དེ་རིང་རྔ་པ་ཀིརྟི་དགོན་པའི་གྲྭ་བ་ཞིག་གིས་རང་ལུས་མེར་བསྲེགས་བཏང་ཡོད་ཀྱང་། དེ་མ་ཐག་རྒྱ་གཞུང་གི་ཉེན་རྟོག་པ་བསླེབས་ཏེ་བཙན་འཁྲིད་བྱས་ཡོད་འདུག
རྒྱ་གར་ལྷོ་ཕྱོགས་འབྲས་སྤུངས་ཟུང་ཆུ་ཁང་ཚན་གྱི་གྲྭ་གསུང་རབ་རྒྱ་མཚོ་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་ཕྱི་དྲོའི་བོད་ནང་གི་ཆུ་ཚོད་ ༥ དང་སྐར་མ་ ༡༠ པའི་སྟེང་རྔ་པ་ཀིརྟི་དགོན་པའི་གྲྭ་བློ་བཟང་འཕྲིན་ལས་ལགས་ཀྱིས་རྔ་པ་རྫོང་ཐོག་གི་དཔའ་བོའི་སྲིང་ལམ་ཞེས་པ་རུ། “ རྒྱལ་བ་རིན་པོ་ཆེ་བོད་མྱུར་དུ་བོད་ནང་ཕེབས་འཇུག་དགོས”ཞེས་པ་སོགས་ཀྱི་སྐད་འབོད་གནང་བཞིན་རང་ལུས་མེར་བསྲེགས་བཏང་ཡོད་འདུག་ལ། དེ་མ་ཐག་རྒྱ་གཞུང་གི་ཉེན་རྟོག་པ་དང་དམག་མི་བསླེབས་ནས་ཁོང་གི་ལུས་ཀྱི་མེད་བསད་དེ་བཙན་ཁྲིད་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། གྲྭ་བློ་བཟང་འཕྲིན་ལས་ལགས་ཀྱི་ཕ་ཡུལ་རྔ་མ་རྫོང་ཀིརྟི་མ་ཡུལ་འཚོ་ནས་ཡིན་པ་གསལ་བོ་ཡིན་ཡང་། ཁོང་ད་ལྟ་དགུང་ལོ་ག་ཚོད་ཡིན་མིན་དང་། ནང་མིའི་ལོ་རྒྱུས་སོགས་ཀྱི་ཞིབ་ཕྲའི་གནས་ཚུལ་ད་སྔ་ཤེས་ཐུབ་མ་སོང་། རྒྱ་གཞུང་གིས་ཁ་པར་བརྒྱུད་ལམ་སོགས་བཀག་སྡོམ་བྱས་ཏེ་འབྲེལ་བ་མཐུད་ཐུབ་ཀྱི་མི་འདུག་ཟེར།
