིད་ཇུས་ཀྱི་དམིགས་ཡུལ་སྒྲུབ་ཐབས་བྱེད་ཀྱིན་ཡོད་པ་བརྗོད་འདུག
