ལམ་སྟོན་ལ་སྒུག་ཡོད།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༦༣ སྟེང་གི་རྩོམ་སྒྲིག་པའི་གཏམ།

བཀའ་ཁྲི་མཆོག་གིས་འདས་པའི་ལོ་གཅིག་གི་ལས་བསྡོམས་ཁྱབ་བསྒྲགས་གནང་སོང་། ལས་བསྡོམས་ནང་བཀའ་ཤག་གསར་པའི་ལས་དོན་གསར་པ་འགའ་དང་། བཀའ་ཤག་རྙིང་པའི་ལས་འཕྲོ་ལྷག་མ་འགའ། གཞི་ནས་མགོ་འཛུགས་དགོས་པའི་ལས་གཞིའི་སྐྱ་ཐིག་འགའ། འཆར་སྣང་ཁྲོད་ཀྱི་རེ་སྨོན་ཁག་ཅིག་བཅས་འཁོད་འདུག བཀའ་ཁྲི་སྔོན་མ་དག་དང་བསྡུར་ན་མང་ཚོགས་ལ་ལས་བསྡོམས་ངོ་སྤྲོད་གནང་སྟངས་འདི་ནང་དོན་གྱི་ཆ་ནས་རྙིང་པ་ཡིན་ཡང་རྣམ་པའི་ཐོག་ནས་གསར་གཏོད་ཅིག་ཏུ་བགྲང་ཆོག་མོད། དེ་སྔའི་ཆིག་སྒྲིལ་དང་གསར་གཏོད་རང་ཁ་རང་གསོ་གསུམ་མག་མོག་རབ་རུབ་ཀྱི་ཚུལ་དུ་བག་ལ་ཉལ་ནས་ལྟ་གྲུབ་ཅིག་གི་ངོ་བོར་འཐིམ་བཞིན་འདུག  

    སྤྱི་ཚོགས་ནང་གི་ལྷགས་པ་རྒྱག་ཕྱོགས་དང་གསར་ལམ་ཁག་ཏུ་དཔྱད་གླེང་གནང་སྟངས་ལ་ཉན་ན། འདས་པའི་ལོ་གཅིག་རིང་གི་བཀའ་ཁྲི་མཆོག་གི་ཕྱི་འབྲེལ་ལས་དོན་ལམ་ལྷོངས་གང་འཚམ་བྱུང་ཡོད་ཚོད་འདུག་ལ། གངས་ཅན་སྐྱིད་གཤོང་ནང་ཁུལ་ལ་འབྲེལ་ལམ་གནང་ཕྱོགས་ཀྱང་ཧ་ཅང་བློ་ལ་འབབ་པོ་བྱུང་ཡོད་ཤག་རེད། ཡིན་ནའང་བཀའ་ཤག་སྐབས་བཅུ་བཞི་བའི་ཤེས་ཡོན་ལམ་སྲོལ་འདི་དང་དཔལ་འབྱོར་འདུ་འགོད་དེ་ཡིན། ཆབ་སྲིད་ལས་འགུལ་འདི་དང་སྤྱི་ཚོགས་བྱེད་སྒོ་དེ་ཡིན་གྱི་ཡིག་ཐོག་གི་འཆར་འགོད་གྲོས་ཚོགས་སུ་ཕུལ་མེད་པ་དང་། བྱ་ལུགས་བྱེད་སྟངས་འདི་ཡིན་ཞེས་མང་ཚོགས་ལ་གསལ་བཤད་ལམ་སྟོན་མེད་པ་དེས་ཁྲིམས་བཟོ་ལྷན་ཚོགས་ཁོམ་ནས་བསྡད་ཡོད་ལ་ས་གནས་མང་ཚོགས་འཐོམ་ནས་ལུས་ཡོད།

    འདས་པའི་བཀའ་ཤག་རིམ་བྱུང་གི་འགྲོ་སྟངས་ལྟར་ན། ཕྱི་ཟླ་དགུ་བའི་ལས་བསྡོམས་བསྐྱར་ཞིབ་ཀྱི་གྲོས་ཚོགས་དང་། ཕྱི་ཟླ་གསུམ་པའི་སྔོན་རྩིས་གཏན་འབེབས་ཀྱི་གྲོས་ཚོགས། དེ་བཞིན་གྲོས་ཚོགས་འཕར་མ་སོགས་ནི་འཛིན་སྐྱོང་བཀའ་ཤག་ལ་ལས་འཆར་ཅི་ཡོད་ཐོག་གྲོས་ཆོད་འཇོག་རྒྱུ་དང་ཁྲིམས་སུ་བཅའ་རྒྱུའི་དུས་ཚོད་ཅིག་དང་།  སྐུ་མདུན་གྱི་འཁྲུངས་སྐར་དང་དམངས་གཙོའི་དུས་དྲན། ཞི་བདེ་གཟེངས་རྟགས་བཞེས་པའི་ཉིན་མོ་སོགས་ནི་བཀའ་ཤག་གི་སྲིད་བྱུས་ལངས་ཕྱོགས་དང། ལས་འཆར་ལམ་སྟོན་ཁག་མི་མང་ལ་ཁྱབ་སྒྱུར་བྱེད་པའི་ཉིན་མོ་ཡིན་ཡང་། བཀའ་ཤག་བཅུ་བཞི་པ་ཁྲིམས་སྒྲིག་གི་རྒྱ་ལས་བརྒལ་ཞིང་མང་ཚོགས་ཀྱི་ཟུར་དུ་ཐོན་ཏེ་ཕྱག་ལས་ཤིག་གནང་གི་མེད་ན་གཞུང་འབྲེལ་ཡིག་ཆའི་སྟེང་ན་ལྟ་རྒྱུ་ཀློག་རྒྱུ་གང་ཡང་མ་མཐོང་།

    སྔར་ལོའི་ཕྱི་ཟླ་དགུ་བའི་གྲོས་ཚོགས་ཚོགས་དུས་གཉིས་པའི་སྐབས། ཚང་མའི་རྣ་བ་གྲུང་གྲུང་གིས་བཀའ་ཁྲིའི་ལས་འཆར་གསར་པ་གང་ཞིག་ཕེབས་རྒྱུར་རེ་སྒུག་བྱས་ཀྱང་། ངག་ཐོག་གི་འགྲེལ་བཤད་རིང་པོ་རེ་ལས་ཡིག་ཐོག་གི་ལས་འཆར་གཅིག་ཀྱང་མ་བྱུང་སྟབས། སྤྱི་འཐུས་མང་པོ་ཞིག་གིས་འཁང་ར་བྱས་ཏེ་ཤོག་བུ་དཀར་པོའི་ངོས་སུ་ཡིག་རུས་ནག་པོ་འཁོད་པའི་སེམས་ལ་འཛིན་རྒྱུའི་ཚིག་ཅིག་དང་རིམ་ལ་བཅུག་རྒྱུའི་བྲོ་ཞིག་དགོས་པའི་གསལ་འདེབས་གནང་ཡོད། ད་ལོའི་ཕྱི་ཟླ་གསུམ་པའི་གྲོས་ཚོགས་ནང་སྔར་བཞིན་བཀའ་ཁྲིས་ལག་སྟོང་མཆན་ལ་བཙིར་ཏེ། རྒྱལ་ཁབ་ག་གེ་མོ་དང་ཁྲིམས་ལུགས་ཆེ་གེ་མོ་ཞེས་ཨ་སྔོན་དབྱིངས་ལ་ལྡིང་སྐོར་བརྒྱབ་ཡོད།

            བཀའ་ཁྲིའི་འོས་མིར་བཞེངས་སྐབས་མི་མང་ལ་ཁས་ལེན་གནང་པ་དང་། བཀའ་ཐམ་སྲིད་ཞི་བདེ་སྐྱིད་མ་བཞེས་སྐབས་༧གོང་ས་མཆོག་ལ་དམ་བཅའ་བཞག་པ་དག་ལས། མགོ་འཛུགས་ཙམ་བྱས་པ་༼ བོད་ཀྱི་སྲིད་བྱུས་ཉམས་ཞིབ་ཁང ༽དང་། གྲགས་འགུལ་ཅི་གང་མེད་པ་༼བོད་ཀྱི་མཉམ་སྡེབ ༽། དེ་བཞིན་༼ བཙན་བྱོལ་ནང་ཁྱད་ལས་པ་ཆིག་ཁྲི་དང་བོད་ནང་ཆིག་འབུམ ༽། ༼༢༠༡༣ ལོར་༧གོང་ས་བཅུ་བཞི་བ་ཕོ་བྲང་པོ་ཏཱ་ལར་གདན་འདྲེན།༽སོགས་ལའང་གོམ་པ་རྒྱག་ཕྱོགས་འདི་ཡོད་དང་། ལག་བསྟར་བྱེད་སྟངས་དེ་ཡིན་གྱི་ལམ་སྟོན་ཞིག་ཕེབས་རོགས།