བོད་ཕྱི་ནང་གཉིས་ཀའི་ཆེད་དུ་མུ་མཐུད་དཀའ་ལས་རྒྱག་གི་ཡིན།

གཟའ་ཉིན་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་གི་གོ་སྒྲིག་འོག བཀའ་ཁྲི་བློ་བཟང་སེང་གེ་མཆོག་གིས་བཀའ་ཁྲིས་དམ་འབུལ་ཞུས་ཏེ་ལོ་གཅིག་འཁོར་བའི་སྐབས་དང་བསྟུན་ནས། དུས་དྲན་སྲུང་གཙིའི་ངོ་བོའི་ཐོག་ལྷ་སྲུང་སྤྱན་འདྲེན་དང་སྨོན་ལམ་མཆོད་འབུལ། ལོ་གཅིག་རིང་གི་བཀའ་ཤག་གི་ལས་དོན་གྲུབ་འབྲས་ཁག་སེར་སྐྱ་མི་མང་ལ་སྙན་གསན་བཅས་གནང་སོང་།

འདི་ལོའི་ཕྱི་ཟླ་ ༨ ཚེས་ ༨ ཉིན་ནི་༸གོང་ས་མཆོག་གིས་ཆབ་སྲིད་དང་འཛིན་སྐྱོང་གི་ཐུགས་འགན་ཡོངས་རྫོགས་མི་མང་གིས་བདམས་པའི་མགོ་ཁྲིད་ལ་རྩིས་སྤྲོད་གནང་བ་ལྟར། བཀའ་ཁྲི་བློ་བཟང་སེང་གེ་མཆོག་གིས་དམ་འབུལ་ཞུས་ཏེ་ལོ་གཅིག་འཁོར་བའི་ཉིན་མོ་ཡིན་སྟབས། དབུས་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་གི་གོ་སྒྲིག་ལྟར། ཞོགས་པ་ཆུ་ཚོད་༧པའི་ཐོག་བཀའ་ཁྲི་མཆོག་གིས་གཙོས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་།རང་དབང་ཅན་གྱི་སྡེ་ཚན་ཁག་གི་འགན་འཛིན།ལྷན་ཁང་ཁག་གི་དྲུང་ཆེ་དང་སྤྱི་འཐུས་རྒྱུན་ལས་རྣམ་པ་ལྷན་འཛོམས་ཐོག་དགའ་གདོང་གྲྭ་ཚང་དུ་ཆོས་སྐྱོང་སྤྱན་འདྲེན་དང་།ཆུ་ཚོད་༨།༣༠ཐོག་བཀའ་ཤག་ཚོགས་ཁང་དུ་བསྟན་སྲུང་ཚེ་རིང་མཆེད་ལྔ་སྤྱན་འདྲེན། ཆུ་ཚོད་ ༡༡ སྟེང་ཕྱི་དྲིལ་ཚོགས་ཁང་ནང་བཀའ་བློན་ལྷན་རྒྱས་ལྷན་བཞུགས་ཐོག་ལོ་གཅིག་གི་ལས་བསྡོམས་གསར་འགོད་གསལ་བསྒྲགས། ཉིན་རྒྱབ་ཆུ་ཚོད་ ༡།༣༠ཐོག་གངས་སྐྱིད་སྤྱི་ཐབ་ཚོགས་ཁང་དུ་སྲི་ཞུ་ལས་བྱེད་ཡོངས་ལ་བཀའ་ཁྲི་བློ་བཟང་སེང་གེ་མཆོག་གིས་གསུང་བཤད་བཅས་གནང་སྟེ།  བཀའ་ཁྲིའི་སྲིད་འགན་བཞེས་ཏེ་ལོ་ཧྲིལ་བོ་གཅིག་འཁོར་བའི་དུས་དྲན་སྲུང་གཙི་གནང་ཡོད་པ་རེད།  

སྔ་དྲོའི་མཛད་རིམ་ཁག་ལེགས་པར་གྲུབ་རྗེས། ཕྱི་དྲོ་ཆུ་ཚོད་ ༤ སྟེང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། དཔལ་རྒྱལ་བ་ཀརྨ་པ་དབུ་བཞུགས་ཐོག རྣམ་རྒྱལ་གྲྭ་ཚང་གི་མཁན་རིན་པོ་ཆེ་དང་། སྐྱབས་རྗེ་ཀིརྟི་རིན་པོ་ཆེ། རྒྱུད་སྟོད་གྲྭ་ཚང་གི་མཁན་རིན་པོ་ཆེ། སྐལ་བཟང་རིན་པོ་ཆེ། དེ་བཞིན། དབུས་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་མཆོག་དང་། བཀའ་ཁྲི་མཆོག་གིས་གཙོས་བཀའ་ཤག་ལྷན་རྒྱས་དང་། སྤྱི་འཐུས་ཚོགས་གཙོ་གཞོན་གྱིས་གཙོས་སྤྱི་འཐུས་རྒྱུན་ལས་རྣམ་པ། ལྷན་ཁང་གི་དྲུང་ཆེ་རྣམ་པའི་དབུས་སྲི་ཞུ་ལས་བྱེད་པ་ཡོངས། བཞུགས་སྒར་ཉེ་ཁུལ་གྱི་སློབ་ཕྲུག་དང་སེར་སྐྱ་མང་ཚོགས་བཅས་མི་གྲངས་སྟོང་ཕྲག་འགའ་འདུ་འཛོམས་ཐོག ཟླ་འདིའི་ཕྱི་ཚེས་ ༦ ཉིན་རང་ལུས་མེར་བསྲེགས་བཏང་བའི་བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་ཚུལ་ཁྲིམས་དང་། ཕྱི་ཚེས་ ༧ ཉིན་རང་ལུས་མེར་བསྲེགས་བཏང་བའི་གཙོས་རྟ་གསར་སྡེ་བའི་བུད་མེད་སྒྲོལ་དཀར་འཚོ་རྣམ་གཉིས་ཀྱི་གཙོས། བོད་བསྟན་སྲིད་མི་རིགས་ཀྱི་རྩ་དོན་ཆེད་རང་ལུས་མེར་བསྲེགས་གཏོང་མཁན་ཡོངས་ཀྱི་ཆེད་དུ། བསྔོ་སྨོན་གསོལ་འདེབས་ཀྱི་མཆོད་འབུལ་གཞི་རྒྱ་ཆེན་པོ་ཞིག་གནང་སོང་།

མཆོད་འབུལ་སྨོན་ལམ་གྲུབ་རྗེས་ཐེག་ཆེན་གཙུག་ལག་ཁང་གི་མདུན་ཐང་དུ། སྐུ་མགྲོན་གཙོ་བོར་དཔལ་རྒྱལ་བ་ཀརྨ་པ་གདན་ཞུས་གནང་ཞིང་། བོད་མིའི་སྒྲིག་འཛུགས་ཀྱི་མང་གཙོའི་བ་ཀ་གསུམ་གྱི་མཛད་གཙོ་རྣམ་པའི་གཙོས་སྲི་ཞུ་ལས་བྱེད་ཡོངས་རྫོགས་ལྷན་བཞུགས་ཐོག བཀའ་ཁྲི་བློ་བཟང་སེང་གེ་མཆོག་གིས་ “ ལོ་སྔོན་མའི་ཕྱི་ཟླ་ ༨ ཚེས་ ༨ ཉིན། ས་ཆ་འདི་ག་རང་ལ་བཀའ་བློན་ཁྲི་པའི་དམ་བཅའ་ཕུལ་བ་ནས་ད་ལྟའི་བར་ལོ་གཅིག་འཁོར་བའི་རིང་། བཀའ་ཤག་སྐབས་བཅུ་བཞི་པས་ཕྲན་བུ་ཞབས་ཞུ་ཞུས་པ་དེ་དག་ནི། གཙོ་ཆེ་ཤོས་༸གོང་ས་མཆོག་གི་ཐུགས་རྗེ་བཀའ་དྲིན་དང་། མི་ཐོག་རྒན་པའི་སྐུ་ལས་སྐྱོན་པའི་བཀའ་དྲིན། དེ་བཞིན། རྒྱ་གར་གཞུང་གི་བཀའ་དྲིན་བཅས་ལ་བརྟེན་ནས་བྱུང་བ་རེད། བཀའ་ཤག་སྐབས་བཅུ་བཞི་པའི་ཐོག་ནས་འདས་པའི་ལོ་གཅིག་རིང་ལ་ལས་དོན་འཐུས་ཤོར་ཕྱིན་མེད་ཅེས་སྙན་སེང་ཞུ་རྒྱུ་ཡིན། ད་ལྟའི་བར་དུ་སྤྱི་དམངས་ཀྱིས་འཕྱར་གྲུ་མཉམ་འདེགས་དང་རྡོག་རྩ་ཆིག་སྒྲིལ་གྱི་ཐོག་ནས་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ། དེ་བཞིན། སྲི་ཞུ་བ་རྣམས་ནས་ཀྱང་བཀའ་ཤག་གི་འཆར་གཞི་གཞིར་བཟུང་། ད་ལྟའི་བར་དུ་ཕྱག་ལས་ཡག་པོ་གནང་སོང་བར་བསྔགས་བརྗོད་ཡོད།” ཅེས་གསུངས་སོང་།

བཀའ་ཁྲི་མཆོག་གིས་དམངས་གཙོ་དང་ཞི་བའི་ལམ་གཉིས་གཙོས། ཆིག་སྒྲིལ་དང་གསར་གཏོད། རང་ཁ་རང་གསོ་སྟེ་བཀའ་ཤག་སྐབས་བཅུ་བཞི་པའི་ལྟ་གྲུབ་གསུམ་དང་། བོད་ནང་གི་གནད་དོན་བཅས་དོན་ཚན་ཁག་ལྔའི་ཐད་ནས། འདས་པའི་ལོ་གཅིག་རིང་ལས་དོན་ག་རེ་སྒྲུབ་ཡོད་མེད་སྐོར་ངོ་སྤྲོད་གནང་སྟེ། དམངས་གཙོ་དང་ཞི་བའི་ལམ་ནི་ནམ་ཡང་འགྱུར་བ་མེད་པའི་ལངས་ཕྱོགས་ཤིག་ཡིན་པ་དང་། སྐབས་བཅུ་བཞི་པའི་བཀའ་ཤག་གི་སྲིད་བྱུས་དེ་དབུ་མའི་ལམ་གྱི་ཐོག་རྒྱ་བོད་འབྲེལ་ལམ་གནང་རྒྱུ་རང་འཇགས་གནས་ཡོད་པ། དེ་བཞིན། རང་ལུས་མེར་བསྲེགས་གཏོང་མཁན་རྣམས་ཀྱི་ཁ་ཆེམས་ཀྱིས་མཚོན་པའི་བོད་ནང་གི་གཞས་གཏོང་མཁན་ཡན་ཆད་ཚང་མས་ཆོལ་ཁ་གསུམ་ཆིག་སྒྲིལ་དགོས་པའི་འབོད་སྐུལ་གནང་བཞིན་པ་ལྟར་ཆིག་སྒྲིལ་གལ་ཆེན་ཡིན་པ། ལས་བྱེད་བདམས་སྟངས་དང་དགེ་རྒན་འོས་སྦྱོང་། དྲ་རྒྱའི་བརྒྱུད་ལམ་སོགས་ཀྱི་ཐད་ཐབས་ལམ་ཕྲན་བུ་གསར་གཏོད་གནང་ཡོད་པ། ལྷག་པར་དུ་རང་ཁ་རང་གསོ་གལ་ཆེན་ཡིན་པའི་སྐོར་དམིགས་སུ་བཏོན་ཏེ། བོད་པའི་གཞིས་ཆགས་ཁག་དང་ཁ་འཐོར་མི་མང་ཕལ་ཆེ་བར་གཞན་བརྟེན་གྱི་བསམ་བློ་ཤུགས་ཆེན་པོ་ཡོད་པ་དང་། གཞན་རྟེན་བསམ་བློ་གཞི་ལ་བཞག་སྟེ་བཀའ་མོལ་གནང་སྟངས་ཀྱི་རྐྱེན་པས།  བྱིས་པའི་སེམས་ལ་མདུང་བཙུགས་པ་ནང་བཞིན་སྤོབས་པ་དང་སེམས་ཤུགས་བཅག་འགྲོ་བཞིན་ཡོད་སྟབས། གཞན་རྟེན་གྱི་བསམ་བློ་དོར་ཏེ་རང་ཁ་རང་གསོའི་བསམ་བློ་གཞི་ལ་བཞག་པའི་ཐོག་ནས་ཕྱག་ལ་གནང་བ་ཡིན་ན། རིམ་གྱིས་སྤྱི་ཚོགས་ནང་གོམས་གཤིས་འཇགས་ཏེ་སོ་སོ་རང་ཉིད་ཀྱི་ནུས་པ་ལ་བརྟེན་ནས་འཐབ་བརྩོད་གནང་རྒྱུའི་སྤོབས་པ་སླེབས་ངེས་པའི་སྐོར་གསུངས་ཡོད་པ་རེད།

 བཀའ་ཁྲི་མཆོག་གིས་བོད་ནང་གི་ཛ་དྲག་གནས་སྟངས་སྐོར་ལ། རྒྱ་ནག་གི་མཁྲེགས་འཛིན་སྲིད་ཇུས་འོག་བོད་མིའི་ཐོག་གདུག་རྩུབ་མནར་གཅོད་ཚད་མེད་གཏོང་བཞིན་པར་བརྟེན། བོད་ནང་གི་བོད་མི་རྣམས་ཐབས་ཟད་འུ་ཐུག་ཏུ་གྱུར་ཏེ། རྒྱ་གཞུང་གི་ཆབ་སྲིད་ཀྱི་རྣམ་པ་དེ་རང་ལུས་མེར་བསྲེགས་ཀྱི་ལམ་ནས་གསལ་འདོན་གནང་གི་ཡོད་ལ།  ད་ལྟའི་བར་ཡོངས་ཁྱབ་ཤེས་རྟོག་བྱུང་བའི་རང་ལུས་མེར་བསྲེགས་གཏོང་མཁན་ ༤༦ བྱུང་ཡོད་ལ། ང་ཚོས་ཧ་མ་གོ་བ་རིགས་དེ་ལས་མང་བ་ཡོད་སྲིད་པ་དང་། ཁོང་རྣམ་པའི་མངོན་འདོད་ནི་༸གོང་ས་མཆོག་བོད་ནང་གདན་འདྲེན་ཞུ་དགོས་པ་དང་། བོད་མིར་རང་དབང་དགོས་པ་དེ་ཡིན་པར་མ་ཟད། དེས་བཙན་བྱོལ་བོད་མི་ཚོར་དམིགས་བསལ་གྱི་བརྡ་ལན་ཞིག་སྤྲད་ཡོད་པ་ནི། བོད་མིའི་རང་དབང་ཆེད་ཁོང་ཚོར་ཡོད་པའི་ཚེ་སྲོག་བློས་གཏོང་གི་ཡོད་ལ། འདི་གར་༸གོང་ས་མཆོག་གི་ཞལ་མཇལ་དང་གསུང་ཆོས་ཐོབ་བཞིན་པའི་རང་དབང་དེ་ཁོང་ཚོར་ཡང་ཐོབ་དགོས་པ་དང་། ང་ཚོ་ཚང་མ་ཤ་ཁྲག་གཅིག་པའི་བོད་རིགས་སྤུན་ཟླ་ཡིན་པ་ཐུགས་ལ་ཉར་ཏེ་སྐུ་ལས་སྐྱོན་དགོས་པའི་བརྡ་ལན་སྤྲོད་ཀྱིན་ཡོད་པར་བརྟེན།  ཁོང་ཚོའི་འབོད་སྒྲ་དེ་རྒྱལ་སྤྱིའི་སྒང་ཁྱབ་ཐུབ་པ་ཞིག་བཟོ་དགོས་པ་དེ་ང་ཚོས་ལས་འགན་ཆགས་ཡོད་སྟབས། བཀའ་ཤག་གི་ངོས་ནས་བཀའ་བློན་རྣམས་འཛམ་གླིང་རྒྱལ་ཁབ་ཁག་ནང་ཕྱིན་ཏེ། བོད་ནང་གི་གནས་སྟངས་དྲིལ་བསྒྲགས་ཐད་ཧུར་བརྩོན་གནང་ལྟར་གྲུབ་འབྲས་ཕྲན་བུ་ཐོན་ཡོད་སྐོར་ངོ་སྤྲོད་གནང་ཡོད།

མཇུག་མཐར་བཀའ་ཁྲི་མཆོག་གིས་སྐབས་བཅུ་བཞི་པའི་བཀའ་ཤག་ནང་། ད་ལྟའི་བཀའ་བློན་ལྷན་རྒྱས་རྣམས་ཕན་ཚུན་དམ་ཚིག་མཐུན་སྒྲིལ་གཙང་མ་ཡོད་པ་གསལ་བཤད་དང་སྦྲགས།  “ བཀའ་བློན་ཁྲི་པའི་དམ་འབུལ་མ་གནང་གོང་། སོ་སོའི་ངོས་ནས་དཀའ་ལས་བརྒྱབ་སྟེ་གང་ཐུབ་ཅི་ཐུབ་ཞབས་ཞུ་བསྒྲུབ་རྒྱུའི་དམ་བཅའ་བཞག་ཡོད། མ་གཞི། བཀའ་བློན་ཁྲི་པའི་འོས་གཞིར་མ་ལངས་གོང་ནས་བཀའ་བློན་ཁྲི་པའི་འོས་འགན་དེ་ལྕི་མོ་དང་དཀའ་ལས་ཁག་པོ་ཡིན་པ་ཤེས་ཀྱིན་ཡོད། འགན་བླངས་བའི་རྗེས་ལ་སྔར་བསམ་པ་ལས་ཀྱང་དཀའ་ལས་ཁག་པོ་ཞིག་རེད། ཡིན་ནའང་། འོས་བསྡུའི་སྔོན་གྱི་དམ་བཅའ་དེ་སྔར་བཞིན་རང་འཇགས་གནས་ཡོད་ལ། བོད་ཕྱི་ནང་གཉིས་ཀར་ཡོད་པའི་བོད་མིའི་ཆེད་དུ་མུ་མཐུད་དཀའ་ལས་རྒྱག་གི་ཡིན།” ཞེས་གསུངས་སོང་།