ཆོས་དབྱངས་སྐྱིད་ཀྱིས་ཟངས་ཀྱི་རྟགས་མ་བླངས་སོང་།

དོ་དགོང་འཛམ་གླིང་ལོན་ཊོན་ཨོ་རྩེད་ཀྱི་སྤྱི་ལེ་ ༢༠ ཅན་གྱི་བུད་མེད་འདུར་རྒྱུག་ཁྲོད། བོད་པའི་བུ་མོ་ཆོས་དབྱངས་སྐྱིད་ལགས་ཀྱིས་ཟངས་ཀྱི་རྟགས་མ་བླངས་སོང་། 

དོ་དགོང་རྒྱ་གར་གྱི་ཆུ་ཚོད་ ༩ ། ༣༠ སྟེང་ལོན་ཌོན་རྒྱལ་སྤྱིའི་ཨོ་ལིམ་པིག་རྩེད་འགྲན་ལས་སྤྱི་ལེ་ ༢༠ ཅན་གྱི་བུད་མེད་འདུར་རྒྱུག་འགྲན་བསྡུར་མགོ་འཛུགས་བྱས་ཤིང་། ཆུ་ཚོད་ ༡༡ མ་ཟིན་ཙམ་ལ་འགྲན་བསྡུར་མཇུག་སྒྲིལ་ཡོད་པ་དང་། བོད་རིགས་བུ་མོ་ཆོས་དབྱངས་སྐྱིད་ལགས་ཀྱིས་ཨང་གསུམ་པའི་རྒྱལ་ཁ་བླངས་ཏེ། འཛམ་གླིང་ཨོ་རྩེད་འགྲན་བསྡུར་ཁྲོད་ཟངས་ཀྱི་རྟགས་མ་ལེན་མཁན་བོད་རིགས་ལུས་རྩེད་པ་ཐོག་མ་དེ་ཆགས་ཡོད་པ་རེད།

དོ་ནུབ་ཀྱི་འགྲན་བསྡུར་ཁྲོད་ར་ཤི་ཡའི་བུ་མོ་(Lashimanova Elena)ལགས་སུ་ཨང་དང་པོ་གསེར་གྱི་རྟགས་མ་དང་། ར་ཤི་ཡའི་བུ་མོ་(Kaniskina Olga)ལགས་སུ་ཨང་གཉིས་པ་དངུལ་གྱི་རྟགས་མ། བོད་པའི་བུ་མོ་ཆོས་དབྱངས་སྐྱིད་ལགས་སུ་ཨང་གསུམ་པ་ཟངས་ཀྱི་རྟགས་མ་བཅས་ཐོབ་སོང་།

འདུར་རྒྱུག་སྤྱི་ལེ་ ༢༠ ཙམ་ལ་རྒྱུགས་ཡོད་པ་ལས་ཨང་དང་པོའི་མགྱོགས་ཚད་ཆུ་ཚོད་སྐར་མ་(1:25:2)ནང་མཐའ་མའི་ས་ཚིགས་སུ་བསླེབས་ཡོད་པ་དང་། ཨང་གཉིས་པ་(1:25.9)ནང་བསླེབས་ཡོད། ཨང་གསུམ་པ་(1:25:16)ནང་བསླེབས་ཏེ། ཨང་དང་པོ་དང་ཆོས་དབྱངས་སྐྱིད་ཀྱི་བར་སྐར་ཆ་ ༡༤ དང་། ཨང་གཉིས་པ་ཆོས་དབྱངས་སྐྱིད་ཀྱི་བར་སྐར་ཆ་ ༧ བཅས་ཀྱི་ཁྱད་ལས་ཤོར་མེད།  

ཐེངས་འདིའི་རྒྱུག་ལམ་གྱི་གཡས་གཡོན་དུ་བོད་མི་དང་བོད་དོན་རྒྱབ་སྐྱོར་བ་མང་པོས་བོད་ཀྱི་རྒྱལ་དར་དང་བོད་པའི་ཚིག་བརྗོད་འཁོད་པའི་ལ་བ་འདྲ་མིན་གྱོན་ཏེ། བུ་མོ་ཆོས་དབྱངས་སྐྱིད་ལ་དགའ་འབོད་ཞུས་ཡོད་པ་རྒྱ་གར་ནང་གི་བརྙན་འཕྲིན་(SPORTS)དང་། (STAR SPORTS)སོགས་བརྒྱུད་དེ་གསལ་བོར་མཐོང་ཐུབ་པ་མ་ཟད། རྒྱ་གར་ངྷ་རམ་ས་ལ་གཙོས་པའི་ས་གནས་ཁག་དང་། དེ་མིན་ཕྱི་རྒྱལ་ཡུལ་གྲུ་ཁག་བཅས་ཀྱི་བོད་མི་ཚོས་བརྙན་འཕྲིན་དང་དྲ་རྒྱ་སོགས་བརྒྱུད་དེ་བུ་མོ་ཆོས་དབྱངས་སྐྱིད་ཀྱི་འདུར་རྒྱུག་ལ་ལྟད་མོར་བལྟས་ཡོད་འདུག

བོད་རིགས་ལུས་རྩེད་པ་ཆོས་དབྱངས་སྐྱིད་ལགས་སུ། དེ་སྔོན་རྒྱ་ནག་གཞུང་འབྲེལ་ཤིན་ཧྭ་གསར་ཁང་གིས་བཅར་འདྲིའི་སྐབས།  ཁོ་ མོས་ “ང་རང་བོད་རིགས་ཤིག་ཡིན་པའི་ངོས་ནས་འཛམ་གླིང་ཨོ་རྩེད་འགྲན་བསྡུར་ཁྲོད་ཞུགས་ཐུབ་པ་དེ་གཟི་བརྗིད་དུ་སེམས་ཀྱིན་ཡོད། ངས་གྲུབ་འབྲས་ལེགས་པོ་ཞིག་ལོན་ཐུབ་རྒྱུར་འབད་བརྩོན་གནང་གི་ཡིན། ” ཅེས་བརྗོད་ཡོད་པ་རེད།

རྒྱ་གར་ངྷ་རམ་ས་ལར་བརྙན་འཕྲིན་བརྒྱུད་བུ་མོ་ཆོས་དབྱངས་སྐྱིད་ཀྱི་འདུར་རྒྱུག་འགྲན་བསྡུར་ལ་ལྟ་མཁན་ཞིག་ལ་ཚོར་བ་ཅི་བྱུང་བཅར་འདྲི་ཞུས་པར། “ངོ་མ་དགའ་བོ་བྱུང་སོང་། བཤད་མི་ཤེས་པའི་དགའ་སྤྲོ་ཞིག་སྐྱེས་སོང་། ངྷ་རམ་ས་ལའི་ཟ་ཁང་མང་ཆེ་བའི་ནང་བོད་མི་མང་པོ་འཛོམས་ཏེ་བརྙན་འཕྲིན་ལ་ལྟ་བཞིན་འདུག མོ་ལ་ཨང་དང་པོ་ཐོབ་མ་ཐག་ཚང་མས་སྐད་བརྒྱབ་སོང་། གཞས་གཏོང་གི་འདུག ཡིན་ནའང་མོ་ལ་བྱ་དགའ་ཐོབ་ཚར་བའི་རྗེས་ལ་བསམ་བློ་བཏང་ན། སེམས་ལ་དགའ་བ་དང་མཉམ་དུ་སྐྱོ་བ་ཞིག་ཀྱང་སྐྱེ་ཡོང་གི་འདུག གང་ཡིན་ཟེར་ན། མོ་རང་ཐེངས་འདིར་རྒྱ་ནག་གི་ལུས་རྩེད་པའི་འཐུས་ཚབ་ཅིག་ཆགས་ཡོད་པ་དང་། བྱ་དགའ་དེ་ཡང་རྒྱ་ནག་(China)ཞེས་པའི་མིང་ཐོག་ནས་བརྩོན་ལེན་བྱེད་དགོས་ཆགས་ཡོད་པ་རེད། གང་ལྟར། བོད་པ་ཞིག་ཨོ་རྩེད་འགྲན་བསྡུར་ནང་ཞུགས་ཐུབ་པ་ཙམ་གྱིས་རླབས་ཆེན་པོ་ཞེ་དྲག་རེད་ལ། རྒྱ་ནག་གི་ཨང་དང་པོ་དང་། འཛམ་གླིང་གི་ཨང་གསུམ་པའི་བྱ་དགའ་ཐོབ་སོང་བ་དེ་བོད་མི་རིགས་ཀྱི་གཟི་བརྗིད་དང་སྤོབས་པ་རེད་དྲན་ཡོད” ཅེས་བརྗོད་སོང་།

འདུར་རྒྱུག་འགྲན་བསྡུར་མགོ་བཙུགས་ཏེ་སྤྱི་ལེ་ ༢ ཕྱིན་མཚམས། བུ་མོ་ཆོས་དབྱངས་སྐྱིད་ཀྱིས་མགྱོགས་ཚད་སྐར་མ་ ༨ དང་སྐར་ཆ་ ༣༩ བླངས་ཏེ་ཨང་ ༡༢ ཆགས་ཡོད་པ་དང་། སྤྱི་ལེ་ ༤ བསྐྱོད་མཚམས་མགྱོགས་ཚད་སྐར་མ་ ༡༧ སྐར་ཆ་ ༢༡ བླངས་ཏེ་ཨང་ ༡༠ དང་། སྤྱི་ལེ་ ༦ བསྐྱོད་མཚམས་མགྱོགས་ཚད་སྐར་མ་ ༢༦ སྐར་ཆ་ ༠༤ བླངས་ཏེ་ཨང་ ༧ ། སྤྱི་ལེ་ ༡༠ བསྐྱོད་མཚམས་མགྱོགས་ཚད་སྐར་མ་ ༤༣ དང་སྐར་ཆ་ ༡༦ བླངས་ཏེ་ཨང་ ༥ ། སྤྱི་ལེ་ ༡༦ བསྐྱོད་མཚམས་མགྱོགས་ཚད་ཆུ་ཚོད་ ༡ སྐར་མ་ ༠༨ སྐར་ཆ་ ༣༤ བླངས་ཏེ་ཨང་ ༣ པར་སླེབས་ཤིང་། མཐའ་མའི་ས་ཚིགས་སུ་སྐབས་མགྱོགས་ཚད་ཆུ་ཚོད་ ༡ སྐར་མ་ ༢༥ སྐར་ཆ་ ༡༦ ཀྱི་གྲུབ་འབྲས་བླངས་ཏེ་ཟངས་ཀྱི་རྟགས་མ་བླངས་ཡོད་པ་རེད།  

བོད་རིགས་བུ་མོ་ཆོས་དབྱངས་སྐྱིད་ལགས་ནི། བོད་པའི་ལོ་རྒྱུས་ཁྲོད་འཛམ་གླིང་ཨོ་རྩེད་ཁྲོད་ཞུགས་མཁན་ཐོག་མ་དང་། ཨོ་རྩེད་འགྲན་བསྡུར་ཁྲོད་རྟགས་མ་ལེན་མཁན་བོད་རིགས་ལུས་རྩེད་པ་ཐོག་མ་དེ་ཆགས་ཡོད།

གསར་འགོད་པ། ཚེ་རིང་རྒྱལ།