རྒྱ་གཞུང་གིས་རྒྱལ་གཅེས་དཔའ་བོ་རོང་རྒྱས་ཨ་གྲཊ་ལགས་ལ་བཙོན་ཁང་དུ་སྡུག་སྦྱོང་མནར་གཅོད་བཏང་སྟེ་གཟུགས་པོའི་གནས་སྟངས་སྐྱོ་བོ་ཆགས་ཡོད་འདུག
ཕྱི་ལོ་ ༢༠༠༧ ལོའི་ཕྱི་ཟླ་ ༨ པའི་ཚེས་ ༡ ཉིན་སྟེ། རྒྱ་ནག་གི་དམག་བཙུགས་དུས་ཆེན་དང་ལི་ཐང་རྫོང་རྟ་རྒྱུགས་དུས་ཆེན་གྱི་མཛད་སྒོའི་ཐོག རྒྱལ་གཅེས་དཔའ་བོ་རོང་རྒྱས་ཨ་གྲཊ་ལགས་ཀྱིས་རྒྱ་ནག་གི་མགོ་ཁྲིད་དང་མི་མང་སྟོང་ཕྲག་མང་པོ་འདུ་འཛོམས་སར། ༸གོང་ས་མཆོག་བོད་མི་ས་ཡ་དྲུག་གི་མགོན་སྐྱབས་ཡིན་པ་དང་། ༸གོང་ས་མཆོག་མགྱོགས་མྱུར་བོད་ལ་གདན་འདྲེན་ཞུ་དགོས་པ། ༸པཎ་ཆེན་སྐུ་ཕྲེང་བཅུ་བའི་ཡང་སྲིད་དགེ་འདུན་ཆོས་ཀྱི་ཉི་མ་མཆོག་དང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྣམ་གཉིས་ཀློད་གྲོལ་གཏོང་དགོས་པའི་གཏམ་བཤད་སྤེལ་སྟབས། ཉིན་དེར་ཉེན་རྟོག་པས་ཁོང་འཛིན་བཟུང་བཙན་ཁྲིད་བྱས་ཏེ། ལོ་དེའི་ཕྱི་ཟླ་ ༡༡ པའི་ནང་དཀར་མཛེས་བོད་རིཊ་རང་སྐྱོང་ཁུལ་འབྲིང་རིམ་ཁྲིམས་ཁང་གིས་ཁོང་ལ།རྒྱལ་ཁབ་ཁ་བྲལ་དང་སྤྱི་ཚོགས་བརྟན་བརླིང་ལ་གནོད་སྐྱོན་བཟོས་པའི་ཉེས་མིང་འོག ལོ་ ༨ དུས་བཀག་བཙོན་འཇུག་གི་ཁྲིམས་ཐག་བཅད་དེ་སི་ཁྲོན་མེན་ཡཱང་བཙོན་ཁང་དུ་བཙོན་འཇུག་བྱས་ཡོད་པ་ལྟར། འདས་པའི་ལོ་ ༥ རིང་རྒྱ་གཞུང་གིས་བཙོན་ཁང་དུ་ཁོང་ལ་སྡུག་སྦྱོང་མནར་གཅོད་རབ་དང་རིམ་པ་བཏང་སྟེ་གཟུགས་པོའི་གནས་སྟངས་སྐྱོ་བོ་ཆཊ་ཡོད་འདུག
འདིའི་ཐད་གསར་འགོད་པས་ཁ་པར་བརྒྱུད་རྒྱ་གར་ལྷོ་ཕྱོགས་གནས་སྡོད་ཁོང་གི་ཚ་བོ་བོད་མི་མང་སྤྱི་འཐུས་ཨ་ཀྲུག་ཚེ་བརྟན་ལགས་སུ་བཅར་འདྲི་ཞུས་ཡོད་ཅིང་། ཁོང་གིས་བརྗོད་དོན་ལྟར་ན། རྒྱ་ནག་གཞུང་གིས་རྒྱལ་གཅེས་དཔའ་བོ་རོང་རྒྱས་ཨ་གྲཊ་ལགས་ཐོག་མའི་བཙོན་འཇུག་སྐབས་ཉེས་རྡུང་ཚབས་ཆེན་བཏང་ཡོད་པ་མ་ཟད། ལོ་ ༥ བཙོན་འཇུག་གི་རིང་སྐབས་དང་སྐབས་སུ་ཉེ་རྡུང་བཏང་སྟེ། ཉེ་ལམ་ནང་མིས་གནས་ཚུལ་ཤེས་རྟོགས་བྱུང་སྐབས། ཁོང་གི་མིག་ཡ་གཅིག་གིས་མཐོང་གི་མེད་པ་དང་། རྣ་བ་ཡ་གཅིག་གིས་གཏན་ནས་མི་གོ་བའི་གནས་སུ་གྱར་ཡོད་པ་དང་། ད་དུང་རྐང་པ་ནད་པ་ཆགས་ཏེ་གཟུགས་པོས་ལྕོགས་ཀྱི་མེད་པའི་གནས་སྟངས་ཆགས་ཡོད་འདུག་ལ། ད་ལྟའི་ཆར་རྒྱ་གཞུང་གིས་ཁོང་བཙོན་པ་གཞན་དང་མི་འདྲ་བར་དམིགས་བསལ་བཀག་ཉར་དོ་དམ་བྱེད་ཀྱི་ཡོད་འདུག
རྒྱལ་གཅེས་དཔའ་བོ་རོང་རྒྱས་ཨ་གྲགས་ལགས་ཀྱིས། ༢༠༠༧ ལོའི་ཕྱི་ཟླ་ ༨ པའི་ཚེས་ ༡ ཉིན་གྱི་མཛད་སྒོའི་གར་སྟེགས་ཐོག་ཕྱིན་སྟེ་གཏམ་བཤད་བྱས་པའི་བརྙན་པར་འཇར་མན་རྒྱལ་ཁབ་ཀྱི་ཡུལ་སྐོར་སྤྲོ་འཆམ་པ་ཞིག་བརྒྱུད་དེ་ལག་སོན་བྱུང་ཡོད་པའི་ནང་། རོང་རྒྱས་ཨ་གྲགས་ལགས་ཀྱིས་སྐབས་དེར་ས་གནས་མི་མང་ལ། “ གནས་ཚུལ་འདི་ང་ཚོའི་ལུས་ཐོག་ན་བྱུང་བཞིན་ཡོད། ཁྱེད་ཚོས་ང་ཚོའི་ལུས་ཐོག་ན་ཅི་ཞིག་བྱུང་བཞིན་པ་ཨེ་ཤེས་སམ། ང་ཚོས་རང་གི་ལུས་པོ་འགུལ་སྐྱོད་ཐུབ་ནའང་། ང་ཚོའི་སེམས་ཀྱི་སྐད་ཆ་བཤད་ཐུབ་ཀྱི་ཡོད་པ་མ་རེད། ཁྱོད་ཚོས་ཨེ་ཤེས་སམ། ད་ལྟ་ཁ་ཤས་ཀྱིས་༧གོང་ས་སྐྱབས་མགོན་ཆེན་པོ་མཆོག་དགོས་མེད་ཡིན་ཚུལ་བཤད་ཀྱི་ཡོད། ༧གོང་ས་སྐྱབས་མགོན་ཆེན་པོ་མཆོག་ནི། ང་ཚོ་བོད་མི་ས་ཡ་དྲུག་གི་དོན་དངོས་ཀྱི་མགོན་སྐྱབས་ཡིན། ”ཞེས་སོགས་ཀྱི་གཏམ་བཤད་སྤེལ་ཡོད་འདུག
གསར་འགོད་པ། དོན་གོ
