ཉེ་ཆར་རྒྱ་གཞུང་གི་གནད་ཡོད་མཐོ་རིམ་མི་སྣ་རྣམས་པའེ་ཏའེ་ཧི་རུ་འདུས་ཏེ། སྐབས་རྗེས་མའི་དཔོན་རིཊ་གསར་བ་འདེམས་སྒྲུག་ཐོག་ནང་ཁུལ་དབང་ཤུཊ་འཐབ་རྩོད་མགོ་འཛུཊ་བྱས་ཡོད་སྟབས། རྒྱལ་སྤྱིའི་སྤྱི་ཚོཊ་ཀྱིས་རྒྱ་གཞུང་གི་གཡོ་འགུལ་ཐད་གླེང་སློང་སྣ་ཚོཊ་བྱེད་བཞིན་ཡོད།
ཟླ་འདིའི་ཕྱི་ཚེས་ ༥ ཉིན་རྒྱ་ནག་གཞུང་འབྲེལ་བརྙན་འཕྲིན་(CCTV)གྱིས། རྒྱ་ནག་གི་སྲིད་འཛིན་གཞོན་པ་ཞི་ཅིན་ཕེན་ཀྱིས་པའེ་ཏའེ་ཧི་རུ་བསྐྱོད་དེ། རྒྱ་གཞུང་གི་གནད་ཡོད་མི་སྣ་ཁག་ལ་ཐུག་འཕྲད་བྱས་པའི་གནས་ཚུལ་དང་། རྒྱ་གཞུང་དབུས་ཆབ་སྲིད་ལྷན་ཁང་གི་འཐུས་མི་ལིག་ཡེན་ཏུང་དང་། རྒྱ་ནག་དབུས་རྩ་འཛུགས་སྡེ་ཁག་གི་མགོ་གཙོ་ལིས་ཡོན་ཁྲའོ། རྒྱ་གཞུང་དབུས་དམར་ཤོག་གཞུང་ལས་ཁང་གི་འགན་འཛིན་ཅིན་ཅིས་ཧྭ། རྒྱལ་སྲིད་སྤྱི་ཁྱབ་ཁང་གི་དྲུང་ཆེ་མཱ་ཁའེ་བཅས་ཀྱང་མཉམ་ཞུགས་བྱས་ཡོད་པ་ཕྱིར་བསྒྲགས་བྱས་ཡོད། ཕྱི་ཟླ་ ༧ ཚེས་ ༣༡ ཉིན་ཅཱང་ཤོག་ཁག་དང་ལྐོག་འབྲེལ་ཡོད་པའི་ཏའོ་ཝེ་གསར་ཁང་གིས་ཀྱང་། རྒྱ་གཞུང་མཐོ་རིམ་མི་སྣས་གནས་ཚུལ་མཁོ་འདོན་བྱས་པ་ལུང་འདྲེན་བྱས་དོན། གསང་བའི་ཚོགས་འདུ་དེའི་འབྲེལ་ཡོད་གོ་སྒྲིག་མི་སྣ་རྣམས་ཉེ་སྔོན་ནས་པའེ་ཏའེ་ཧི་རུ་འབྱོར་ཟིན་པར་མ་ཟད། དེར་མཐུད་ནས་རྒྱ་གཞུང་གི་གནད་ཡོད་མཐོ་རིམ་དཔོན་རིགས་ཀྱང་ས་ཁུལ་དེར་བསྐྱོད་མགོ་བརྩམས་ཡོད་སྐོར་བརྗོད་འདུག
པའེ་ཏའེ་ཧི་ཚོགས་འདུ་དེ་ནི་གཞུང་འབྲེལ་གྱི་རྣམ་པའི་ཐོག་ནས་མ་ཡིན་པར། མཐོ་རིམ་དཔོན་རིགས་རྣམས་གུང་གསེང་གི་རྣམ་པའི་ཐོག་ནས་ཚོགས་ཡོད་ལ། ཚོགས་འདུའི་སྐབས་གཞུང་འཛིན་དཔོན་རིགས་རྣམས་གཙོས། དེ་སྔའི་དཔོན་རིགས་ཟུར་བ། རྒན་རབས་གནད་ཡོད་མི་སྣ་བཅས་འདུ་འཛོམས་ཐོག གསང་བའི་སྒོ་ནས་ནང་ཁུལ་ཤོག་ཁག་བར་དབང་ཤུགས་འཐབ་རྩོད་བྱས་ཏེ། སོ་སོའི་ཕྱོགས་གཏོགས་མི་སྣ་བསྐོ་འཐེན་གྱིས་དཔོན་རིགས་གསར་བ་འདེམས་སྒྲུག་དང་། མ་འོངས་པའི་ལོ་ ༡༠ སྲིད་ཇུས་ཁ་ཕྱོགས་གཏན་འབེབས་བྱས་རྗེས། འདི་ལོའི་ལོ་མཇུག་གི་སྐབས་ ༡༨ པའི་ཚོགས་ཆེན་སྟེང་ཡོངས་ཁྱབ་ཕྱིར་བསྒྲགས་བྱ་དགོས་སྟབས། དོན་གྱིས་རྒྱ་གཞུང་གི་མི་དམངས་འཐུས་མི་ཚོགས་ཆེན་དང་སྲིད་གྲོས་ཚོགས་ཆེན་གཉིས་ལས་ལྷག་པའི་ཤུགས་རྐྱེན་ཆེན་པོ་ལྡན་ཡོད།
པའེ་ཏའེ་ཧི་ཚོཊ་འདུའི་གྲོས་གཞི་གཉིས།
པའེ་ཏའེ་ཚོགས་འདུའི་ཐོག་གི་གླེང་གཞི་གཙོ་བོ་གཉིས་ནི། སྐབས་རྗེས་མའི་ཆབ་སྲིད་ལྷན་ཁང་གི་ཆེས་མཐོའི་རྒྱུན་ལས་དང་འཐུས་མི་འདེམས་སྒྲུག་བྱ་རྒྱུ་དང་། མ་འོངས་པའི་ལོ་བཅུའི་རིང་གི་གཞི་རྩའི་ཆབ་སྲིད་ལངས་ཕྱོགས་གཏན་འབེབས་བྱ་རྒྱུ་ཡིན་ལ། ཧོང་ཀོང་གསར་ལམ་ཁག་གིས་གནས་ཚུལ་སྤེལ་བ་ལྟར་ན། ད་ལྟའི་ཆར་རྒྱུན་ལས་མི་དྲུག་གཏན་འབེབས་ཐག་གཅོད་བྱུང་ཟིན་ཡོད་པ་དང་། དེ་དག་ནི་ཞི་ཅིན་ཕེན་དང་ལི་ཁི་ཆང་། ལིས་ཡོན་ཁྲའོ། ཡུས་ཀྲིན་ཧྲིན། ཀྲང་ཏིག་ཅང་། ཝང་ཀྲི་ཧྲན་བཅས་ཡིན་ལ། མཐའ་མའི་ས་མིག་གཅིག་དེར་རྒྱ་གཞུང་དབུས་དྲིལ་བསྒྲགས་སྡེ་ཁག་གི་མགོ་གཙོ་ལིག་ཡོན་ཧྲན་དང་། ཀུང་ཏུང་ཞིང་ཆེན་གྱི་དམར་ཤོག་དྲུང་ཆེ་ཝང་ཡཱང་། ཐེན་ཅིན་གྲོང་ཁྱེར་གྱི་དམར་ཤོག་དྲུང་ཆེ་ཀྲང་ཀའོ་ལིན་གསུམ་གྱི་བར་འཐབ་རྩོད་བྱ་རྒྱུ་ཡིན་འདུག
སྲིད་དོན་དབྱེ་ཞིབ་པ་དག་གིས་དཔྱད་བརྗོད་སྤེལ་བ་ལྟར་ན། ཆབ་སྲིད་ལྷན་ཁང་གི་ད་ལྟའི་རྒྱུན་ལས་མི་དགུ་ནས་བདུན་ལ་ཇེ་ཉུང་དུ་གཏོང་རྒྱུའི་བསམ་ཚུལ་དེ་ནི་ཝུན་ཇ་པའོ་ཡིས་བཏོན་པ་དང་། དེར་ཧུའུ་ཅིན་ཐའོ་ཡི་རྒྱབ་སྐྱོར་དང་ཞིས་ཅིན་ཕེན་གྱིས་མོས་མཐུན་བྱས་ཡོད་འདུག གལ་སྲིད་དེ་གཏན་ཁེལ་བྱུང་ཚེ། ཁྲིམས་སྲིད་སྡེ་ཁག་དང་དྲིལ་བསྒྲགས་སྡེ་ཁག་གཉིས་ཕྱིར་འཐེན་བྱ་དགོས་སྟབས། ཅཱང་ཧུའུ་ཤོག་ཁག་གཉིས་བར་དབང་ཤུགས་འཐབ་རྩོད་ཀྱི་རྐྱེན་པས་དངོས་སུ་གཏན་ཁེལ་བྱུང་ཐུབ་མེད་པ་རེད། རྒྱུན་ལས་མི་དགུ་རང་འཇགས་ཐོག་འཇོག་དགོས་བྱུང་ཚེ། ལིག་ཡོན་ཧྲན་དང་ཝང་ཡཱང་། ཀྲང་ཀའོ་ལིན་གསུམ་རྒྱུན་ལས་ཁྲོད་ཚུད་རྒྱུ་ཡིན་པའི་ཚོད་དཔག་བྱེད་ཀྱི་ཡོད་པ་རེད།
ཝང་ཡཱང་དང་རྒྱ་གཞུང་གི་ཁ་ཕྱོཊ།
ཕྱི་ཟླ་ ༥ ཚེས་ ༩ ཉིན་ཀུང་ཏུང་ཞིང་ཆེན་དམར་ཤོག་དྲུང་ཆེ་ཝང་ཡཱང་གིས། ས་གནས་ཞིང་ཆེན་གྱི་དམར་ཤོག་འཐུས་ཚོགས་སྐབས་ ༡༡ པའི་ཐོག བཅོས་བསྒྱུར་ནི་དམར་ཤོག་ཚོགས་པ་དང་སྲིད་གཞུང་ནས་མགོ་བརྩམ་དགོས་པ་དང་། མི་དམངས་ཀྱི་བདེ་སྐྱིད་ནི་དམར་ཤོག་ཚོགས་པ་དང་སྲིད་གཞུང་གི་བཀའ་དྲིན་ལས་བྱུང་བར་བརྗོད་པའི་ནོར་འཁྲུལ་གྱི་འདུ་ཤེས་མེད་པ་བཟོ་དགོས་པ། དམར་ཤོག་མཐོ་རིམ་དཔོན་རིགས་ཚོས་མི་སྒེར་གྱི་དཔལ་འབྱོར་མ་དངུལ་ཡོངས་བསྒྲགས་བྱ་དགོས་པའི་གཏམ་བཤད་སྤེལ་བར་མ་ཟད། ཝུའུ་ཁེན་སྡེ་བའི་གནད་དོན་མི་མང་གི་འོས་བསྡུའི་ལམ་ནས་ཐག་གཅོད་དང་། ཀུང་ཀྲིག་གྲོང་ཁྱེར་གྱི་བཟོ་བའི་མཐུན་ཚོགས་ཐད་ཀར་འོས་བསྡུའི་ལམ་ནས་བསྐོ་འཇོག་སོགས་བྱས་ཏེ། རྒྱ་གཞུང་གི་ད་ལྟའི་ཆབ་སྲིད་ལམ་ལུགས་ལ་བཅོས་བསྒྱུར་བྱ་དགོས་པའི་རྣམ་འགྱུར་གསལ་སྟོན་བྱས་ཡོད་སྟབས། ཐེངས་འདིའི་རྒྱ་གཞུང་གི་དཔོན་རིགས་གསར་འདེམས་ཁྲོད། ཝང་ཡཱང་ཆབ་སྲིད་ལྷན་ཁང་གི་རྒྱུན་ལས་ཁྲོད་སླེབས་ཐུབ་མིན་དེ་ནི། མ་འོངས་པར་རྒྱ་གཞུང་གི་ཆབ་སྲིད་ལམ་ལུགས་བཅོས་སྒྱུར་ཐུབ་མིན་གྱི་འགག་རྩར་ངོས་འཛིན་གནང་གི་ཡོད།
ཟླ་འདིའི་ཚེས་ ༡ ཉིན་རྒྱ་གཞུང་དམར་ཤོག་དུས་དེབ་༼ ཆིག་ཧྲི༽ཐོག་གློ་བུར་དུ་ཝང་ཡཱང་གཙོར་འདོན་གྱིས་གནས་ཚུལ་སྤེལ་ཡོད་སྟབས། ཆབ་སྲིད་དབྱེ་ཞིབ་པ་དག་གིས་རྒྱ་གཞུང་གིས་པའེ་ཏའེ་ཧི་ཚོགས་འདུའི་སྐབས་དང་བསྟུན་ཏེ། དེ་སྔོན་ཞིས་ཅིན་ཕེན་དང་ལི་ཁི་ཆང་གཉིས་ཧུའུ་ཅིན་ཐའོ་དང་ཝུན་ཇ་པའོ་གཉིས་ཀྱི་ཚབ་བྱ་རྒྱུའི་སྒྲོམ་གཞིར་འགྱུར་ལྡོག་འབྱུང་བཞིན་པའི་བརྡ་ལན་ཞིག་ཡིན་པའི་དོགས་སློང་བྱས་ཡོད་པ་མ་ཟད། མ་འོངས་པར་ཞིས་ཅིན་ཕེན་དམར་ཤོག་སྤྱི་ཁྱབ་དྲུང་ཆེ་དང་རྒྱལ་ཁབ་ཀྱི་སྲིད་འཛིན། ཝང་ཡཱང་རྒྱལ་ཁབ་ཀྱི་སྲིད་བློན། ལི་ཁི་ཆང་མི་དམངས་འཐུས་མིའི་ཚོགས་ཆེན་གྱི་རྒྱུན་ལས་ཚོགས་གཙོ་དང་སྲིད་གྲོས་དྲུང་ཆེ་བཅས་སུ་བསྐོ་འཇོག་བྱ་སྲིད་པའི་ཚོད་དཔག་དང་། གལ་སྲིད་ཝང་ཡཱང་རྒྱུན་ལས་འོས་མིའི་ཁྲོད་ནས་མར་ཟེགས་ཚེ། རྒྱ་གཞུང་གི་སྐབས་རྗེས་མའི་དཔོན་རིགས་གསར་བའི་དུས་ཡུན་ནང་། རྒྱ་གཞུང་གི་ཆབ་སྲིད་གནས་སྟངས་སྔར་ལས་ཇེ་མཁྲེགས་སུ་འགྲོ་རྒྱུ་ཡིན་པ་མ་ཟད། མ་འོངས་རྒྱ་ནག་དཔོན་རིགས་ནང་ཁུལ་གྱི་འཐབ་རྩོད་ཀྱང་ཛ་དྲག་ཏུ་འགྲོ་སྲིད་སྐོར་རྗོད་ཀྱི་ཡོད།
ཧུའུ་ཅིན་ཐའོ་ཡི་དམིཊ་རེ་འགའ།
ཐེངས་འདིའི་པའེ་ཏའེ་ཧི་ཚོགས་འདུའི་སྐབས་ཧུའུ་ཅིན་ཐའོ་ཡི་རྩོད་ལེན་བྱེད་བཞིན་པའི་དམིགས་ཡུལ་གཙོ་བོ་གཉིས་ནི། ཚོགས་ཆེན་སྐབས་ ༡༨ པའི་ཐོག་དཔོན་རིགས་གསར་རྙིང་བརྗེ་སྤོར་བྱས་རྗེས། མུ་མཐུད་དུ་ལོ་གཉིས་རིང་དམག་ཁུལ་གྱི་དབང་ཆ་སྒེར་ཉར་བྱ་རྒྱུ་དང་། ཁོ་རང་གིས་བཏོན་པའི་ཚན་རིག་དང་མཐུན་པའི་འཕེལ་རྒྱས་ཀྱི་ལྟ་བ་དེ། སྐབས་རྗེས་མའི་ཚོགས་ཆེན་ཐོག་དམར་ཤོག་ཚོགས་པའི་རྩ་འཛིན་ཡིག་ཆའི་ནང་འཇོག་ཐབས་བྱ་རྒྱུ་དེ་ཡིན་འདུག
ཉེ་ཆར་རྒྱ་གཞུང་དབུས་དམག་སྤྱི་ལྷན་ཁང་གི་མགོ་གཙོ་གཞོན་པ་ ༢ དང་། འཐུས་མི་ ༨ ཀྱིས་མཉམ་འབྲེལ་ཐོག ཧུའུ་ཅིན་ཐའོ་ཡིས་རྒྱ་ནག་དམག་ཁུལ་གྱི་ཆེས་མཐོའི་དབང་འཛིན་པའི་འགན་མུ་མཐུད་འཁུར་དགོས་པའི་སྙན་ཞུ་ཞིག་ཕུལ་ཡོད་པ་མ་ཟད། ཕྱི་ཟླ་ ༧ པའི་ནང་རྒྱ་ནག་གི་དབུས་མཚོ་དམག་དང་མཁའ་དམག དེ་བཞིན། ལན་ཀྲུག་དམག་ཁུལ། ཀུང་ཀྲུག་དམག་ཁུལ། ཁྲིན་ཏུའུ་དམག་ཁུལ། ཧོང་ཀོང་བཅའ་སྡོད་དམག་དཔུང་སོགས་དམག་ཁུལ་ཆེ་ཁག་གི་དམག་དཔོན་ ༡༤ ལྷག་གློ་བུར་དུ་བརྗེ་སྤོ་བྱས་ཡོད། སྲིད་དོན་དབྱེ་ཞིབ་པ་དག་གིས་དེ་ནི་ཧུའུ་ཅིན་ཐའོ་ཡིས་རྒྱ་ནག་གི་དམག་ཁུལ་གྱི་དབང་ཤུགས་ལོ་ ༢ རིང་མུ་མཐུན་ཉར་རྒྱུ་དེ་གཏན་ཁེལ་ཟིན་པའི་རྣམ་འགྱུར་གསལ་བོ་ཞིག་ཡིན་སྐོར་བརྗོད་ཡོད།
གཞན་ཡང་། སྐབས་ ༡༨ པའི་དཔོན་རིགས་གསར་བ་འདེམས་སྒྲིག་གི་འཐབ་རྩོད་ཁྲོད། ཧུའུ་ཅིན་ཐའོ་ཡི་ཤོ་རྡེའུ་གལ་ཆེན་གཅིག་ནི་ནང་སོག་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཧུའུ་ཁྲོན་ཧྭ་ཡིན་པ་དང་། ཧུའུ་ཁྲོན་ཧྭ་ནི་ད་ལྟའི་བར་ཧུའུ་ཡིས་ཐད་ཀར་བསྐོ་འཐེན་བརྒྱུད་སྐྱེད་སྲིང་བྱས་པ་ཞིག་ཡིན་པ་མ་ཟད། མ་འོངས་པར་རྒྱ་གཞུང་གི་ཆེས་མཐོའི་དབང་འཛིན་པར་འཇོག་རྒྱུའི་དམིགས་ཡུལ་བཟུང་ཡོད་པ་རེད།
ཕྱི་ཚེས་ ༨ ཉིན་ཧྥ་རན་སིའི་རླུང་འཕྲིན་ཁང་གིས་གནས་ཚུལ་སྤེལ་བའི་ནང་། ཐེངས་འདིར་ཧུའུ་ཡིས་ཧུའུ་ཁྲོན་ཧྭ་སྐབས་རྗེས་མའི་རྒྱུན་ལས་མི་ ༧ གྲས་སུ་བསླེབ་རྒྱུར་ཐབས་ཤེས་བྱེད་བཞིན་ཡོད་ལ། གལ་སྲིད་ཧུའུ་ཁྲོན་ཧྭ་རྒྱུན་ལས་ནང་བསླེབ་ཐུབ་པ་བྱུང་ཚེ། ཁོ་རང་ཆབ་སྲིད་ལྷན་ཁང་གི་རྒྱུན་ལས་ཁྲོད་ནས་ལོ་ཆུང་ཤོས་ཏེ་ཆགས་ཡོད་སྟབས། མ་འོངས་པར་རྒྱ་གཞུང་གི་ཆེས་མཐོའི་དབང་འཛིན་པ་ཆགས་རྒྱུར་རེ་བ་ཆེན་པོ་ཡོད་པ་དང་། མ་མཐར་ཡང་ཚོགས་ཆེན་ ༡༨ པའི་ཐོག་ཧྲང་ཧེ་གྲོང་ཁྱེར་གྱི་དམར་ཤོག་དྲུང་ཆེ་རུ་བསྐོ་འཐེན་བྱ་རྒྱུ་ཡིན་སྐོར་བརྗོད་འདུག
གསར་འགོད་པ། ཚེ་རིང་རྒྱལ།
༼བོད་ཀྱི་དུས་བབ་ཚགས་པར་ལས་འདིར་བདམས་བཀོད་བྱས།༽
